2 Timoteo 2 - Dios Iwene

Usula kwemawijayonö, jwaikwöda Jesús wei̧ ja̧bö kwö̧jo jö̧ba̧lö Pablo Timoteonö yöawina wene

¹ Chitji̧danö chösödökwe Timoteo, Cristo Jesúsnö dötewanö kwö̧jiökwe, Diosma isabenö otiwanö lȩlö̧jinö iyökweja, jo̧kwajabetjö̧ baikwö wetakwö: Ja̧ Dios iyi̧tjö kwujuluwachibanö ja̧wi.

² Ja̧danö, kwujuluwachibanö ja̧nö, ötjö chöba̧ja̧dina jawama ökwöbi kwöba̧ja̧do, Dios wei̧ otiwanö ja̧bö ju̧kwadönö. Jobadönö kwöba̧ja̧do Timoteo, jobadönö kwöba̧ja̧di̧danö jobadöbi yadakwö ju'wedönö otiwanö tjöba̧ja̧dakobetjö̧. Jau Timoteo, belö ba̧jekwadö tja̧ja̧kwonö chöba̧ja̧dijatö, ja̧danö ja̧ chöba̧ja̧dina jawa kwöwaisachijatö, ¿jö̧tö? Ja̧ jawa ökwöbi kwujuluwachibanö ja̧nö kwöba̧ja̧do, ökwönö chöba̧ja̧dinadanö.

³ Ja̧danö, wanedö yötawa Timoteo: Cristo Jesús ömöayo̧ guardiaso̧danö ichejekwo̧ja, jo̧kwajabetjö̧ guardiaso̧ otiwo̧danö, usula kwemawijayonö, kwo̧'wo̧ 'dibachibö baledö kwö̧jo.

⁴ Jau Timoteo, kwöwaisa, guardia jojodöma, tjuluwedö tjösödi̧da ja̧tjobö jo̧be, ¿jö̧tö? Jo̧kwajabetjö̧, guardia jojodöböködö jawa omukwatöködö guardia jojodöma, tjuluwo̧ öpöjödi̧ jawa ja̧tjapji jö̧ba̧lö. Ja̧danö ökwöbi kwuluwo̧ ösödi̧ jawada omukwatö kwö̧jo Timoteo, böjȩ jawa omukwatökönö.

⁵ Ja̧danö, ju'wibi wanedö yötawa: Alewadötjö abönö ichibo̧ ubutjawaka tjubutjawakwedöma, sule tjalewo jö̧tja̧li̧danö tjalewitjö̧da tjubutjawakwedö, ¿jö̧tö? Tjalewoko jö̧tja̧li̧danö tjalewitjö̧ma, tjubutjawökakwedö, ¿jö̧tö? Ja̧dajiobe Timoteo, jo̧kwajabetjö̧ baikwö wetakwö: Ökwöbi ja̧bö kwö̧jo jö̧ka̧li̧danöda ja̧bö kwö̧jo, Dios iyakwaka kwubutjawakobetjö̧.

⁶ Isabenö mikwawobe Duluwo̧ wei̧ kwotidi̧ma Timoteo, baikwö wanedö yötawa: Batjo jawa 'diinö otidadöma, jobadöda tjotidaja̧tjö abönö kwadö, ¿jö̧tö? Ja̧danö ökwöbi Cristo wei̧ kwotidobetjö̧, isabenö kwotidaja̧ mikwa kwemakwo̧ja Timoteo.

⁷ Yötawaja̧ jawama isabenö mikwawi̧ jawa Timoteo, jo̧kwajabetjö̧ ja̧ yötawaja̧ jawa kwomukwato, ja̧danö Duluwo̧ma isabenö otiwanö ja̧ jawa kwöwaisachibobö pjaatakobe.

⁸ Timoteo, usula emawö kwö̧jonö, ba̧kwȩlö̧jatebö Duluwo̧ Jesucristo ö̧jina kwomukwatobö jo̧be. Jau Timoteo, jo̧ba David itji̧ tupadanö jojo Duluwo̧ma, ö'wö baibinajayonö, wobajaletjö tjeachajinobe, ¿jö̧tö? Usula emawö kwö̧jonö, ba̧kwȩlö̧jatebö ja̧ wene kwomukwatobö jo̧be. Jau Timoteo, jobekwö laebobe otiwa jawa wene yötawi̧ wenema,

⁹ ja̧danö ja̧ wene yötawobetjö̧ nöinö usula chemawobe, jwiinö usula chemawobe. Jau Timoteo, ja̧ wene yötawobetjö̧, sulabenö ja̧badönö ka̧lena tjödi̧danö ötjönö ka̧lena tjödinobe, pje'datakwawo̧ batibanö. Jo̧kwaijayonö, ötjöma pje'datakwawo̧ ka̧lena chö̧bijayonö, Dios iwenema ajayitjöda pje'datakwawokobe Timoteo.

¹⁰ Ja̧danö, Dios iwene pje'datakwawokobetjö̧, usula chemawijayonö, Dios ösödawö̧ ömöledö batjibakwedönö omukwatö, öpöjödachibökönö usula chemawobe. Jau Timoteo, öpöjödachibökönö usula chemawobe, cho̧'wo̧ 'dibachibö usula chemawi̧tjö jobadöbi Cristo Jesúsnö ösödö tjö̧jibakobetjö̧, ja̧danö jo̧bakwö mölejȩbetjö ba̧kwȩlö̧jatebö tjö̧jakobetjö̧.

¹¹ Cristo jawa wene otiwa jawa wenema isabenö wene Timoteo, isabenö dösödobö ji̧ wene. Baikwö yötawa: Cristokwö wobinadöma, ju'wibi isabenö Cristokwö mölejȩbe tjö̧jakwedö.

¹² Ja̧danö, usula tjemawijayonö tjo̧'wo̧ 'dibachibö baledadöma, ju'wibi tupakwö Cristokwö luwedö batjibanö yöbawö tjö̧jakwedö. Ja̧danö, Cristonö ösödökönö, Duluwo̧bö̧kö̧ Cristoma, jö̧ba̧lö öpöjödadöma, ju'wibi Cristo öpöjödakwawö̧, Chömöledöböködö, jö̧ba̧lö.

¹³ Ja̧danö, jö̧tja̧li̧danö ja̧böködöma, isabenö jö̧tja̧li̧danöma ja̧tjökakwedö, jo̧kwaijayonö Cristoma ba̧kwȩlö̧jatebö iteda jö̧a̧li̧danö ja̧bo̧, la'akatjöda jö̧a̧löködanöma ja̧bö̧kö̧. Jau Timoteo, Cristoma jö̧a̧löködanö ja̧oböma la'akatjöda jwibo̧, jo̧kwajabetjö̧ ba̧kwȩlö̧jatebö jö̧a̧li̧danö ja̧bo̧. Jejenö jo̧be Timoteo, jo̧kwajabetjö̧ usula kwemawijayonö, Jesucristo ömöayo̧ ja̧nö jo̧ba wei̧ ja̧bö kwö̧jo.

¹⁴ Biya̧ yötawaja̧ jawa okobe deinö tjomukwatibobö yökawodönö, ja̧danö Dios öba a'otjö webidönö, ölakwabikwawö jwöjwötjakwawi̧ma katjatibobö, jejenö ölabikwawö jwöjwötjakwawi̧ma mikwawokobetjö̧. Jau Timoteo, ju'wedöma jojodö tjiwȩyudina jawa jwöjwötjakwawobe, laebi̧ma baikwö jö̧ba̧lö laebena, wainö jö̧ba̧lö laebena jö̧ba̧lö. Jejenö jwöjwötjakwawi̧ma pjaatökö ji̧ Timoteo, suli̧ waedakwawa ji̧ jwöjwötjakwawi̧ a̧ja̧kwadönöma, jo̧kwajabetjö̧ jwöjwötjakwawi̧ katjatibobö webidönö.

Dios ömöayedö otiwanö ja̧bö tjö̧ji̧ jawa Pablo yöawina wene

¹⁵ Timoteo, jwaikwöda isakwö kwö̧jo, Dios öba a'otjö isabenö wene otiwanö yöbawö kwotidobö. Jejenö otidö kwö̧jitjö̧ma, Dios öba a'otjö kwi̧sebakwo̧ja, Dios wei̧ otiwanö otido̧sa jö̧ba̧lö, ja̧danö kwötabakwoböma jwiena, kwuluwo̧ wei̧ otiwanö ja̧bö kwö̧jobetjö̧.

¹⁶ Ja̧danö, jejenö yöbawö kwö̧jonö, jojodö mikwawökö ji̧ sulabenö yötja̧li̧ma a̧ja̧kwökönuwi Timoteo. Jau Timoteo, jejenö yötja̧li̧ma, wanedö yötawa, jojodönö le'dedö loobedanö ichejekwa, ja̧danö ju'wibi, tupakwö Dios öpöjödi̧ jawa jwaikwöda ja̧tjobö ji̧.

¹⁷ Ja̧danö, wanedö yötawa, jobadö yötja̧li̧ma jojodönö teachibobedanö ichejekwa, tjiwe'iju 'dolobö 'baluponö ja̧bö, jojodönö suli̧ waedö. Jau Timoteo, jejenö sulabenö yöba̧ladö tjuju̧kwobe, ja̧danö Himeneobi, Filetobi jejenö yöba̧ladö tjuju̧kwobe.

¹⁸ Jobadöma jweinö yöawakwawatjö 'da̧bachibö tji̧'yajabe, ja̧danö jobadöma sulabenö yötjawobe, wobinadö 'yabibajö tjeachakwawama ida̧ökö baledinobe jö̧ba̧lö. Jejenö sulabenö yöbawö ju'wedönö suli̧ tjöwaedobe, Dios yöawi̧ ösödakwawa katjatibobö ja̧tjobetjö̧.

¹⁹ Jo̧kwaijayonö, ju'wedö tjösödi̧ waekwijayonö, Dios yöbawö ujunina wenema waekwokobe, la'akatjöda söawachokobe. Jau Timoteo, Diosma isabenö wene ujuninobe, inawa pjolachibököwadanö. Wanedö yötawa: Diosma isabenö wenesawa inawa ujuninobe, ja̧danö jawanö seyudanö wȩyukwawa jo̧be, ja̧danö baikwö laebobe wȩyukwi̧ma: Diosma iteda ömöledönö waiso̧, jö̧ba̧lö laebobe, ja̧danö ju'wibi laebobe: Okobe deinö Duluwo̧ ömöledösa jö̧ba̧ladöma, sulabetjö 'da̧bachibö tji̧'yobö jo̧be, jö̧ba̧lö laebobe.

Suli̧tjö 'da̧bachibö ja̧wi jö̧ba̧lö Pablo yöawina wene

²⁰ Baikwö wanedö yötawakwö Timoteo: O̧do otiwejutjö nöinö dȩja̧pi̧ya jo̧be, ¿jö̧tö? Orotjö ja̧danö platatjö otikwa ö̧pi̧ya jo̧be, ja̧danö ju'wibi towisötetjö, ja̧danö letiatjö otikwa ö̧pi̧yabi jo̧be, ¿jö̧tö? Ja̧danö, ja̧ dȩja̧pi̧yatjö, orotjö, ja̧danö platatjö otikwaö̧pi̧yama, wainö ji̧ ö̧pi̧ya jo̧be, ja̧danö sule otiwa jawa anawaö̧pi̧ya, ¿jö̧tö? Jo̧kwaijayonö towisötetjö, ja̧danö letiatjö otikwaö̧pi̧yama mikwawökö ö̧pi̧ya jo̧be, ja̧danö suli̧ jawa anawa öpi̧ya, ¿jö̧tö?

²¹ Jejenö jo̧be Timoteo, ja̧danö baikwö yötawakwö: Bakwo̧ suli̧tjö 'da̧bachibö ja̧nö idichawitjö̧ma, Dios ömöayo̧ otiwo̧ ö̧jena, dȩja̧pa̧ nöinö mikwawapa̧danö. Ja̧danö, suli̧tjö 'da̧bachibö ö̧jobetjö̧, Duluwo̧ jo̧banö otiwanö weobö ja̧kobe, isabenö okobe jwiinö otiwi̧ otikwa otidobö.

²² Jejenö jo̧be Timoteo, jo̧kwajabetjö̧ baikwö wetakwö: Möayedö sulabenö tjösödi̧tjö 'da̧bachibö döbibaji, ja̧danö ju'wida isakwi, otiwi̧ jawada. Jau ju'wida isakwö kwö̧jobö jo̧be, sulabe jwiinö kwö̧jobö, ja̧danö Dios yöawi̧ kwösödobö, ja̧danö jojodönö kwösödobö, ja̧danö wene jwiinö kwö̧jobö. Tjomajadenö bakwainö otiwadöma jejenö tjö̧jobö isakwadö Timoteo, ja̧danö ökwöbi jejenö kwö̧jobö kwisakwo.

²³ Ja̧danö kwöwaisa Timoteo, jojodö wajwibö omukwatökönö yötja̧lakwawi̧ma, Aaa, biya̧daena, ju'widaena, jö̧ba̧lö yötja̧lakwawi̧ma mikwawokobe, sule jojodö jwöjwötjakwawobö ja̧i̧ ji̧, ¿jö̧tö? Jo̧kwajabetjö̧ ja̧ jaye yöa̧lakwawama kwöpöjödo, jojodökwö jwöjwöbakwawö kwö̧japji jö̧ba̧lö.

²⁴ Jau Timoteo, kwöwaisa, Duluwo̧ ömöayedöma jwöjwötjakwawobö jwibadö, ¿jö̧tö? Jwöjwöbakwawökönö, okobe deinö jojodönö dösölö̧jinö yötja̧lakwawobö jo̧be Duluwo̧ ömöayedöma. Jau Timoteo, Duluwo̧ ömöayedöma okobe deinö jojodönö dösölö̧jinö yötja̧lobö jo̧be. Ja̧danö ju'wibi, jojodönö tjöba̧ja̧dobö jo̧betjö̧, otiwanö jojodönö Dios iwene ba̧ja̧dakwawa tjöwaisachobö jo̧be, jweinö tjöba̧ja̧dakobetjö̧. Ja̧danö ju'wibi, jojodö jobadönö sulabenö ja̧tjenama o̧'wo̧ 'dibachibö tjöbaledobö jo̧be.

²⁵ Ja̧danö, Dios jawa öpöjödadö jobadönö öpöjödakwawö tjö̧jena, jobadökwö jwöjwöbakwawökönö dösölö̧jinö jwetjebobö jo̧be, Dios pjaatitjö̧ma bidöma sulabenö tjomukwati̧ kabatibö tjöbalewachena, ja̧danö isabenö wene tjösödena jö̧ba̧lö.

²⁶ Jau Timoteo, jobadö öpöjödadöma Awetja ujunina 'daliwanö lö̧jajadö Awetja wei̧da ja̧tjo jö̧ba̧lö. Jo̧kwaijayonö Dios pjaatitjö̧ma Awetja ujulutjö tjö̧jibena. Jo̧kwajabetjö̧, tjöpöjojodönö dösölö̧jinö yöba̧lö pjatjatobö jo̧be Duluwo̧ ömöayedöma, bidönöbi Dios pjaatena jö̧ba̧lö.