2 Tesalonicenses 3 - Dios Iwene

Diosnö akebaduwo ökwödönö jö̧ba̧lö Pablo aebina wene

¹ Ja̧danö, bajaleapo jawa baikwö yötawa: Diosnö akebaduwo ökwödönö chömöledö, Duluwo̧ jawa wene yödawi̧ma, tupakwö ina juluwanö yödawobö jelobebi, jelobebi. Ja̧danö, yödawi̧ a̧ja̧kwadöma otiwanö omukwatö tjösödobö akebaduwo, ökwödö kwösödinaduwadanö jobadöbi tjösödo jö̧ba̧lö.

² Ja̧danö, Diosnö akebaduwo ökwödönö, sulabedötjö, jwiinö sulabenö ja̧badötjö dö̧jibinö ja̧o jö̧ba̧lö. Jau chömöledö, ju'wedöma Jesúsnö tjöpöjödobe,

³ jo̧kwaijayonö Duluwo̧ma jö̧a̧li̧danö ja̧bo̧, ja̧danö ökwödö Tesalónicanö ju̧kwadönö tjöeba̧lakobe, inesö sulabo̧ ökwödönö suli̧ öwaedapji jö̧ba̧lö.

⁴ Ja̧danö, Duluwo̧nö do̧'wo̧ döwana̧lobe, isabenö ökwödö Tesalónicanö ju̧kwadönö pjabato̧ jö̧ba̧lö, wedina jawa ja̧bö kwö̧jaduwobö. Ja̧danö, tupakwöbi jejenö pjaatakwo̧ jö̧ba̧lö Duluwo̧nö do̧'wo̧ döwana̧lobe chömöledö.

⁵ Chömöledö, Duluwo̧ ökwödö kwomajadeduwinö öba̧ja̧dobö chösöda, Dios ökwödönö ile niebi̧ wene kwöwaisachibaduwobö, ja̧danö Cristo o̧'wo̧ 'dibachibö ö̧ji̧ wene kwöwaisachibaduwobö.

Otidö kwö̧jaduwo jö̧ba̧lö Pablo weina wene

⁶ Chömöledö, ökwödö Jesúsnö ösödadötjö ju'wedö tjuju̧kwobe, döba̧ja̧dina a̧ja̧kwökönö 'dö̧wekwachibö ju̧kwadöma. Duluwo̧ Jesucristo iminö wedaduwakwö, okobe deinö jejenö ja̧bö ju̧kwadö Jesúsnö ösödadötjö 'da̧bachibö kwö̧jaduwo jö̧ba̧lö.

⁷ Kwöwaisaduwa, ökwödö di̧sebinadanö ökwödöbi ja̧bö kwö̧jaduwo chömöledö. Ökwödöma ökwödökwö dö̧jenama, 'dö̧wekwachiböma dö̧jijökötö, ¿jö̧tö?

⁸ Ja̧danö, bakwo̧ u̧kwabi dukwijökötö midökönöma, ¿jö̧tö? Jau chömöledö, yö̧tebi, mölebi dotidijatö, usula emawö dotidijatö, ökwödö Tesalónica jojodöda nöinö kwotidaduwapji jö̧ba̧lö, du̧kwa kwiyaduwobö.

⁹ Chömöledö, ökwödönö yöbawö dö̧jobetjö̧, isabenö kwite'ada̧laduwobö wedo jö̧da̧linobe, jo̧kwaijayonö di̧sebi̧danö ökwödöbi ja̧bö kwö̧jaduwo jö̧ba̧lö, otidö dö̧jijatö.

¹⁰ Jau chömöledö, ina ökwödökwö dö̧jayi, baikwö yödawijatö: Bakwo̧ otidobö öpöjöditjö̧ma, ukwoko jo̧bama, jö̧ba̧lö.

¹¹ Jobekwö yötawa chömöledö, ökwödönö da̧ja̧kwobetjö̧, Tesalónica ju̧kwadö Jesúsnö ösödadötjö, ju'wedöma otidökönö ja̧nö, sule ju'wedönö weba̧lö sulabenö kwebacha̧lö tjö̧jobe.

¹² Jejenö ja̧bö ju̧kwadönö Duluwo̧ Jesucristo iminö baikwö ba̧ja̧dö wedobe ökwödönö chömöledö: 'Wi̧inö ja̧nö, idöda tjotidawa otidö tjö̧jo jö̧ba̧lö, böjȩnö ja̧nö tjukwakwa̧ kwakwawama idöda otidö tjemobö.

¹³ Ja̧danö, ökwödö otiwanö ja̧bö ju̧kwadönö baikwö yötawa chömöledö, otiwanö ja̧bö ja̧kwawama kwöpöjödachibaduwa.

¹⁴ Ökwödötjö bakwo̧ böjanö diwȩyudaja̧ma a̧ja̧kwökönö öpöjöditjö̧ma, jo̧banö kwedaduwo, a̧ja̧kwö̧kö̧ jö̧ba̧lö. Ja̧danö, jo̧bakwö bakobe kwö̧jaduwoko, tabakwö ö̧jakobetjö̧.

¹⁵ Jo̧kwaijayonö jo̧banö omukwatökönaduwi, döpöjojo jö̧ba̧löma chömöledö, bitema döjawo̧ jö̧ba̧lö pjabatö lȩkebaduwonö chömöledö.

Pablo bajaleapo yöawina

¹⁶ Chömöledö, do̧'wo̧ luwo̧nö ösöwachibanö pjabato̧ Duluwo̧ ökwödönö pjaatobö chösöda, okobe jwiinö kwö̧jaduwi̧ ba̧kwȩlö̧jatebö kwo̧'wo̧ luwo̧duwi ösöwachibanö kwö̧jaduwobö. Duluwo̧ okobe deinö ökwödökwö ö̧jobö chösöda chömöledö.

¹⁷ Chömöledö, ötjö Pablo biya̧ bajaleapo chiwȩyudaja̧ma, ötjöda chömamunö chiwȩyudajabe. Okobe jwiinö kwialusöjanö chiwȩyudi̧ma, jejenö wȩyudajichobe, Aaa, isabenö Pablo iwȩyudina jö̧ba̧lö tjöwaisachibo, jö̧ba̧lö.

¹⁸ Duluwo̧ Jesucristo ökwödönö okobe deinö lȩlö̧jinö pjaatobö chösöda. Biya̧data.