2 Samuel 4 - Dios Iwene

Isbosetnö kwabö lotjina jawa

¹ Saulmine itji̧ la'aka luwo̧ Isbosetma a̧ja̧kwinobe, —Abnerma Hebrontjö ö'wö baibajabeta, —jö̧ba̧lö. Jejenö a̧ja̧kwenama, jwiinö yeaibinobe Isbosetma, ime'dawinö, ja̧danö ju'wedö ömöayedö israel jojodöbi jwiinö yetjaibinobe.

⁴ Ja̧danö jelo̧bi ö̧jinobe, Saul i̧tji̧mu tupadanö jojodötjöma, Saul ö̧'dö̧ Jonatanmine itji̧ Mefiboset mikwo̧ ö̧jinobe, ömasapiya suli̧ waekwinökwema. Jo̧ba ömasapiya suli̧ waekwina wenema baikwö laebobe. Mefiboset bakwamu jawa o̧biya ujuna̧lenama, abe'do Jonatanbi, a'dö Saulbi filisteo jojodökwö ölakwabikwawö debö tji̧'yinobe. Ja̧danö, ö'wö batjibaja̧ wene Jezrel comunidadtjö ichö yötjawenama, Mefibosetnö teada̧lujuma juluwanö jo̧banö do̧batö döjibajinobe, filisteo jojodö kwabawö tjichena jö̧ba̧lö. Ja̧danö juluwanö döjibajotö jö̧ba̧lö Mefibosetnö do̧ba̧lö ö'öjakwawemi ja'ötjö, Mefibosetma meinobe, ömasapiya 'deawinö. Jobekwö laebobe Mefiboset ömasapiya suli̧ waekwina wenema.

² Isboset ömöayedötjö du̧ju̧taja ölakwabikwawa jojodö tjuluwedö tjö̧jinobe, Rimon mikwo̧ i̧tji̧muma, Bana mikwo̧bi, Recab mikwo̧bi. Tjabe'do Rimonma Benjamin niji comunidad Berot jojo. Ja̧ Berot jojo jö̧ba̧lö laebi̧ma, israel jojobö̧kö̧ jö̧ba̧löma wanekwachokobe, ja̧ möle Berot comunidadma, Benjaminsaso jojodö tjö̧jemi comunidad.

³ Ajayinö ju'wedöda Berotnö tjö̧jinajayonö, damötjö̧ Guitayin comunidadbe dötjibajinobe, ja̧danö babe möle baibanö ina jobe Guitayin comunidadnö tju̧ju̧kwobe ajayinö Berotnö ju̧kwinadöma.

⁵ Ja̧danö, ju'wi möle baikwö baledinobe. Jobadö Isboset ömöayedö Recabbi, Banabi Isboset ejube tji̧'yinobe, ja̧danö möle ja'ö wöatena Isboset ejube tjichibinobe, Isboset aba̧lonö.

⁶ Ejube ichibajadö, o̧do okwa tetjachinobe, —Trigo emö tebachadösa, —jö̧ba̧lö. Jo̧kwaijayonö, tebachajadö, Isboset ukwa'wonö tibatö, jo̧banö kwabö lotjinobe, ja̧danö kwabö lobajadö, dötjibajinobe Recabbi, öjawo̧ Banabi.

⁷ Ja̧ baledina wene baikwö laebobe. Isbosetma abeko̧ okwa camapjonö ba̧nö aba̧linobe. Ja̧danö, jejenö aba̧lonö, o̧do okwa tebachö, aba̧leko̧ okwa tebachö, jo̧banö kwabö lotjinobe, ja̧danö kwabö lobajadö, uu tjubulatinobe. Ikenama, bulatajadö Isboset uu e'ewö dötjibajinobe, ja̧danö yö̧te baledibanö Araba ötjabobe tjöbaledinobe.

⁸ Jobe baledajadö, Hebronbe tjichibinobe, ja̧danö Isboset uu e'ewö tjiyinobe Davidnö. La'aka luwo̧ Davidnö iyö, yötja̧linobe baikwö: —Duluwo̧, kwöpöjojo Saul itji̧ Isboset uuma biyu diyakwö. Jau duluwo̧, damötjö Saulma ökwönö kwabö lootö jö̧ba̧lö isakwinobe, jo̧kwaijayonö babe möle Isabenö Jo̧ Diosma balekwa mikwa Saulnöbi, itji̧munöbi lȩebajabe, edi Isbosetnö kwabö lobajadö uu diyakwö, —jö̧ba̧lö.

⁹ Jo̧kwaijayonö, jejenö tjiyökwe, otiwa jö̧ba̧löma atadinokobe Davidma, wainö atadinobe Recabnöbi, Bananöbi: —Chuluwo̧ Isabenö Jo̧da okobe jwiinö wene chöbaledi̧tjö chö̧jibanö pjabato̧ma, ja̧danö jo̧ba ö̧ji̧ wene isabenö ji̧danö, ju'wi isabenö ji̧ wenebi yötawaduwakwö:

¹⁰ Damötjö bakwo̧ ichö yöawinobe Saul ö'wö baibaja̧ wenema, otiwa jawa wene yötawakwö jö̧ba̧lö. Jo̧kwaijayonö, –David ösödachibanö ja̧i̧ wene yöbawo̧sa, –jö̧ba̧lö omukwatö yöawijayonö, jo̧banö do̧batö kwabö lotijatö, Siclag comunidadtjö. Yöawaja̧ wene mikwa baibanö jo̧banö kwabö lotijatö.

¹¹ Jejenö jo̧banö kwabö lotinatjö̧ma, dakwö kwomukwataduwa, ökwödönö, –Otiwanö Isbosetnö kwabö loköbinaduwobe, –jö̧ba̧lö yöta̧lenaji̧? Ökwödöma sulabedöja, ja̧danö Isboset sulabenö ja̧ököjayonö, iteda eju okwa tebachö, camapjonö bo̧nö kwabö loköbaduwajabetija. Ajayinö Saul ö'wö baibaja̧ wene yöbawo̧nö kwabö lotinatjö̧ma, ökwödö jo̧ba sulabenö ja̧itjö̧ bajalekwönönö sulabenö ja̧bajadönö kwabö lotökenaji̧? Isbosetnö kwabö loköbaduwitjö̧, isabenö balekwa mikwa ökwödönö kwabö lobö, bö̧jȩtjö söbebö lotakwawö̧ja, —jö̧ba̧lö atadinobe Davidma.

¹² Ikenama, jö̧ba̧lajo̧, Davidma weinobe ömöayedönö, ja̧danö jobadönö kwabö lotjinobe. Ikenama, tjömamijubi, tjömasapiyabi 'wibö lobö, tjiteba'iju Hebron o̧pesobu ö'öbönö mö akwatö tjöninobe, —Bidöma sulabedö, —jö̧ba̧lö. Jo̧kwaijayonö Isboset uu emö, Abnernö tjödinemi okwa tjödinobe, Isbosetma otiwanö domukwatinökwe jö̧ba̧lö.