2 Samuel 14 - Dios Iwene

Absalon Jerusalenbe ȩwa̧jina jawa

¹ David öpöo Sarvia jitji̧ Joabma edö öwaisinobe, La'aka luwo̧ Davidma itji̧ Absalonnö edobö jö̧a̧lobe, jö̧ba̧lö.

² Jo̧kwajabetjö̧ weinobe, Tecoa comunidadtjö bajwuju waisuju jichobö. Ja̧danö, ichibajunö weinobe, —Tjö̧möledö wotjiawö̧ budekwadödanö kwichejekwinö ja̧bi, budekwadö 'dutjawa̧do̧ 'dubawö. Ja̧danö, budekwuju, jömöledö debö tji̧'yioko lekwe möle budekwuju kwichejekwi̧nö, omewasobu dubawökönö ja̧nö,

³ la'aka luwo̧ David ö̧jobekwö 'ya̧wi, ja̧danö yötawaja̧danö akebo la'aka luwo̧nö, —jö̧ba̧lö weinobe Joabma, ja̧danö okobe jwiinö Davidnö ajebakwa̧ yöawinobe Tecoa jojosujunö.

⁴ Weoko, Tecoa jojosujuma Joab weaja̧danö ja̧jinobe, ja̧danö David öba a'o ichibö, jöba nijakwö jöbamatinobe, inesö la'aka chuluwo̧ja jö̧ba̧lö. Ja̧danö, David öba a'o bamataju, ajebinobe, —La'aka chuluwo̧, pjabatitjö, —jö̧ba̧lö.

⁵ Ajebökwe, la'aka luwo̧ Davidma abebö a̧ja̧kwinobe, —¿Dakwö pjatatobö, wene kwujuna̧lima di̧ya? —jö̧ba̧lö. Abebö a̧ja̧kwoko, —Ötjöma usulasujusa, chilekwe wobö ujunibinokosa.

⁶ Ötjöma chi̧tji̧mu ömadönö du̧ju̧tajanö chujuna̧lijatö, ja̧danö jobadöma jo̧dawa'ye mejenö ja̧nö tjölakwabikawinobe. Ja̧danö, tjölakwabikwawi̧ katjatibobö lȩbȩbo̧ deiawö̧, labinö tjölakwabikwawinobe, ja̧danö chitji̧mutjö bakwo̧ma öjawo̧nö kwainobe, ö'wö baibanö.

⁷ Ja̧danö, jejenö balediawö̧, babe okobe deinö chömöledöma ötjö kwömöayujunö labinö wetja̧lobe, –Kwitji̧ öjawo̧nö kwabö lobinanö iyidönö, öjawo̧nö kwabö loaja̧ balekwa mikwa jo̧banöbi kwabö lodakobetjö̧, –jö̧ba̧lö wetja̧lobe. Ja̧danö, jo̧banö kwabö lotjitjö̧ma, ötjöbi chilekweminebi ditji̧mu tupadanö jojodö deinö dö̧jakwedösa, wanedö yötawa dö̧ji̧ma, ökwölatjö sule ökwöla ubi̧ ö̧'i̧a bakö̧'ada ji̧bobe, jo̧ba chitji̧da, ja̧danö ja̧bi tibebö lotjobö jö̧tja̧lobe, ökwöla jwiinö tiibanö. Ja̧danö jejenö chitji̧nö kwabö lotjitjö̧ma, chilekwemine imi söbebö lotjena, itji̧mu tupadanö jojodötjö bakwo̧bi deakobetjö̧, —jö̧ba̧lö ajebinobe.

⁸ Ajebökwe, la'aka luwo̧ Davidma atadinobe, —Jau, pjatatocha. Kwejube daji̧, ja̧danö weawa wetocha, jo̧banö kwabö lotjapji jö̧ba̧lö.

⁹ —Atadoko, tupakwö yöja̧linobe, —Chuluwo̧, öjawo̧nö kwabö lobo̧nö lȩbebökönö dö̧jiökwe, Dios öba a'otjö wene dujuna̧litjöma, ja̧ wenema ötjönöda, ja̧danö chabe'do ömöledönöda baibobö jo̧be, ökwö la'aka chuluwo̧bi, kwömöledöbi wene jwiinö kwö̧jaduwakwedöja, ötjöda atebakwö pjakatobetjö̧, —jö̧ba̧lö.

¹⁰ Jö̧ja̧lökwe, La'aka luwo̧ Davidma yöa̧linobe, —Bemi tupakwo jelo̧ ökwönö wene jwöebobö jö̧a̧litjö̧ma, wene jwöbebo̧nö chö̧jobekwö ichejebinö, ja̧danö isabenö yötawakwö, la'akatjöda yemidanö wene jwöebökakwo̧, —jö̧ba̧lö.

¹¹ Jö̧a̧loko, —Chuluwo̧ la'aka luwo̧, Kwuluwo̧ Isabenö Jo̧ öba a'otjö yöbawö kwujunobö atebakwö, öjawo̧nö kwabö löiökwe balekwa mikwa kwabö lobo̧ma, la'akatjöda chitji̧nö kwabö loobö jwiakobe jö̧ba̧lö, —ajebökwe, Davidma atadinobe, —Isabenö Jo̧ ö̧ji̧ wene ji̧danö isabenö yötawakwö, ja'yubebi sulabenö baledökakobe kwitji̧nö, wanedö yötawa, kwitji̧ öwö'yetjö bakwa'yebi tjoduwökakobe, —jö̧ba̧lö atadinobe Davidma.

¹² Jemi ikenama jojosujuma tupakwö ajebinobe, —Chuluwo̧, ina ja'yubenö ötjö kwömöayuju yöta̧lobö atebakwö, ina yöta̧lobö weköbakwa̧ji̧ la'aka chuluwo̧? —jö̧ba̧lö ajebökwe, —Yöba̧li̧, —weinobe.

¹³ Weoko, —Chuluwo̧, ötjönö pjakatobö kwomukwatitjö̧ma, tajawedö ötjönö pjakati̧danö Dios ömöledö israel jojodönö pjakatobö kwöpöjödobeda? Tajawedö kwitji̧ Absalon ȩwa̧jobö kwöpöjodobeda? Ötjönö pjakatobö kwösödi̧ma, öwaetjöda öwawinö i̧sȩbobe, kwitji̧ ȩwa̧jobö kwöpöjödi̧ma sula jö̧ba̧lö.

¹⁴ Jau chuluwo̧, ökwödö bö̧je jojodöma okobe deinö ö'wö babibadösa, ja̧danö woawatjö tjedachajobö jwibadösa. Baikwö wanedö yötawa, bakwo̧ ojwiyo nijinö tjoebitjö̧ma, yemidanö i̧sa̧yu okwa tebachibö a̧ji̧bokobu, ja̧danö jejenö a̧ji̧bobö jwii̧danö, woawatjö tjedachajobö jwibadösa. Dios omukwati̧danö kwomukwato chuluwo̧, jojodönö lȩbebö söbebö loobö ji̧jayonö, lȩlöinö edö yemidanö jo̧bakwö tjichibobö isakwo̧, ö̧jelö 'da̧bachibö ju̧kwadöma ba̧kwelöjatebö ödö tjö̧japji jö̧ba̧lö. Dios omukwati̧danö kwomukwato chuluwo̧, kwitji̧ tjeachajobö kwomukwato, kwitji̧ ödö ja̧nö ö'wö baibapji jö̧ba̧lö.

¹⁵ Jau chuluwo̧ la'aka luwo̧, jojodö chitji̧nö kwabö lotjobö tjomukwati̧tjö̧, yetabijatö, ja̧danö yebabinö ja̧nö chomukwatijatö, –La'aka luwo̧ Davidnö atebocha, pjaatobö, ja̧danö lȩlöinö editjö̧ma, ötjö ömöayuju atebi̧danö pjaatena.

¹⁶ Isabenö wene chujuna̧li̧ a̧ja̧kwö, ötjönö chö̧jibinö pjaatena, balekwa mikwa kwabö lobo̧ma chitji̧nö kwabö loapji jö̧ba̧lö, ötjöbi chitji̧bi bakobe Dios iyinemi nijitjö debö di̧'yapji jö̧ba̧lö. –Jobekwö chomukwatijatö chuluwo̧,

¹⁷ ja̧danö omukwataju, tupakwö chomukwatijatö, –Chuluwo̧ la'aka luwo̧ ötjönö pjaatitjö̧ma ötjöbi chi̧tji̧bi otiwanö wene jwiinö dö̧jena, –jö̧ba̧lö chomukwatijatö. Jau la'aka chuluwo̧, ökwöma Dios weökwe angeldanö ichejekwo̧ja, wene dujuna̧li̧ a̧ja̧kwö, otiwi̧bi suli̧bi böjö jweinö yökawobö waiso̧köbobetjö̧. Kwuluwo̧ Isabenö Jo̧ Diosnö ateba, ökwökwö ja̧nö pjaatobö, —jö̧ba̧lö yöja̧linobe Tecoa jojosujuma.

¹⁸ Yöja̧liökwe, la'aka luwo̧ Davidma atadinobe, —Babe ökwönö abebö cha̧ja̧kwocha, ja̧danö jweinö, ja'yubebi tojökönö kwatadobö wetakwö, —jö̧ba̧lö. —Jau la'aka chuluwo̧, abebö a̧ja̧kwi, —jö̧ba̧lö yöja̧liökwe,

¹⁹ —Babe akebaja̧ma, Joab weakwö akebaji̧? —jö̧ba̧lö abebö a̧ja̧kwinobe Davidma. Abebö a̧ja̧kwoko, —Jau chuluwo̧, ökwö la'aka chuluwo̧ kwö̧ji̧ wene isabenö ji̧danö, isabenö yötawakwö, abebö kwa̧ja̧kwaja̧danö jo̧be. Isabenö kwömöayo̧ Joabda ötjönö webinama, ja̧danö okobe jwiinö ötjö kwömöayuju yöta̧laja̧ma, Joab yöta̧lobö weaja̧da yöta̧lajabe chuluwo̧.

²⁰ Jau chuluwo̧, kwitji̧ jawa ajayinö kwomukwatina balewö lobö wainö kwomukwatotö jö̧ba̧lö, ökwönö yöta̧lobö weatö Joabma. Ja̧danö jo̧ba weaja̧ tojata̧lö ja̧ jawa yöta̧lobö domukwatijayonö, isabenö waiso̧ja chuluwo̧, ja̧danö dotojoböma jwiatö. Jau chuluwo̧, Dios weökwe angel öwaisi̧danö okobe jwiinö ditebo jawa waiso̧ja, ja̧danö dotojo jö̧da̧laja̧ma, kwöwaisachibajabe, —jö̧ba̧lö jatadinobe.

²¹ Ikenama la'aka luwo̧ Davidma Joabnö yöa̧linobe, —Akebaja̧danö ja̧tocha, Absalon ȩwa̧jobö wetocha. Jo̧kwajabetjö̧ Guesurbe 'ya̧nö, öbibö ichejebinö chitji̧ Absalonnö, —jö̧ba̧lö.

²² Yöa̧lökwe, la'aka luwo̧ David öba a'otjö Joabma öba nijakwö öbamatinobe, isabenö chuluwo̧ja jö̧ba̧lö, ja̧danö Davidnö yöa̧linobe, —Chuluwo̧, Dios ökwönö pjaatobö ateba. Babe öwawinö chedobe, isabenö otiwanö ötjö kwömöayo̧nö kwösödobe jö̧ba̧lö, atebaja̧danö baledobö weköbajabetjö̧, —jö̧ba̧lö.

²³ Ikenama, David weaja̧danö, Joabma Guesurbe i̧'yinobe, Absalonnö isakwö, ja̧danö jo̧banö öbibö ȩwa̧jinobe Jerusalenbe.

²⁴ Jo̧kwaijayonö, Jerusalenbe tjichibenama, öba a'o Absalon ichibobö weinokobe Davidma, —Wainö, iteda ejunö ö̧jobö jo̧be, chöba a'o ichibobö jwibo̧, —jö̧ba̧lö. Jo̧kwajabetjö̧, iteda ejunö ö̧jinobe, ja̧danö la'aka luwo̧ David öba a'o ichibinokobe.

²⁵ Absalonma isabenö wamenö otiwo̧ ö̧jinobe, okobe deinö israel jojodötjö bakwo̧bi deinobe, jojodö edö, —Aaa, itema otiwo̧, —jö̧ba̧lö Absalonnö yötja̧li̧danö yötja̧lökwema. Okobe jwiinö iteba'oma, jwiinö otiwo̧ ö̧jinobe, suli̧ jwiinö.

²⁶ Ja̧danö, öwö'yema, jwiinö otiwa'ye wana̧linobe. O̧ba bakwabakwena bakwötanöda öwö'ye 'witjobö weinobe, ja̧danö 'witjenama, la'aka luwo̧ itea ömöki̧ nönawapinö öba̧ja̧dinobe, dokwa nöinö ömökojobö jö̧ba̧lö, ja̧danö dötölataja kilo bajalekwönönö ömökinobe Absalon öwö'yema.

²⁷ Ja̧danö i̧tji̧munöbi 'yaebinobe Absalonma, ömadönö wamedukwanöbi, itjiju bakwujunöbi. Ja̧danö Absalon itjijuma Tamar jimikwinobe, jwiinö otiwuju.

²⁸ Dötölataja o̧biya baledibanö, abe'do la'aka luwo̧ Davidnö edökönö Jerusalennö ö̧jinobe Absalonma.

²⁹ Ikenama, Absalon omukwatinobe, —Joabnö wetocha, la'aka luwo̧ chabe'do ö̧jobekwö 'ya̧nö, aebobö, yemidanö öba a'o chichibakobetjö̧, —jö̧ba̧lö. Jejenö omukwatö, Joab Absalon ö̧jobekwö ichobö jwöinobe, jo̧kwaijayonö Joabma ichobö öpöjödinobe. Öpöjödiökwe, yemidanö ichobö jwöinobe, ja̧danö yemidanö öpöjödinobe.

³⁰ Jejenö öpöjödiökwe, Absalonma iteda ömöayedönö weinobe, —Joab öbatjoma, chöbatjo ö'öbösayu jo̧be, cebada jawa batjoma. Jayu Joab öbatjo juwaduwi, —jö̧ba̧lö weinobe.

³¹ Weawö̧, Joab öbatjo tjujuwinobe, ja̧danö tjujuwiökwe, Joabma Absalon ejube 'ya̧nö abebö a̧ja̧kwinobe, —Tajawedö chöbatjo tjujuwaja̧da kwömöayedöma? —jö̧ba̧lö.

³² Abebö a̧ja̧kwökwe, —Belö ökwönö jwötijatö, baikwö kwichobö, –Chiminö chabe'do la'aka luwo̧nö akebobö jö̧ta̧la, –jö̧ba̧lö, ja̧danö kwichokobetjö̧, tjujuwajabe. Jau Joab, baikwö la'aka luwo̧ chabe'donö akebobö jö̧ta̧la, –Absalonma abebö a̧ja̧kwobe, Tajawedö Guesurtjö chichobö ökibaja̧da? Jobetjö latebinökötjö̧ma, otiwo jö̧a̧linena. Ökwö la'aka chuluwo̧ kwöba a'o chichibobö jö̧ta̧la, ja̧danö kwedemi isabenö wene chujuna̧litjö̧ma, kwabö loköbobö jo̧be, –jö̧ba̧lö chabe'donö akebobö jö̧ta̧la, —jö̧ba̧lö atadinobe Absalonma.

³³ Atadökwe, Joabma la'aka luwo̧ David ö̧jobekwö i̧'yinobe, ja̧danö Absalon yöa̧laja̧ yöawinobe. Yöawiökwe, Absalon öba a'o ichibobö weinobe, ja̧danö David öba a'o ichibö, öba nijakwö öbamatinobe, isabenö la'aka chuluwo̧ja jö̧ba̧lö. Ja̧danö, la'aka luwo̧ Davidma Absalonnö ösödö du̧atinobe, ökwönö edö chösöda, jö̧ba̧lö.