2 Timoteo 4 - Dios Iwene

¹ Kwöwaisa Timoteo, Cristo Jesúsda wobinadönöbi, ina yaba̧ladönöbi yöawakwo̧, ja̧bö tjö̧jina otiwojobö sulojobö jö̧ba̧lö, ja̧danö yöbawajo̧ lȩebakwo̧, ¿jö̧tö? Jau Timoteo, 'dö̧ibaji̧ möle, böjȩtjö yöbawö weobö ichenama, jejenö yöawakwo̧ Cristo Jesúsma, ja̧danö ja̧ omukwatö Dios öba a'otjöbi, Cristo Jesús öba a'otjöbi baikwö wetakwö:

² Dios iwene yökawo jö̧ba̧lö. Ja̧danö ja̧ yökawo jö̧ta̧laja̧ma, sule wene jwienadamaökö, wene jwienabi, wene jȩnabi yayonö yökawobö jo̧be. Jau Timoteo, ba̧kwȩlö̧jatebö kwo̧'wo̧ 'dibachibö ja̧nö, otiwanö kwöba̧ja̧dobö jo̧be jojodönö. Baikwö yötawa: Jwekebobö baibenama, jwekebobö jo̧be, ja̧danö lȩkebobö baibenama, lȩkebobö jo̧be, ja̧danö tjujuluwachibanö yökawobö baibenama, tjujuluwachibanö yökawobö jo̧be.

³ Jau Timoteo, isabenö kwo̧'wo̧ 'dibachibö yökawobö ja̧kobe, baikwö yötawa: Ja'yubenö lekwajabetjö jojodöma otiwanö ba̧ja̧dakwawa tja̧ja̧kwobö tjöpöjödachibakobe, tjo̧wi̧ta, da̧ja̧kwökö jö̧ba̧lö. Ja̧danö, jejenö öpöjödö, idöda tjösödi̧da yöbawadönö tjisakwakobe, tjösödi̧ jawada yöbawadönöma.

⁴ Ja̧danö isabenö wene yöawakwawa a̧ja̧kwö kabatibö, böjȩ jojodö tja'dödöminetjö tja̧ja̧kwina jawada ösödö tjö̧jakobe.

⁵ Timoteo, ba̧kwȩlö̧jatebö jweinö omukwatö kwö̧jo, ja̧danö usula kwemawenama, kwo̧'wo̧ 'dibachibö kwöbaledo. Otiwa jawa wene yöbawö kwotido, ja̧danö ju'wi Dios ökwönö wei̧bi otidö kwö̧jo.

⁶ Jau Timoteo, ajayinö otidö chö̧jinama, ökwöda otidö kwö̧jobö badekwachobe babema, ötjöma juluwanö debö chi̧'yakobetjö̧. Jau Timoteo, ida̧ökö ötjönö kwabö lotjakwa̧ jawa jamatö ja̧tjobe, ja̧danö ida̧ökö böjȩtjö latebobö baibajabe.

⁷ Dios wei̧ otidö chö̧ji̧ma baikwö wanedö yötawa: Otiwanö döpöjojonö ölakwabikwawö kwakwaakwawama otiwanö kwakwachakwawajabe. Ja̧danö ju'wibi wanedö yötawa: Ö'öbakwawadö ö'ötjakwawi̧ma otiwanö ö'öchakwawajabe, bajalebe chichibenanö kabatö, ja̧danö Dios yöawi̧ ösödöma kabatibökönö jwaikwöda otiwanö chösödajabe.

⁸ Ja̧danö, jejenö ja̧bö chö̧jiökwe, chuunö chubutjawakwaka, sulabe jwibadö tjubutjawakama, ida̧ökö mölejȩbe te'ada̧lö jo̧be, 'dö̧ibaji̧ möle Duluwo̧ chuunö öwanenanö kabatö. Jau Timoteo, Duluwo̧da sulabe jwibo̧ inesö lȩekwa luwo̧ma, ja̧danö ja̧ mölema, Duluwo̧ma ja̧ka inesö otiwaka ötjönö iyö öwanakobe. Jo̧kwaijayonö sule ötjönödamaökö, okobe deinö Duluwo̧ ichakwa̧ ösödö te'ada̧ladönöbi iyakobe ja̧ mölema.

Bajaleapo Pablo Timoteonö weina wene

⁹ Timoteo, juluwanö chö̧jobekwö kwichobö kwisakwo, jo̧dawa'ye chö̧jobetjö̧.

¹⁰ Jau Timoteo, ajayinö ötjökwö otidina Demas mikwo̧ma, böjȩ jawa ösödobetjö̧ ötjönö le'dedibö i̧'yajabe, ja̧danö böjȩ jawa ösödobetjö̧ Tesalónicabe i̧'yajabe. Ja̧danö, ju'wibi Crescentema Galacia nijibe i̧'yajabe, ja̧danö Titoma Dalmacia nijibe i̧'yajabe,

^11-12 jo̧kwajabetjö̧ sule Lucaskwöda chö̧jibobe babema, ju'wedö detjobe. Ju'wibi Tíquiconö wetijatö, Éfesobe i̧'yobö. Baikwö kwichena, Marcosnö öbibö kwichejebonö, chedemi otiwanö ötjönö pjaatakobetjö̧.

¹³ Ja̧danö, belö Troas comunidadtjö Carpo mikwo̧kwö chökamijido̧ tiyuwena 'duawakwado̧ chödibijatö, ja̧bi kwichejebobö chösöda, ja̧danö kwialubi kwichejebo. Ja̧ kwialutjö inesö kwichejebobö chösödi̧ma, i̧sȩdo̧tjö otikwa öjiya kwichejebobö chösöda.

¹⁴ 'Dii̧ jawa cobretjö otido̧ Alejandro mikwo̧ma nöinö suli̧ öwaedinobe ötjönö, ja̧danö jejenö sulabenö ja̧iökwe Duluwo̧ma isabenö balekwa mikwa jo̧banö lȩebakobe.

¹⁵ Ökwönö suli̧ öwaedapji jö̧ba̧lö, eda̧lakwawö kwö̧jo Timoteo, jo̧ba Alejandroma isabenö nöinö yödawi̧ wene öpöjödö ölabikwawö tjöeba̧lobetjö̧.

¹⁶ Ajayinö lȩekwa luwedö tjöba a'o chö̧jenama, jo̧dawa'ye chö̧jijatö, okobe deinö le'dedibö tji̧'yinobetjö̧. Jejenö le'dedibö tji̧'yijayonö, ötjönö le'dedibö 'yi̧nadönö Dios lȩlö̧jinö edobö chösöda, le'dedibö tji̧'yina omukwatökönö.

¹⁷ Ja̧danö, ju'wedö le'dedibö lotjijayonö, Duluwo̧ma le'dediböma loinokobe ötjönö, Duluwo̧ma ötjökwö ö̧jinobe, ja̧danö chujuluwachibanö pjaatinobe okobe jwiinö Dios yöawi̧ yötawobö. Jejenö pjaatobetjö̧, okobe deinö jobe ju̧kwadö judío jojodöböködöma Dios yöawi̧ tja̧ja̧kwinobe, ja̧danö ju'wibi, Duluwo̧ma chö̧jibinö pjaatinobe, lȩekwa luwedö ötjönö kwabö lotjapji jö̧ba̧lö.

¹⁸ Jau Timoteo, ja̧tjö chö̧jibanö pjaatinobe Duluwo̧ma, ja̧danö ju'wibi okobe jwiinö ötjönö sulabenö ja̧tji̧tjö chö̧jibanö pjaatakobe, ja̧danö iteda yöbawö weena mölejȩbe wene jwiinö chichibobö i̧'yejebakobe. Ba̧kwȩlö̧jatebö kabatökönö jo̧banö dösödobö jo̧be, otiwo̧ja, juluwo̧ja jö̧ba̧lö, jejenö otiwa.

Bajaleapo Pablo yöawina wene

¹⁹ Prisca mikwujunöbi, Aquila mikwo̧nöbi, Onesíforo mikwo̧ ömöledönöbi detawobedanö dokwa ateba.

²⁰ Erasto mikwo̧ma Corintio comunidadnö ö̧jibinobe, ja̧danö Trofimo mikwo̧ ö'wöchobetjö̧, Mileto comunidadnö chujunibinobe Trofimonö.

²¹ Juluwanö baikwö kwichobö kwisakwo Timoteo, tiyuwakwa̧ abönö. Eubulo mikwo̧ma ökwönö deawobedanö dokwa aebobe, ja̧danö Pudente mikwo̧bi, Lino mikwo̧bi, Claudia mikwujubi, okobe deinö dömöledö Jesúsnö ösödadöbi ökwönö detjawobedanö dokwa atjebobe.

²² Duluwo̧nö ateba, ökwökwö ja̧nö kwo̧'wo̧ luwo̧nö pjaatobö. Duluwo̧ ökwönöbi, ökwökwö ju̧kwadönöbi lȩlö̧jinö edobö chösöda. Biya̧data.