2 Timoteo 3 - Dios Iwene

'Dö̧ibaji̧ möle labikobe jö̧ba̧lö Pablo yöawina wene

¹ Timoteo, baikwö kwöwaisobö jö̧ta̧la, 'dö̧ibaji̧ möle isabenö waiyakobe, baikwö labebö lobö yötawa:

² Jojodöma idödada ösödabikwawö tjö̧jakobe, ja̧danö jwaikwöda balada tjösödakobe, ja̧danö otiwadösa jö̧ba̧lö tjomukwatakobe, ja̧danö ju'wedötjö bajalekwönönöbedösa jö̧ba̧lö tjomukwatakobe. Ja̧danö, ju'wedönö sulabenö yötja̧lakobe, ja̧danö tjabe'dodönö tja̧ja̧kwökakobe, ja̧danö iyawa edö otiwanö iyajabe jö̧ba̧löma tjösödökakobe, ja̧danö Diosnö omukwatökönö sulabenö ja̧bö tjö̧jakobe.

³ Ja̧danö, jojodönö ösödabikwawöma tjö̧jökakobe, ja̧danö jojodönö lȩlö̧jinöma tjedökakobe, ja̧danö ju'wedönö omöna yötja̧lakobe, sulabenö ja̧badö jö̧ba̧lö. Ja̧danö, idöda tjösödi̧da ja̧tjakobe, ja̧danö jojodönö tjölabikobe, ja̧danö otiwanö ja̧awama tjöpöjödakobe.

⁴ Ja̧danö, tjömöledönö iyö lotjakobe tjöpöjojodönö, ja̧danö baledakwa̧ omukwatökönö idöda tjösödi̧da juluwanö ja̧tjakobe, ja̧danö nöinö mikwawadösa jö̧ba̧lö omukwatö tjö̧jakobe, ja̧danö Diosnö ösödökönö, jwaikwöda tjo̧'wo̧ ösöwachibobö ji̧ jawada tjösödakobe.

⁵ Jobadöma wamenö Diosnö ösödadödanö tjichejekwakobe Timoteo, jo̧kwaijayonö jejenö tjichejekwijayonö, okwanö tjöpöjödakobe, Dios ujulu jwia jö̧ba̧lö. Jobadötjö 'da̧bachibö ja̧wi Timoteo,

⁶ jobadöma isabenö jojodönö suli̧ tjöwaedobetjö̧. Jau Timoteo, isabenö jojodönö suli̧ tjöwaedobe, jobadötjö ju'wedöma tebachö, sulabenö yöbawö 'daliwa tjönobedanö ichejekwa, ya̧dö tjo̧'wo̧ luwo̧nö me'dawadönö do̧tjatotö jö̧ba̧lö. Jobadö tjo̧'wo̧ luwo̧nö me'dawadö ya̧dönö baikwö yötawa: Jobadöma jwaikwö idöda tjösödi̧ jawada isakwadö, ju'wi tjösödi̧ jawabi, ju'wi tjösödi̧ jawabi, ja̧danö tjösödi̧ jawa jwaikwöda isakwö, nöinö sulabenö ja̧bö tjö̧jobe.

⁷ Jau Timoteo, jobadöma tjösödi̧ jawa tjisakwobetjö̧, ba̧kwȩlö̧jatebö ju'wi omöna yöawakwawabi, ju'wi omöna yöawakwawabi tja̧ja̧kwobe. Jo̧kwajabetjö̧ nöinö omöna yöawakwawa tja̧ja̧kwobetjö̧, isabenö waisakwawa tjöwaisobö jwibadö, ja̧danö juluwanö 'daliwanö tjö̧libobe.

^8-9 Jau Timoteo, 'dö̧ibaji̧ mölema, Dios wei̧ öpöjödadöma isabenö wene öpöjödö tjöbeba̧lö tjö̧jakobe, damötjö ji̧nadö Janes mikwo̧bi, Jambres mikwo̧bi Moisés yöawi̧ öpöjödö tjöbeba̧lö tjö̧jinadanö, ja̧danö ju'wibi Janesnöbi, Jambresnöbi baledinadanö baledakobe jobadönöbi. Jau Timoteo, kwöwaisa Janesnöbi, Jambresnöbi baledina wene, jobadöma Moisésnö tjöpöjödinobe, jo̧badanö bakwaibedösa jö̧ba̧lö, ¿jö̧tö? Jo̧kwaijayonö ja'yubenö lekwajabetjö jojodö tjöba a'otjö Diosma jobadönö i̧sebinobe, chömöayo̧ Moisésdanöböködö jö̧ba̧lö, ¿jö̧tö? Bidö Dios wei̧ öpöjödö tjöbeba̧ladöbi ja̧danö. Jobadöma jwaikwöda sulabenö omukwatö, ja̧danö isa̧ökö wene ösödö sulabenö tjöbeba̧lö tjö̧jobe, yödawi̧ öpöjödö. Ja̧danö, damötjö baledinadanö baledakobe jobadönöbi, ja'yubenö lekwajabetjö Diosma i̧sebakobe wajwibadö tjö̧ji̧ma, ja̧danö jejenö i̧sebenama, okobe deinö jojodönö öwaetjöda öwawakobe, isabenö wajwibö tjöbeba̧ladö jö̧ba̧lö.

Pablo Timoteonö weina wene

¹⁰ Timoteo, ökwöma lekwe möle yötawi̧ kwa̧ja̧kwajabe, ja̧danö ja̧bö chö̧ji̧ kwedajabe, ja̧danö jwaikwöda chisakwi̧ kwedajabe, ja̧danö Dios yöawi̧ chösödi̧ kwedajabe, ja̧danö cho̧'wo̧ 'dibachibö chöbaledi̧ kwedajabe, ja̧danö ösödabikwawö chö̧ji̧ kwedajabe, ja̧danö me'dawachibökönö chö̧ji̧ kwedajabe.

¹¹ Ja̧danö, ötjönö sulabenö ja̧tji̧ kwedajabe, ja̧danö usula chemawi̧ kwedajabe, ¿jö̧tö? Jau Timoteo, Antioquíatjöbi, Iconiotjöbi, Listratjöbi ötjönö sulabenö ja̧tjina kwedijatö, isabenö usula chemawinö jwiinö sulabenö ja̧tjinobe ötjönö, ¿jö̧tö? Ja̧danö, ju'wibi kwedijatö Timoteo, okobe jwiinö ja̧tjö chö̧jibinö pjaatinobe Duluwo̧ma, ¿jö̧tö?

¹² Timoteo, ötjönö baledi̧ma, ötjönödama baledokobe, isabenö okobe deinö Cristo Jesúskwö dötewanö ja̧nö, Dios ösödi̧danö ja̧bö tjö̧jobö isakwadönöbi sulabenö ja̧tjakobe, usula tjemawinö.

¹³ Jau Timoteo, sulabedöbi, Jesúsnö ösödadösa jö̧ba̧lö omöna yöba̧ladöbi ida̧ökö sulabenö ja̧tjobe babema, jo̧kwaijayonö 'dö̧ibaji̧ mölema jemi bajalekwönönö jwiinö sulabenö ja̧tjakobe, jojodönö omöna yöba̧löbi, omöna yöa̧lakwawa ösödöbi.

¹⁴ Ja̧danö, baikwö wetakwö Timoteo: Ida̧ökö kwöwaisachibina jawa, ja̧danö ida̧ökö Dios iwene otiwanö kwösödi̧ma, jwaikwöda 'diinö do̧ba̧lö kwösödo, isabenö wene jö̧ba̧lö. Jau Timoteo, ökwönö ba̧ja̧dinadönö kwöwaisawö̧ otiwanö ba̧ja̧dadö jö̧ba̧lö,

¹⁵ ja̧danö ju'wibi Dios iwene kwöwaisa, ina tjemu kwö̧jayi ökwönö tjöba̧ja̧dinobetjö̧. Ja̧danö, jejenö kwöwaisobetjö̧ 'diinö do̧ba̧lö kwösödobö jo̧be, chösödi̧ wenema isabenö wene jö̧ba̧lö. Jau Timoteo, ökwönö tjöba̧ja̧dina jawa Dios iwene jawama, waisanö kwomukwatobö ba̧ja̧dakwawa jawa tjöba̧ja̧dinobe, ¿jö̧tö? Ja̧danö, waisanö kwomukwatobö tjöba̧ja̧dinama, otiwa jawa wene waisanö kwomukwatobö pjaatinobe, Cristo Jesúsnö ösödö kwö̧jibobö, ¿jö̧tö? Jau Timoteo, jejenö waisanö kwomukwatobö pjaatinobe tjöba̧ja̧dinama, jo̧kwajabetjö̧ ja̧ laebi̧ kwöwaisachibinobetjö̧ isabenö wene 'diinö do̧ba̧lö kwö̧jobö jo̧be.

¹⁶ Isabenö mikwawobe Dios iwenema Timoteo, Diosda yöawinobetjö̧. Jau Timoteo, okobe jwiinö Dios iwenema, Diosda yöawawö̧ tjiwȩyudinobe, ja̧danö Dios yöawi̧daobetjö̧, isabenö mikwawobe, ba̧ja̧döbi tjöba̧ja̧dobö, ja̧danö sulabenö ba̧ja̧dakwawa jwebeböbi jwetjebobö, ja̧danö, sulabenö ja̧tji̧ jwebeböbi jwetjebobö, ja̧danö otiwanö ja̧bö ja̧kwawa ba̧ja̧döbi tjöba̧ja̧dobö.

¹⁷ Jau Timoteo, Dios iwene jejenö tjöba̧ja̧dobö jo̧be, Dios ömöayedöma isabenö otiwanö otikwa waisachibö, okobe jwiinö Dios jobadönö wei̧ otiwanö waisanö tjotidakobetjö̧.