2 Timoteo 1 - Dios Iwene

Dokwa jö̧ba̧lö Pablo iwȩyudina wene

^1-2 Ötjö böjanö kwialusöjanö wȩyudö webo̧ma Pablosa, Cristo Jesús webawo̧sa. Ja̧ Cristo Jesús webawo̧ chö̧ji̧ma, ötjö chösödi̧damaökö, baikwö yötawa: Diosma yöbawö ujuninobe, Cristo Jesúsnö ösödadöma ja̧kwawa tjujuna̧lakwedö jö̧ba̧lö, ja̧danö jejenö yöbawö ujuninobetjö̧, ötjönö 'da̧batö ujuninobe, Cristo Jesús webawo̧ batibanö ja̧ otiwa jawa wene yötawobö. Ja̧danö, ötjö Pabloma chitji̧danöbo̧ chösödökwe Timoteonö wȩyudö weta. Jau Timoteo, ökwönö chiwȩyuda, ja̧danö Dabe'do Diosbi, Duluwo̧ Cristo Jesúsbi ökwönö lȩlö̧jinö edö pjatjatobö chösöda, ja̧danö kwo̧'wo̧ luwo̧ ösöwachibanö pjatjatobö chösöda.

Jwaikwöda Dios wei̧ ja̧bö kwö̧jo jö̧ba̧lö Pablo Timoteonö iwȩyudina wene

³ Timoteo, kabatökönö ökwönö omukwatö Diosnö ösödö yöta̧lobe, otiwa jö̧ba̧lö. Jau Timoteo, cha'dödömine otiwanö Dios wei̧ ja̧bö tjö̧jinadanö, ötjöbi chomajadenö otiwanö chöwaisi̧danö, jwaikwöda Dios wei̧ ja̧bö jo̧sa. Ja̧danö jo̧ba wei̧ ja̧bö chö̧jonö, mölebi, yö̧tebi kabatökönö ökwönö omukwatö atebobe chuluwo̧ Diosnö.

⁴ Jau Timoteo, isabenö ökwönö chomukwatobe, ja̧danö belö o̧'wo̧ tjo̧achö kwubudekwina wene chomukwatibobe. Jejenö omukwatö, cho̧'wo̧ tjo̧achobe, yemidanö chömöledöso̧ Timoteonö chedowe jö̧ba̧lö, yemidanö dediakwawenama otiwanö cho̧'wo̧ ösöwachibanö chö̧jakobetjö̧.

⁵ Timoteo, ökwönö omukwatö isabenö Dios yöawi̧ kwösödi̧ wene chomukwatiba. Jau, ajayinöma ökwö kwa'do̧ Loida mikwujuma, isabenö Dios yöawi̧ ösöduju jö̧jinobe, ja̧danö kwojo'do Eunicebi isabenö Dios yöawi̧ ösöduju jö̧jinobe. Ja̧danö chedemi ökwöbi jobadö tjösödi̧danö isabenö ösödo̧ja Timoteo.

⁶ Ja̧danö, jejenö chöwaisobetjö̧, kwujuluwachibanö yötawakwö, Dios ja̧bö kwö̧jobö iyinama, ajayitjö bajalekwönönö jwaikwöda ja̧bö kwö̧jo jö̧ba̧lö. Jau Timoteo, damötjö chömamiju kwuunö 'bibeba̧lö ja̧tinenama, Diosma ja̧bö kwö̧jobö iyinobe, ja̧danö ajayitjö bajalekwönönö ja̧ ja̧bö kwö̧jobö yötawakwö.

⁷ Jau Timoteo, Diosma iteda O̧'wo̧ Luwo̧nö iyinobe ökwödönö, ja̧danö jo̧ba Dios iyinökwema yedaboböma pjabatö̧kö̧, ju'wida pjabato̧ jo̧bama. Jau Timoteo, Dios O̧'wo̧ Luwo̧ma dujuluwachibanö dö̧jobö pjabato̧, ja̧danö ösödabikwawö dö̧jobö pjabato̧, ja̧danö jweinö omukwatö dö̧jobö pjabato̧ Dios O̧'wo̧ Luwo̧ma. Ja̧danö, jejenö pjabato̧obetjö̧, jwaikwöda ja̧bö kwö̧jo Dios ja̧bö kwö̧jobö iyinama Timoteo.

⁸ Jo̧kwajabetjö̧, Duluwo̧ jawa wene tabakwökönö yöbawö kwö̧jo Timoteo, ja̧danö ka̧lena chö̧bijayonö, ötjönöma kwötabakwokotjö, Pabloma chömöledöso̧bö̧kö̧ jö̧ba̧lö. Jau Timoteo, Jesús jawa wene yötawobetjö̧ ka̧lena chö̧bobe ötjöma, ja̧danö, ökwöbi otiwa jawa wene yökawobetjö̧, bakobe Dios ujulunö ötjökwö usula emawö kwö̧jo ökwöbi, öpöjödachibökönö.

⁹ Jau Timoteo, Diosda ökwödönö dö̧jibinö pjabatinama, jo̧bada iteda ömöledö badibobö jwöbinama, jo̧kwajabetjö̧ usula emawö jwaikwöda otiwa jawa wene yöbawö kwö̧jo iteda ujulunö. Ja̧ Dios ökwödönö pjaatinama, otiwanö ja̧bö dö̧jiökwema pjaatinokobe, itedada la'akatjöda jejenö omukwatö ujuninobetjö̧ jejenö pjaatinobe. La'akatjöda Diosma omukwatö ujuninobe, Cristo Jesúsnötjö otiwa jawa mikwa jwiinö ökwödönö iyobö.

¹⁰ Ja̧danö babema ja̧ omukwatö ujunina wene ökwödönö i̧sebinobe, dö̧jibinö pjabato̧ Cristo Jesús ichinenama. Jau Timoteo, Cristo Jesúsma woawa ujulu söbebö loinobe, ja̧danö otiwa jawa wenetjö isabenö ja̧kwawa, ba̧kwȩlö̧jatebö ja̧kwawa ökwödönö i̧sebinobe.

¹¹ Ja̧danö, ja̧ wene yötawo jö̧ba̧lö Diosma 'da̧batö ujuninobe ötjönö, yöbawo̧ batibanö, ja̧danö Cristo webawo̧ batibanö, ja̧danö ja̧ wene ba̧ja̧do̧ batibanö.

¹² Ja̧danö, jejenö ötjönö 'dabatö ujuninobetjö̧, babema ka̧lena chö̧bobe Timoteo. Jo̧kwaijayonö, ka̧lena chö̧bijayonö, ja̧ wenetjö chötabakwökö, cho̧'wo̧ chöwana̧lökwenö chöwaisobetjö̧. Jau Timoteo, cho̧'wo̧ chöwana̧lökwenö chöwaisa, Isabenö juluwo̧ cho̧'wo̧ luwo̧nö ite'ada̧lobö, jö̧ba̧lö, yemidanö ichakwa̧ möle baibenanö kabatö.

¹³ Jejenö jo̧be Timoteo, jo̧kwajabetjö̧ baikwö wetakwö Timoteo: Jweinö ökwönö ba̧ja̧dö yötawinadanö ja̧bö ja̧wi. Cristo Jesúskwö dötewanö ja̧nö, Cristonö ösödö kwö̧jo, ja̧danö ösödabikwawö kwö̧jo.

¹⁴ Ja̧danö, do̧'wo̧ luwo̧nö jo̧, Dios O̧'wo̧ Luwo̧ ökwönö otiwa jawa iyina a̧'dȩlanö te'ada̧lö kwö̧jo Timoteo.

¹⁵ Timoteo, kwöwaisa, ba̧jekwadö Asia nijitjö Jesúsnö ösödadöma ötjönö katjatibinobe, ja̧danö jobadötjö Figelobi, Hermógenesbi ötjönö katjatibinobe.

¹⁶ Jo̧kwaijayonö, ju'wedö katjatibijayonö, Onesíforoma ötjönö kaatibinokobe, ja̧danö Diosnö atebobe jo̧ba ömöledönö lȩlö̧jinö edö pjaatobö. Jau Timoteo, jo̧bama cho̧'wo̧ ujuluwachibanö pjaatinobe nöinö, ja̧danö nöinö ötjönö edö ichinobe. Ka̧lena chö̧bijayonö, ötabakwinokobe ötjönö,

¹⁷ ja̧danö baikwö Romabe ichinenama, tabakwökönö nöinö isakwinobe, ötjönö öbadekwajenanö baibanö.

¹⁸ Jo̧ba Onesíforonö ida̧ökö kwöwaisökwe Timoteo, otiwanö pjabato̧ jö̧ba̧lö, belö Éfesonö ja̧nö nöinö pjaatina kwedinobetjö̧. Jo̧ba Onesíforonö baikwö yöta̧la, Cristo yemidanö ichakwa̧ möle badekwachenama, Duluwo̧ jwiinö lȩlö̧jinö jo̧banö pjaatobö chösöda, ötjönö otiwanö pjabatinanöma.