2 Samuel 8 - Dios Iwene

David öpöjojodönö ujuluwina jawa

¹ Ja̧danö, ja'yubeda lekwajabetjö, Davidma filisteo jojodökwö ölakwabikwawinobe, ja̧danö jwiinö ujuluwinobe filisteo jojodönö. Jwiinö filisteo jojodönö ujuluwinobe Davidma, tjitebo niji la'aka luwo̧ baibanö.

² Ja̧danö, Moab niji jojodönöbi ujuluwinobe Davidma. Jobadönö juluwajo̧, ölakwabikwawa jojodönö weinobe nijinö isa'ba wapö'bakwa baibanö tjö̧bamatobö. Ikenama dö'balataja ba̧jadönö kwabö loinobe, ja̧danö jele'banö ba̧jadö tjö̧jibobö weinobe. Jemi ikenama ji̧bajadöbi, ju'wedö Moab niji jojodöbi David ömöayedö batjibinobe, o̧ba bakwabakwena tjiteatjö Davidnö midadö batjibanö.

³ Ja̧danö ju'wibi, Davidma Rejob itji̧, Soba niji la'aka luwo̧ Hadad Ezer mikwo̧nö ujuluwinobe. Jo̧ba Hadad Ezerma, Eufrates mikwödö ö'öbö niji yemidanö ujuluwobö i̧'yinobe, ja̧danö i̧'yiökwe, Davidma jo̧bakwö ölakwabikwawö ujuluwinobe.

⁴ Ölakwabikwawö, ömöayedötjö kabayudönö wajadönö mil sietecientobedönö do̧atinobe, ja̧danö ju'wedö ölakwabikwawa jojodönö veinte milbedönö do̧atinobe. Juluwajo̧, tja̧jwi̧mu ka̧bayudö tji̧se'bo ja'önö 'witjebinobe, otiwanö ö'öbakwawöködö batjibanö, tjajwimutjö sule cien kolukiya töbadönöda 'witjebinokobe.

⁵ Ja̧danö, Hadad Ezerkwö ölakwabikwawiawö̧, Siria niji ölakwabikwawadöma Damasco comunidadtjö latjebinobe, Hadad Ezernö pjatjatobö. Jo̧kwaijayonö, jejenö tjichiökwe, jobadönöbi ujuluwinobe Davidma, ja̧danö jobadötjö veintidos milbedönö kwabawö loinobe.

⁶ Ikenama, juluwajo̧, Damasco comunidadtjö iteda ömöayedö ölakwabikwawa jojodö tju̧ju̧kwemi ujuninobe, siria jojodönö wetjobö. Jo̧kwajabetjö̧ jobadö siria jojodöbi David ömöayedö batjibinobe, o̧bakwena tjiteatjö Davidnö midadö batjibanö. Okobe jwiinö David ölakwabikwawö ö̧ji̧ma, Isabenö Jo̧ma Davidnö pjaatinobe, ja̧danö okobe deinö öpöjojodönö ujuluwobö weinobe.

⁷ Ajayinö Hadad Ezer mikwo̧ ölakwabikwawa jojodötjö luwedöma, tjöekwapi orotjö otikwapi kwetjatjinobe, ja̧danö juluwajo̧ ja̧ kwetjatajapima, David 'döebinobe, ja̧danö Jerusalenbe e'ewinobe.

⁸ Ju'wibi, Hadad Ezer itebo niji Beta comunidadtjöbi, Berotay comunidadtjöbi, La'aka luwo̧ Davidma nöinö bronce jawa do̧batö e'ewinobe.

⁹ Jamat niji la'aka luwo Tou mikwo̧ma, David Hadad Ezernö ujuluwaja̧ wene a̧ja̧kwinobe, —Davidma okobe deinö Hadad Ezer ömöayedö ölakwabikwawa jojodönö ujuluwajabeta, —jö̧ba̧lö.

¹⁰ Jejenö o̧'wo ösöwachibanö a̧ja̧kwö, itji̧ Joran mikwo̧nö weinobe, Davidnö edö, Dokwa jö̧ba̧lö aebobö, ja̧danö —Otiwanö döpöjojonö kwujuluwajabetija, —jö̧ba̧lö ösödö yöa̧lobö. Jo̧ba Toubi Hadad Ezer öpöjojo ö̧jinobe, ja̧danö nöinö jo̧bakwö ölakwabikwawö ji̧ainobe ajayinöma, jo̧kwajabetjö̧ kwömöledöso̧sa jö̧ba̧lö jejenö itji̧nö weinobe. Ja̧danö, Joranma nöinö iyawa ichejebinobe, Davidnö tjiyobö, platatjöbi, orotjöbi, broncetjöbi.

¹¹ Jejenö tjiyiökwe, La'aka luwo̧ Davidma ja̧ tjiyaja̧ 'da̧batö ujuninobe, Isabenö Jo̧nö iyawa jawa jö̧ba̧lö, ju'wi 'da̧batö ujunina jawakwö. Ba̧kwelöjatebö ju'wedö tjitebo jojodönö ujuluwenama, Davidma tjitea platatjöbi, orotjöbi 'da̧batö ujuninobe, Isabenö Jo̧nö iyawa baibanö,

¹² Edom nijitjö do̧ataja̧bi, Moab nijitjö do̧ataja̧bi, amonitas jojodötjö do̧ataja̧bi, filisteo jojodötjö do̧ataja̧bi, amalecita jojodötjö do̧ataja̧bi, Rejob itji̧, Soba niji la'aka luwo̧ Hadad Ezertjö do̧ataja̧bi.

¹³ Ja̧danö, Sayu wabeko mikwobe, Davidma edomitas ölakwabikwawa jojodökwö ölakwabikwawenama, jobadötjö dieciocho milbedönö kwabawö loinobe. Ja̧danö, jobadönö ölakwabikwawö ȩwa̧jenama, ajayitjö bajalekwönönö okobe deinö tjöwaisachibinobe Davidnö, Isabenö juluwo̧ Davidma jö̧ba̧lö.

¹⁴ Ja̧danö, Edom niji̧ ju̧kwadönö juluwajo̧, Edom niji ba̧kwemeachibanö Davidma iteda ömöayedö ölakwabikwawa jojodö tju̧ju̧kwemi ujuninobe, edomitas jojodönö wetjobö, ja̧danö edomitas jojodöma David ömöayedö batjibinobe. Jejenö okobe jwiinö David ölakwabikwawö i̧'yiteniama, Isabenö Jo̧ma Davidnö pjaatinobe, öpöjojodönö ujuluwobö.

David ömöayedötjö luwedö tjö̧jina jawa

¹⁵ Davidma okobe jwiinö israel niji la'aka luwo̧ öjinobe, ja̧danö israel jojodö la'aka tjuluwo̧ ja̧nö, otiwanö jobadönö yöbawö weinobe. Ba̧kweminö, weo jö̧a̧lidanö ömöledö israel jojodönö yöbawö ö̧jinobe.

¹⁶ Ja̧danö David ömöayedötjö luwedöma, bidö: Sarvia jitji̧ Joab mikwo̧ma, ölakwabikwawa jojodö tjuluwo̧ ö̧jinobe. Ajilud itji̧ Josafat mikwo̧ma, baledaja̧ wene wȩyukwa luwo̧ ö̧jinobe.

¹⁷ Ajitob itji̧ Sadoc mikwo̧bi, Abiatar itji̧ Ajimelec mikwo̧bi, Diostjö jojodötjö tjö̧'dade pjabatadö otidö tjö̧jinobe. Seraias mikwo̧ma, la'aka luwo̧ yöawi̧ wȩyukwa luwo̧ ö̧jinobe.

¹⁸ Joyada itji̧ Benaias mikwo̧ma, la'aka luwo̧nö tjöbeba̧lö teada̧ladö tjuluwo̧ ö̧jinobe. Ja̧danö David itji̧mubi, luwedö tjö̧jinobe.