Apocalipsis 1 - Dios Iwene

Juan iwȩyudina ajayinö jawa

¹ Ötjöma Juan mikwo̧sa. Jesucristo ömöayo̧sa. Böja kwialusöja chiwȩyudi̧ma Jesucristo i̧sebi̧ jawa, lekwokobe baledakwa̧ma. Ja̧danö, Diosma ajayima ja̧ lekwokobe baledakwa̧ma Jesucristonö i̧sebijetö. Diosma Jesucristonö webijetö iteda ömöayedönö i̧sebobö, ja̧ baledakwa̧ i̧sebi̧ma. Ja̧danö, Jesucristoma webijetö ángelnöma ötjönö i̧sebobö.

² Ja̧danö, ötjöma biya̧, Dios iwene, Jesucristo i̧sebi̧ jawa wenema wȩyudö wetaduwakwö okobe jwiinö i̧sebi̧ chedi̧ma.

³ Chömöledö, biya̧ chiwȩyudi̧ma baledakwa̧ jawa. Ja̧danö, ja̧ baledakwa̧ma lekwokobe. Ja̧danö, biya̧ chiwȩyudi̧ eda̧lö ömöledönö yöbawadöma tjo̧'wo̧ ösöwanö tjö̧jakwedö. Ja̧danö, biya̧ chiwȩyudi̧ a̧ja̧kwadöbi tjo̧'wo̧ ösöwanö tjö̧jakwedö. Ja̧danö, biya̧ chiwȩyudi̧ weawa jawa a̧ja̧kwö ja̧badöbi tjo̧'wo̧ ösöwanö tjö̧jakobe. Jau, tjo̧'wo̧ ösöwanö tjö̧jakobe, biya̧ chiwȩyudi̧ baledakwa̧ma, Tjo̧wi̧ yöneawachobe, jö̧ba̧lö, waisö tjö̧jobetjö̧.

Juan Jesúsnö ösödadönö, jelemutjö dötölatajanö tjuju̧kwemi ju̧kwadönö ajayinö yöawina

⁴ Ötjö, Juan, böja kwialusöjama wȩyudö weta Asianö ju̧kwadönö, Jesúsnö ösödö ko̧ko̧kwa̧lö ba̧jadönöma, jelemutjö dötölatajanö ko̧ko̧kwa̧lö ba̧nö tjuju̧kwitenia. Chömöledö, Diosma ökwödönö lȩlö̧jino edobö chösöda. Ja̧danö, Diosma ökwödönö pjaatobö chösöda, kwo̧'wo̧ luwo̧duwi ösöwachibanö kwö̧jaduwobö. Jo̧bama babe jo̧bi, la'akatjöda ji̧nabi, 'dö̧ibajenanö baibanö ö̧jakwo̧bi. Ja̧danö chömöledö, Dios O̧'wo̧ Luwo̧ma ökwödönö lȩlö̧jino edobö chösöda. Jo̧bama, Dios ö̧bemi abönö bo̧. Ja̧danö, jo̧bama jelemutjö dötölataja ujulu jawa juna̧lo̧, Dios O̧'wo̧ Luwo̧ma.

⁵ Ja̧danö, Jesucristoma ökwödönö lȩlö̧jino edobö chösöda, kwo̧'wo̧ luwo̧duwi ösöwachibanö kwö̧jaduwobö. Jesucristoma Dios omukwati̧ jweinö yöbawo̧. Ja̧danö, jo̧bama wobinadötjö abönö tjebachajina. Ja̧danö, okobe deinö böjȩ la'aka luwedönö webö jo̧ Jesucristoma, inesö la'aka luwo̧obetjö̧. Chömöledö, Jesúsma ökwödönö jwiinö ile nibebo̧. Jo̧bama iteda ökwösobu ebawinö imidawinobetjö̧, sulabe wei̧ a̧ja̧kwökönö, otiwanö dö̧jobö jo̧be.

⁶ Jesucristoma ökwödönö 'da̧batö ujuninobe iteda ömöayedö badibanö, itenöda, Duluwo̧, jö̧ba̧lö, öbabidö badibanö. Damötjö, la'aka luwedö, Diostjö jojodötjö ö'weje pjabatadö pjatjatinadanö Jesucristoma 'da̧batö ujuninobe ökwödönöma, jojodönö pjadatobö. Ja̧danö, ökwödöma Diosnö abebadösa, Jesucristo abe'donöma, jojodönö pjaatobö. Chömöledö, Jesucristo otiwanö pjaatinobe ökwödönöma. Otiwanö pjaatinobetjö̧ jo̧banö dösödaduwo, Jwiinö juluwo̧, jö̧ba̧lö, Ba̧kwȩlö̧jatebö webö ö̧jobö jo̧be, jö̧ba̧lö. Chömöledö yötawi̧ma isabenö yötawa.

⁷ A̧ja̧kwaduwitjö, Jesucristo yemidanö ichakwa̧ wenema: Jesucristoma yemidanö ichakobe ojwiyo'wonö, okobe deinö tjedinö. Okobe deinö jo̧banö inia tjöinö tibatinadöma, jo̧ba ichobema tjedakwedö. Ja̧danö, böjȩ bakwameachibanö, okobe deinö bakwasokwena ju̧kwadö, Jesúsnö öpöjödadöma, jo̧ba ichobe edö yebabinö tjubudekwakwedö, jo̧ba lȩebakwa̧ omukwatö, jö̧ba̧lö laebobe Dios iwenetjö. Jau, chömöledö, biya̧ Dios iwenetjö yötawi̧ma isabenö baledakobe, Jesús yemidanö ichenama.

⁸ Chömöledö, Duluwo̧ Diosma, jwiinö juluwo̧ma baikwö yöawobe: Ötjöma la'akatjöda ji̧nasa. Ja̧danö, 'dö̧ibajenanö baibanöbi chö̧jakwo̧sa, jö̧ba̧lö. Jejenö yöawobe Diosma, babe jo̧bi, la'akatjöda ji̧nabi, 'dö̧ibajenanö baibanöbi ö̧jakwo̧.

Juan Jesúsnö edina yöbawö iwȩyudina wene

⁹ Chömöledö, ötjöma ökwödö kwömöledöduwiso̧sa. Ökwödöma bakweminö Jesúskwö dötewinö babibinadösa. Ja̧danö, Jesúsnö dösödobetjö̧ ökwödönöbi, ja̧danö, ötjönöbi inia tjödinö baledobe. Ja̧danö, ju'winö, bakweminö Jesúskwö dö̧jakwedösa, iteda La'aka Luwo̧ ö̧jakwa̧ möle baledena. Ja̧danö, ökwödöma ja̧ möle baledakwa̧ bakweminö te'ada̧ladösa, Jesús La'aka Luwo̧ ö̧jakwa̧ möle baledakwa̧ma. Ja̧danö, labi̧ jawa baledenabi, do̧'wo̧ 'dibachibö ja̧nö ju̧kwadösa, bakweminö. Ja̧danö, chömöledö, ökwödönö yötawobö jö̧ta̧la ötjönö baledina, kwöwaisaduwobö. Ötjöma, Dios iwenebi, Jesús ö̧jina wenebi yötawobetjö̧ ötjönö do̧batö, e'ewö lotjijatö bi'o o'wejesa'onö, Patmos mikwa'onö le'dedö. Jau, le'dedö lotjinökwesa ötjöma, bi'onöda chö̧jobö.

¹⁰ Ja̧danö, belö bi'onö ja̧nö, domingo möle baledibajena, Dios O̧'wo̧ Luwo̧ma ötjö cho̧'wo̧ luwo̧ okwanö i̧sebö öba̧ja̧da̧lijatö. Ja̧danö, cha̧ja̧kwijatö labinö ökwöi̧, trompeta pjutji̧danö ökwöobe.

¹¹ Ja̧ ökwöi̧ma jojo yöa̧li̧da cha̧ja̧kwijatö. Ja̧danö, baikwö jö̧a̧lijatö ötjönöma: —Juan, biya̧ kwedi̧ma wȩyudi weköbo jelemutjö dötölatajanö tjuju̧kwitenia ju̧kwadönö, ötjönö ösödö ko̧ko̧kwa̧ladönöma. Biya̧ comunidadesnö ju̧kwadönö, Éfesonö, Esmirnanö, Pérgamonö, Tiatiranö, Sardisnö, Filadelfianö, Laodiceanö ju̧kwadönö wȩyudi weköbo, ötjönö ösödö ko̧ko̧kwa̧ladönöma— jejenö weijatö ötjönöma, trompeta pjutji̧danö ökwöinö yöba̧lo̧ma.

¹² Ja̧danö, ötjönö yöba̧lajo̧nö chedotö jö̧ba̧lö jalachibö chedemi la̧pa̧la̧yu̧bi̧ya junawa o'di̧ju chedijatö, jelemutjö do'do̧latajanö ju̧kwi̧, orotjö otikwa o'di̧ju.

¹³ Ja̧danö, la̧pa̧la̧yu̧bi̧ya junawa o'di̧ju 'da̧detjö bakwo̧nö chedijatö, jojodajajo̧nö. Jo̧bama kamijido̧ ödöado̧ 'dubawo̧. Ja̧do̧ wamema, omukonö kamijido̧ duwapjaado̧, orodanö ichekwado̧ di̧batakwawo̧.

¹⁴ Jo̧bama öwö'ye jwiinö deawu̧ bo̧, bu̧jwa̧wu̧ dewi̧danö. Öbajalebiyabi la̧pa̧la̧yu̧ ubö salöi̧danö salöbo̧.

¹⁵ Ömasapiyabi jwiinö salöbo̧. 'Dii̧ jawa, suli̧ jwiinö baibobö ökwölanö juwawa jwiinö dei̧yanö ubi̧danö ubo̧nö. Ja̧danö, jo̧ba iwenema labinö ökwöi̧ cha̧ja̧kwijatö, taya doibobe labinö ökwöi̧danö.

¹⁶ Ja̧danö, ömamu öwaisobekwöchobesamunö si̧li̧'i̧dönö jelemutjö du̧ju̧tajanö do̧ba̧lö jo̧nö. Ja̧danö, aatjöbi isa̧pi̧ ödöapi̧, bakwachobekwödanö sȩapi̧ laebijatö. Ja̧danö, öbabi, ja̧wo̧ dewinö jwiinö dejati̧danö dejato̧.

¹⁷ Ötjöma jo̧banö edinö, ¡Ayö! jö̧ba̧lö, 'dö̧bachibö metji̧danö metijatö nijibe, de'bo'bonö bamatö, jo̧ba ömasapiya la'aka. Jejenö chöbamatiökwe ömamu öwaisobekwöchobesamunö ötjönö tjo̧'omanö mabö yöawijatö: —Yekabi. Ötjöma la'akatjöda ji̧nasa. Ja̧danö, 'dö̧ibajenanö kabatö chö̧jakwo̧sa, chö̧ji̧ma 'dö̧ibajökönö.

¹⁸ Ja̧danö, ötjödasa ba̧kwȩlö̧jatebö jo̧ma. Wotinajayonö edi, 'yaba̧lo̧sa. Ötjöma wobajaletjö tjetachajinobetjö̧ ba̧kwȩlö̧jatebö 'yaba̧lo̧sa. Yemidanöma wobö̧kö̧sa. Wanedö yötawa: Ötjöma wobajale uluwo̧danö webo̧sa, wobajaletjö o̧penönö juluwo̧chobetjö̧. Ja̧danö, wobajale uluwo̧danö chö̧jobetjö̧ ötjödasa wobinadö tjö̧bajemi yawepi̧ juna̧lo̧ma. Ja̧danö, wobinadö jobetjö latjebobö po̧beböbi po̧bebo̧sa. Ja̧danö, latjebokobö yö̧beböbi yö̧bebo̧sa— jejenö wanedö yöawijatö ötjönöma, Ötjödasa wobajale webo̧ma, jö̧ba̧lö.

¹⁹ Ina yöawijatö: —Juan, wetakwö, kwedi̧ma kwiwȩyudo, babe baledi̧ kwedi̧bi, ju'winö baledakwa̧ chi̧sebobe kwedi̧bi.

²⁰ Ja̧danö, biya̧ babeda wajwiköbi̧ kwedi̧ma labebö lotakwö, kwöwaisachibanö: Bidö si̧li̧'i̧dönö jelemutjö du̧ju̧tajanö chömamunö do̧ta̧lawö̧ma, jelemutjö du̧ju̧tajanö Dios ömöledö babibinadötjö la'aka luwedönö wanekwachobe, jelemutjö dötölatajanö tjuju̧kwitenia ju̧kwadönö. Ja̧danö, biya̧ jelemutjö do'do̧latajanö la̧pa̧la̧yu̧bi̧ya junawa o'di̧juma wanekwachobe ötjönö ösödadönö, jelemutjö dötölatajanö ko̧ko̧kwa̧lö ba̧nö tjuju̧kwitenia ju̧kwadönö— chedökwema jejenö yöawijatö ötjönöma.