2 Samuel 17 - Dios Iwene

Husay Davidnö pjaatina jawa

¹ Ju'wibi yöa̧linobe Ajitofelma, Absalonnö: —Chuluwo̧, chedemi kwömöayedö ölakwabikwawa jojodötjö ömadö doce milbedönö omudawö, babe yö̧teda Davidnö lutitjö̧ma, otiwena, jejenö weköbobö ateba.

² Jejenö jo̧banö lubö, nöinö kweachajabetjö me'dawachibajo̧nö, ujulu jwibo̧nö mebibö dichibakobe, ja̧danö jejenö dichibiawö̧, jo̧babi jo̧bakwö kwebachadöbi yetjaibakobe, ja̧danö ömöayedöma dötjibajakobe. Jejenö sule la'aka luwo̧ Davidnöda kwabö lodakobe,

³ ikenama ömöayedöbajadönö öbibö chichejebakobe, tjebachajö ökwö kwömöayedö batjibanö. Jau chuluwo̧, kwöpöjojo kwabö loköbobö jö̧ka̧lökwema bakwo̧da, Davidda, ja̧danö jo̧ba ö'wö baibitjö̧ma, woaja̧ ikenama jojodökwö wene jwiinö kwö̧jakwo̧ja, —jö̧ba̧lö yö̧a̧linobe Ajitofelma Absalonnö.

⁴ Jejenö yöa̧liawö̧, Absalonbi, okobe deinö israel jojodötjö luwedöbi a̧ja̧kwö tjösödinobe, isabenö jweinö omukwato̧ Ajitofelma jö̧ba̧lö.

⁵ Jo̧kwaijayonö, Ajitofel yöa̧li̧ ösödijayonö, Absalonma yöa̧linobe, —Husaynöbi jwöbaduwi, jo̧ba waisakwawa ji̧ lȩekwabi da̧ja̧kwobö, Ajitofel omukwati̧danö omukwatojobö jö̧ba̧lö.

⁶ Jwöökwe, Husayma Absalon öba a'o ichibinobe, jadanö Absalonma Husaynö yöawinobe Ajitofel yöa̧laja̧ma, ja̧danö yöba̧lajo̧, abebö a̧ja̧kwinobe, —Kwedemi yöa̧laja̧danö ja̧dobö otiwenaji̧? Otiwökö jö̧ba̧lö kwomukwatitjö̧ma, otiwanö ja̧dobö kwomukwati̧ yökawo, da̧ja̧kwobö, —jö̧ba̧lö abebö a̧ja̧kwinobe Absalonma.

⁷ Abebö a̧ja̧kwökwe, Husayma, —Chedemi babe Ajitofel yöa̧laja̧danö ja̧köboböma otiwökena, baikwö labebö lobö yötawa:

⁸ Kwöwaisa kwabe'donöbi, ömöayedönöbi chuluwo̧, jobadöma jwiinö juluwadö ölakwabikwawa jawama. Ja̧danö, ju'wibi, babe baledaja̧ balediawö̧, labidö tjö̧jobe babema, baikwö wanedö yötawa, Ojwe yawi jitji̧munö 'dötjebioko labuju jö̧ji̧danö, babe labidö tjö̧jobe kwabe'dobi, ömöayedöbi. Ja̧danö ju'wibi chuluwo̧, kwabe'doma ölakwabikwawa jawa jwiinö waiso̧, ja̧danö babe yö̧te jo̧bama ju'wedö jojodökwö abökakobe.

⁹ Chedemi jo̧bama ida̧ökö jelobe uju̧kwawena, laju okwaö̧kö̧, jelobeö̧kö̧. Ja̧danö jweinö kwomukwato chuluwo̧, David ömöayedö kwömöayedönö mebibö, ju'wedönö kwabö lotjitjö̧ma, jwiinö yetjaibakobe jojodöma. –Ayö, Absalon ömöayedönö ba̧jekwadönö kwabö lotjajabe, –jö̧ba̧lö.

¹⁰ Ja̧danö jejenö baleditjö̧ma, okobe deinö kwömöayedöma yebabinö katjatibakobe. Jau chuluwo̧, okobe deinö israel jojodöma kwabe'donö tjöwaisökwe, juluwo̧, ölakwabikwawa jawa waiso̧ jö̧ba̧lö, ja̧danö ju'wibi jo̧ba yöne ömöayedöbi jwiinö juluwadö jö̧ba̧lö tjöwaisobe. Jo̧kwajabetjö, babe yö̧te Davidnö kwabö lotjobö tjomukwati̧ waekwitjö̧ma, okobe deinö yetjaibena, inesö juluwadö yebaböködöbi yebabidö batjibanö tjö̧jena—.

¹¹ Tupakwö yöa̧linobe Husayma, —Ja̧danö, jejenöobetjö̧, baikwö otiwanö ja̧dakwa̧ chomukwati̧ma yötawakwö: Okobe jwiinö ditebo israel niji ba̧kwemeachibanö ölakwabikwawa jojodönö kwo̧ko̧kodo, ojwe ö'öbö so̧biapuso̧pja ba̧jȩkwidanö ba̧jekwadönö, ja̧danö ökwöda jobadönö öbibö kwi̧'yo, kwabe'donö kwujuluwobö.

¹² Jejenö jelobeö̧kö̧, jelobeö̧kö̧ uju̧kwawijayonö, jo̧banö döbadekwajakobe, ja̧danö jo̧banöbi, okobe deinö jo̧banö pjabatadönöbi kwabö lodakobe, bakwo̧bi ö̧ji̧bökönö.

¹³ Ja̧danö, ju'wi comunidadbe ö̧jibobö döibajitjö̧ma, okobe deinö israel jojodö ja̧ comunidadbe di̧'yena, ja̧danö a̧la̧chi'bonö okobe jwiinö ja̧ comunidad söbebö lobö, wabekobe töbö de'ewakobe, ja̧ comunidadtjö inawa ja'yuwawabi ji̧bökenanö baibanö, jö̧ba̧lö —yöa̧linobe Husayma, Absalonnö.

¹⁴ Jejenö yöa̧liawö̧, Absalonbi, okobe deinö israel jojodö Absalonkwö ju̧kwadöbi a̧ja̧kwö, —Otiwa, —jö̧ba̧lö yötja̧linobe, —Bite Husay waisanö yöa̧laja̧ma, Ajitofeltjö bajalekwönönö waisanö yöa̧lajabe, —jö̧ba̧lö, ja̧danö yöa̧laja̧danö ja̧tjobö omukwatö tjujuninobe. Jo̧kwaijayonö jejenö Husay yöa̧li̧ tjösödi̧ma, Isabenö Jo̧ omukwatö ujuninadanö baledinobe. Isabenö Jo̧ma, Ajitofel waisanö yöa̧li̧ tjöpöjödobö weinobe, Diosma Absalonnö lȩebobö omukwatö ujuninobetjö̧.

Husay Davidnö baledaja̧ yöawina jawa

¹⁵ Ikenama jobetjö labebö, Husayma Diostjö jojodötjö tjö̧'da̧de pjabatadö Sadocnöbi, Abiatarnöbi yöawinobe, —Ajitofelma baikwö Absalonnöbi, israel jojodötjö damönöbi yöawatö ja̧tjobö, ja̧danö ötjöma baikwö ja̧tjobö yötawatö, —jö̧ba̧lö.

¹⁶ Ja̧danö, yöbawajo̧, weinobe, —Juluwanö Davidnö yötjawobö webaduwi, babe yö̧te jojodö deobe ojwe peikwena ö'öböma kwabaduwoko, juluwanö ojwe pebibö tupakwö kwi̧'yaduwo, juluwanö kwi̧'yaduwökötjö̧ma, ökwödönö ichibö söbebö lotjakobe, —jö̧ba̧lö weinobe.

¹⁷ Tjö̧'da̧de pjabatadö tji̧tji̧mu Ajimazbi, Jonatanbi Jerusalen comunidad okwa tetjachobö jwiinobe, tetjachena Absalon ömöayedö jobadönö tjedapji jö̧ba̧lö, jo̧kwajabetjö̧ jobadöma Enroguel comunidadnö tjiteada̧linbe, wene tja̧ja̧kwena, tupakwö la'aka luwo̧ Davidnö yöbawö tji̧'yobö. Ja̧danö, omukwatö tjujuninobe, Sadocbi Abiatarbi baledi̧ wene tja̧ja̧kwenama, bakwuju tjömöayujunö wetjobö, Jonatannöbi, Ahimaznöbi wene yöjawobö, yöjawaja̧ tupakwö Davidnö yötjawobö.

¹⁸ Ja̧danö, Absalon ömöayedö wajwitjonö jobetjö latjebobö tjomukwatijayonö, bakwo̧ möayo̧ma jobadönö edinobe, ja̧danö Absalonnö yöawinobe. Jo̧kwajabetjö juluwanö jobetjö latjebinobe Jonatanbi Ajimazbi, ja̧danö Bajurin comunidadbe juluwanö tji̧'yinobe, bakwo̧ Bajurin jojo ejube. Jo̧ba eju a̧petutjö ojwese'do ji̧nobe, jo̧kwajabetjö je'do okwa tjuju̧kwawinobe.

¹⁹ Ikenama Baturin jojo ilekwoma möchekwa̧donö jö̧möchebinobe ojwese'doma, ja̧danö trigo ödebiya ja̧do̧ wame jödinobe, okwa ju̧kwawadönö tojö.

²⁰ Ikenama Absalon ömöayedöma jejube ichibö, abebö tja̧ja̧kwinobe, —Ajimaznöbi Jonatannöbi disakwa, ¿dai tjö̧jobeda? —jö̧ba̧lö. Abebö tja̧ja̧kwoko, —Jobadöma ida̧ökö ja'yuwödö petjibajabe, —jatadinobe. Jejenö jatadawö̧, ja'yuwödö pebibö tjisakwinobe, ja̧danö badekwajöködö, Jerusalenbe tjȩwa̧jinobe.

²¹ Ja̧danö, isakwadö tjȩwa̧jaja̧ ikena, Jonatanbi Ajimazbi ojwese'dotjö labebö, la'aka luwo̧ Davidnö yöbawö tji̧'yinobe. David ö̧jobe ichibö, baledaja̧ wene yötjawinobe. Ajitofel juluwanö Davidnö isakwobö lȩebaja̧ wenebi yöbawö, —Juluwanö a̧la̧ibö teada̧lökönö Jordan ojwe pekibaduwo, —jö̧ba̧lö yötja̧linobe.

²² Jejenö yötjawiökwe, Davidma juluwanö a̧la̧ibö peibinobe, jo̧babi okobe deinö jo̧bakwö kwebachadöbi. I̧yada yöteda petjibinobe, ja̧danö dewachakwa̧ abönö, okobe deinö bakwo̧bi ö̧ji̧bökönö Jordan ojwe petjibinobe.

^23-24 Ja̧danö, pebibajadö, Davidbi jo̧bakwö kwebachadöbi tupakwö Majanayin comunidadbe tji̧'yinobe. Ja̧danö, Ajitofel waisanö lȩebaja̧ Absalon a̧ja̧kwiökökwe, Ajitofelma öwaisinobe, Davidnö ujuluwobö omukwati̧ waekwakobe jö̧ba̧lö. Jo̧kwajabetjö̧ ajwi bulu oma'anö wanawaka wanajo̧, bulunö wa̧nö ȩwa̧jinobe itebo comunidad Guilobe. Jobe ichibö, woaja̧ ikena jawa ömöledönö weinobe, ö'wö batibaja̧ ikenama chitea jawa baikwö ja̧baduwi jö̧ba̧lö. Ikenama, webajo̧, nubawö ö'wö baibinobe. Ikenama ömöledöma Ajitofelnö tjödinobe, abe'donö tjödinemi ötölanö. Ja̧danö, Absalonma israel jojodö ölakwabikwawa jojodökwö Jordan ojwe peibinobe, Davidnö lubö.

²⁵ Ajayinöma David ömöayo̧ Joabma israel ölakwabikwawa jojodötjö la'aka luwo̧ ö̧jinobe, ja̧danö Joab ö̧jinemi, Absalonma iteda ömöayo̧ Amasa mikwo̧nö ujuninobe, ölakwabikwawa jojodö inesö la'aka tjuluwo̧ baibanö. Jo̧ba Amasama, ismaelita jojo Itra mikwo̧ itji̧, ja̧danö ojo'doma Isai itji̧ju Abigail mikwuju. Ju'wibi, Amasa ojo'do Abigailma, Joab ojo'do Sarvia jöjawuju.

²⁶ Ja̧danö, Absalonbi, israel jojodötjö ölakwabikwawa jojodöbi Galaad nijinö tjabakwemi tjujuninobe.

²⁷ Davidma Majanayin comunidadbe i̧'yinobe, ja̧danö jobe ichibenama, ju'wedöma jo̧banö pjatjatinobe. Amonitas jojodö tjitebo comunidad Raba la'aka luwo̧, Najas itji̧ Sobima, itea ichejebinobe, ja̧danö Lo Debar comunidad jojo Amiel itji̧ Machirma itea ichejebinobe, ja̧danö galaadita jojo Roguelin comunidad jojo Barzilayma itea ichejebinobe, Davidnö pjabatö.

²⁸ Jobadöma kama opjijubi, dȩja̧piyabi, i̧sa̧yijubi, trigobi, cebadabi, harinaso̧pjabi, trigo balawabi, caraotabi, lentejasbi,

²⁹ wa̧yo̧bi, cuajadabi, obejadönöbi, quesobi tjichejebinobe, Davidnö tjiyobö, Davidbi ömöledöbi otiwanö tjukwobö. Jobadöma tjöwaisinobe, jojodö deobekwe kwebachö baledajadö, a̧wi̧chi̧tjöbi ojwiyo o̧titjöbi tötjena, ja̧danö tjime'dawachibajena jö̧ba̧lö. Jo̧kwajabetjö̧ Davidnö pjabatö tjitea ichejebö tjiyinobe Davidnö.