2 Samuel 23 - Dios Iwene

David bajaleapo i̧wȩyudina jawa

¹ Davidma Isai itji̧, ja̧danö Dios ujuninökwe, inesö la'aka luwo̧ ö̧jobö. Jacobo ösödinökwe Dios omudawö ujuninökwe Davidma, israel jojodö la'aka tjuluwo̧ baibanö. Ja̧danö ju'wibi, Israel jojodötjö inesö otiwa jawa lo̧awa wȩyudo̧, jö̧ba̧lö ötjabinobe Davidnö. Baikwö laebobe David bajaleapo waisanö i̧wȩyudinama:

² Isabenö Jo̧ O̧'wo Luwo̧ma ötjönötjö yöawobe, bi̧ya yötawi̧ma iteda iwene yötawobe.

³ Jau, israel jojodö dösödökwe Dios, ökwödö israel jojodönö tjö̧beba̧linö teada̧lo̧ma yöawajabe, baikwö yötawobö: Jojodö inesö la'aka tjuluwo̧, Diosnö yebabinö omukwatö, Dios ösödi̧danö ömöayedönö yöbawö webo̧ma, isabenö otiwanö ömöayedönö pjabato̧.

⁴ Jau, la'aka luwo̧ otiwo̧ma, jawo̧ yȩayi̧ ojwiyo'wo jwiena dejato̧danö ichejekwo̧, ja̧danö ojwiyo o̧bi̧danö ichejekwo̧, ja̧tjö̧ meje'ye otiwanö pokwi̧danö, iteda ömöayedö otiwanö tjö̧da̧peachobö öibobetjö̧.

⁵ Jobekwö yöawajabe Diosma, la'aka luwo̧ otiwo̧nö, ja̧danö, jejenö jo̧be, Dios öba a'otjö israel jojodönö yöbawö chö̧ji̧ma. Jo̧kwajabetjö̧, otiwanö israel jojodönö yöbawö chö̧jiökwe, Diosma isabenö ja̧akwa̧ wene yöbawö ujunajabe ötjönö, ba̧kwelöjatebö ja̧kwa̧ yöbawö junawama. Yöbawö ujuni̧ma, okobe jwiinö otiwanö labebö lobö yöawajabe, la'akatjöda balewö loawa jwii̧ wenema. Isabenö ötjönöbi chi̧tji̧mu tupadanö jojodönöbi pjaatakwa̧ wene yöbawö ujunajabe, ja̧danö ja̧ badekwachobö inesö chösödi̧ badekwachinö isabenö ja̧akwo̧ Diosma, la'akatjöda ökwödönö pjabatöma kaatakwawökakobe.

⁶ Ja̧danö ökwödönö pjaatonö, sulabedö Diosnö öpöjödadönöma ikwö loakobe. Jobadö sulabedöma sȩaka sulabakadanö labidö, jojodö matjoko jö̧tja̧lakadanö.

⁷ Ja̧danö jakajaye baledi̧danö baledakobe jobadö sulabedönö. Sȩaka juwö loakwo̧ma, 'dii jawatjö otikwa jawanö, palapinöö̧kö̧, otokwötenöö̧kö̧ sobö pukwebö, sȩaka ubinö juwö lobo̧, ja̧danö jejenö juwö loi̧danö, Diosma söbebö lobö lȩebakobe sulabedönö, —jö̧ba̧lö iwȩyudinobe Davidma, bajaleapo i̧wȩyudinama.

David ömöayedötjö inesö juluwadönö wȩyukwöja

⁸ Baikwö laebobe David ömöayedötjö inesö juluwadö tji̧mibiya wȩyukwöjama: Ju'wedö inesö juluwadö tjujuluwi̧tjö bajalekwönönö juluwadöma wamedukwa tjö̧jinobe, bidö: Ju'wedötjö bajalekwönönö okobe deinö tja̧ja̧kwökwema tacmonita jojo Jeseb Basabet mikwo̧. Jo̧bama bakwöta möleda öpöjojodökwö ölakwabikwawö ochocientosbedönö kwabawö loinobe.

⁹ Ikena jojo wamedukwa inesö juluwadötjöbo̧ma, ajojita jojo Dodo itji̧ Eleazar mikwo̧. Jo̧bama Davidkwö ja̧nö, yebabökönö filisteo jojodö jobe ko̧kwo̧kwadönö ölakwabikwawinobe. Ja̧ möle ju'wedö israel jojodö dötjibajinobe,

¹⁰ jo̧kwaijayonö jo̧ba Eleazarma döbibajökönö 'diinö ja̧nö ölakwabikwawinobe. Lekwe ölakwabikwawö, ba̧jȩkwadö filisteo jojodönö kwabawö loinobe, jobadönö ujuluwenanö kabatö. Lekwe ölakwabikwawö kwölöte'o do̧a̧lajabetjö̧, ömamu bulukanö 'diamachibinobe, kwölöte'o kaatökönö. Ja̧ möle jo̧banötjö Isabenö Jo̧ma jwiinö pjaatinobe israel jojodönö, tjöpöjojodönö tjujuluwobö. Ja̧danö ju'wedö israel jojodö ajayinö döbibajadö tjȩwa̧bijenama, filisteo jojodötjö ina 'yaba̧ladöma detjinobe ida̧ökö, ja̧danö sule Eleazar kwabö loajawö̧ tjiteada tjemobö ji̧nobe.

¹¹ Ja̧danö jo̧ba ikena juluwo̧ma, ararita jojo Ague itji̧ Sama mikwo̧ma. Lehi comunidadtjö batjo nöayu lentejas nöinö wa̧jayu ji̧nobe, ja̧danö filisteo ölakwabikwawa jojodöma jobe tjo̧ko̧kwinobe, ja̧ wa̧ji̧ tjö̧naukwobö. Ja̧danö jejenö tjönaukwobö tjichiawö̧, okobe deinö ju'wedö israel jojodöma yebabinö dötjibajinobe filisteo jojodö tjöba a'otjö.

¹² Jo̧kwaijayonö, ju'wedö dötjibajayonö, Jo̧ba Samama jayunö 'diinö ja̧nö ölakwabikwawinobe, tju̧kwa tjönaukwapji jö̧ba̧lö, ja̧danö tjönaukwo jö̧ba̧ladö filisteo jojodönö kwabawö loinobe. Jejenö Isabenö Jo̧ma jo̧banötjö̧ filisteo jojodönö tjujuluwobö pjaatinobe.

¹³ Ju'wi imiame, jojodö batjo̧ wa̧ji̧ tjemenanö jenanö, David ömöayedö inesö juluwadötjö wamedukwa David ö̧jobekwö tji̧'yinobe, inawa ötöla nööla Adulan ötjaböla ö̧jenama. Ja̧ möle filisteo jojodö ölakwabikwawadöma Refayin wabekonö tjö̧jinobe,

¹⁴ ja̧danö juwibi ja̧ möle filisteo jojodöma Belen comunidadtjö ölakwabikwawadö tju̧ju̧kwemi tjujuna̧linobe. Ja̧danö, Davidma ötölanö ja̧nö,

¹⁵ itebo Belen omukwatö yöa̧linobe, —Belen ojwese'do ojwiyowe, isabenö je'do comunidad apjude ö'öböse'dotjö chowobö jö̧ta̧la, bakwo̧ je'dotjö ojwiyo wabö iyitjö̧ma, chösödena, —jö̧ba̧lö yöa̧linobe.

¹⁶ Ja̧danö, jejenö yöa̧liawö̧, jobadö wamedukwa juluwadöma, filisteo jojodö tju̧ju̧kwemi tebachö, je'dotjö ojwiyo watjinobe, ja̧danö ichejebö, Davidnö tjiyinobe, owobö. Jo̧kwaijayonö jejenö tjiyökwe, owinokobe Davidma, Isabenö Jo̧nö iyawa baibanö nijinö sa̧bö yöa̧linobe,

¹⁷ —Isabenö ötjöma bobu ojwiyo la'akatjöda chowobö jwibo̧sa, chowitjö̧ma bidö chömöayedö tjökwösobu chowobedanö ichejekwobetjö̧. Jau, jobadöma isabenö inesö labobe tebachö, debö tji̧'yo jö̧tja̧lajabeta, jo̧kwajabetjö owökönö, ökwö Isabenö Jo̧nö chiyakwö, —jö̧ba̧lö owinokobe Davidma. Jobekwö laebobe jobadö wamedukwa yebabökönö tjujulu tji̧sȩbina wenema.

¹⁸ Ja̧danö David ömöayedö inesö juluwadötjö jelo̧ma, Sarvia jitji̧, Joab öjawo̧ Abisai mikwo̧. Jo̧ba Abisaima, inesö treintabedö ötjabawö̧ tjuluwo̧ ö̧jinobe. Jo̧bama bakwöta möle öpöjojodönö ölakwabikwawö, otokwötenö trescientosbedönö kwabawö loinobe. Jo̧kwajabetjö̧, ajayinö tjimi labebajadönö tja̧ja̧kwi̧danö Abisainöbi tja̧ja̧kwinobe.

¹⁹ Jo̧bama Treintabedö ötjabawötjö bajalekwönönö jojodö tja̧ja̧kwökwe, ja̧danö jo̧bama tjuluwo̧ ö̧jinobe. Jo̧kwaijayonö inesö juluwadö wamedukwabedö ötjabawö̧tjö ji̧nö̧kö̧ Abisaima.

²⁰ Ja̧danö, inesö juluwadötjö jelo̧, Cabsel comunidad jojo Joyada itji̧ Benaias mikwo̧. Jo̧babi, nöinö ujulu i̧sȩbinobe. Jo̧bama Moab niji jojodötjö inesö juluwadö, didibadanö juluwadö du̧ju̧tajanö ujuluwinobe. Ju'wibi, ju'wi möle tiyuwena, ojwiyo o̧bidanö nieve jawa mölejebetjö tjoduwenama, laju nöaju okwa a̧jibö, jobe jo̧ didibanö kwabö loinobe.

²¹ Ja̧danö ju'wibi jwiinö nöbo̧ egipcio jojodötjö juluwo̧nö ujuluwinobe. Jo̧ba egipcio jojoma, otokwöte kwebatö ölakwabikwawinobe, ja̧danö Benaiasma sule ösö̧'ada kweatinobe, jo̧kwaijayonö egipcio jojokwö ölakwabikwawö, otokwöte emibö kwabö loinobe, iteda otokwötenö.

²² Jobekwö Joyada itji̧ Benaiasma ujulu i̧sȩbinobe, ja̧danö jo̧banöbi okobe deinö tja̧ja̧kwinobe, abönö wamedukwa juluwadönö tja̧ja̧kwidanö.

²³ Jo̧kwaijayonö ju'wedö treintabedö ötjabawö̧tjö bajalekwönönö okobe deinö tja̧ja̧kwökwe ö̧jijayonö, inesö juluwadö wamedukwabedö ötjabiwö̧tjö ji̧nö̧kö̧ Benaiasma. Ja̧danö, jo̧ba Benaias mikwo̧nö ujuninobe Davidma, ömöayedö la'aka luwo̧ Davidnö tjöbeba̧lö teada̧ladö tjuluwo̧ baibanö.

²⁴ Ja̧danö ju'wedö juluwadö treintabedö jö̧ba̧lö ötjabawö̧ David ömöayedö inesö juluwadöma bidö: Joab öjawo̧ Asael mikwo̧bi, Belen jojo Dodo itji̧ Eljanan mikwo̧bi,

²⁵ Jarodita jojo Sama mikwo̧bi, Jarodita jojo Elca mikwo̧bi,

²⁶ Paltita jojo Heles mikwo̧bi, Tecoita jojo Iques itji̧ Ira mikwo̧bi,

²⁷ Anatotita jojo Abiezer mikwo̧bi, Jusatita jojo Mebunay mikwo̧bi,

²⁸ Ajojita jojo Zalmon mikwo̧bi, Netofatita jojo Maray mikwo̧bi,

²⁹ Netofatita jojo Bana itji̧ Jeled mikwo̧bi, Benjamin niji Guibea comunidad jojo Ribay itji̧ Itay mikwo̧bi,

³⁰ Piratonita jojo Benaias mikwo̧bi, Gaas mikwödö niji jojo Hiday mikwo̧bi,

³¹ Arbatita jojo Abi Albon mikwo̧bi, Bajurinita jojo Azmavet mikwo̧bi,

³² Salbonita jojo Elijaba mikwo̧bi, Jasen itji̧mutjö Jonatan mikwo̧bi,

³³ Ararita jojo Sama mikwo̧bi, Ararita jojo Sarar itji̧ Ahian mikwo̧bi,

³⁴ Macateo jojo Ajasbay itji̧ Elifelet mikwo̧bi, Guilonita jojo Ajitofel mikwo̧ itji̧ Elian mikwo̧bi,

³⁵ Carmel comunidad jojo Jezro mikwo̧bi, Arbita jojo Paray mikwo̧bi,

³⁶ Soba comunidad jojo Natan itji̧ Igal mikwo̧bi, Gadita jojo Bani mikwo̧bi,

³⁷ Amonita jojo Selec mikwo̧bi, Sarvia jitji̧ Joab ömöayo̧, ölakwabikwawa jawa kwebato̧ berotita jojo Najaray mikwo̧bi,

³⁸ Itrita jojo Ira mikwo̧bi, Itrita jojo Gareb mikwo̧bi,

³⁹ Hitita jojo Urias mikwo̧bi. Jobadö okobe deinö David ömöayedö inesö juluwadö ötjabawö̧ma, treinta y sietebedö.