2 Samuel 24 - Dios Iwene

David jojodönö tjö̧ba̧jadobö weina jawa, dokwa ba̧jȩkwadö tjö̧jojobö jö̧ba̧lö

¹ Ja̧danö, Isabenö Jo̧ma yemidanö israel jojodönö ödameakwinobe. Baikwö laebobe jobadönö ödameakwina wenema. Davidnö weinobe, israel jojodönö suli̧ waedö, jobadönö ba̧ja̧dakwawa weobö, baikwö: —Israel jojodönöbi, juda jojodönöbi kwö̧ba̧jado, kwömöayedö ölakwabikwawa jojodönö kwöwaisobö, dokwa ba̧jȩkwadö tjö̧jojobö, —jö̧ba̧lö.

² Jo̧kwajabetjö̧ la'aka luwo̧ Davidma, ölakwabikwawa jojodötjö la'aka luwo̧ Joabnö weinobe, —Israel niji̧ ba̧kwȩmeachibanö okobe deinö israel jojodötjö tjölakwabikwawobö juluwadönö ba̧ja̧dö kwekacho, chömöayedö ölakwabikwawa jojodö dokwa ba̧jȩkwadö tjö̧jojobö chöwaisakobetjö̧. Okobe jwiinö israel niji ba̧kwemeachibanö kwi̧'yo, u'dakwö Dan comunidatjö, a̧likwö Berseba comunidadbe kwichibenanö kabatö, —jö̧ba̧lö weinobe Davidma Joabnö.

³ Weökwe, Joabma öpöjödinobe, —La'aka chuluwo̧, jejenö dö̧ba̧jadoko. Isabenö dömöledö israel jojodö tjö̧ba̧jekwachobö jo̧be, ja̧danö kwuluwo̧ Isabenö Jo̧ Dios babe tjö̧ji̧tjö jwiinö bajalekwönönö tjö̧ba̧jekwachinö pjaatobö chösöda, ina 'yaba̧lo̧ kwö̧jayi tjö̧ba̧ja̧dökenanö tjö̧ba̧jekwachibobö chösöda. Jo̧kwaijayonö, tajawedö jojodönö dö̧ba̧jadobö kwösöda, dö̧ba̧jaditjö̧ma sulena la'aka chuluwo̧, —jö̧ba̧lö atadinobe.

⁴ Jo̧kwaijayonö, jejenö öpöjödö atadijayonö, yayonö la'aka luwo̧ Davidma jwaikwöda labinö weinobe Joabnöbi, ömöayedö ölakwabikwawa jojodö tjuluwedönöbi, jojodönö tjö̧ba̧jadobö. Jo̧kwajabetjö̧, weawö̧, tjuluwo̧ ö̧jelö labebö, israel jojodönö tjö̧ba̧jadobö tji̧'yinobe.

⁵ Jordan ojwe pebibö, Aroer comunidadtjöbi, ju'wi comunidad jobe pjeanö wabeko jȩmi comunidadtjöbi, jamatö tjö̧ba̧ja̧dinobe. Ikenama, jobe ba̧ja̧dadö, u'dakwö ba̧ja̧dö tji̧'yinobe, Gad nijibenö, Jazer comunidadbe.

⁶ Ikenama, jobe ba̧ja̧dadö, tupakwö Galaad nijibenö tji̧'yinobe, hitita jojodö tjitebo comunidad Kedesbe. Ikenama tupakwö Dan comunidadbe ba̧ja̧diabö tji̧'yinobe. Ikenama Dantjö labebö, ja̧wo̧ meajobekwö Sidon comunidadbe ba̧ja̧diabö tji̧'yinobe.

⁷ Ja̧danö ba̧ja̧diabö tji̧'yonö, 'diinö tjöekwobe comunidad Tirobe tjichibinobe, ja̧danö okobe deinö heveos jojodöbi, cananeos jojodöbi tjitebo comunidadtenia ba̧ja̧diabö tjöbaledinobe. Ja̧danö bajaliyanö Juda nijitjö a̧li̧kwöchobe jȩmi comunidad Bersebabe ichibanö ba̧ja̧diabö tji̧'yinobe.

⁸ Jejenö okobe jwiinö israel niji ba̧kwemeachibanö ba̧ja̧diabö kwetjachinobe, jawo̧dö jelemutjö̧ ö'wejemubedökwö, veinte mölekwö baledibanö. Ja̧danö, jejenö lekwe ba̧ja̧dadö, Jerusalenbe tjȩwa̧jinobe.

⁹ Ichibajo̧, Joabma la'aka luwo̧ Davidnö yöawinobe tjö̧ba̧ja̧daja̧ma, —Israel nijitjö̧ okobe deinö tjölakwabikwawobö juluwadö ömadöma, ochocientos milbedö tjö̧jobe, ja̧danö juda nijitjö quinientos milbedö tjölakwabikwawobö juluwadö tjö̧jobe, —jö̧ba̧lö.

¹⁰ Ikenama, jojodönö ba̧ja̧dajo̧, Davidma jwiinö o̧'wo tjo̧ekwinobe omajadenö, —Sabö, jojojonö tjö̧ba̧jadobö wetinökötjö̧bö, sulabenö Dios öpöjödinö ja̧tajabe, —jö̧ba̧lö. Ja̧danö, o̧'wo tjobekwö, Isabenö Jo̧nö aebinobe, —Chuluwo̧ Isabenö Jo̧, isabenö jwiinö sulabenö ja̧tajabe. Sulabenö omukwatö̧kö̧ ja̧nö, kwöpöjödinö sulabenö ja̧tajabe chuluwo̧ Isabenö Jo̧, jo̧kwajabetjö atebakwö, kwöba a'otjö wene chujuna̧li̧ söbebö loköbobö, —jö̧ba̧lö aebinobe.

¹¹ Gad mikwo̧ma, Dios yöawi̧ Davidnö yöbawö ö̧jinobe, ja̧danö jemi ikena möle, David yȩayi a̧la̧ibenama, Isabenö Jo̧ma iteda yöawi̧ weinobe Gadnö, Davidnö yöawobö, baikwö:

¹² —David ö̧jobekwö 'ya̧nö yökawonö, –Baikwö laebobe Isabenö Jo̧ ökwönö yöawi̧ma, sulabenö ja̧köbinobetjö̧ isabenö lȩtebakwa̧ jo̧be, ja̧danö lȩebakwawa jawa wapötakwa jawa yötawakwö, ökwöda lȩtebakwa̧ omudawö kwujunobö, —jö̧ba̧lö Gadnö weinobe, Davidnö yöawobö.

¹³ Weökwe, David ö̧jobekwö ichibö, Dios yöawaja̧ yöawinobe Gadma, ja̧danö David omudawö ujunobö yöawinobe: Bi̧ya Dios lȩebakwa̧ma, ¿dakwö lȩebobö omudawö kwujujunobeda? Wapötakwa o̧biya baledibanö a̧wi̧chi̧ tjöoböö̧kö̧, wamedukwa ja̧wo̧dö baledibanö kwöpöjojodö ökwödönö tjujuluwonö dökibajaduwoböö̧kö̧, wapötakwa möle baledibanö jojodö tjö'wöchobö Dios weoböö̧kö̧. Ökwöda omukwatö yöbawitjö, ötjönö webinanö ȩwa̧bijö chatadakobetjö̧.

¹⁴ Yöawökwe, Davidma Gadnö atadinobe, —Jwiinö cho̧'wo tjo̧acha, isabenö waiya omudawö chujunobö. Jo̧kwaijayonö, Isabenö Jo̧nö chöwaisa, jo̧bama inesö lȩlöjinö edo̧, jö̧ba̧lö. Jo̧kwajabetjö̧ bö̧jȩ jojodö ötjönö lȩtjebobö omudawö chujunökö, Isabenö Jo̧ Diosda wapötakwa möle baledibanö dö'wöchinö ökwödönö lȩebobö omudawö chujuna, jo̧bama inesö lȩlöjinö edo̧ jö̧ba̧lö chöwaisobetjö̧, —jö̧ba̧lö atadinobe Davidma, Gadnö.

¹⁵ Jejenö atadökwe, Isabenö Jo̧ma ja̧ möle yeayi jamatö, badedö ujunina mölȩ baibanö israel niji ba̧kwemeachibanö jojodö tjö'wöchobö weinobe, u'da bajale comunidad Dantjö, a̧likwö bajale comunidad Berseba baibanö okobe jwiinö israel niji ba̧kwemeachibanö tjö'wöchinobe. Ja̧danö, tjö'wöchi̧tjö̧ israel jojodö setenta milbedö ö'wö batjibinobe.

¹⁶ Ja̧danö, weökwe kwabawö lobo̧ angel Jerusalenbe ichibö, jojodö tjö'wöchinö kwabawö loobö ichibenama, Isabenö Jo̧ma lȩlöinö edö, angel kaatakwawobö weinobe, —Tjo̧wita, kwabawö lobö kabatakwawi, —jö̧ba̧lö. Ja̧danö jejenö weenama, Isabenö Jo̧ weökwe angelma jebuseo jojo Arauna eju, trigo sula'wo chabö loawejunö ö̧jinobe.

¹⁷ Davidma kwabawö lobo̧ angelnö edinobe, ja̧danö edö Isabenö Jo̧nö aebinobe, —Isabenö Jo̧, ötjödasa sulabenö ja̧binama, ötjönöda lȩkebobö jo̧be. Jau chuluwo̧, chömöayedö israel jojodöma, sulabenö ja̧böködö obejadödanö ichejekwadö, jobadöma sulabenö ja̧tjinokobe. Ötjödasa sulabenö ja̧binama chuluwo̧, jo̧kwajabetjö̧ atebakwö, ötjönöda, ja̧danö yöne chömöledönöda lȩkebobö, ju'wedö israel jojodönö lȩbebökönö, —jö̧ba̧lö aebinobe Davidma.

¹⁸ Ja̧danö ja̧ möle Gadma David ö̧jobekwö ichibö weinobe, —Jebuseo jojo Arauna miwko̧ trigo sula'wo chabö loawejube nöchö, jobetjö Diosnö iyawöte otidö, kwabö juwö kwiyo Diosnö, —jö̧ba̧lö.

¹⁹ Jejenö Isabenö Jo̧ weaja̧ Gad yöawökwe, Davidma jobe önöchinobe ömöayedökwö,

²⁰ ja̧danö Araunama edö, la'aka luwo̧ David ömöayedökwö ö̧jobekwö ichobe edinobe. Tjichobe edö, Araunama labebö, öba nijakwö David öba a'o bȩbachibö ösödinobe, chuluwo̧ja jö̧ba̧lö.

²¹ Ja̧danö Araunama abebö a̧ja̧kwinobe, —Chuluwo̧ la'aka luwo̧, tajawedö ötjö kwömöayo̧ chö̧jobekwö kwichaja̧da? —jö̧ba̧lö. Abebö a̧ja̧kwökwe Davidma atadinobe, —Kweju trigo sula'wo chabö loaweju midö chemobö chichajabe, jobetjö Isabenö Jo̧nö iyawöte otidö, Isabenö Jo̧nö kwabö juwö chiyobö, jojodö tjö'wöchi̧nö lȩebi̧ma kaatakwawakobetjö̧, —jö̧ba̧lö atadinobe Davidma.

²² Atadökwe, Araunama Davidnö yöa̧linobe, —Chuluwo̧ la'aka luwo̧, okobe jwiinö kwösödi̧ma, mikwa jwiinö emö Diosnö kwiyo. Bidö chajwimu pa̧kayadönö kwemo, kwabö juwö kwiyobö, ja̧danö towi ötebiya trigo jawa otikwötebi, pa̧ka̧yadö töawa jawa okwi'ijubi kwemo, imi baibanö kwujuwobö.

²³ Jau chuluwo̧, okobe jwiinö bi̧ya jawama, ötjö Araunama ökwö la'aka chuluwo̧nö chiyakwö, Diosnö kwiyobö. Ja̧danö, jejenö kwiyiökwe, kwuluwo̧ Isabenö Jo̧ Dios kwiyi̧ ösödobö chösöda, —jö̧ba̧lö yöa̧linobe Araunama.

²⁴ Jo̧kwaijayonö, mikwa jwiinö chiyakwö jö̧ba̧lö yöa̧lökwe öpöjödinobe la'aka luwo̧ Davidma, —Mikwa jwiinöma chemökö, midö chemobö chösöda. Jau, la'akatjöda mikwa jwiinö chemaja̧ jawa Chuluwo̧ Isabenö Jo̧ Diosnö chiyobö jwiobe. Diosnö chiyakwa̧ jwiinö ubinö chiyakwa̧ma, midö chemaja̧ jawada chiyobö chösöda, —jö̧ba̧lö yöa̧linobe Davidma, ja̧danö platatjö cincuenta ö̧pibiya midö, trigo sula'wo chabö loawejubi, pa̧kayadönöbi eminobe, Diosnö kwabö juwö iyobö.

²⁵ Ja̧danö, emajo̧, Davidma jobetjö iyawöte otidinobe, ja̧danö Isabenö Jo̧nö jwiinö ubinö iyawabi, jojodö bakobe Dioskwö ösökwö ja̧kwawa jawa iyawabi jobetjö juwö iyinobe. Jejenö iyö, Isabenö Jo̧nö aebinobe, israel jojodönö lȩlöjinö edobö, ja̧danö a̧ebökwe, a̧ja̧kwinobe Isabenö Jo̧ma, ja̧da̧nö lȩlöjinö edö, israel jojodö tjö'wöchi̧ kaatakwawobö weinobe.