2 Samuel 15 - Dios Iwene

Absalon inesö la'aka luwo̧ baibobö isakwina jawa

¹ Ja̧danö, jemi ikenama, baikwö baledinobe: Absalonma ölakwabikwawa jawa kolukabi, kabayudönöbi eminobe, ja̧danö ömöayedö ölakwabikwawa jojodö cincuentabedönö weinobe, kweachi̧tenia, jobadöma abönö kwetjachobö.

² Ja̧danö ju'wibi ja̧inobe Absalonma. Ja̧ möle Israel jojodö wene tjujuna̧lenabi, bakwo̧ jelo̧kwö jwöjwöbakwakwawö ö̧jenabi, la'aka luwo̧ ö̧jobekwö 'yi̧atjinobe, wene tjujuna̧li̧ a̧ja̧kwö, lȩekwa yöawobö. Jo̧kwajabetjö̧, möletenia, yȩayi a̧la̧ibö, comunidad apjude a'obe ja̧nö 'yi̧ainobe Absalonma, comunidadbe ichadönö edobö. Ja̧danö, bakwo̧ la'aka luwo̧ öba a'o wene ujuna̧li̧ yöawobö ichenama, Absalonma jo̧banö jwöbiainobe, jo̧bakwö yöa̧lakwawobö. —Detjö, diso nijitjö, ja̧danö diya comunidadtjö kwichaja̧da? —abebö a̧ja̧kwiawö̧, atadiatjinobe, ja̧danö wene tjujuna̧li̧ yöbawiatjinobe.

³ Yötjawiökwe, Absalonma, —Chömöledöso̧, isabenö jwea kwomukwati̧ma, isabenö la'aka luwo̧ ökwönö pjaatobö jo̧be. Jo̧kwaijayonö, la'aka luwo̧ma lȩekwa luwo̧ bakwo̧nöbi ujunikokobe, jojodö wene yötjawi̧ a̧ja̧kwö, lȩekwa yöawobö. Jo̧kwajabetjö̧, ökwönö pjaatobö ji̧jayonö, waekwobe chömöledöso̧, —jö̧ba̧lö atadiainobe Absalonma.

⁴ Ikenama tupakwöbi yöba̧li̧ainobe Absalonma, —Lȩekwa luwo̧ chö̧jitjö̧ma, isabenö otiwo jö̧a̧lena. Lȩekwa luwo̧ chö̧jitjö̧ma, okobe deinö otiwanö chö̧jobekwö ichibö, wene yötjawena, ja̧danö yötjawi̧ a̧ja̧kwö, otiwanö pjabatö, jwetebo jö̧ta̧lena. Jo̧kwaijayonö lȩekwa luwo̧ chö̧jokobetjö̧, sula, ökwödönö la'aka luwo̧ pjaato jö̧a̧li̧ma waekwobe, —jö̧ba̧lö yöba̧liainobe Absalonma.

⁵ Ja̧danö ju'wibi ja̧biainobe, bakwo̧ Absalon öba a'o ichibö, chuluwo̧ja jö̧ba̧lö bȩbachibö ösöditjö̧ma, Absalonma jo̧banö do̧batö, kabebö du̧atinobe, ökwöma chömöleso̧ja jö̧ba̧lö.

⁶ Jejenö ja̧inobe Absalonma, okobe deinö la'aka luwo̧ öba a'o wene yötjawobö ichadönö. Ja̧danö, jejenö ja̧bö, israel jojodö tjösödi̧ önaukwinobe, la'aka luwo̧nö tjösödi̧tjö̧ bajalekwönönö jo̧banöda tjösödobö ja̧bö.

^7-8 Ja̧danö, ö'wejemu jawa o̧biya baledaja̧ ikenama, Absalonma la'aka luwo̧ Davidnö aebinobe, —La'aka chuluwo̧, Hebron comunidadbe chi̧'yobö jö̧ta̧la, jobetjö Isabenö Jo̧ Diosnö kwabö juwö chiyobö. Jau chuluwo̧, ötjö kwömöayo̧ siria niji comunidad Guesurnö chö̧jayi, isabenö ja̧takwa̧ wene yöbawö chujunijatö, –Isabenö Jo̧ Dios Jerusalenbe chȩwa̧jobö pjaatitjö̧ma, isabenö Hebronbe 'ya̧nö, jobetjö Isabenö Jo̧ Diosnö ösödö kwabö juwö chiyocha, —jö̧ba̧lö. Jo̧kwajabetjö̧ yö̧bawö chujunina badekwachinö Hebronbe chi̧'yobö atebakwö, chi̧'yobö weköbakwa̧ji̧? —jö̧ba̧lö aebinobe Absalonma abe'do Davidnö.

⁹ Aebökwe, la'aka luwo̧ Davidma atadinobe, —Jau, wene jwiinö Hebronbe kwi̧'yo, —jö̧ba̧lö. Jo̧kwajabetjö̧ Hebronbe i̧'yinobe Absalonma.

^10-11 Ja̧danö, Absalonkwö ju'wedö doscientosbedö Jerusalennö ju̧kwadöma Hebronbe tji̧'yinobe. Jobadöma Absalon isabenö omukwati̧ wajwitjinobe, Absalon a̧debawö̧ tji̧'yinobe, sulabenö omukwatökönö teadö tji̧'yinobe. Jo̧kwaijayonö ju'wibi tojata̧lö ja̧inobe Absalonma. Iteda ömöayedö israel niji ba̧kwemeachibanö sasokwena jojodö tjö̧'da̧de tji̧'yobö weinobe, ja̧danö jobadönö weinobe baikwö: —Trompeta ökwöakobe, ja̧danö ökwöi̧ a̧ja̧kwö, yökawaduwo, –Trompeta ökwöi̧ a̧ja̧kwaduwi, Hebron comunidadtjö Absalonnö kabebö tjujunajabe, okobe deinö israel jojodö la'aka tjuluwo̧ baibanö, –jö̧ba̧lö yökawaduwo trompeta ökwöenama, —jö̧ba̧lö weinobe Absalonma ömöayedönö.

¹² Jejenö 'ya̧jo̧, Hebrontjö Absalonma kwabö juwö Diosnö iyinobe. Ja̧danö, jobe Hebronnö ö̧jonö, ju'wibi ja̧inobe, bakwo̧ waiso̧nö jwöinobe, Guilo comunidad jojo Ajitofel mikwo̧nö, Guilotjö ichö, Absalonnö la'aka luwo̧ baibakwa̧ jawa pjaatobö. Jo̧ba Ajitofelma, jwiinö waiso̧, ja̧danö ajayinö Davidnö pjabatina, otiwanö ja̧akwa̧ öwaisobö. Ja̧danö, ajayitjö bajalekwönönö Absalonnö ösödadöma tjö̧ba̧jekwachinobe, Davidnö kabatibö Absalonnöda la'aka luwo̧ baibanö tjujunobö omukwatadöma.

David Jerusalentjö 'döibajina jawa

¹³ Ja̧danö, bakwo̧ David ö̧jobekwö ichibö yöawinobe, —Israel jojodöma ökwönö kabatibö, Absalonnö tjösödajobe, la'aka tjuluwo̧ ö̧jobö, —jö̧ba̧lö.

¹⁴ Yöawökwe, Davidma ömöayedö jo̧bakwö Jerusalennö ju̧kwadönö yöa̧linobe, —Juluwanö a̧la̧ibö dödibajaduwo, Absalon ökwödönö kwabö loapji jö̧ba̧lö. Juluwanö ladebökötjö̧ma, dö̧jibobö jwiena, ichibö ökwödönöbi, ju'wedö okobe deinö Jerusalennö ju̧kwadönöbi kwabö lotjena, —jö̧ba̧lö.

¹⁵ Yöa̧lawö̧, —Jau duluwo̧, ökwödöma kwömöayedösa, okobe jwiinö ökwö la'aka duluwo̧ omukwatö kwujuni̧danö pjadatakwedösa, —jö̧ba̧lö tjatadinobe.

^16-17 Jo̧kwajabetjö̧, juluwanö latjebinobe. Davidma weinobe, ömöayedödanöbedö ilekwamu domulatajabedönö okobe ji̧bö, o̧do tjiteada̧lobö, ja̧danö ju'wedö David ömöledöbi, Jerusalennö ju̧kwadötjö ba̧jekwadöbi Davidkwö tji̧'yinobe. Jerusalentjö labebö, bajaleapo o̧do, comunidad ö'öbösejunö tjöjamatinobe.

¹⁸ Ja̧danö, David jobe iteada̧lonö, okobe deinö ömöayedöma David öba a'o tjöbaledinobe, ja̧danö la'aka luwo̧nö tjöbeba̧lö teada̧ladö quereteo ötjabawö̧bi, peleteo ötjabawö̧bi tjöbaledinobe, ja̧danö ju'wedö filisteo jojodö Gat comunidadtjö Davidkwö ichinadö seiscientosbedöbi tjöbaledinobe la'aka luwo̧ David öba a'o.

¹⁹ Ja̧danö, jobadö Gat comunidad jojodö tjöbalediökwe, Davidma tjuluwo̧ Itay mikwo̧nö yöa̧linobe, —Itay, ökwödöma tajawedö ötjökwö kwichaduwobö? Ökwödöma la'aka luwo̧ 'yabayo̧ Absalonkwö kwö̧jibaduwena. Ökwödöma israel jojodöböködöja, ja̧danö kwiteboduwitjö ödö ja̧nö,

²⁰ mada ichinadöja. Babe ötjöma wajwitobekwö chi̧'ya, jo̧kwajabetjö̧ ökwödönö wetökena, –Ötjökwö ichaduwi, –jö̧ba̧löma. Jerusalennö kwö̧jaduwobö tjekachaduwo, ju'wedö kwömöledökwö Itay, ja̧danö Isabenö Jo̧nö ateba, ba̧kwelöjatebö dösölö̧jinö edö, otiwanö ökwönö pjaatobö, —yöa̧linobe Davidma Itaynö.

²¹ Yöa̧lökwe, Itayma la'aka luwo̧ Davidnö atadinobe, —Ja̧maökö chuluwo̧ la'aka luwo̧, Isabenö Jo̧ ö̧ji̧ wene ji̧danö, ja̧danö ökwö inesö la'aka chuluwo̧ kwö̧ji̧ wenedanö, isabenö yötawakwö, okobe jwiinö kwekachi̧teniama, ötjöbi ökwökwö chichocha. Jau chuluwo̧, ö'wö batibitjö̧bi, ina 'yaba̧lo̧ chö̧jitjö̧bi, bakwaiobe, ötjö kwömöyo̧ma ökwökwö chi̧chakwo̧sa, —jö̧ba̧lö.

²² Yöa̧lökwe, —Jau, otiwa. Kwatjö̧ma ökwödöbi kwöbaledaduwo, —jö̧a̧linobe Davidma. Jo̧kwajabetjö̧ Gat jojo Itaybi, okobe deinö ömöayedö ölakwabikwawa jojodöbi, tjömöledöbi David öba a'o tjöbaledinobe.

²³ Jejenö tjöbaledonö, jobe ju̧kwadö jojodöma labinö tjubudekwinobe tjuluwo̧ Davidnö, ja̧danö la'aka luwo̧ Davidbi, jo̧bakwö 'ya̧döbi Cedron mikwödö pebibö, jojodö deobekwö tji̧'yinobe.

²⁴ Comunidadtjö latjebakwa̧ abönö, Diostjö jojodötjö tjö̧'da̧de pjabatadö Abiatar mikwo̧bi, Sadoc mikwo̧bi tjichinobe, ja̧danö jobadökwö levita jojodöma Dios iteapjo, Dioskwö Israel jojodökwö yöbawö tjujunina wene i̧sȩkwapjo e'ewö tjichinobe. Comunidad ö'öbö ichibö, Dios iteapjo nijinö tjujuninobe, okobe deinö Davidkwö kwebachadö comunidadtjö latjebenanö kabatö.

²⁵ Jobadöbi la'aka luwo̧ Davidkwö tji̧'yobö jö̧tja̧linobe, jo̧kwaijayonö Davidma Sadocnö yöa̧linobe, —Ökwödöma Dios iteapjo tjekataduwo, Jerusalenbe Dios ejubema. Isabenö Jo̧ Dios ötjönö lȩlöinö editjö̧ma, ötjöbi Jerusalenbe chȩwa̧jobö pjaatakwo̧, Dios ejubi, bipjo Dios iteapjobi chedobö.

²⁶ Jo̧kwaijayonö, ötjönö öpöjödö, –Davidnö chöpöjödachibajabe, –jö̧ba̧lö pjaatökötjö̧ma, ja̧bi otiwa. Ötjöma Dios ömöayo̧sa, iteda ösödi̧danö ja̧obö otiwobe, —jö̧ba̧lö yöa̧linobe Davidma Sadocnö.

²⁷ Tukwakwö yöa̧linobe la'aka luwo̧ Davidma tjö̧'da̧de pjabato̧ Sadocnö: —Sadoc, ökwöma tupakwö baledakwa̧ yöbawo̧ja, ¿jö̧tö? Jo̧kwajabetjö̧ baikwö atebakwö, wene jwiinö Jerusalenbe kwȩwa̧jo, kwitji̧ Ajimazkwöbi, Abiatar itji̧ Jonatankwöbi.

²⁸ Ja̧danö, ötjöma ojwe peikwena jojodö deobe chiteada̧locha, baledi̧ wene cha̧ja̧kwobö. Jo̧kwajabetjö̧, baledi̧ kwöwaisena, jobe yöbawadönö weköbo, ja̧danö ötjöma jobe chiteada̧locha, weköbakwa̧ wene cha̧ja̧kwenanö kabatö, —yöa̧linobe Davidma Sadocnöbi, Abiatarnöbi.

²⁹ Yöa̧lawö̧, Dios iteapjo tjebatö tjȩwa̧jinobe, Sadocbi, Abiatarbi, ja̧danö jobe Jerusalennö tjö̧jinobe.

³⁰ Tjȩwa̧jonö, Davidma Jerusalentjö labebö Olivos ötjaba'o mösa'o önöchinobe, tupakwö döibajobö. Ja̧danö, 'ya̧nö, Davidma budekwö, sapatu jwiinö, uu möchekwö kweachinobe, o̧'wo tjo̧acho̧sa jö̧ba̧lö. Ja̧danö okobe deinö Davidkwö kwebachadöbi, kwetjachonö tjuu möchekwö tjubudekwinobe.

³¹ Mösa'o önöchonö, ju'wedö Davidnö yötjawinobe, —Waiso̧ Ajitofelbi Absalonnö pjaatobe, kwö̧bemi Absalonda la'aka luwo̧ ö̧bobö, —jö̧ba̧lö. Yötjawökwe, Davidma Diosnö aebinobe, —Isabenö Jo̧, ökwönö ateba, Ajitofel waisanö yöawi̧ma, waisakwawa jwii̧ yöawakwawa baibanö a̧bulewi̧ baibanö pjakatobö, —jö̧ba̧lö.

³² Ja̧danö, mösa'o wa̧pekwa'o Diosnö iyawemibe ichibenama, jobe arquita jojo Husay mikwo̧no öbadekwajinobe, o̧'wo tjoachö, ökamiji̧do̧ kȩ'ekwö, uunö ökwölaso̧pja̧ wanawo̧nö.

³³ Jo̧banö edö, David yöa̧linobe, —Chömöledöso̧ Husay, ötjökwö kwichitjö̧ma pjakatobö jö̧ka̧li̧ma waekwena, ötjönö pjakatobö jwiena.

³⁴ Jo̧kwaijayonö, Jerusalenbe kwȩwa̧itjö̧ma, isabenö pjakatobö jȩna. Jau Husay, ȩwa̧jö, Absalonnö yökawo, –La'aka chuluwo̧, kwabe'do Davidnö waisakwawa jawa lȩbebö pjatatinadanö, ökwö kwömöayo̧ ja̧nö ökwönöbi pjatatocha, –jö̧ba̧lö. Jejenö, Ajitofel waisanö yöa̧li̧ Absalon a̧ja̧kwapji jö̧ba̧lö pjakatena.

³⁵ Jau Husay, Diostjö jojodötjö tjö̧'da̧de pjabatadö Sadocbi, Abiatarbi jobe ökwökwö tjö̧jakobe, ja̧danö okobe jwiinö Absalon ejutjö yötja̧li̧ma, a̧ja̧kwajo̧ Sadocnöbi, Abiatarnöbi yökawo.

³⁶ Sadoc itji̧ Ajimazbi, Abiatar itji̧ Jonatanbi jobadökwö tjö̧jobe, ja̧danö jobadönötjö̧ okobe jwiinö kwa̧ja̧kwaja̧ wene weköbo, chöwaisobö, —jö̧ba̧lö weinobe Davidma, Husaynö.

³⁷ Jejenö weökwe, David ömöledöso̧ Husayma Jerusalenbe ȩwa̧jinobe, ja̧danö ȩwa̧jö, jobe ichibinobe, Absalonbi jobe ichibenanö.