2 Samuel 13 - Dios Iwene

Amnon iteda öjawuju Tamarnö sulabenö ja̧ina jawa

^1-2 Bakwuju David itjiju Tamar mikwuju jö̧jinobe, David itji̧ Absalon öjawuju, jwiinö otiwujuma. Ja̧danö ina i̧so̧kwö jö̧kuju jö̧jinobe Tamarma. Ja̧danö, David itji̧ Amnon mikwo̧ma, öjawuju Tamar mikwujunö ösödinobe, otiwuju, isujunö 'da̧towe jö̧ba̧lö. Kabatökönö jobujukwö ö̧jobö omukwatinobe, dakwö chöjawujukwö chö̧jakwajö jö̧ba̧lö, ja̧tjö 'dö̧achi̧ baibenanö kabatö.

³ Ja̧danö, Amnon ömöledötjö bakwo̧ ö̧jinobe, Jonadab mikwo̧. Jo̧ba Jonadabma, David öpöe Sima mikwo̧ itji̧, ja̧danö jwiinö waisina Jonadabma, iteda ösödi̧ jawa badekwachinö ja̧i̧ma.

⁴ Ja̧danö, ju'wi möle Jonadabma Amnonnö abebö a̧ja̧kwinobe, —Amnon, tajawedö yȩayitenia kwo̧'wo tjo̧achö kwö̧jobeda? Ökwöma inesö la'aka luwo̧ itji̧köba, tajawedö kwo̧'wo tjo̧achobö, yöbawitjö, —jö̧ba̧lö. Abebö a̧ja̧kwökwe, Amnonma atadinobe, —Chöjawo̧ Absalon öjawujunö chösöda, Tamarkwö chö̧jowe jö̧ba̧lö, ja̧danö jobujukwö chö̧jakwa̧ wayobetjö̧, cho̧'wo tjo̧acha, —jö̧ba̧lö atadinobe.

⁵ Atadökwe, Jonadabma Amnonnö yöa̧linobe, —Baikwö ja̧köbo, a̧la̧ibökönö kamapjonö kwö̧bo, chö'wöcha jö̧ba̧lö. Jejenö kwö'wöchiökwe, kwabe'do Davidma dakwö kwö̧jojobö jö̧ba̧lö edö ichakobe, ja̧danö edö ichenama, baikwö akebo kwabe'donö, –Chabe'do, chöjawuju Tamar ichö, chösödi̧ kwakwawa jotidobö chösöda. Jejenö chöba a'otjö kwakwawa jotidakobe, ja̧danö jiyi̧tjö, chukwocha, –jö̧ba̧lö akebo kwabe'donö.

⁶ —Jö̧a̧lökwe, jö̧a̧laja̧danö ja̧inobe Amnonma. Nöinö chö'wöcha jö̧ba̧lö, a̧la̧ibökönö kamapjonö ö̧binobe. Ja̧danö la'aka luwo̧ David jo̧banö edö ichenama, Amnonma jo̧banö aebinobe, —Chabe'do, weköbobö ateba, chöjawuju Tamar mikwuju jichobö, ja̧danö chöba a'otjö chösödi̧ pan jotidobö. Ikenama jiyaja̧tjö̧ otiwanö chukwena, —jö̧ba̧lö aebinobe.

⁷ Aebökwe, Davidma yöbawo̧nö weinobe, David ejunö ju̧ju Tamarnö yöa̧lobö, —Tamar, kwöpöe Amnonma ö'wöchobe, ejube kwi̧'yo, ukwakwa̧ kwakwawa kwotidobö, —jö̧ba̧lö.

⁸ Weoko, Tamarma Amnon ejube ji̧'yinobe. Jobe Amnonma kamapjonö ö̧binobe, ja̧danö Amnon eda̧lonö, öba a'otjö pansa'be otidö, öpji̧ya jotidinobe, ja̧danö otidaju, jöbalinobe, ukwobö.

⁹ Ikenama, balö kabataju, jotidaja̧ deja̧pa̧nö jöwaninobe Amnon öba a'o, ukwobö. Jo̧kwaijayonö Amnonma ukwobö öpöjödinobe, ja̧danö weinobe, okobe deinö ömöayedö latjebobö, ja̧danö weawö̧, okobe deinö latjebinobe.

¹⁰ Ikenama Amnonma Tamarnö yöa̧linobe, —Chabȩko̧be kwichejebo kwakwawa, ja̧danö kamapjonö chö̧bonö kwiyotjö, kwömamutjö chukwobö, —jö̧ba̧lö. Yöa̧loko, abȩko̧be je'ewinobe pan öpji̧yama, jöpöe Amnon ö̧jobekwö.

¹¹ Jo̧kwaijayonö, kwakwawa ichejebö yö̧ne jichibenama, Tamarnö do̧atinobe Amnonma, ja̧danö yöa̧linobe, —Ichi, ötjökwö dö̧lo chöjawuju, —jö̧ba̧lö.

¹² Jö̧a̧loko jöpöjödinobe, —Ja̧maökö chöpöe. Ötjönö juluwajo̧, 'da̧köbobö jwiinö sula, ditebo israeltjö la'akatjöda jejenö ja̧tjobö jwiobe, atebakwö jejenö sulabenö ja̧bökönui jö̧ba̧lö.

¹³ Ja̧danö ötjönö 'da̧bö kwujuluwitjö̧ma, jwiinö tabakwö chö̧jena, cho̧'wo̧ 'dibachibö chö̧jökenanö. Ja̧danö ökwöma jejenö ja̧bö inesö omukwatökönö tjo̧'wo jwibadödanö bakibena. Yötawakwö chöpöe, ötjökwö kwö̧jobö kwösöditjö̧ma, dabe'do la'aka luwo̧nö akebo, kwilekwo batibanö ötjönö kwemobö, akebitjö̧ma isabenö akebaja̧danö weena, —jö̧ba̧lö ajeba̧linobe Tamarma.

¹⁴ Jo̧kwaijayonö a̧ja̧kwobö öpöjödinobe Amnonma, ja̧danö jujulutjö bajalekwönönö juluwo̧obetjö̧, öjawujunö juluwajo̧ 'da̧bö ö̧linobe Tamarnö.

¹⁵ Ikenama, öjawujunö 'da̧bö kabatajo̧, Amnonma jwiinö öpöjödachibinobe öjawuju Tamarnö. Ajayinö ösödaja̧tjö bajalekwönönö jwiinö öpöjödachibinobe. Jobujunö öpöjödö, —A̧la̧ibö da̧ji, —weinobe.

¹⁶ Weoko, —Ja̧maökö chöpöe, ida̧ökö ötjönö 'da̧bö kwujuluwajabema, a'dewö lobökönuitjö. Jejenö ja̧köbitjö̧ma, ida̧ökö sulabenö ja̧köbaja̧tjö bajalekwönönö sulena, —jö̧ba̧lö ajebinobe. Jo̧kwaijayonö a̧ja̧kwobö öpöjödinobe,

¹⁷ ja̧danö ömöayo̧ ejunö otido̧nö jwöbö weinobe, —Bisuju jojosujunö chö̧jelö labebi, ja̧danö lajebaja̧ okobe apjude pje'dati, yemidanö tejachapji jö̧ba̧lö.

¹⁸ —Weökwe, ömöayo̧ma Tamarnö laebinobe, ja̧danö apjude ipje'datinobe. Tamarma kamijido̧ ödöado̧ 'dujawinobe, öja ödöado̧ma, ju'wedö la'aka luwo̧ i̧tji̧mu ya̧dö ina i̧so̧kwö jö̧kö̧dö 'dubawiatji̧danö.

¹⁹ Ja̧danö, jo̧'wo tjo̧achö, ja̧do̧ ödöado̧ kȩ'ekwö lojinobe Tamarma, ja̧danö ökwölaso̧pja̧ juunö jöwaninobe, ja̧danö juu do̧ba̧lakwawö, labinö budekwiabö jȩwa̧jinobe.

²⁰ Jejenö ja̧jiökwe, jöpöe Absalonma abebö a̧ja̧kwinobe, —Chöjawuju, kwöpöe Amnonma ökwönö 'da̧bö ujuluwaji̧? Jo̧bama kwöpöeobetjö̧, baledaja̧ yöbawökönui, ja̧danö baledaja̧ omukwatöma kwo̧'wo tjo̧acha chöjawuju, —jö̧ba̧lö. Ja̧danö jemi tupakwö jöpöe Absalon ejunö jö̧jinobe Tamarma, jwiinö o̧'wo tjo̧achuju.

²¹ La'aka luwo̧ Davidma baledaja̧ wene a̧ja̧kwinobe, ja̧danö a̧ja̧kwö nöinö ödameakwinobe.

²² Ja̧danö, Absalonma jwiinö öpöjödinobe Amnonnö, öjawuju Tamarnö sulabenö 'da̧bö ujuluwinobetjö̧, jwiinö ölabinobe Amnonnö, ja'yubebi jo̧banö yöa̧lökenanö baibanö.

Absalon Amnonnö kwabö loina jawa

²³ Jemi ikenama, dötölataja o̧biya baledaja̧ ikenama, baikwö baledinobe: Absalon ömöayedöma, Absalon ajwimu obejadö tjöwö'ye 'wibö tjotidinobe, Baal Jazortjö, Efrain niji yöneawinö. Ja̧danö, ja̧ 'wiawa ba'ali tjujunenama, Absalonma okobe deinö la'aka luwo̧ David i̧tji̧mu ömadönö a̧debinobe, ichö jo̧bakwö ba'ali tjukwobö.

²⁴ La'aka luwo̧ David öba a'o ichibö, Absalonma aebinobe baikwö: —Chuluwo̧ chabe'do, babema chömöayedö chajimu obejadö tjöwö'ye 'witjobe. Jo̧kwajabetjö̧ ökwö la'aka chuluwo̧nö cha̧debobö jö̧ta̧la, ökwöbi, kwömöayedötjö luwedöbi ötjökwö kwichaduwobö, bakobe ja̧ 'wiawa ba'ali dujunobö, —jö̧ba̧lö aebinobe Absalonma.

²⁵ Aebökwe, la'aka luwo̧ Davidma atadinobe, —Ja̧maökö chitji̧, okobe deinö di̧'yobö jwiobe, dö̧ba̧jȩkwobe, ja̧danö okobe deinö di̧'yitjö̧ma, ömökobedanö ichejekwena, —jö̧ba̧lö atadinobe. Ichobö aeba̧lijayonö, öpöjödinobe, jo̧kwaijayonö yöa̧linobe, —Chi̧'yököjayonö Diosnö ateba otiwanö kwo̧'woduwi ösöwanö ja̧ ba'ali kwukwaduwobö, —jö̧ba̧lö.

²⁶ Jejenö ichökiökwe, Absalonma aebinobe, —Ökwö kwichököjayonö, chöpöe Amnon ichobö atebakwö, —jö̧ba̧lö. Aebökwe, —¿Tajawedö Amnon i̧'yobö kwösödobeda? Wetökena, —jö̧ba̧lö atadinobe Davidma.

²⁷ Jo̧kwaijayonö Absalonma lekwe aeba̧linobe, bajaliyanö Amnonnöbi, okobe deinö ju'wedö i̧tji̧mu ömadönöbi Absalonkwö ba'ali tjujunobö weenanö kabatö.

²⁸ Ja̧danö, ba'ali tjujunena, Absalonma iteda ömöayedönö weinobe baikwö: —Amnonnö eda̧lö kwiteada̧laduwo, ubasobu o̧'dobu owa̧lö, 'dukwachökwe baibenanö kabatö. Ja̧danö, ökwödönö, –Amnonnö kwabaduwi, –jö̧ba̧lö wetenama, yebabökönö jo̧banö kwabö loköbaduwo. Jejenö wetenama, yekabiduwa, wene ökwödönö baibobö jwiena, ötjö kwuluwo̧da jejenö kwabö loköbaduwobö wetobetjö̧. Jo̧kwajabetjö̧ kwujuluwachibaduwanö yebabökönö jo̧banö kwabö loköbaduwo, —jö̧ba̧lö weinobe Absalonma, ömöayedönö.

²⁹ Ja̧danö, weawö̧, weaja̧danö ja̧tjinobe, Amnonnö kwabö lotjinobe. Ja̧danö, jejenö kwabö lotjiawö̧, okobe deinö ju'wedö La'aka luwo̧ David itji̧muma, tjajwikwena kabayu wanö, dötjibajinobe.

³⁰ Ja̧danö, döbibajö Jerusalenbe tjȩwa̧jonö, ju'wedöma baledaja̧ wene a̧ja̧kwö Davidnö yötjawinobe, —La'aka luwo̧ David, bakwo̧bi ö̧ji̧bökönö, Absalonma okobe deinö kwitji̧munö kwabö loajabeta, —jö̧ba̧lö.

³¹ Yötjawökwe, la'aka luwo̧ Davidma a̧la̧ibö, o̧'wo tjo̧achö ökamiji̧do̧ kȩ'ekwö loinobe, ja̧danö nijakwö mebö öbamatjinobe, o̧'wo tjo̧achö. Ja̧danö okobe deinö jobe ju̧kwadö David ömöayedöbi tjo̧'wo tjo̧achö tjökamiji̧do̧ tji̧kȩ'ekwinobe.

³² Jo̧kwaijayonö, David öpöe Sima itji̧ Jonadabma yöawinobe Davidnö, —La'aka chuluwo̧, omukwatökönui, okobe deinö kwi̧tji̧munö kwabö lotjajabe jö̧ba̧löma, sule bakwo̧nöda kwabö lotjajena, Amnonnöda. Jau chuluwo̧, öjawuju Tamarnö 'da̧bö ujuluwinemi möletjö baikwö bajalenö, balekwa mikwa Amnonnö kwabö loobö omukwatö ujuninobe Absalonma, jo̧kwajabetjö̧ babema Amnonnö kwabö lotjajabe.

³³ Jo̧kwajabetjö̧, Ayö, okobe deinö chitji̧mu debö tji̧'yajabe jö̧ba̧löma omukwatökönui chuluwo̧, sule bakwo̧da, Amnonda debö i̧'yajabe, —jö̧ba̧lö yöawinobe Jonadabma Davidnö.

³⁴ Öpöenö kwabö lobajo̧, Absalonma ju'wedö tjitebobe döibajinobe, ja̧danö öja̧wo̧döma Jerusalenbe döbibajö tjȩwa̧jinobe. Ja̧danö, Jerusalentjö tjöbeba̧lö eda̧lo̧ma pöbamö edinobe, Joronayin comunidadbe ya̧kwawamabenö, ja̧danö ba̧jekwadö mösa'o ö'öbönö ichadönö edinobe.

³⁵ Ja̧danö, edaja̧ yöawiökwe, Jonadabma la'aka luwo̧ Davidnö yöawinobe, —Jau chuluwo̧, yötawaja̧danö jo̧be, edi, kwi̧tji̧muma ina 'yaba̧ladö tichibobe, —jö̧ba̧lö.

³⁶ Ja̧danö, juluwanö jejenö yöawaja̧ ikenama, yöawaja̧danö David itji̧mu tjichibinobe, ja̧danö ichibö, labinö ökwöinö tjubudekwinobe. Ja̧danö la'aka luwo̧ Davidbi, okobe deinö ömöayedöbi, nöinö tjo̧'wo tjo̧achö tjubudekwinobe Amnonnö.

^37-38 Ja̧danö, jemi tupakwö lekwe möle i̧tji̧ Amnonnö o̧'wo tjo̧achö ubudekwinobe Davidma. Öpöenö kwabö lobajo̧, Absalonma ju'wedö tjitebobe döibajinobe, ojo'do jitebö Guesur niibe. Absalon a'dö Talmay mikwo̧ma ja̧ niji la'aka luwo̧ ö̧jinobe, ja̧danö jobe wapötakwa o̧biya baledibanö a'dö Talmaykwö ö̧jinobe.

³⁹ Ja̧danö, ajayinö nöinö Amnonnö ubudekwinajayonö, lekwe möle baledajajabema David o̧'wo tjo̧achi̧ otiwachibinobe. Ja̧danö, Absalonnö edobö omukwatinobe Davidma, chitji̧ Absalonwe, jö̧ba̧lö.