Apocalipsis 12 - Dios Iwene

Juan isujunö edina wene

¹ Ikenama ju'wi jwiinö juluwi̧ i̧sebi̧ma mölejȩnö öwawachobe chedijatö. Jobetjöma isujunö chedijatö. Jobujuma, kamijido̧ 'dutjawi̧danö möle ja̧wo̧ ö̧loko. Ja̧danö, jobujuma yö̧te ja̧wo̧nö ja̧ta̧lö bu̧ju. Ja̧danö, butjawaka, inesö la'aka luwedö tjubutjawi̧danö butjawuju. Jakanöma a̧li̧nösamutjö du̧ju̧tajanö si̧li̧'i̧dö tjö̧lajaka.

² Jobujuma metu'wo ju̧ju. Ida̧ökö nioko. Jwöjobe cha̧ja̧kwijatö, ¡Akö, akö! jwöji̧ma.

Juan toba'dadanöso̧nö edina wene

³ Ikenama ju'wi i̧sebi̧ma mölejȩbetjö öwawachobe chedijatö. Jobetjö toba'dadanöso̧nö chedijatö, jwiinö nöbo̧nö, duwo̧nö. Jo̧bama uubiya jö̧kwe, jelemutjö doyulatajanö. Ja̧danö, ö'yekiyabi juna̧lo̧, domulataja jawa ökiya. Ja̧danö, inesö la'aka luwedö tjubutjawi̧danö, butjawa ökiya butjawo̧, uubiya bakwayukwena bakwakakwena.

⁴ Jo̧ba öwali'boma juluwo̧. Öwali'bonö labinö wökwebö mölejȩbe lö̧jadö si̧li̧'i̧dönöma, ö'wedönöda böjȩkwö jaobe chedijatö. Ja̧danö, jo̧bama metu'wo nioko jö̧bemi badeibö te'ada̧lö jo̧nö chedijatö, jemibökwenö ukwotö jö̧ba̧lö.

⁵ Ja̧danö, metu'wo ju̧juma jemajökwe iso̧nö chedijatö. Jo̧ba jitji̧ma inesö la'aka luwo̧ baibakwo̧. Ja̧danö, okobe deinö böjȩnö ju̧kwadönö iteda weakwo̧, öpöjojodönö söbebö lobö. Toba'dadanöso̧ma, jemibajökwenö ukwotö jö̧ba̧lö ite'ada̧lijayonö omönanö Dios ö̧bobekwö kaekwajobe chedijatö, Dios tjemunö pjaatobetjö̧.

⁶ Ikenama tjemu ojo'do jojodö deobekwö, Dios ajayi döjibajakwa̧ otidinobekwö döbibajajunö chedijatö. Jobujuma jobe jö̧jonö otiwanö tjite'ada̧loko, lekwe möle, mil doscientos sesenta möle jenanö.

Juan, mölejȩbetjö ölakwabikwawö kwakwatjakwawobe edina wene

⁷ Ikenama mölejȩbetjö jwiinö ölakwabikwawö kwakwatjakwawobe chedijatö. Ja̧danö, bakwo̧ ángel, Miguel mikwo̧ma, ömöayedö ángelesdöma, toba'dadanöso̧kwö, jo̧ba ömöayedökwö ölakwabikwawö kwakwatjakwawobe chedijatö.

⁸ Ja̧danö, ángel, Miguel mikwo̧ma, iteda ömöayedö ángelesdökwö toba'dadanöso̧nö, jo̧ba ömöayedönöbi tjujuluwobe chedijatö. Jo̧kwaobetjö̧ toba'dadanöso̧ma, ömöayedöbi, mölejȩbe tjuju̧kwoböma weököwö̧ babibinadö, böjȩnöda tjö̧jobö.

⁹ Ikenama nöbo̧ toba'dadanöso̧nöma mölejȩbetjö böjȩkwö labinö jabö lotjobe chedijatö. Jo̧bama damötjö, a̧ko'da ji̧na, Awetja mikwo̧, böjȩnö ju̧kwadönö okobe deinö omöna yöba̧lo̧, jö̧ba̧lö, ötjabökwe. Ja̧danö, iteda ömöayedö, sulabedö ángelesdönöbi labinö jabö lotjinawö̧, mölejȩbetjö böjȩkwö.

¹⁰ Ikenama iwene labinö ökwöi̧ cha̧ja̧kwijatö mölejȩbetjö, baikwö: —Tjo̧wi̧ta, Awetjanö mölejȩbetjö böjȩkwö jabö lotjajabe. Jo̧bama mölebi, yö̧tebi Do̧'wo̧ Döwana̧lökwe Dios öba a'o ja̧nö jwöbeba̧lo̧ Diosnö, iteda ömöledö babibinadö sulabenö ja̧tji̧ma. Ja̧danö, bajaliyanö, Do̧'wo̧ Döwana̧lökwe Diosma, iteda ömöledö babibinadönö tjö̧jibinö pjaati̧tjö okobe jwiinö badekwachajabe. Bajaliyanö, Dios ömöledö babibinadönö, Awetja sulabenö ja̧biainatjö tjö̧jibi̧ma badekwachajabe. Isabenö, Do̧'wo̧ Döwana̧lökwe Diosma iteda ujulu i̧sebajabe. Ja̧danö, Awetjanö jabö lotjajabetjö̧, tjo̧wi̧ta, Dios La'aka Luwo̧ ö̧ji̧ möle badekwachajabe. Ja̧danö, Do̧'wo̧ Döwana̧lökwe Dios, iteda jojodö tjö̧jibinö pjabatö weinökwenö, kabebö ujuni̧ möle badekwachajabe böjȩ la'aka luwo̧ baibanö.

¹¹ Dios ömöledö babibinadö wobinadöma Awetja weelö ji̧binadö, Obeja Itji̧danö Jo̧ ökwösobutjö tjidichawobetjö̧. Ja̧danö, Dios iwene yötjawinobetjö̧ Awetjanö juluwinadö. Jobadöma tjo̧'wo̧ 'dibachibö ja̧nö yöbawinadö, jobadönö kwabö lotjenabi.

¹² Ja̧danö, Awetjanö tjujuluwinobetjö̧ ökwödö mölejȩnö ju̧kwadöma, otiwanö, kwo̧'wo̧duwi ösöwanö ju̧kwaduwi, jobema deobe Awetjama. Jo̧kwaijayonö jejenömaökö böjȩnö ju̧kwadöma. Yelösöda kwo̧'wo̧duwi ösöwanöma kwö̧jaduwokobe. Böjȩkwö jatjajökwema, yelösöda ölakwabikwawobe ökwödönöma. Jo̧bama öwaisa, Tjo̧wi̧, chö̧ji̧ma 'dö̧ibaja, lekwökö, jö̧ba̧lö. Jo̧kwaobetjö̧ ökwödönö labinö, inia tjököbaduwinö ja̧obö omukwato̧— jejenö mölejȩbetjö iwene yöawi̧ cha̧ja̧kwijatö.

Juan isuju döjibajobe edina wene

¹³ Ikenama chedemi, toba'dadanöso̧, ¡Mölejȩbetjö böjȩkwö jatjajökwesa! jö̧ba̧lö, waisachibajo̧nö chedijatö. Jejenö waisachibö jitji̧nö emajajunö kwabö lootö jö̧ba̧lö i̧'yobe chedijatö, jobuju jö̧jobekwö.

¹⁴ Jo̧kwaijayonö jobujuma, möko nöbo̧ o̧wa̧ja̧pi̧ya iyajoko köbö 'döbibajujunö chedijatö, toba'dadanöso̧ ö̧jelöma, jojodö deobekwö. Jobujuma jobetjöma Dios otiwanö ite'ada̧loko ju̧ju, o̧bi̧ya wa̧pöbakwatjö jelebatjö ja'öba.

¹⁵ Ja̧danö, toba'dadanöso̧ma isujunöma o̧bebö loobö omukwatö, aatjö ojwedanö doibobö ja̧obe chedijatö, isujunöma ojwe emibö o̧bebö loobö.

¹⁶ Jo̧kwaijayonö böjȩma isujunöma pjabatö omönanö, nijima laju baibanö baledobe chedijatö, jojo aa alekwi̧danö niji aa alekwinö. Jejenö ojwe, toba'dadanöso̧ aatjö doibajödöma, laju okwada doibobe chedijatö

¹⁷ Jejenö baledobetjö̧ toba'dadanöso̧ma isujunö jwiinö ölabobe chedijatö. Jo̧kwaobetjö̧ jobuju ji̧tji̧munö, ajayinö jeminawö̧nö inia tjötjinö ja̧otö jö̧ba̧lö i̧'yobe chedijatö. Jobadöma, ajayinö jeminawö̧ ji̧tji̧muma, Dios weina a̧ja̧kwadö, Jesús jawa yöbawadö. Ja̧danö, toba'dadanöso̧ma so̧bi̧ya̧pu̧nö jamatö jo̧nö chedijatö, ojwe ö'öbö.