2 Samuel 9 - Dios Iwene

David Jonatan itji̧nö dösölö̧jinö pjaatina jawa

¹ Ja̧danö ju'wi möle Davidma abebö a̧ja̧kwinobe, —Ina Saul i̧tji̧mutjö jelo̧ öjobeji̧? Jo̧ba itji̧ Jonatanma yöne chömöledöso̧ öjinobetjö̧, jo̧ba ömöledönö dösölö̧jinö pjatatobö chösöda, —jö̧ba̧lö.

² Abebö a̧ja̧kwawö̧, Saul ejunö ajayinö otidinadötjö bakwo̧nö jwötjinobe, Siba mikwo̧no, David öba a'o ichibobö. Ja̧danö, öba a'o ichibiökwe, Davidma abebö a̧ja̧kwinobe, —Ökwöma Siba mikwo̧ kwö̧jiji̧? —jö̧ba̧lö. Abebö a̧ja̧kwökwe, —Jau chuluwo̧, kwömöayo̧ Sibasa, —jö̧ba̧lö atadinobe.

³ Atadökwe la'aka luwo̧ Davidma abebö a̧ja̧kwinobe, —Dios öba a'otjö Jonatannö yöbawö chujunijatö, ömöledönö dösölö̧jinö pjatatakwa̧ wenema, jo̧kwajabetjö̧ abebö cha̧ja̧kwakwö, Saul ömöledötjö ina jelo̧ ö̧jobeji̧, jo̧banö dösölö̧jinö pjatatoböma? —jö̧ba̧lö. Abebö a̧ja̧kwökwe Sibama atadinobe, —Jonatan i̧tji̧mutjö bakwo̧ ina ya̧a̧lobe, ömasapiya suli̧ waekwinama, —jö̧ba̧lö.

⁴ Atadökwe, la'aka luwo̧ Davidma abebö a̧ja̧kwinobe, —Dai ö̧jobeda? —jö̧ba̧lö aebökwe, —Lo Debar comunidadnö ö̧jobe, Amiel itji̧ Maquir mikwo̧ ejunö, —atadinobe Sibama.

⁵ Yöawökwe, La'aka luwo̧ Davidma weinobe, Lo Debar comunidadbe 'ya̧nö, Maquir ejutjö tjichejebobö Jonatan itji̧nö.

⁶ Ja̧danö tjichejebiökwe, Saul itji̧ Jonatan itji̧ Mefiboset mikwo̧ma David öba a'o ichibinobe, ja̧danö ichibö David öba a'otjö öba nijakwö öbamatinobe, chuluwo̧ja jö̧ba̧lö. Ichibö, —Mefiboset kwö̧jiji̧? —David jö̧a̧lökwe, —Jau, kwömöayo̧ Mefibosetsa, —jö̧ba̧lö atadinobe.

⁷ Atadökwe, Davidma Mefibosetnö yöa̧linobe, —Yebabökönui chömöledöso̧, kwabe'do Jonatanma yöne chömöledöso̧ chösödökwe ö̧jinobe, jo̧kwajabetjö̧ kwabe'dominenö omukwatö, ökwönö dösölö̧jinö pjatatobö chösöda. Jau Mefiboset, okobe jwiinö kwadömine Saul iteboinemi, ökwönö tjetatobö chösöda ökwö kwitebo baibanö. Ja̧danö ju'wibi, yö̧ne chömöledö tjukwi̧danö, ba̧kwelöjatebö ötjökwö mesasötetjö kwukwobö chösöda, isabenö chömöledöso̧köbobetjö̧, —jö̧ba̧lö.

⁸ David yöa̧lökwe, Mefibosetma yemidanö öba nijakwö bȩachinobe, ja̧danö yöa̧linobe, —Ötjöma mikwawö̧kö̧sa chuluwo̧, jejenö ötjönö pjakatoböma. Jau chuluwo̧, ötjöma awili ö'wö babibajo̧ awilidanö mikwawö̧kö̧sa, ötjönö pjakato jö̧ba̧löma.

⁹ Ikenama la'aka luwo̧ Davidma Saul ömöayo̧ Sibanö jwöinobe, ja̧danö ichibiökwe, Sibanö yöa̧linobe: —Siba, okobe jwiinö Saulmine iteama, okobe jwiinö ömöledö tjiteabi, kwuluwo̧mine Saul ö'dö̧ Mefibosetnö tjebatö chiyajabe.

¹⁰ Ja̧danö, baikwö wetakwö Siba, ökwöbi, kwi̧tji̧mubi, kwömöayedöbi, Mefiboset ömöayedö kwö̧jaduwakwedöja, ja̧danö itebo niji kwotidaduwakwedöja, kwuluwo̧mine Saul ö'dö̧ma otiwanö batjo waji̧ kwakwawa ujuna̧lakobetjö̧. Jo̧kwaijayonö, a'dö itea jejenö ujuna̧lijayonö, Mefibosetma yö̧ne chömöledöso̧ ja̧nö, chitea mesasötetjö ukwakwo̧, —jö̧ba̧lö yöawinobe Davidma Sibanö. Jo̧ba Sibama, i̧tji̧mu quincebedönö ujunalinobe, ja̧danö ju'wibi ömöayedö veintebedönö ujuna̧linobe.

¹¹ Ja̧danö Mefiboset ömöayedö kwö̧jaduwakwedöja jö̧ba̧lö yöawökwe, —Jau chuluwo̧ la'aka luwo̧, otiwa. Kwömöayo̧sa chuluwo̧, ja̧danö okobe jwiinö weköbaja̧danö ja̧dakwedösa, —jö̧ba̧lö atadinobe Sibama. Jemi ikenama, David i̧tji̧mu tjukwi̧danö, Mefibosetma David iteasöte mesasötetjö ba̧nö kwiainobe.

^12-13 Ja̧danö, jemi tupakwö ömasapiya suli̧ waekwo̧ Mefibosetma Jerusalen comunidadnö ö̧jinobe, mölekwena Davidkwö ukwobetjö̧. Ja̧danö Mefibosetma itji̧ ja'yuwo̧nö ujuna̧linobe, Mica mikwo̧nö. Ja̧danö Sibabi, okobe deinö ömöledöbi, Mefiboset ömöayedö baibanö tjö̧jinobe.