2 Samuel 16 - Dios Iwene

Siba Davidnö pjaatina jawa

¹ Ja̧danö, mösa'o wa̧pekwa'o tupakwö David öbaledajabema, Mefiboset ömöayo̧ Sibanö öbadekwajinobe. Sibama du̧ju̧taja bu̧lu̧dönö, doscientos pan öpji̧yabi, cien ochiju uba köködakwawabi, cien ochiju higo wa̧ji̧bi, ubasobu o̧'do̧busa'wo bakwa'wobi, e'ewadö bu̧lu̧dönö öbibö ichinobe.

² Jejenö ichibiökwe, Davidma Sibanö abebö a̧ja̧kwinobe, —Bi̧ya, ¿dai e'ewö kwi̧'ya? —jö̧ba̧lö. Abebö a̧ja̧kwökwe, Siba atadinobe, —Bidö bu̧lu̧döma, ökwö la'aka chuluwo̧ kwömöledö tjöwanobö chichejebejabe, ja̧danö pan öpji̧yabi, higo waji̧bi, kwömöayedö tjukwobö chichebajabe, ja̧danö ubasobuma, jojodö deobe kwekachaduwonö me'dawadö tjowobö chichejebajabe, —jö̧ba̧lö atadinobe Sibama.

³ Jejenö yöa̧lökwe, la'aka luwo̧ Davidma abebö a̧ja̧kwinobe, —¿Kwuluwo̧mine Saul ö̧'dö̧ Mefibosetja? ¿Jo̧bama ichajökiji̧? —jö̧ba̧lö. Abebö a̧ja̧kwökwe, Siba atadinobe, —Jo̧bama Jerusalennö ö̧jibajabe, baikwö omukwatö, –Babe israel jojodöma cha'dömine Saul webö ö̧jinemi ötjöda webö chö̧jobö tjujunakobe, —jö̧ba̧lö.

⁴ Jejenö yöa̧lökwe, la'aka luwo̧ Davidma Sibanö yöa̧linobe, —Mefiboset jejenö ötjönö öpöjödö ö̧jibinobetjö̧, okobe jwiinö jo̧ba ujuna̧linama, ökwönö chiyakwö, —jö̧ba̧lö. Yöa̧lökwe, Sibama atadinobe, —Chuluwo̧, kwöba a'o bȩbachibö chösödakwö, ba̧kwelöjatebö kwösödi̧nö ja̧bö chö̧jobö chösöda, —jö̧ba̧lö.

Simi Davidnö sulabenö yöa̧lina jawa

⁵ Ja̧danö, la'aka luwo̧ David Bajurin comunidadbe ichibenama, Saulmine ömöledötjö bakwo̧ Guera mikwo̧ itji̧ Simi mikwo̧ma, comunidadtjö labebö, sulabenö yöba̧lö jwöeba̧linobe Davidnö.

⁶ Ju'wibi, la'aka luwo̧ Davidnöbi, ömöayedötjö luwedönöbi inawiya ikwinobe Simima. David ömöayedö ölakwabikwawa juluwadöbi, ju'wedö jo̧bakwö kwebachadöbi Davidnö tjöbeba̧lö tjösawinö kwetjachijayonö, Simima inawiya ikwinobe.

⁷ Ja̧danö, inawiya ikwonö, Simima sulabenö jwöeba̧linobe Davidnö, baikwö: —A'dewö lotakwö ökwö sulabo̧, jojodönö kwabawö lobo̧nö, belö labebi.

⁸ Ökwöma Saul ömöledönö kwabö lobajo̧, jo̧ba la'aka luwo̧ ö̧binemi kwönaukwinobe. Ja̧danö jejenö ja̧köbiökwe, babe Isabenö Jo̧ma balekwa mikwa ökwönö lȩebobe. Jau, ökwönö lȩbebö, luwo̧ kwö̧binemi kwitji̧ Absalonda ö̧bobö iyajabe. Ökwö jojodönö kwabawö lobö sulabenö ja̧köbinama, babe balekwa mikwa ökwönöda otiwanö baibajabe, —jwöbeba̧lö sulabenö yöa̧linobe Simima Davidnö.

⁹ Jejenö sulabenö yöa̧liökwe, David öpöo Sarvia jitji̧ Abisaima Davidnö yöa̧linobe, —Chuluwo̧, ite mikwawö̧kö̧ ökwönö sulabenö yöa̧lobö jwibo̧, jo̧bama ö'wö babibajo̧ awilidanö mikwawö̧kö̧, tajawedö ökwö inesö la'aka chuluwo̧nö sulabenö yöa̧lobö. Webitjö, ö̧jobekwö 'ya̧nö, uu bulatö lotobö, —jö̧ba̧lö yöa̧linobe Abisaima.

¹⁰ Jejenö yöa̧liökwe, la'aka luwo̧ Davidma atadinobe, —Bi̧ya baledi̧ma ökwödö Sarvia jitji̧mu jawamaökö Abisai. Jau, wajwida ökwödöma, Isabenö Jo̧ Diosda jo̧banö weajena, Davidnö sulabenö yöka̧lo jö̧ba̧lö, ja̧danö Jo̧bada jejenö weatjö̧ma, kabatibi jö̧ba̧lö wedoböma jwiobe.

¹¹ —Ja̧danö tupakwö yöa̧linobe Davidma, Abisainöbi, ju'wedö ömöayedönöbi, —Omukwataduwi, ötjöda chitji̧ma, ötjönö kwabö loobö isakwo̧, ¿jö̧tö? Jo̧kwajabetjö̧, ötjöda yöne chömöledöso̧ chitji̧ ötjönö öpöjöditjö̧ma, bite chömöledöso̧bö̧kö̧, Benjaminsaso jojo, Saul ömöledöso̧ ötjönö öpöjödobö jwienaji̧? Jȩna, jo̧kwajabetjö̧ jo̧banö kwabö lobökönaduwi, wainö sulabenö yöba̧lo̧, Isabenö Jo̧ Diosda sulabenö yöa̧lobö weajena jö̧ba̧lö.

¹² Ja̧danö ju'wibi yöta̧laduwakwö, Bite ötjönö sulabenö ja̧i̧ edö, Isabenö Jo̧ma edö, lȩlöinö edö pjaatena ötjönö. Simi usula chemawinö sulabenö yöa̧liökwe, Isabenö Jo̧ma lȩlöinö edö otiwanö pjaatena, —jö̧ba̧lö yöa̧linobe Davidma.

¹³ Ikenama yöba̧lajo̧, Davidbi ömöayedöbi tupakwö manabenö tji̧'yinobe, ja̧danö tji̧'yonö, badeibö mösa'o ja'yuwa'ö ö'öbönö kwebachö, Simima sulabenö jwöbeba̧liabö kweachinobe, inawiyabi, nijiso̧pjabi ikwö.

¹⁴ Ja̧danö, la'aka luwo̧ Davidbi, jo̧bakwö kwebachadöbi, me'dawachibajadö tjichibinobe Jordan mikwödö ojwebe, ja̧danö jobe ichibö, tjö'wachinobe.

Absalon Jerusalenbe ichibina jawa

¹⁵ Ja̧danö, David jejenö döibajonö, Absalonma ömöayedö israel jojodökwö ichibinobe Jerusalenbe, ja̧danö waisakwawa lȩbebo̧ Ajitofelbi Absalonkwö ichibinobe.

¹⁶ Ja̧danö, David ömöledöso̧ arquita jojo Husayma Absalon öba a'o ichibinobe, ja̧danö ichibö, —Chuluwo̧, lekwe möle duluwo̧ kwö̧jobö chösöda, —jö̧ba̧lö dötölatajanö yöa̧linobe Husayma.

¹⁷ Yöa̧lökwe, Absalonma abebö a̧ja̧kwinobe, —Ökwöma chabe'do David yöne ömöledöso̧ö̧kö̧ jö̧talatö, jo̧kwajabetjö̧ jo̧bakwö dö̧kibajo jö̧ka̧lajena ichejekwa. Tajawedö yöne kwömöledöso̧kwö 'dökibajököda? —jö̧ba̧lö.

¹⁸ Abebö a̧ja̧kwökwe, Husayma atadinobe, —Ja̧maökö, kwabe'do ömöledöso̧bö̧kö̧sa chuluwo̧. Jau Absalon, Isabenö Jo̧ Diosbi, israel jojodöbi ökwönöda omudawö tjujunajabe, jo̧kwajabetjö ökwöda kwömöledöso̧sa, ja̧danö ökwökwöda ja̧nö pjatatakwo̧sa.

¹⁹ Ja̧danö ju'wibi baikwö yöta̧la, kwabe'do ömöledöso̧ waisakwawa lȩbebo̧ chö̧jinatjö̧ma, ökwö jo̧ba itji̧ inesö la'aka luwo̧ bakibenama, ökwönö pjatatökenaji̧? Isabenö kwabe'donö pjabatö waisakwawa lȩtebinadanö, ökwönöbi pjatatobö jo̧be chuluwo̧, —jö̧ba̧lö omöna yöba̧lö atadinobe Husayma.

²⁰ Ikenama Absalonma Ajitofelnö abebö a̧ja̧kwinobe, —Waisakwawa ji̧ lȩekwa yökawobö chösöda, otiwanö ja̧dakwa̧ma di̧ya? yöbawitjö, —jö̧ba̧lö.

²¹ Abebö a̧ja̧kwökwe, Ajitofelma Absalonnö atadinobe: —Kwabe'doma ilekwamutjö ju'wedönö ujunibinobe, eju tjiteada̧lobö, ¿jö̧tö? Jobadö kwabe'do ilekwamunö 'da̧bö ja̧köbo, isabenö kwabe'do öpöjojo kwö̧ji̧ öwawakobetjö̧. Jejenö ja̧köbiawö̧, okobe deinö israel jojodöma a̧ja̧kwö tjöwaisakobe, jwaikwöda kwabe'dö öpöjojo kwö̧ji̧ma, ja̧danö ajayitjö bajalekwönönö ökwöbi, kwömöayedöbi kwujuluwachibaduwakwedöja, —jö̧ba̧lö atadinobe.

²² Jo̧kwajabetjö̧, Ajitofel yöa̧laja̧danö ja̧inobe. Absalon ömöayedöma i̧sȩdo̧tjö otikweju la'aka luwo̧ eju mö ba̧ba̧lawobe tjujuninobe, okobe deinö tjedobö öwawobema. Ikenama okobe deinö tjedonö, Absalonma iteda i̧sȩdotjö otikweju okwa tebachö, abe'do ilekwamunö 'da̧'da̧bö ja̧inobe.

²³ Ja̧ möle okobe deinö Ajitofelnö tjomukwatinobe, Ajitofelma jwiinö waiso̧, Dios waisanö yöawi̧danö jwaikwöda waisanö yöbawo̧ Ajitofelma, jö̧ba̧lö. Jobekwö tjomukwatinobe Davidbi, Absalonbi, ja̧danö ba̧kwelöjatebö Ajitofel lȩekwa yöawi̧danö ja̧biatjinobe.