2 Samuel 6 - Dios Iwene

David isapjo Dios iteapjo emö i̧'yina jawa

¹ Jemi ikenama Davidma israel jojodötjö ömadö ölakwabikwawa jojodötjö treinta milbedönö ömudawö o̧ko̧kodinobe.

² Ja̧danö, ko̧ko̧dajo̧, jobadönö öbibö i̧'yinobe Balia de Juda ötjabobe, jobetjö isapjo Dios iteapjo tjemobö. Jo̧ba Diosma, Isabenö Jo̧, Okobe Jwiinö Juluwo̧ Dios, ja̧danö inesö iteakanö ö̧bȩmima, inesö juluwadö angeledö querubines ötjabawö̧ tjöwame Bo̧. Ja̧danö ja̧pjoma, Inesö Isabenö Jo̧ imida laebapjo.

^3-4 Japjoma Abinadab mikwo̧ ejunö ji̧nobe, ja̧danö jejuma mösa'o ja'yuwa'o wa̧pekwa'o ji̧nobe. Ja̧danö, ja̧pjo emajadö, koluka yayakanö tjaninobe, pa̧ka̧yadö tötjobö. Ikenama Abinadab i̧tji̧mu Uza mikwo̧bi, Ajio mikwo̧bi jwetjeba̧lonö, jobetjö latjebinobe. Ja̧danö kwetjachonö, Ajioma pa̧ka̧yadö tjabönö jwebeba̧lö i̧'yinobe.

Uza ö'wö baibina jawa

⁵ Ja̧danö, kwetjachonö, Davidbi, okobe deinö ju'wedö israel jojodöbi tjo̧'wo ösöwachibanö Isabenö Jo̧ öba a'otjö kwetjachinobe, lo̧böbi, lo̧awa jawa arpabi, lirabi, panderetasbi, sistrosbi, cimbalosbi ökwöinö.

⁶ Jo̧kwaijayonö Nacon mikwo̧ trigo sula'wo chabö loaweju badeibö tjichibenama, pa̧ka̧yadöma töbö metjo jö̧tja̧linobe, jo̧kwaiökwe Uzama Dios iteapjo do̧atinobe, kolukatjö meapji jö̧ba̧lö.

⁷ Jejenö maoko jawa maiökwe, Diosma ödameakwinobe Uzanö, ja̧danö jenada Diosma Uzanö lȩbebö kwabö loinobe. Jejenö lȩebökwe, jenada Dios iteapjo ö'öbö ja̧nö ö'wö baibinobe Uzama, Dios iteapjo maajobetjö̧.

⁸ Ja̧danö, jejenö jobetjö Uzanö Dios lȩebinobetjö̧, Perez Uza jö̧ba̧lö tjimidinobe, Uzanö lȩebinemi jö̧ba̧lö. Ja̧danö ina babebi jejenö ötjabobe. Ja̧danö, jejenö Isabenö Jo̧ Dios Uzanö kwabö loiökwe, ödameakwinobe Davidma.

⁹ Ja̧danö ja̧ möle Isabenö Jo̧nö yeaibinobe Davidma, —Yetabi, chitebo Jerusalenbe che'ewökako̧sa Isabenö Jo̧ iteapjoma, —jö̧ba̧lö.

¹⁰ Jo̧kwajabetjö̧, iteda itebo Jerusalen, David itebo comunidad ötjabobe e'ewobö öpöjödobetjö̧, jelobe jobetjö yöneawobe junö tji̧'yinobe, Gat comunidad jojo Obed Edom mikwo̧ ejube. Ja̧danö Obed Edom ejunö ujuninobe Isabenö Jo̧ iteapjoma.

¹¹ Jobe junajadö, tjȩwa̧jinobe Jerusalenbe, ja̧danö wamedukwa ja̧wo̧dö baledibanö, Gat comunidad jojo Obed Edom ejunö ji̧nobe Isabenö Jo̧ iteapjoma. Ja̧danö, iteda iteapjo Obed Edom ejunö jo̧betjö̧, Isabenö Jo̧ma otiwanö pjaatinobe, Obed Edomnöbi, ömöledönöbi.

¹² Ja̧danö la'aka luwo̧ Davidnö yötjawinobe, —Isabenö Jo̧ iteapjo Obed Edom ejunö jo̧betjö̧, otiwanö pjaatajabe jo̧banöbi, ömöledönöbi, okobe jwiinö ujuna̧li̧bi, —jö̧ba̧lö. Jo̧kwajabetjö̧, jejenö yötjawiökwe, Davidma Dios iteapjo ichejebinobe Obed Edom ejutjö, ja̧danö tjo̧'wo ösöwachibanö David itebo comunidad Jerusalenbe tjichejebinobe.

¹³ Baikwö laebobe Isabenö Jo̧ iteapjo tjichejebina jawama. Ömadö isapjo tjöböbe'onö e'ewadö bakwamu metro jenanö tji̧'yaja̧bema, tjöjamatinobe, ja̧danö Davidma pakayaso̧nöbi, jelo̧ Diosnö iyawo̧ o̧tewo̧nöbi kwabö juwö iyinobe Diosnö.

¹⁴ Ja̧danö, Davidma ödöado̧, linotjö otikwa̧do̧ 'duawinobe, ja̧danö Isabenö Jo̧ iteapjo ichejebö, jwiinö o̧'wo ösöwachibanö Isabenö Jo̧ öba a'otjö bailedanö döinobe, okobe jwiinö ujulunö o̧'wo ösöwanö döinobe.

¹⁵ Jejenö Davidbi, ju'wedö israel jojodöbi trompeta pjuböbi, labinö jwöbeba̧löbi tjo̧'wo ösödi̧nö Isabenö Jo̧ iteapjo tjichejebinobe Jerusalenbe.

¹⁶ Ja̧danö, Isabenö Jo̧ iteapjo e'ewö Jerusalen comunidad tetjachenama, Saul itjiju Mical mikwujuma, ventanasa'dotjö edö, jilekwe la'aka luwo̧ Davidnö jedinobe, Isabenö Jo̧ Diosnö ösödö, döbö kwebacho̧nö. Ja̧danö ja̧ edö, jöpöjödinobe jomajadenö, bite chilekwema mikwawö̧kö̧, la'aka luwo̧ kweacho jö̧a̧li̧danöma kwebachö̧kö̧ jö̧ba̧lö.

^17-18 Ja̧danö, Jerusalenbe ichibajadö, löwöte i̧sȩdo̧tjö otikwöte okwa tjujuninobe. Tjichejebakwa̧ abönö, Davidma tjujunakwöte otidinobe, ja̧danö jöte okwa Isabenö Jo̧ iteapjo tjujuninobe. Ikenama, isapjo junajo̧, Davidma Diosnö iyawa jwiinö ubinö iyawabi, ju'wi Dioskwö ösökwö ja̧kwawa iyawabi Isabenö Jo̧nö iyinobe. Ikenama, iyajo̧, Isabenö Jo̧ Okobe Jwiinö Juluwo̧ Diosnö aebinobe, israel jojodönö pjaatobö.

¹⁹ Ja̧danö, ju'wibi okobe deinö jobe ju̧kwadö Israel jojodönö kwakwawa iyabinobe, ömadönöbi, ya̧dönöbi bakwo̧nökwena pansapja̧ bakwapja̧bi, itebiyabi, ubatjö dalö isa'o baibanö tjotidinabi iyinobe, tjukwobö. Ikenama, okobe deinö jojodöma tjȩwa̧jinobe, bakwo̧nökwena tjejube tjewa̧jinobe.

²⁰ Ja̧danö, Davidbi ejube ȩwa̧jinobe, jojodönö pjaatobö Diosnö aebaja̧danö ömöledönöbi aebobö. Jo̧kwaijayonö ejube ichibenama, Saul itjiju Micalma jilekwe ichobekwö lajebinobe, ja̧danö jilekwe Davidnö sulabenö obö yöja̧linobe: —Ayö, Isabenö israel niji la'aka luwo̧nö obö tjomukwatobö kwalewajabe, baile döbö kwisȩbaja̧ma. Omukwatöködö taba jwiinö tjalewi̧danö, kwömöayedö midö tjeminawö̧ tjömöayedö ya̧dö tjeda̧lonö, kwö̧ka̧miji̧do kaekwa̧linö baile dököbajabe, tjöba a'otjö kwökamiji̧do̧ 'yobekwö loköbi̧danö, —jö̧ba̧lö Davidnö obö yöja̧linobe Micalma.

²¹ Yöja̧liökwe, Davidma atadinobe, —Ja̧ kwedaja̧ma, Isabenö Jo̧ öba a'otjö, jo̧banö ösödö dötatö. Jo̧ba chösödökwe Isabenö Jo̧da, ötjönö omudawö juninama, israel niji̧ la'aka luwo̧ batibanö. Jau Mical, kwabe'donöbi, kwöjawo̧dönöbi öpöjödö, Isabenö Jo̧ma ötjönö omudawö ujuninobe, iteda ömöledö israel jojodö tjuluwo̧ batibanö, jo̧kwajabetjö̧ tabakwökönö jo̧ba öba a'otjö cho̧'wo ösöwachibanö döbö chöjakwo̧sa.

²² Ja̧danö ju'wibi yötawakwö chilekwo, babe ja̧taja̧ kwöpöjödi̧tjö bajalekwönönö ja̧takwo̧sa, Davidma inesö mikwawö̧kö̧ jö̧ba̧lö kwomukwatenanö baibanö, jo̧kwaijayonö ökwöma mikwawö̧kö̧ jö̧ba̧lö kwomukwatonö, chömöayedö midö tjeminawö̧ tjömöayedö̧ ya̧döma, isabenö otiwanö tjomukwatakwedö ötjönö, Davidma otiwanö Diosnö ösödo̧ jö̧ba̧lö, —atadinobe Davidma, ilekwo Mical mikwujunö.

²³ Ja̧danö, Saul itjiju Mical mikwujuma, ji̧tji̧mu debuju jö̧jinobe, ö'wö bajibenanö baibanö.