2 Samuel 5 - Dios Iwene

David okobe deinö israel jojodö la'aka tjuluwo̧ baibina jawa

¹ Jemi ikenama, israel jojodötjö okobe deinö sasokwena tjuluwedöma David ö̧jobekwö tji̧'yinobe, Hebronbe. Ja̧danö, ichibö Davidnö yötja̧linobe baikwö: —David, isabenö yö̧ne dömöledöso̧ja, diwe'ijubi, ditebiabi bakwaibedösa, okobe deinö bakwo̧da Israelda i̧tji̧mu tupadanö jojodödobetjö̧.

² Isabenö ökwöda duluwo̧ kwö̧jobö jo̧be David, baikwö yöda̧la: Damötjö Saulmine duluwo̧ ö̧jayi, ökwöda ökwödötjö ölakwabikwawa jojodönö ökibijatö, döpöjojodönö dujuluwobö. Ja̧danö ökwönöda yöbawö ujuninobe Isabenö Jo̧ma, –Chömöledö israel jojodönö öbibö kwiteada̧lakwo̧ja, ja̧danö la'aka tjuluwo̧ kwö̧bakwo̧ja, –jö̧ba̧lö ökwönöda yöbawö ujuninobe. Jo̧kwajabetjö̧ isabenö inesö la'aka duluwo̧ kwö̧jobö jo̧be, —jö̧ba̧lö Davidnö yötja̧linobe.

³ Jo̧kwajabetjö̧, jejenö yöba̧lö, Hebrontjö okobe deinö israel jojodötjö luwedöma, Davidnö o̧te totjebinobe, isabenö biteda okobe deinö israel jojodö la'aka duluwo̧ jö̧ba̧lö. Ja̧danö Isabenö Jo̧ Dios öba a'otjö la'aka luwo̧ Davidbi jojodöbi isabenö otiwanö ja̧bö tjö̧jakwa̧ wene yöbawö tjujuninobe.

⁴ David israel jojodö tjuluwo̧ ö̧jina wene baikwö laebobe. Treinta o̧bia juna̧lo̧, ajayinö la'aka luwo̧ baibinobe Davidma, ja̧danö cuarenta o̧bia baledibanö la'aka luwo̧ ö̧jinobe.

⁵ Ajayinö Hebron comunidadtjö Judasaso jojodönöda yöbawö ö̧jinobe, jelemutjö dötölataja obia ja'ö baledibanö. Jemi ikenama, Jerusalentjö okobe deinö israel jojodönö yöbawö ö̧jinobe Davidma, o̧bia treinta y tres baledibanö.

David Jerusalen comunidad ujuluwina jawa

⁶ Baikwö laebobe David ajayinö Jerusalen ujuluwina wenema: Ajayinö israel jojodöböködö tjö̧jinobe Jerusalen comunidadnö, jebuseos ötjabawö̧ma. Jobadö jebuseo jojodöda ajayinö ja̧ nijinö ju̧kwinadöma, ja̧danö Davidma jobadönö ujuluwobö i̧'yinobe. Jerusalen comunidadma 'diinö tjöekwobe ji̧nobe, jo̧kwajabetjö̧ jejenö ichiawö̧, jebuseo jojodöma Davidnö obö yötja̧linobe, —La'akatjöda ökwödönö kwujuluwobö juluwö̧kö̧ja, ökwödötjö me'dawadö kwebachöködöbi, tjöbajale tjewawadöbi otiwanö tjötjeba̧lena, ökwödönö kwujuluwapji jö̧ba̧lö, —obö yötja̧linobe Davidnö, otiwanö 'diinö tjöekwobe ja̧dösa jö̧ba̧lö.

⁷ Jo̧kwaijayonö, jejenö tjomukwatijayonö, Davidma 'diinö tjöbebö tjotidinemi comunidad ujuluwinobe, iteda itebo comunidad baibanö. Ja̧ comunidadma ju'wi imi 'diinö tjöekwobe Sion ötjabobe, ju'wi imi David itebo comunidad jö̧ba̧lö ötjabobe.

⁸ Baikwö laebobe David Jerusalen ujuluwina wenema: Comunidad 'diinö tjöbebö tjotidinajayonö, ojwe teachemi sotjinobe, comunidad jojodö jelö watjobö. Ja̧danö Davidma iteda ömöayedö ölakwabikwawa jojodönö yöa̧linobe, —Jebuseo jojodönö tjujuluwo jö̧ba̧ladöma, ojwe teachemibenö tetjacho, jwiinö chöpöjödawö̧ tjötjeba̧lakwedö jö̧tja̧linawö̧ kwebachöködönöbi, tjöbajale tjewawadönöbi kwabö lotjobö, —jö̧ba̧lö. Jo̧kwajabetjö jejenö tebachö tjujuluwinobe jebuseo jojodönö. Ja̧danö, ja̧ David yöa̧linatjö laebobe babe jojodö yötja̧li̧ma, —Kwebachöködöbi tjöbajale tjewawadöbi o̧do okwa tebachöködö, —jö̧ba̧lö.

⁹ Ja̧danö 'diinö tjöekwobe Jerusalen comunidad juluwajo̧, Davidma jobe pjolachö ö̧jinobe itebo baibanö. Ja̧danö ja̧ comunidad imidinobe, David itebo comunidad jö̧ba̧lö. Ja̧danö Davidma nöinö comunidad tjotidobö weinobe, jalobe baibanö. Milo ötjabobetjö jamatö, comunidad okwa baibanö nöinö tjotidinobe.

¹⁰ Ja̧danö ajayitjö bajalekwönönö nöinö ujuluwachibinobe Davidma, Okobe Jwiinö Juluwo̧ Isabenö Jo̧ Dios jo̧banö otiwanö pjaatobetjö̧.

¹¹ Ja̧danö, Tiro comunidad la'aka luwo̧ Hiram mikwo̧ma yöbawadönö weinobe Davidnö, chömöledöbi kwömöledöbi wene jwiinö dö̧jakwedösa jö̧ba̧lö. Ja̧danö ju'wibi nöinö towi ötebiya weinobe Hiramma, otiwowi cedro ötjabowi ötebiyama, ja̧danö ja̧ towi ötebiya otidadönöbi, inawiya jawa otidadönöbi weinobe, David ö̧jakweju otiweju tjotidobö.

¹² Jo̧kwajabetjö̧, okobe jwiinö ja̧ baledi̧ edö, Davidma öwaisachibinobe, —Isabenö Jo̧ Diosma isabenö israel jojodötjö inesö la'aka luwo̧ batibanö pjaatajabe, —jö̧ba̧lö, ja̧danö, —Iteda ömöledö israel jojodönö ösödobetjö̧, nöinö chujuluwachibanö pjaatajabe, otiwanö israel jojodönö yöbawö chö̧jakobetjö̧ —jö̧ba̧lö öwaisachibinobe.

¹³ Hebrontjö labebö, Jerusalen comunidadnö ö̧jobö i̧'yinobe Davidma, ja̧danö Jerusalennö ja̧nö Davidma ju'wedö ilekwamunöbi eminobe, ja̧danö ajayitjö bajalekwönönö ba̧jȩkwadö i̧tji̧mu ömadönöbi ya̧dönöbi 'yaebinobe Jerusalentjö.

¹⁴ Jerusalentjö David i̧tji̧mu ömadö tjeminawö̧ tjimibiyama, baikwö laebobe: Samua mikwo̧bi, Sobab mikwo̧bi, Natan mikwo̧bi, Salomon mikwo̧bi,

¹⁵ Ibjar mikwo̧bi, Elisua mikwo̧bi, Nefeg mikwo̧bi, Jafia mikwo̧bi,

¹⁶ Elisama mikwo̧bi, Eliada mikwo̧bi, Elifelet mikwo̧bi.

David filisteo jojodönö ujuluwina jawa

¹⁷ Ja̧danö, filisteo jojodöma tja̧ja̧kwinobe, —Israel jojodöma Davidnö tjujunajabe, okobe deinö israel jojodötjö inesö la'aka luwo̧ baibanö, —jö̧ba̧lö. Jejenö a̧ja̧kwö, okobe deinö filisteo jojodöma ko̧ko̧kwö, ölakwabikwawa jojodönö wetjinobe, Davidnö tjujuluwobö. Ja̧danö, Davidma tjichakwa̧ wene a̧ja̧kwinobe, ja̧danö a̧ja̧kwö, 'diinö tjöekwobe i̧'yinobe.

¹⁸ Ja̧danö, filisteo jojodö tjichenama, wabeko Refayin ötjabobe ichibö, wabeko ba̧kwemeachibanö tjölakwabikwawobö tjabakwemi tjotidinobe.

¹⁹ Jejenö tjichibiökwe, Davidma abebö a̧ja̧kwinobe Isabenö Jo̧nö, —Chuluwo̧, filisteo jojodökwö ölakwabikwawö labebö chi̧'yakwa̧ji̧? Latebitjö̧ma, jobadönö chujuluwobö kwiyakwa̧ji̧? —jö̧ba̧lö. Aebökwe Isabenö Jo̧ma, —Jau, labebö ölakwabikwawaji, isabenö filisteo jojodönö kwujuluwobö chiyakobetjö̧, —jö̧ba̧lö atadinobe.

²⁰ Jö̧a̧lökwe, Davidma ömöayedö ölakwabikwawa jojodökwö filisteo jojodö tjö̧jobekwö i̧'yinobe, ja̧danö Baal Perasintjö filisteo jojodönö öbadekwajinobe, ja̧danö jwiinö jobadönö ujuluwinobe. Jobadönö ujuluwenama, Davidma yöa̧linobe, —Ojwe okwatö söbebö loi̧danö, Isabenö Jo̧ma chöba a'otjö chöpöjojodönö söbebö loajabe, —jö̧ba̧lö. Ja̧danö ja̧ yöa̧linatjö, jobe Baal Perazin jö̧ba̧lö tjimidinobe, Dios söbebö loinobe jö̧ba̧lö.

²¹ Isabenö jwiinö tjujuluwinobe filisteo jojodönö jobetjö, juluwanö dötjibajobetjö, tjösödawö̧ o̧'wo jawa okobe junibö, juluwanö dötjibajajinobe. Jadanö, okobe junibö dötjibajawö̧nö ko̧ko̧dö, jelobe e'ewö lotjinobe David ömöayedöma.

²² Jemi ikenama, ja'yubenö lekwajabetjö, filisteo jojodöma yemidanö Davidnö tjujuluwobö tjichinobe, ja̧danö yemidanö wabeko Refayin ötjabeko ba̧kwemeachibanö tjölakwabikwawobö tjö̧jinobe.

²³ Tjichiökwe, Davidma yemidanö Isabenö Jo̧nö abebö a̧ja̧kwinobe, —Filisteo jojodönö ölakwabikwawö latebakwa̧ji̧? —jö̧ba̧lö. Aebökwe, Isabenö Jo̧ma atadinobe, —Jweinöma jobadönö ölakwabikwawö lakeboko. Lakebenama, söpödibö, balsamo towibiya jo̧bekwö kwi̧'yö, tjö̧kö̧manö ichö jobadönö mekibobö.

²⁴ Jobe ichibajo̧, kwiteada̧lo̧, balsamo towi wa̧pekwowitjö ökwöakwa̧ kwa̧ja̧kwenanö kabatö. Towi wa̧pekwowitjö, ba̧jȩkwadö ölakwabikwawadö kwetjachobedanö ökwöakobe, ja̧danö ja̧ ökwöi̧ kwa̧ja̧kwenama, jenada filisteo jojodönö mekibobö ja̧kobe, kwöwaisakobetjö̧, –Isabenö Jo̧ma ida̧ökö chabönö filisteo jojodönö kwabawö i̧'yajabe jö̧ba̧lö, —yöawinobe Isabenö Jo̧ma, Davidnö.

²⁵ Weökwe, Isabenö Jo̧ weaja̧danö ja̧inobe Davidma, ja̧danö Gabaontjö, Guezerbe ichibenanö kabatö ba̧jȩkwadö filisteo jojodönö kwabawö loinobe.