3 Juan 1 - Dios Iwene

Juan Gayonö yöawinatjö ajayinö yöawina wene

¹ Gayo dokwa. Ötjöma Jesúsnö ösödadö tjuluwo̧sa. Ja̧danö, te'ada̧lakwawa jojosa. Ja̧danö, böja kwialusöjama ökwönö chiwȩyuda Gayo, Jesústjö chöjawo̧ chösödökwenöma. Gayo, ökwönö ile nibebo̧sa bakwainö Dios yöawi̧, isabenö ji̧ iwenema dösödobetjö̧.

² Ja̧danö Gayo, Diosnö atebobe ökwönö pjaatobö okobe jwiinö kwö̧ji̧ma. Ja̧danö, ö'wöchökönö kwö̧jobö atebobe Diosnö, kwiteba'obi juluwachibanö kwö̧jobö, kwo̧'wo̧ luwo̧ juluwinö kwö̧ji̧danö.

³ Ja̧danö, kwo̧'wo̧ luwo̧ juluwachibanö kwö̧jobema chöwaisa, dö̧ja̧wo̧dö yötjawi̧, ökwö kwö̧ji̧ yötjawi̧ma cha̧ja̧kwinobetjö̧. Jobadö, kwö̧jobetjö bai ȩwa̧jinadöma ökwö otiwanö pjabatö kwö̧ji̧, Dios isabenö ji̧ yöawi̧ a̧ja̧kwö kwö̧ji̧ma yötjawijatö. Gayo, isabenö yöta̧la. Ja̧ jobadö ökwönö yötjawi̧ cha̧ja̧kwena cho̧'wo̧ ösöwanö chö̧jijatö.

⁴ Isabenö chi̧tji̧mu, Dios isabenö ji̧ iwene a̧ja̧kwö tji̧'yobe, jö̧ba̧lö, yötjawi̧ cha̧ja̧kwena cho̧'wo̧ ösöwanö chö̧jobe. Jejenö cho̧'wo̧ ösöwanö chö̧jemitjö o̧penönö cho̧'wo̧ ösöwanö chö̧joböma jwiobe.

Juan yöawina wene Gayonö: —Otiwanö pjabato̧ja— jö̧ba̧lö

⁵ Chöjawo̧ chösödökwe Gayo, ökwöma Dios isabenö ji̧ yöawi̧ a̧ja̧kwö jo̧ja, dö̧ja̧wo̧dönö pjabatö, ökwö kwö̧jobekwö 'ya̧dönöma. Ja̧danö, jobadönö wajwiköbijayonö otiwanö pjakatinobe. Isabenö Gayo, jejenö pjakatena kwi̧sekwobe, Ötjöma Dios isabenö ji̧ yöawi̧ a̧ja̧kwö jo̧sa, jö̧ba̧lö.

⁶ Ja̧danö, jobadöma baikwö ȩwa̧jadö Jesúsnö ösödadö ko̧ko̧kwö ba̧jadönöma yötjawijatö, Gayoma okwödönö ösödö dösölö̧jinö ja̧nö pjaatijatö, jö̧ba̧lö. Gayo, yemidanö kwö̧jobekwö tji̧'yenama Dios iwene yöbawö tji̧'yakwa̧ pjakatodönö, tjujuna̧lobö. Jejenö pjakatena Dios iteda iwene yöbawö 'ya̧dönö pjakatobö ösödi̧da pjakatobe Gayo.

⁷ Isabenö yötawa. Jobadöma Jesús yöawina wene yöbawö tji̧'yobetjö̧ jobadönö pjakatobö jo̧be. Ja̧danö, jobadöma ju'wedötjö, Dios iwene öpöjödadötjöma ja'yubebi tjeminokobe, tjö̧ji̧ jawa mikwa pjatjati̧ma.

⁸ Jo̧kwaobetjö yötawakwö, ökwödö Jesúsnö ösödadöma jobadö yöbawö 'ya̧dönö pjadatobö jo̧be, jobadökwö bakobe Dios isabenö ji̧ iwene jojodö tja̧ja̧kwobö pjadatakobetjö̧.

Juan, Diótrefesnö yöawina wene

⁹ Belö, kwialusöjanö wȩyudö wetijatö jobe kwitebobe, jobe ko̧ko̧kwa̧lö ba̧nö Jesúsnö ösödadönö yöbawö, Dios iwene yöbawö 'ya̧dönö pjakataduwobö jo̧be, jö̧ba̧lö. Jo̧kwaijayonö ökwödötjö bakwo̧, Diótrefes mikwo̧ma ötjö webö yötawi̧ öpöjödinobe. Yelösöda jo̧bama, Ötjödasa abönö la'aka luwo̧sa, jö̧ba̧lö, yötawi̧ma öpöjödinobe. Yelösöda öpöjödinobe, Juan, ja̧danö jo̧bakwö ja̧dö ökwödö duluwedöböködö, jö̧ba̧lö. Öpöjödinobe, Jobadö yötjawi̧ma da̧ja̧kwoko, jö̧ba̧lö.

¹⁰ Jo̧kwaobetjö̧ jobe chi̧'yenama ökwödö ko̧ko̧kwa̧lö ba̧jadönö yötawocha jo̧ba sulabenö omukwati̧ma. Jo̧bama o̧'wo̧ sulinö edö ju'wedönö omöna yöa̧lobe ötjönöma. Ja̧danö, ja̧ sulabenö omukwati̧damaökö, ju'wi jawabi sulabenö omukwatö ja̧obe jo̧bama, biya̧: Jesústjö dö̧ja̧wo̧dö jobe kwitebobe tji̧'yena jo̧ba Diótrefesma jobadönö yöba̧lökönö ö̧jinobe. Jo̧kwaijayonö jobe ju̧kwadötjö ju'wedöma pjadato jö̧tja̧linobe. Jejenö pjatjatobö jö̧tja̧liökwe Diótrefesma yelösöda ölabinobe jobadönöma. Ja̧danö, o̧'wo̧ sulinö baibobetjö̧ ichinadönö pjatjatobö jö̧ba̧ladönö Diosnö tjösödejutjö a'dewö loinobe, yemidanö tebachaduwökönuwi, jö̧ba̧lö. Isabenö yötawa. Jo̧ba Diótrefesma sulabenö omukwatö ö̧jobe.

¹¹ Gayo, chöjawo̧ chösödökwe, yötawakwö. Suli̧ jawa ja̧badö tjö̧ji̧danö kwö̧joko. Otiwi̧ jawa ja̧badö tjö̧ji̧danöda kwö̧jo. Otiwi̧ jawa ja̧bö ja̧döma tji̧sekwobe, Ökwödöma Dios i̧tji̧mu babibinadösa, jö̧ba̧lö. Jo̧kwaijayonö suli̧ jawa ja̧bö ja̧döma wainö tji̧sekwobe, Ökwödöma Diosnö wajwibadösa, jö̧ba̧lö. Gayo, otiwi̧ ja̧wa ja̧bö kwö̧jo, dö̧ja̧wo̧dönö pjabatö.

¹² Ja̧danö, jelo̧ dömöledöso̧ Demetrionö yötawa. Jojodöma ba̧jekwadö jo̧banö otiwanö yötja̧lobe, Demetrioma otiwi̧ jawa ja̧bö jo̧, Dios isabenö ji̧ yöawi̧ a̧ja̧kwo̧, jö̧ba̧lö. Ötjöbi jejenö yöta̧la jo̧banöma, Otiwi̧ jawa ja̧bö jo̧ Demetrioma, jö̧ba̧lö. Ja̧danö, kwöwaisa ötjö yöta̧li̧ma jweinöda yöta̧lobe.

Juan kabatakwawö yöawina wene

¹³ Gayo, ina, nöinö yöta̧lo jö̧ta̧lijayonö, kwialusöjanö wȩyudö yöta̧lo jö̧ta̧lökö.

¹⁴ Te'ada̧lökönö chichobö chösöda kwö̧jobema, ökwönö ediakwawö yöta̧lobö. Gayo, Diosma kwo̧'wo̧ luwo̧nö wene jwiinö kwö̧jobö pjaatakwo̧ja. Bena ju̧kwadö kwö̧ja̧wo̧döma debawö atjebobe, Dokwa, jö̧ba̧lö. Ja̧danö, ötjöbi jobe ju̧kwadö chö̧ja̧wo̧dönö debawö ateba, Dokwa, jö̧ba̧lö, bakwo̧nökwena. Tjo̧wi̧ta biya̧da yöbawö chiwȩyuda.