2 Tesalonicenses 1 - Dios Iwene

Pablo Tesalónicanö ju̧kwadönö ikenasa'ye iwȩyudina'yetjö ajayi jawa

¹ Ötjö Pablo mikwo̧sa, ja̧danö Timoteokwö Silvanokwö böja kwialusöja chiwȩyuda ökwödö Tesalónica comunidadnö ju̧kwadötjö Dabe'do Diosbi, Duluwo̧ Jesucristobi tjömöledönö.

² Dabe'do Diosbi, Duluwo̧ Jesucristobi ökwödönö lȩlö̧jinö tjedobö dösöda, kwo̧'wo̧ luwo̧duwi ösöwachibanö kwö̧jaduwobö.

Dios böjȩ jojodönö lȩebakwa̧ Pablo yöawina wene

³ Chö̧ja̧wo̧dö, Diosma ökwödönö pjaatobetjö̧, jo̧banö dösödobö jo̧be, ja̧danö dösödo jö̧da̧li̧danö kabatökönö otiwanö Diosnö ösödö yöda̧lobe, otiwanö Tesalónicanö ju̧kwadönö pjabato̧ja jö̧ba̧lö. Jau chömöledö, ökwödönö pjaatobetjö̧, Jesúsnö kwösödaduwi̧ma nöachobedanö ichejekwa, ja̧danö kwömöledö Jesúsnö ösödadönö kwösödabikwawaduwi̧bi nöachobedanö ichejekwa. Ja̧danö jejenö pjaatinobetjö̧, otiwanö pjabato̧ja jö̧ba̧lö yöta̧lanö chömöledö.

⁴ Jau chömöledö, ju'wedöma ökwödönö sulabenö ja̧tjijayonö, ja̧danö nöinö usula kwemawaduwijayonö, jwaikwöda kwo̧'wo̧duwi 'dibachibö Jesúsnö ösödadöja. Jo̧kwajabetjö̧ ökwödönö ösödö, jelobetenia Dios ömöledönö yödawobe, Dömöledö Tesalónicanö ju̧kwadöma otiwanö ju̧kwadötö, jobadöma usula tjemawijayonö, otiwanö Jesúsnö ösödadötö, jö̧ba̧lö.

⁵ Jau chömöledö, jejenö kwö̧jaduwi̧ma kwi̧sekwaduwobe Dios jweinö ja̧i̧ma. Ökwödöma Dios La'aka Luwo̧ ö̧jakwa̧ omukwatö, usula emawadöja babema, ¿jö̧tö? Ja̧danö Diosma ökwödönö ja̧bo̧, jo̧ba webö ö̧jena tjö̧jo jö̧ba̧ladö bakibaduwanö.

⁶ Jau chömöledö, lȩebo jö̧a̧li̧danö, usula kwemawaduwinö ja̧badönö otiwanö lȩebakwo̧ Diosma, balekwa mikwa jobadö usula tjemawinö.

⁷ Jo̧kwaijayonö ökwödö Tesalónicanö ju̧kwadönöbi, ökwödönöbi usula demawi̧tjö dö̧jibinö ja̧akwo̧ Diosma, Duluwo̧ Jesús mölejȩbetjö ichö öwawachenama. Jau chömöledö, Duluwo̧ Jesúsma iteda ömöayedö ángelesdö juluwadökwö öwawachö ichakwo̧. Ja̧danö, ökwölakwö ichakwo̧,

⁸ Diosnö wajwibadönö lȩebo jö̧ba̧lö, ja̧danö Duluwo̧ Jesús jawa otiwa jawa wene öpöjödadönö lȩebo jö̧ba̧lö.

⁹ Jobadönö söbebö loakwo̧, Dios lȩebi̧tjö kabatökönö tjemawinö, ja̧danö Duluwo̧ ö̧jelötjö, ja̧danö jo̧ba dejatinö ujulutjö ba̧kwȩlö̧jatebö 'da̧bachibö tjö̧jakwedö.

¹⁰ Jejenö baibakobe Duluwo̧ ichakwa̧ mölema. Ja̧ möle ichakobe Jesúsma, okobe deinö iteda ömöledö jo̧banö otiwo̧ja jö̧ba̧lö tjösödobö, ja̧danö okobe deinö jo̧banö ösödadö jo̧banö otiwanö ösödö tjomukwato jö̧ba̧lö ichakwo̧. Jau chömöledö, ökwödöbi ja̧ möle jo̧banö kwösödaduwakwedöja, yödawina wene kwösödinaduwobetjö̧.

¹¹ Jo̧kwajabetjö̧, kabatökönö Diosnö adebobe, ökwödönö omukwatö. Diosma ökwödönö jwöinobe, iteda ömöledö kwö̧jaduwobö, ¿jö̧tö? Ja̧danö, iteda ömöledö tjö̧jo jö̧tja̧li̧danö kwö̧jaduwobö Dios pjaatobö adebanö chömöledö. Ja̧danö, iteda ujulunö otiwanö kwösödaduwi̧, ja̧danö Jesúsnö ösödö kwotidaduwi̧ badekwachinö ja̧o jö̧ba̧lö adebanö.

¹² Jejenö Dios ökwödönö pjaatobö adeba chömöledö. Ja̧danö, jejenö ökwödönö pjaatobetjö̧, ökwödöma otiwanö omukwatö Duluwo̧ Jesúsnö kwösödaduwakwedöja, Duluwo̧ Jesúsma otiwo̧, jö̧ba̧lö. Ja̧danö, Diosbi Duluwo̧ Jesucristobi ökwödönö otiwa jawa mikwa jwiinö tjiyobetjö̧, Jesúsma ökwödönö ösödakobe, chömöledö otiwadö jö̧ba̧lö.