2 Samuel 2 - Dios Iwene

David Juda niji jojodö tjuluwo̧ baibina jawa

¹ Jemi ikenama, baikwö baledinobe. Davidma Isabenö Jo̧nö abebö a̧ja̧kwinobe, —Juda niji comunidadbe chi̧'yobö jo̧beji̧? —jö̧ba̧lö. Abebö a̧ja̧kwökwe, —Jau, kwi̧'yobö jo̧be, —jö̧ba̧lö atadinobe Isabenö Jo̧ma. Atadökwe, —Di̧ya comunidadbe chi̧'yakwa̧da? —jö̧ba̧lö aebökwe, —Hebron comunidadbe kwi̧'yo, —jö̧ba̧lö atadinobe Isabenö Jo̧ma.

^2-3 David ilekwamuma bidö, Jezrel comunidad jojosuju Ajinoan mikwujubi, Nabal wobö ujunibinoko Carmel jojosuju Abigail mikwujubi. Ja̧danö, kwi̧'yo jö̧ba̧lö Dios weökwe, Davidma ilekwamunöbi, ömöayedönöbi, ömöayedö tjö̧möledönöbi öbibö Hebron comunidadbe i̧'yinobe, jobe tjö̧jobö. Ja̧danö Hebronbe 'ya̧jadö, jobe tjö̧jinobe, Hebrontjö pjei̧ comunidadnö.

⁴ Ja̧danö, jejenö ichiawö̧, Juda jojodötjö ömadöma David ö̧jobekwö tjichinobe, ja̧danö ichibö, David uunö o̧te totjebinobe, —Bitema ökwödö Juda jojodö inesö la'aka duluwo̧, —jö̧ba̧lö. Ja̧danö, Davidma yötjawi̧ a̧ja̧kwinobe, Jabes de Galaad jojodö otiwanö Saulnö o̧tjina wenema.

⁵ Ja̧danö, a̧ja̧kwajo̧, Davidma yöbawadönö weinobe, Jabes jojodönö yötjawobö: Davidma ökwödönö yöawobe: —Chömöledö, Saulnö kwo̧tji̧naduwa wenama cha̧ja̧kwajabe, ja̧danö a̧ja̧kwajo̧ yötawaduwakwö, Isabenö otiwanö kwuluwo̧ Saulminenö ösödadöja, ja̧danö ja̧ kwösödaduwi̧ wene otiwanö kwi̧sebinaduwobe, jo̧banö otiwanö kwo̧tji̧naduwenama. Jejenö otiwanö kwi̧sebaduwiökwe, balekwa mikwa Isabenö Jo̧ Dios otiwanö ökwödönö pjaatobö chösöda.

⁶ Jau chömöledö, jejenö otiwanö Saulnö ja̧köbaduwiökwe, balekwa mikwa Isabenö Jo̧ Dios ba̧kwelöjatebö ökwödönö ösödö, kabatökönö ökwödönö pjaatobö chösöda, ja̧danö ju'wibi ötjö Davidma otiwanö ja̧takwo̧sa ökwödönö, duluwo̧ Saulminenö otiwanö kwo̧tjinaduwaja̧ wene omukwatö.

⁷ Ja̧danö, babe yötawaduwakwö, kwuluwo̧duwi Saul debö i̧'yinajayonö, yayonö kwujuluwaduwachibanö yebabökönö kwö̧jaduwo. Jau chömöledö, Juda niji̧ jojodöma ötjönö 'da̧batö tjujunajabe inesö la'aka tjuluwo̧ batibanö, ja̧danö ökwödöbi otiwanö yebabökönö chömöayedö kwö̧jaduwo. —jö̧ba̧lö yöbawadö yötjawobö weinobe Davidma, Jabes jojodönöma.

Saul itji̧ Isboset ju'wedö israel jojodö tjuluwo̧ baibina jawa

⁸ Ja̧danö, Juda jojodö Davidnö la'aka tjuluwo̧ baibanö tjujunijayonö, ju'wedö israel jojodöma jelo̧ ömöayedö baibanö tjö̧jinobe. Saul ömöayedö ölakwabikwawa jojodö tjuluwo̧, Abner mikwo̧ma, Saul itji̧ Isboset mikwo̧nö öbibö, Majanayin comunidadbe i̧'yinobe,

⁹ ja̧danö jobetjö jo̧banö ujuninobe, Galaad niji jojodöbi, Guesuri niji jojodöbi, Jezrel niji comunidad jojodöbi, Efrain niji jojodöbi, Benjamin niji jojodöbi, okobe deinö ju'wedö israel jojodöbi la'aka tjuluwo̧ baibanö.

¹⁰ Jo̧ba Isbosetma cuarenta o̧bia juna̧lo̧, israel jojodö tjuluwo̧ baibinobe, ja̧danö dötölataja o̧biya tjuluwo̧ ö̧binobe. Jo̧kwaijayonö, ju'wedö israel jojodö Isboset ömöayedö tjö̧jinajayonö, israel jojodötjö Judasaso jojodöma Davidnöda tjösödinobe, ja̧danö jo̧ba ömöayedö tjö̧jinobe. Jejenö israel jojodötjö ju'wedöma Isboset ömöayedö tjö̧jinobe, ja̧danö ju'wedöma David ömöayedö tjö̧jinobe.

¹¹ Ja̧danö, o̧biya jelemutjö dötölatajakwö, jawo̧dö jelemutjö̧ bakwo̧kwö baledibanö, Davidma Juda jojodö tjuluwo̧ ö̧jinobe, Hebron comunidadtjöma.

Judasaso jojodö ju'wedö israel jojodökwö ölakwabikwawö tjö̧jina jawa

¹² Ju'wi möle Abnerma uluwo̧ Isboset ömöayedö ölakwabikwawa jojodönö öbibö, Majanayin comunidadtjö labebö, Gabaon comunidadbe i̧'yinobe.

¹³ Ja̧danö, jejenö i̧'yiökwe, Sarvia jitji̧ Joab mikwo̧ma, David ömöayedö ölakwabikwawa jojodönö öbibö i̧'yinobe, Abnernö tjöbadekwachobö. Ja̧danö, 'ya̧jadö, o̧pesobu Gabaon comunidad o̧pesobu ö'öbötjö tjöbadekwachinobe, ja̧danö bakwachobu Abnerma ömöayedökwö niji̧nö tjö̧bamatinobe, ja̧danö bakwachobu Joabma ömöayedökwö nijinö tjöbamatinobe.

¹⁴ Ja̧danö Abnerma Joabnö yöa̧linobe, —Dömöayedötjö ju'wedönö omudawö wedo, döba a'otjö tjölakwabikwawobö, didötjö tjujuluwojobö jö̧ba̧lö. —Yöa̧lökwe, —Jau, tjölakwabikwawo, —jö̧ba̧lö atadinobe Joabma.

¹⁵ Jo̧kwajabetjö̧, Benjaminsaso jojodötjö Isboset ömöayedö docebedö, David ömöayedö docebedökwö tjölakwabikwawinobe.

¹⁶ Ja̧danö, tjölakwabikwawenama, okobe deinö tjöpöjojokwena uu'ye do̧batö, ometupanö kwölöte'onö dotjinobe, jo̧kwajabetjö̧ okobe deinö jobadö veinticuatrobedöma bakobe debö tji̧'yinobe. Ja̧danö, jobetjö jejenö tjölakwabikwawinobetjö̧, ja̧ mejema, babema Kwölöte'ijunö tjölakwabikwawina mejȩ, jö̧ba̧lö ötjabi̧ meje.

¹⁷ Ja̧danö jobadö ajayinö ölakwabikwawadö debö tji̧'yaja ikenama, okobe deinö ju'wedöbi tjölakwabikwawinobe. Labinö tjölakwabikwawinobe ja̧ mölema, ja̧danö David ömöayedöma, israel jojodö Abner ömöayedönö tjujuluwinobe.

Joab öjawo̧ Asael debö i̧'yina jawa

¹⁸ Ja̧ möle Sarvia ji̧tji̧mu wamedukwa jobe David ömöayedö tjö̧jinobe, Joab mikwo̧bi, Abisai mikwo̧bi, Asael mikwo̧bi. Ja̧danö, Asaelma, jwiinö juluwanö ö'öbakwawo̧ ö̧jinobe, yama juluwanö ö'öakwawi̧danö.

¹⁹ Ja̧danö, David ömöayedö tjöba a'otjö Abner döibajenama, Asaelma Abnernö luinobe. Jamatökönö, jwaikwöda Abnernö luinobe.

²⁰ Jejenö luiökwe, Abnerma ökömakwö edö abebö a̧ja̧kwinobe, —Asael, ökwödaji̧ chökömanö lubo̧ma? —jö̧ba̧lö. Abebö a̧ja̧kwökwe, —Jau, Asaelsa, —jö̧ba̧lö atadinobe.

²¹ Atadökwe, —Lubökönuitjö, jelobekwö jalachibö, jelo̧nöda lubaji jo̧banö kwujuluwobö, ja̧danö jo̧ba itea kwemobö, —jö̧ba̧lö weinobe Abnerma. Jo̧kwaijayonö, Asaelma jwaikwöda Abnernö luinobe.

²² Jo̧kwaiökwe, Abnerma yemidanö weinobe, —Lubökönuitjö, ökwönö kwabö lotapji jö̧ba̧lö. Ökwöma Joab öjawo̧ja, jo̧kwajabetjö̧ ökwönö kwabö lotobö chöpöjöda. Jau Asael, ökwönö kwabö lotitjöma, ba̧kwelöjatebö kwöpöe Joabkwö wene chujuna̧lena, la'akatjöda söawökönö, ökwönö kwabö lotobö chöpöjöda Asael, kabatakwawi, —jö̧ba̧lö yöa̧linobe Abnerma Asaelnö.

²³ Jo̧kwaijayonö Asaelma kaatakwawobö öpöjödinobe, ja̧danö jwaikwöda Abnernö luinobe. Jo̧kwajabetjö̧ bajaliyanö Abnerma ökömanö lubo̧nö doinobe otokwötenö moriwokwöchobenö, ukwa'wonö, ja̧danö jejenö doökwe, ukwa'wonö söbibö oma'akwöchobe laebinobe. Ja̧danö, Asaelma jobe mebö debö i̧'yinobe. Jejenö balediawö̧, Asael ökömanö ichadöma debö i̧'yelö ichibö tjöjamatinobe, Asaelnö tjedenama.

²⁴ Jo̧kwaijayonö, Asael öpöedö Joabbi, Abisaibi, ju'wedöbi tupakwö lutjinobe Abnernö, mösa'o Ama ötjaba'obe tjichibenanö kabatö. Ja'oma Gia comunidad badeibösa'o, jojodö deobe Gabaon mikwobe 'ya̧kwawamanö ja̧'o. Jobe yi̧benakwö tjichibinobe.

²⁵ Jobe mösa'o wa̧pekwa'onö Benjaminsaso jojodö Abner ömöayedöma, Abnerkwö tjo̧ko̧kokwinobe, ja'otjö 'diinö ja̧nö tjölakwabikwawobö.

²⁶ Jemi ikenama Abnerma Joabnö jwöinobe, —Dokwa lekwe ölakwabikwawö dö̧jakwa̧da? Kwomukwatökiji̧, kabatibökönö ölakwabikwawö dö̧jitjö̧ma, isabenö jwiinö do̧'wo tjo̧achakwawakobe, dömöledökwö dölakwabikwawobetjö̧. Jau Joab, ökwödöma okobe deinö yöne dömöledösa, israel jojodösa, dokwa lekwe kwömöayedönö weköbakwa̧da, tjömöledönö lubö kwabawö lotjoböma? Katjatakwawobö weköbodönö, —jö̧ba̧lö jwöinobe Abnerma.

²⁷ Jwöökwe, Joab atadinobe: —Jweinö yöka̧la Abner, otiwanö yöka̧lajabe. Duluwo̧ Diosma isabenö jo̧, ja̧danö Dios isabenö ö̧ji̧danö isabenö yötawakwö, yöka̧lajökötjö̧ma, isabenö yö̧te baledibanö chömöayedöma tjömöledö ökwö kwömöayedönö lubö kwabawö lotjo jö̧tja̧lajena, otiwanö yöka̧lajabe, kadatakwawobö, —jö̧ba̧lö.

²⁸ Ja̧danö jö̧ba̧lajo̧, Joabma trompeta pjuinobe, ölakwabikwawö katjatakwawobö. Jo̧kwajabetjö̧ israel jojodönö lubö katjatinobe, ja̧danö ölakwabikwawa katjatinobe.

²⁹ Jemi ikenama, ölakwabikwawö kabatajadö, Abnerma ömöayedönö öbibö ȩwa̧jinobe Majanayinbe. Yö̧te baledibanöbi, yȩayi baledibanöbi Araba ötjabobe baledö kwetjachinobe. Ja̧danö, Jordan mikwödö pebibö, möle ja'ö Majanayinbe tjichibinobe.

³⁰ Ja̧danö, Joabbi ömöayedönö öbibö, Abnernö luinelö ȩwa̧jinobe. Lubö kabatajadö, okobe deinö ömöayedönö ko̧ko̧dö ö̧ba̧jadinobe, ja̧danö ba̧jadö tjedenama, jobadötjö veintebedö detjinobe. David ömöayedö ölakwabikwawadötjö Asaelbi, ju'wedö diecinuevebedöbi ölakwabikwawö debö tji̧'inobe.

³¹ Jo̧kwaijayonö, David ömöayedötjö veintebedö wotjijayonö, Benjamin jojodötjö Abner ömöayedönö trecientos sesentabedönö kwabawö lotjinobe.

³² Ja̧danö, Asael iteba'o e'ewö, Belenbe tje'ewinobe, ja̧danö jobetjö inawa ötölanö tjödinobe, Asael abe'dominenö tjödinölanö. Ja̧danö, lödajadö, yö̧te baledibanö, Hebronbe kwebachö tjȩwa̧jinobe, ja̧danö dewachena jenanö, Hebronbe tjichibinobe.