2 Samuel 3 - Dios Iwene

¹ Ja̧danö, lekwe möle Saulmine ömöledökwö, David ömöledökwö ölakwabikwawa ji̧nobe. Ja̧danö, tjölakwabikwawonö, tupakwönönö ujuluwachibinobe Davidma, jo̧kwaijayonö Saulmine ömöledöma tupakwönönö tjime'dawachibinobe.

David i̧tji̧munö 'yaebina jawa

² Baikwö laebobe Hebron comunidadtjö David ilekwamu tji̧tji̧munö tjemina wenema. David itji̧ abönö pöema, Amnon mikwo̧nö jeminobe. Amnon ojo'doma Jezrel jojosuju Ajinoan mikwuju.

³ Jo̧ba öjawo̧ma, Quileab mikwo̧. Quileab ojo'doma, Carmel jojosuju Nabal wobö ujunibinoko Abigail mikwuju. Jo̧ba öjawo̧ma Absalon mikwo̧. Absalon ojo'doma, Guesur niji̧ la'aka luwo̧ Talmay mikwo̧ itjiju Maca mikwuju.

⁴ Jo̧ba öjawo̧ma, Adonias mikwo̧. Adonias ojo'doma Jaguit mikwuju. Jo̧ba öjawo̧ma, Sefatias mikwo̧. Sefatias ojo'doma Abital mikwuju.

⁵ Jo̧ba öjawo̧ma, Itrean mikwo̧. Itrean ojo'doma, David ilekwo Egla mikwuju. Jobadö David itji̧muma, Hebron comunidadtjö tjeminawö̧.

Abner Davidnö pjaatina jawa

⁶ Saulmine ömöledökwö, David ömöledökwö ölakwabikwawö tjöjinobe, ja̧danö ölakwabikwawö tjö̧jonö, Abnerma ajayitjö bajalekwönönö Saul ömöledötjö luwo̧ baibinobe.

⁷ Ja̧danö, ju'wi möle baikwö baledinobe. Saul ilekwamu wobö ujunibinawö̧tjö bakwuju Aya itjiju Rizpa mikwuju jö̧jinobe, ja̧danö ju'wi mölȩ la'aka luwö̧ Isbosetma Abnernö jö̧a̧linobe, —Abner, tajawedö sulabenö chabe'domine ilekwo Rizpakwö kwö̧jaja̧da? Ökwöda la'aka luwo̧ bakibotö jö̧ba̧lö chabe'domine ilekwonö kwemobö kwomukwatiji̧? —jö̧ba̧lö.

⁸ Yöa̧lökwe, Abnerma jwiinö ölabinobe Isbosetnö, ja̧danö atadinobe: —Kwedemi juda niji̧ awilidanö chichejekwobeji̧, jejenö ötjönö sulabenö yöka̧loböma? Isabenö yötawakwö, ba̧kwelöjatebö jwaikwöda kwabe'dominenö ösödö pjatatajabe, kwabe'donöbi, öjawo̧dönöbi, ömöledönöbi. Ju'wibi ökwönö pjatatajabe. David ökwönö ujuluwobö webökönö, jwaikwöda ökwönö pjatatajabe. Jo̧kwaijayonö, jwaikwöda kwabe'donöbi, ökwönöbi pjabatö ji̧achijayonö, ötjönö sulabenö yöka̧lajabe, –Sulabenö isujunö 'da̧bö jo̧ja, –jö̧ba̧lö.

^9-10 Jo̧kwajabetjö̧ baikwö yötawakwö Isboset, Isabenö Jo̧ma damötjö Davidnö yöbawö ujuninobe, –Davidda okobe deinö Israel jojodö la'aka tjuluwo̧ ö̧jakwo̧, –jö̧ba̧lö, jö̧tö? Jau, Isabenö Jo̧ma damötjö yöbawö ujuninobe, Saul la'aka luwo̧ ö̧binemima, Saul ömöledötjö 'döbebö, Davidnö iyobö, ja̧danö isabenö yötawakwö Isboset, ötjönö sulabenö yöka̧litjö̧, ötjöma ja̧ Dios jö̧a̧lina wene badekwachinö ja̧takwo̧sa. Okobe deinö kwabe'do Saulmine ömöayedö israel jojodö Davidda ömöayedö batjibanö ja̧takwo̧sa, u'da Dan comunidadtjö, alikwö Berseba niji̧be ichibanö, okobe jwiinö israel niji̧ la'aka luwo̧ Davidda baibenanö kabatö. Jejenö isabenö ja̧takwa̧ wene yötawakwö Isboset, ja̧danö yöta̧laja̧danö ja̧tökötjö̧ma, Dios isabenö ötjönö lȩebobö ja̧kobe, —jö̧ba̧lö atadinobe Abnerma, Isbosetnö.

¹¹ Jejenö yöa̧liökwe, atadakwawa jwiinö ö̧jinobe Isbosetma, Abnernö yeabobetjö̧.

¹² Ja̧danö jejenö Isboset Abnernö sulabenö yöa̧laja̧ ikenama Abnerma yöbawadönö weinobe, iteda yöawi̧ Davidnö yötjawobö, baikwö: —David, ditebo niji̧ma, ökwöda yöbawö weköbo jö̧ka̧lemi niji, jö̧tö? Jo̧kwajabetjö̧, baikwö yötawakwö, ökwökwö ötjökwö otiwanö ja̧dakwa̧ wene yöbawö dujunitjö̧ma, isabenö ökwönö pjatatakwo̧sa, okobe deinö israel jojodönö ötibakwo̧sa, ökwöda inesö la'aka tjuluwo̧ bakibobö, —jö̧ba̧lö Davidnö yötjawobö weinobe Abnerma.

¹³ Yötjawökwe, Davidma ösödinobe, ja̧danö Abnernö atadaja̧ yötjawobö weinobe baikwö: —Jau Abner, otiwa, otiwanö ja̧dakwa̧ wene yöbawö dujunakwedösa, ötjökwö ökwökwö. Jo̧kwaijayonö jejenö yöbawö dujunakwa̧ abönö bakwöta jawa wetakwö. Ötjönö edö kwichenama, chilekwo Saul itjiju Mical mikwujunö tjebatajö kwichejebo. Chilekwo Mical deinö, chöba a'o kwichibobö jwiobe, —jö̧ba̧lö atadinobe Davidma Abnernö.

¹⁴ Ja̧danö Davidma yöbawadönö weinobe iteda yöa̧li̧ Isbosetnö yötja̧lobö baikwö: —Chilekwo Mical mikwujunö tjebatajitjö. Isabenö jobujunö chemobö chimidijatö kwabe'donö, filisteo jojodö cienbedönö kwabawö lobajo̧, tjötade bajalesa̧diju kwabe'donö chiyijatö, itjiju Micalnö chemobö. Jo̧kwajabetjö chilekwonö tjebatajitjö, —jö̧ba̧lö.

¹⁵ Yötja̧lökwe, Isbosetma weinobe ömöayedönö, jilekwe Paltiel mikwo̧tjö 'döbebö, Davidnö tjetjatobö Micalnö.

¹⁶ Jejenö 'dötjebiökwe, jilekwe Paltielma jökömanö budekwö i̧'yinobe, Bajurinbe tjichibenanö kabatö. Ikenama, Bajurintjö Abnerma Paltielnö webö loinobe, ja̧danö weökwe, ȩwa̧jinobe.

¹⁷ Jemi ikenama Abnerma israel jojodötjö luwedökwö yöa̧lakwawinobe, baikwö: —Ida̧ökö lekwe möle Davidnö la'aka kwuluwo̧duwi baibanö kwujunaduwobö omukwatadöja, jö̧tö?

¹⁸ Babema jejenö kwomukwataduwi̧ badekwachinö ja̧köbaduwobö jo̧be, baikwö yötawa. Isabenö Jo̧ Diosma damötjö yöbawö ujuninobe Davidnö: –Ökwö Davidma chömöayo̧ja, ja̧danö ökwönötjö̧ chömöledö israel jojodönö pjatatakwo̧sa, filisteo jojodötjöbi, ju'wedö tjöpöjojodötjöbi tjö̧jibinö –jö̧ba̧lö yöbawö ujuninobe Davidnö. Jo̧kwajabetjö babema inesö la'aka duluwo̧ baibanö dujunonö, —jö̧ba̧lö yöa̧linobe Abnerma, israel jojodötjö luwedönö.

¹⁹ Ja̧danö Saul ömöledösaso Benjamin jojodönöbi jejenö yöa̧lakwawinobe Abnerma, ja̧danö yöba̧lakwawajo̧, Davidnö edö i̧'yinobe Abnerma, Hebronbe. Davidnö yöawobö i̧'yinobe Abnerma, —Benjaminsaso jojodöbi, ju'wedö israel jojodöbi, ökwö Davidnö inesö la'aka tjuluwo̧ baibanö tjujunobö ösödadötö, —jö̧ba̧lö.

²⁰ Hebronbe i̧'yenama, Abnerma ömöayedötjö veintebedönö öbibö i̧'yinobe ja̧danö tjichibiökwe, Davidma ösödinobe, ja̧danö jobadökwö ba'ali ujuninobe, bakobe ösödabikwawö tjukwobö.

²¹ Ja̧danö, jobe yöba̧lakwawö, Abnerma Davidnö yöa̧linobe, —Chuluwo̧, kwösöditjö̧ma, okobe deinö israel jojodönö ko̧ko̧dö chi̧'yocha, ko̧ko̧kwö ökwökwö isabenö kwömöayedö batjibakwa̧ wene yöbawö tjujunobö. Ja̧danö, jejenö kwösödi̧danö okobe deinö israel jojodö inesö la'aka tjuluwo̧ kwö̧jakwo̧ja, —jö̧ba̧lö yöa̧linobe Abnerma Davidnö. Yöa̧lökwe, David ösödinobe, —Yöka̧laja̧danö ja̧baji, —jö̧ba̧lö. Ja̧danö jejenö ja̧otö jö̧ba̧lö, wene jwiinö David ö̧jelö laebinobe Abnerma.

²² Jemi ikenama, Abner laebaja̧ ikenama, Joabbi, David ömöayedötjö ju'wedöbi jelobe ju̧kwadönö juluwajadö tjewa̧jinobe, nöinö tea emajadö tjȩwa̧jinobe. Jo̧kwaijayonö, tjichibenama, deinobe Abnerma, tjichibakwa̧ abönö ida̧ökö wene jwiinö Abner laebobö David weajobetjö̧.

²³ Ja̧danö Joabbi, ju'wedö David ömöayedö ölakwabikwawadöbi tjichibenama, jojodö Joabnö yötjawinobe: —Abnerma Davidnö edö ichajabeta, ja̧danö yöba̧lakwawajadö, Abner wene jwiinö ȩwa̧jobö David weajabeta, —jö̧ba̧lö.

²⁴ Yötjawökwe, Joabma David ö̧jobekwö 'ya̧nö yöa̧linobe, —Taji sulabenö ja̧köbaja̧da? Abner kwöjobekwö ichenama, tajawedö wene jwiinö ȩwa̧jobö weköbaja̧da? Wene jwiinö ȩwa̧jobö weköboko jö̧ka̧lajabe.

²⁵ Kwöwaisa David, Abnerma isabenö kwöpöjojo, ja̧danö ökwönö omöna yöa̧lotö jö̧ba̧lö ichajabeta. Isabenö ichaja̧ma, ja̧bö kwö̧ji̧bi, kwekachi̧bi edö öwaisotö jö̧ba̧lö ichajabeta, tupakwö ökwönö ujuluwobö, —jö̧ba̧lö yöa̧linobe Joabma Davidnö.

²⁶ Ja̧danö David ö̧jelö laebenama, David wajwionö yöbawadönö weinobe Joabma, Abnernö —Tjebachaji, —jö̧ba̧lö yötjawobö. Ja̧danö, 'ya̧jadö, ojwese'do Sira mikwe'do ö'öbönö badekwajadö yötjawinobe Abnernö.

²⁷ Yötjawökwe, Hebronbe tjeachajinobe Abnerma, ja̧danö comunidad apjudebe ichibenama, Joabma jo̧banö öbadekwajinobe. Ja̧danö, badekwajo̧, —Ichi, jojodö tja̧ja̧kwokonö yöda̧lakwawo, —jö̧ba̧lö, apjude ö'öbökwö öibinobe Abnernö. Jo̧kwaijayonö, yöda̧lakwawo jö̧ba̧lö yöa̧lajayonö, kwölöte'onö doinobe Abnernö, ukwa'wonö. Ajayinö Abner Joab öjawo̧ Asaelnö kwabö loiökwe, balekwa mikwa Abnernö kwabö loinobe Joabma, ja̧dano jobe ö'wö baibinobe Abnerma.

²⁸ Jejenö baledaja̧ yötjawiökwe, Davidma yöa̧linobe, —Ötjöbi, ju'wedö chömöayedöbi Isabenö Jo̧ öba a'otjö wene jwibadösa, ja̧ Abnernö kwabö loaja̧ma ökwödö jawamaökö.

²⁹ Abnernö kwabö loawa wene saami̧ma, Joabnöda, ja̧danö okobe deinö abe'do i̧tji̧mu tupadanö jojodönöda saamobö jo̧be, jobadöda jawaobetjö̧. Jau, isabenö Dios jobadönö lȩebobö chösöda, sulabenö Abnernö kwabö loajobetjö̧. Diosnö ateba, kabatökönö Joab i̧tji̧mu tupadanö jojodö tjö'wöchobö, wale'de saamoböbi, lepra saamoböbi, kwebachöködö tjö̧joböbi, ju'wedö kwabö lotjawö̧ wotjoböbi, a̧wi̧chi̧ tjötjoböbi Dios lȩebobö ateba, —jö̧ba̧lö öpöjödö yöa̧linobe Davidma, Abnernö kwabö loaja̧ wene a̧ja̧kwenama.

³⁰ Jobekwö baledinobe Joabbi, öjawo̧ Abisaibi Abnernö kwabö lotjina wenema. Gabaontjö tjölakwabikwawelö Abner tjöjawo̧ Asael mikwo̧nö kwabö loiawö̧, balekwa mikwa Abnernö kwabö lotjinobe.

David Abnernö ubudekwina jawa

³¹ Ikenama Davidma Joabnöbi, okobe deinö ju'wedö jo̧bakwö ju̧kwadönöbi weinobe: —Abnernö o̧tjö̧ di̧'yonö, kwö̧ka̧mijido̧ kȩekwö, kamijido̧ epju̧yunö kalukaa̧do̧ 'dubawö, Abner iteba'o abönö kwebachö kwubudekwaduwo, —jö̧ba̧lö. Ja̧danö, Abnernö o̧tjö̧ tji̧'yena, Davidma iteba'o a̧ja̧pjo ökömanö kweachinobe, chömöledöso̧nö do̧tjo̧be jö̧ba̧lö.

³² Ja̧danö, Hebrontjö Abnernö tjödinobe, ja̧danö lödajadö, tjödajemi ö'öbö ja̧nö labinö ubudekwinobe Davidma, ja̧danö ju'wedö jojodöbi tjubudekwinobe.

³³ Ja̧danö Davidma o̧'wo tjo̧achö lo̧inobe Abnernö baikwö: —Chömöledöso̧ Abnerma, otiwo̧inobe, jo̧kwajabetjö̧ sulabedö ö'wö batjibi̧danöma ö'wö baiboko jö̧a̧lajabe.

³⁴ Abner, ökwöma sulabo̧danöma ichejekwö̧kö̧ja ö'wö bakibaja̧ma. Sulabedönö, tjö̧mamijubi, tjömasapiyabi nu'yö di̧batö kwabö lotjawö̧, jo̧kwaijayonö ökwöma kwömamijubi, kwömasapiyabi di̧tjatökökwe ö'wö bakibajabe. Jau Abner, ö'wö bakibaja̧ma, otiwo̧kö̧bijayonö, ömadö sulabedöma sulabenö kwabö lotjinobe ökwö chömöledöso̧ otiwo̧nö, chömöledöso̧ Abnerwe, —jö̧ba̧lö lo̧awa lo̧inobe Davidma, Abnernö budekwö. Ja̧danö okobe deinö jojodöbi Abnernö tjubudekwinobe.

³⁵ Ja̧ Abnernö tjo̧tja̧ja̧ mölema kwakwawa ukwinokobe Davidma, ja̧danö Abnernö tjo̧tja̧ja̧ ikena, okobe deinö jojodöma Davidnö ukwobö atjebinobe, —Ina dewayi kwakwawa kwukwo duluwo̧, —jö̧ba̧lö. Jo̧kwaijayonö David öpöjödinobe, —Dios öba a'otjö yötawaduwakwö, ja'yubebi kwakwawa chukwökakwo̧sa, yö̧te baibenanö kabatö, ja̧danö ina dewayi chukwitjö̧ma, Dios lȩebobö jȩna, —jö̧ba̧lö.

³⁶ Ja̧ baledi̧ tjedinobe jojodöma, ja̧danö edö tjösödinobe, Isabenö duluwo̧ Davidma otiwo̧ jö̧ba̧lö. Isabenö okobe jwiinö David ja̧bö ö̧ji̧ edö tjösödinobe jojodöma.

³⁷ Ja̧ möle baledi̧ edö, okobe deinö jojodöma edö tjöwaisinobe, —La'aka luwo̧ Davidma Abnernö kwabö lotjobö öpöjödinobe, —jö̧ba̧lö.

³⁸ Ja̧danö Davidma iteda yöne ömöayedönö yöa̧linobe, —Kwomukwataduwökiji̧, babe mölȩ bakwo̧ la'aka luwo̧ma ö'wö baibajabe, isabenö israel jojodötjö bakwo̧ inesö juluwo̧ma ö'wö baibajabe, ja̧ kwomukwataduwobö jo̧be, —jö̧ba̧lö.

³⁹ Tupakwö yöawinobe Davidma, —O̧te tobebö, la'aka luwo̧ baibanö tjujuninökwema ötjödasa, jo̧kwaijayonö babe mölȩma juluwo̧danömabö̧kö̧sa, me'dawo̧danöbo̧sa. Idö Sarvia ji̧tji̧mu Joabbi, Abisaibi isabenö labidö, ja̧danö jobadönö chödöyötobö juluwö̧kö̧sa. Isabenö Jo̧ Diosda jobadönö lȩebakwo̧, sulabenö Abnernö kwabö lotjiökwe, isabenö Diosda balekwa mikwa lȩebakwo̧, —jö̧ba̧lö yöa̧linobe Davidma.