2 Samuel 20 - Dios Iwene

Saba mikwo̧ La'aka luwo̧ David wei̧ kaatibobö omukwatina jawa

¹ Ja̧danö, israel jojodö judasaso jojodökwö jejenö jwöjwöbakwawö tjö̧jenama, jobe bakwo̧ sulabo̧ Saba mikwo̧ ö̧jinobe. Jo̧ba Sabama, Benjaminsaso jojo, ja̧danö Bicri mikwo̧ itji̧. Jo̧ba Sabama, israel jojodö judasaso jojodö jwöjwötjakwawi̧ a̧ja̧kwö, trompeta pjubö, yöa̧linobe, —Judasaso jojodö yötja̧li̧danö, jobadöda David ömöledöma, ökwödö israel jojodöma David ömöledöböködösa, ja̧danö jo̧ba Isai itji̧ David iyi̧tjö la'akatjöda demökakwedösa. Jo̧kwajabetjö̧ jo̧banö kabatibö, bakwo̧nökwena dejube dȩwajaduwo, —jö̧ba̧lö yöa̧linobe.

² Yöa̧lawö̧, israel jojodöma jo̧banö tja̧ja̧kwinobe, ja̧danö Davidnö le'dedibö, Bicri itji̧ Sabakwö latjebinobe. Jo̧kwaijayonö, jobadö latjebonö, judasaso jojodöma jwaikwöda la'aka tjuluwo̧ Davidkwö tji̧'yinobe, bite la'aka duluwo̧nö ösödadösa jö̧ba̧lö. Ja̧danö, Davidkwö teadö tji̧'yinobe, Jordan mikwödötjö, Jerusalenbe ichibenanö kabatö.

³ Jejenö Davidma Jerusalenbe ȩwa̧jö, ejube ichibinobe. Ja̧danö, ejube ichibö, ilekwamu domulatajabedö, eju tjiteada̧lobö ujunibinawönö jelejunö pjolatö ujuninobe. Jelejunö pjolatö junö, ipje'datinobe jobadönö, ja̧danö teada̧ladönö ujuninobe, ilekwamubajadönö tjiteada̧lobö. Ja̧danö, jemi tupakwö ba̧kwelöjatebö tju̧kwa iyö iteada̧lijayonö, la'akatjöda yemidanö jobadökwö ö̧jinokobe, bidönö Absalon sulabenö 'da̧'da̧bö ö̧jinawö̧, jö̧ba̧lö. Jo̧kwajabetjö̧, jejenö ipje'datajawö̧, jobe tjilekwamu wobö tjujunibinawö̧danö tjö̧jinobe, ö'wö batjibenanö kabatö.

⁴ Ikenama la'aka luwo̧ Davidma ölakwabikwawa jojodö tjuluwo̧ Amasanö weinobe, —Judasaso jojodötjö ölakwabikwawa jojodönö ko̧ko̧daji, ja̧danö ko̧ko̧dajo̧, itekwayi dewachö chöba a'o kwichibo, —jö̧ba̧lö.

⁵ Weökwe, Amasama judasaso jojodönö ko̧ko̧dö i̧'yinobe, jo̧kwaijayonö lekwamachibinobe, ja̧danö ichibinokobe David badedö ujunina mölema.

⁶ Jejenö ichibiökökwe, Davidma Abisainö weinobe, —Juluwanö Sabanö ludibobö jo̧be, ökwödönö suli̧ waedapji jö̧ba̧lö. Jau Abisai, juluwanö lubökönö, lekwe diteada̧litjö̧ma, Bicri itji̧ Sabama, nöinö wene baibobö ja̧akwo̧, Absalon wene baibobö ja̧inatjö bajalekwönönö. Jo̧kwajabetjö̧, Amasa ichibobö teada̧lökönö, ökwöda chömöayedö ölakwabikwawa jojodönö öbibö, Sabanö lubaji. Juluwanö jo̧banö lukubo, 'diinö tjöekwobe comunidadbe ichibö, ökwödötjö döibapji jö̧ba̧lö, —Abisainö weinobe Davidma.

⁷ Weökwe, Sabanö lubö i̧'yinobe Abisaima, ja̧danö öibawö̧, Joab ömöayedö ölakwabikwawa jojodöbi, la'aka luwo̧nö tjöbeba̧lö teada̧ladöbi, ju'wedö David ömöayedötjö inesö juluwadöbi Abisaikwö tji̧'yinobe.

⁸ Ja̧danö, Sabanö lubö, inawa nöawa, Gabaon niji inawabe tjichibenama, Amasama bajaliyanö judasaso jojodönö öbibö jobadökwö ichibinobe. Jejenö ichibiökwe, Joabma ö̧jobekwö i̧'yinobe, dokwa chömöledöso̧, jö̧ba̧lö. Joabma ölakwabikwawo̧ 'duawa̧do̧ 'duawinobe, ja̧danö wamenö koleasö̧jenö i̧sa̧pi̧bi önawinobe. Joab Amasa ö̧jobekwö i̧'yena, i̧sa̧pi̧ meobö ja̧inobe,

⁹ ja̧danö Amasanö, —Dokwa chömöledöso̧, otiwanö kwö̧ji̧ji̧? —jö̧ba̧lö, ömamu öwaisobekwöchobesamunö Amasa ajesa'ye do̧atinobe, ibekasa'wonö du̧atobö.

¹⁰ Ja̧danö, Amasama edinokobe, Joab wajwiobekwöchobesamunö i̧sa̧pi̧ do̧alobema, ja̧danö ibekasa'wonö du̧atobö ja̧enama, Joabma Amasanö doinobe ukwa'wonö, ö'yapiyu nijibe welachibanö. Jejenö bakwötanöda dobö, Amasanö kwabö loinobe Joabma. Ikenama Amasanö kwabö lobajo̧, Joabbi, öjawo̧ Abisaibi, tupakwö Sabanö lutjobö tji̧'yinobe.

¹¹ Ja̧danö, Joab ömöayedötjö bakwo̧ Amasa ipjeanö jamatö, jwöinobe Amasa öibajawö̧nö, —Okobe deinö la'aka luwo̧ Davidnöbi, ömöayo̧ Joabnöbi ösödadöma, Joab ökömanö kwi̧'yaduwobö jo̧be, —jö̧ba̧lö.

¹² Jejenö yöa̧lena, Amasama ökwösobö ebawö pelebö ö'wöchinobe, ja̧danö jejenö pelebö ö̧biawö̧, okobe deinö ichibadöma jamatö tjȩda̧linobe. Jo̧kwaiökwe, Joab ömöayo̧ma Amasanö töinobe mana ö'öbökwö, ja̧danö töbajo̧, iteba'o ömöchebinobe sawana'wonö.

¹³ Ikenama, Amasa iteba'o manatjö laebaja̧ ikena, okobe deinö jojodöma Joabkwö tji̧'yinobe, Sabanö lubö.

¹⁴ David öpöjojo Sabama okobe jwiinö israel niji baledö, Abel Betmaca comunidadbe ichibinobe. Ja̧danö, jobe okobe deinö Saba abe'do Bicri ömöledöma, ko̧ko̧kwö jo̧bakwö comunidad tetjachinobe.

¹⁵ Ja̧danö, Abel Betmaca comunidad tetjachibiawö̧, Joabbi jo̧bakwö ichajadöbi comunidad ichibö tjötjösawinobe. Ja̧danö, niji ichejebö, comunidad tjöekwemi ö'öbö wa̧tja̧winobe nijima, ja̧danö tjöekwemi 'dobö lotjotö jö̧ba̧lö, tjöekwemi 'dotjinobe, comunidad jojodönö tjujuluwobö.

¹⁶ Ja̧danö, jejenö ja̧tjioko, jobe ju̧ju isuju waisujuma, comunidadtjö jwöjinobe, —A̧ja̧kwaduwi, a̧ja̧kwaduwi, Joabnö yökawaduwo, chö̧jobekwö ichö ötjökwö yöa̧lakwawobö, —jö̧ba̧lö.

¹⁷ Jwöjiökwe, jö̧jobekwö yöne ichinobe Joabma, ja̧danö ichioko, —Ökwöma Joabkö̧biji̧? —ajebökwe, —Jau, Joabsa, —jö̧ba̧lö atadinobe. Atadoko, —Chuluwo̧, ötjö kwömöayuju yöta̧li̧ kwa̧ja̧kwo, —yöja̧linobe. Yöja̧lökwe, —Jau, cha̧ja̧kwocha, yöba̧li, —jö̧ba̧lö atadinobe Joabma.

¹⁸ Atadoko yöja̧linobe, —Bemi Abel comunidadma, isabenö waisanö omukwatadö tju̧ju̧kwobe comunidad, baikwö yöta̧la: Damötjö̧ jojodö jwöjwötjakwawenama, yöba̧liatjinobe, –Abel jojodöma isabenö waisanö lȩbebadö, jo̧kwajabetjö̧ Abel comunidadtjöda abebö da̧ja̧kwo, dite otiwanö yöa̧lojobö döwaisakobetjö̧, –jö̧ba̧lö.

¹⁹ Ökwödöma isabenö israel jojodötjö otiwadösa, duluwedö wetji̧ otiwanö a̧ja̧kwadösa, ja̧danö ökwödöma israel jojodö otiwanö tjo̧mukwatawö̧ comunidad jojodösa. Jo̧kwajabetjö̧, tajawedö ditebo comunidad, Isabenö Jo̧ Diosda dö̧jobö iyina comunidad söbebö loköbobö jö̧ka̧lobeda? —jö̧ba̧lö abebö ja̧ja̧kwinobe.

²⁰ Abebö ja̧ja̧kwökwe, —Ja̧maökö, la'akatjöda kwitebo comunidad söbebö lobö, ökwödönö chujuluwobömaökö.

²¹ Ökwödönö söbebö lodoböma jö̧ta̧lökö, jo̧kwaijayonö, bakwo̧, Efrain mösa'ijutjö ichajo̧ Bicri itji̧ Sabama, la'aka duluwo̧ David wei̧ öpöjödö, ölakwabikwawobö jö̧a̧lobe. Jo̧kwajabetjö̧, Sabanö pjabatökönö, jo̧banö do̧batö kwiyaduwitjö̧ma, ölakwabikwawökönö kwiteboduwitjö̧ dȩwa̧jakwedösa, —jö̧ba̧lö atadinobe Joabma. Yöa̧loko, —Jau, teada̧li, uu bulatö lobö, tjöekwemi wamenö ikwö diyakobe, —jö̧ba̧lö jatadinobe.

²² Ikenama, atadaju, jobuju waisujuma comunidad luwedönö waisanö lȩjebinobe, —Ditebo comunidad söbebö lotjapji jö̧ba̧lö, la'aka luwo̧ öpöjojo Sabanö kwabö lodobö jo̧be, —jö̧ba̧lö. Ja̧danö, yöja̧lawö̧, tja̧ja̧kwinobe, ja̧danö Saba uu bulatö lobajadö, Joabnö ikwö tjiyinobe. Ikenama, tjiyajökwe, Joabma trompeta pjuinobe, —Tjo̧wita, —jö̧ba̧lö. Ikenama okobe deinö ja̧ comunidadtjö tjejukwena tjȩwa̧jinobe, ja̧danö Joabma Jerusalenbe ȩwa̧jinobe, la'aka luwo̧ David öjobekwö.

David ömöayedötjö luwedö wȩyukwöja

²³ La'aka luwo̧ David ömöayedötjö luwedöma bidö: Joabma okobe deinö israel jojodötjö ölakwabikwawa jojodö tjuluwo̧ ö̧jinobe. Ja̧danö, Joyada itji̧ Benaias mikwo̧ma, la'aka luwo̧nö tjöbeba̧lö teada̧ladö tjuluwo̧ ö̧jinobe.

²⁴ Ja̧danö Adoniran mikwo̧ma, 'diinö otikwa weawa la'aka luwo̧ ö̧jinobe. Ja̧danö Ajilud itji̧ Josafat mikwo̧ma, baledaja̧ wene wȩyukwa luwo̧ ö̧jinobe.

²⁵ Ja̧danö Seraias mikwo̧ma, la'aka luwo̧ yöawi̧ wȩyukwa luwo̧ ö̧jinobe. Ja̧danö Sadocbi, Abiatarbi, Diostjö jojodötjö tjö̧'dade pjabatadö otidö tjö̧jinobe.

²⁶ Ja̧danö ju'wibi, yairita jojo Ira mikwo̧ma, David öba a'o Diostjö jojodötjö tjö̧'da̧de pjabatö otidinobe.