Apocalipsis 11 - Dios Iwene

Dios Juannö weina wene: —Eju ba̧ja̧dö kwedo 'ya̧wi— jö̧ba̧lö

¹ Jemi ikenama, isö̧'a̧, ödöö̧'a̧, ba̧ja̧dakwawö̧'a̧ do̧ba̧lö chö̧jijatö, ötjönö iyajö̧'a̧ma. Ikenama, Diosma ötjönö weijatö: —Ötjö cheju ba̧ja̧dö kwedo 'ya̧wi. Ja̧danö, ötjönö juwö iyawapjobi ba̧ja̧dö kwedo 'ya̧wi. Jobema, ötjönö ösödö ko̧ko̧kwa̧ladönöbi ba̧ja̧dö kwedo 'ya̧wi, dokwa ba̧jekwadö ötjönö ösödö tjoko̧ko̧kwa̧lojobö.

² Jejenö ba̧ja̧dö kwedobö wetijayonö cheju a̧petuma ba̧ja̧döma kwedoko. Jobema judío jojodöböködö sulabenö ja̧tjobö jo̧be. Jobadöma, ötjö 'da̧batö chujuninemi comunidadnö tebachö, tjujuluwakwedö. Ja̧danö, ja̧wo̧dö cuarenta y dosnö, jobetjöma, la'aka luwedödanö sulabenö webö tjö̧jakwedö— weijatö Diosma ötjönöma.

Dios Juannö yöawina wene: —Du̧ju̧taja wetawö̧ ötjö yötawi̧ yötjawakobe, sulabedö sulabenö webö tjö̧jonö— jö̧ba̧lö.

³ Ikenama Diosma ötjönö yöawijatö: —Jobadö sulabenö ja̧badöma sulabenö webö tjö̧jonö, ju'wedö du̧ju̧tajama, ötjö yötawi̧ yötjawobö wetawö̧ma yötjawakobe, jejenö yötjawobö chujulu iyö wetakobetjö̧. Ja̧danö, jobadöma lekwe, mil doscientos sesenta möle baledibanö, jobetjö yötjawakwedö, ju'wedö, jobe ju̧kwadöma yelösöda sulabenö ja̧tjonö. Jobadö du̧ju̧taja yötawi̧ yöbawadöma, kamijido̧ pjelewado̧, tjömöledö wotjaiawö̧ 'dutjawi̧danö 'dubawö tjö̧jakwedö—yöawijatö Diosma ötjönöma.

⁴ Jobadöma, Dios yöawi̧ yöbawadöma, Duluwo̧ Dios öba a'o tjö̧jobe, böjȩ okobe jwiinö La'aka Luwo̧ Diosma. Ja̧danö, jobadöma, Olivo towibiya dowilataja owibiya, jö̧ba̧lö, ötjabiwö̧. Ja̧danö, La̧pa̧la̧yu̧ junawa o'di̧ju do'do̧lataja, jö̧ba̧lö, ötjabiwö̧.

⁵ Ja̧danö, jobadönö öpöjödo̧ma, Kwabö lotodönö, jö̧ba̧lö, ja̧bo̧ma, isabenö jo̧banö juwö lotjökwe. Jobadö Dios yöawi̧ yöbawadö tjaatjö, ökwöla labeibö jwiinö juwö lotjena jo̧banö, Kwabö lotodönö, jö̧ba̧lo̧nöma.

⁶ Jobadöma Dios ujulu i̧sebadö. Ja̧danö, lekwe möle, mil doscientos sesenta möle yötjawonö ojwiyo o̧bökönö webadö. Ja̧danö, ojwebiyabi ku̧kwi̧nö baibanö webadö. Ja̧danö, böjȩ okobe jwiinö sulabenö baibi̧ jawa baibanö webadö, ba̧kwȩlö̧jatebö tjösödena.

⁷ Ja̧danö, jobadö yötjawi̧ 'dö̧ibajena, böjȩ teebe laju möajunö a̧jo̧ma, jajutjö labeibö jobadö tjö̧jobekwö i̧'yobe, jobadönö ujuluwobö. Jobe 'ya̧nö kwabawö loobe jobadönöma.

⁸ Ja̧danö, kwabawö loajawö̧ma, jobe inesö la'akasemi comunidad ö'weje la̧manö tjö̧bajobe, i̧lȩdo̧ okwa lödawöködöda. Jemi comunidadma Sodoma, jö̧ba̧lö, ötjabemi, suli̧ baibinemi Sodomanö wanekwachobetjö̧. Ja̧danö, Egipto, jö̧ba̧lö, ötjabemi, suli̧ baibinemi Egiptonö wanekwachobetjö̧. Jemima jobadö kwabö loajawö̧ tjuluwo̧nö ösötenö bȩtjinemi.

⁹ Ja̧danö, wa̧pötakwa mölenö ja'ö baledibanö, jojodöma böjȩ bakwameachibanö ju̧kwadötjö, wainökwena tjiwene yöba̧ladöbi, wainökwena ji̧nadötjö tupadanö jojodöbi, jelobebi jelobe ju̧kwadöbi, lödawöködöda ö'weje mananö tjö̧bajobe baledö tjeda̧lobe. Jobadönö edö, Otiwa, wainö woböda tjö̧bajadö, jö̧ba̧lö, jobadö tjö̧bajonö tjöbaledobe. Ja̧danö, jojodöma, jobadönö i̧lȩdo̧ okwa lödö tje'ewoböma yelösöda wetjokobe.

¹⁰ Ja̧danö, jobadö wobajadönö edö tjösödobe, Otiwa, bajaliyanö wobö tjö̧baja, jö̧ba̧lö. Ja̧danö, ösödö ja̧nö pjiesta tjujunobe. Iyawabi iyö tjujunobe. Nöinö tjösödobe jwiinö inia tjötjinö ja̧badö wotjiniawö̧.

¹¹ Jo̧kwaijayonö wa̧pötakwa mölenö ja'ö baibajena wobinadöma yemidanö 'yabibajadö tjö̧jobe. Jobadönö kwabö lotjinajayonö, wa̧pötakwa möle ja'ö baibajena Dios imiyu'wo teachibawö̧ yemidanö 'yabibajadö tjö̧jobe. Ja̧danö, 'yabibajö tjöjamatiawö̧, jobadönö edadöma, ¡Ayö! jö̧ba̧lö, jwiinö yetjaibobe, yelösöda.

¹² Jemi ikenama, mölejȩbetjö iwene ökwi̧ma, Baikwö kabekwachajaduwi, jö̧ba̧lö, jwöobe. Ja̧danö, jobadönö öpöjödadö tjeda̧lonö mölejȩbekwö katjekwajobe ojwiyo'wonö.

¹³ Katjekwachaja̧ okobema böjȩ niji jwiinö tjö̧bebö li̧leibobe. Yelösöda, tjö̧bebö li̧leibobetjö̧ jobe comunidad o̧di̧juma pjolachakwawobe. Ja̧danö, jobe ju̧kwadöma, siete mil jojodö wotjobe, jejenö niji tjö̧bebö li̧leibobetjö̧. Ja̧danö, jejenö baledobetjö̧ ju'wedöma jwiinö yetjaibobe. Ja̧danö, Diosnöda omukwatö tjösödobe, ¡Ayö! Diosma, mölejȩbe jo̧ma, jwiinö juluwo̧, jö̧ba̧lö.

Trompeta pjubo̧, jelemutjö domulatajasanu pjubo̧ baibanö pjuina wene

¹⁴ Ja̧ inia tjötjinö baledobe chedinama, tjo̧wi̧ dötölatajanö inia tjötjinö baledinama. Ina jemi ikena trompeta pjubo̧ pjuakobe, ju'wi inia tjötjinö baledakwa̧ abönö, wa̧pötakwa baibanö inia tjötjinö baledakwa̧ma.

¹⁵ Jemi ikena trompeta pjubo̧, jelemutjö domulatajasanu pjubo̧ baibanö pjubo̧ pjuenama mölejȩbetjö labinö tjiwene yötja̧li̧ cha̧ja̧kwijatö, biya̧ tjiwenenö ökwöi̧: —Tjo̧wi̧ta. Böjȩma Duluwo̧ Dios La'aka Luwo̧ ö̧jena badekwachajabe. Ja̧danö, Dios weinökwe, jojodö tjö̧jibinö pjaatobö weinökwe La'aka Luwo̧ ö̧jenanö badekwachajabe. Jobadöma ba̧kwȩlö̧jatebö webö tjö̧jakwedö— jö̧ba̧lö, ökwöi̧ cha̧ja̧kwijatö.

¹⁶ Ikenama damö la'aka luwedö, veintecuatronö, Dios ö̧bemi badeibö ba̧jadöma nijakwö meibö tjöba bȩbachibö Diosnö tjösödobe chedijatö.

¹⁷ Ja̧danö, Diosnö ösödö yötja̧li̧ cha̧ja̧kwijatö, baikwö: —Duluwo̧ Dios ökwöma juluwo̧ja. Ökwöma babe jo̧bi, la'aka ji̧nabi jo̧ja. Ökwönöda dösöda, Otiwanö pjabato̧ja, jö̧ba̧lö. Ida̧ökö jwiinö kwujulu i̧sebö, böjȩnö webö kwö̧joböma badekwachajabe, kwujulu i̧sebö.

¹⁸ Ökwönö öpöjödadöma yelösöda, tjo̧'wo̧ sulinö edö yötja̧lobe, labinö lȩkebi̧ möle ichibiawö̧. Yökawi̧ möle ida̧ökö baibajabe, wobinadönö edö, otiwanö ja̧tjinojobö, sulabenö ja̧tjinojobö edö yökawi̧ mölema. Ja̧danö, otiwi̧ jawa kwiyi̧ möle baibajabe kwömöayedönöbi, yökawi̧ yöbawadönöbi, okobe deinö kwömöledö babibinadönöma. Ja̧danö, okobe deinö ökwönö yebabinö otiwanö omukwatadönö, la'aka luwedönöbi, jo̧kwadabedönöbi otiwi̧ jawa kwiyi̧ möle baibajabe. Ja̧danö, badekwachajabe lȩkebi̧ mölema, jojodö sulabenö ja̧nö, ju'wedönö inia tjötjinö ja̧bö ju̧kwadönö lȩbebö— jejenö Diosnö ösödö yötja̧li̧ma cha̧ja̧kwijatö.

Juan, Dios eju okwa apjude po̧ibobe Dios domulataja weina jawa a̧japjo edina wene

¹⁹ Ikenama mölejȩbetjö Dios eju apjude po̧ibobe chedijatö. Jejenö po̧ibobe chedemi okwa isapjo chedijatö, Dios u̧kwapjo, domulataja weina jawa a̧japjoma. Ikenama, böba ölabi̧ a̧ja̧kwö, ja̧danö, nekakanö dejö baledobe chedijatö. Tjiwenebi, böba labinö ökwödi̧bi ökwöi̧ma cha̧ja̧kwijatö. Ja̧danö, niji tjö̧bebö li̧leibobe chedijatö. Ikenama ojwiyo o̧bi̧danö, inawiyadanö ichejekwi̧ labinö mölejȩbetjö nijakwö tjoduwobe chedijatö.