2 Samuel 12 - Dios Iwene

Dios yöawi̧ yöbawo̧ Natan Davidnö lȩbebö yöawina jawa

¹ Isabenö Jo̧ma David ja̧ina öpöjödinobe, ja̧danö yöawi̧ yöbawo̧nö weinobe, Natan mikwo̧nö, Davidnö yöawobö. Ja̧danö, ichibö, Natanma Davidnö yöawinobe baikwö: —Ju'wi comunidadtjö, du̧ju̧taja tjuju̧kwinobe, luwo̧danö jo̧bi, usulaso̧bi.

² Luwo̧danö jo̧ma, nöinö a̧jwi̧munö ujuna̧linobe, pa̧ka̧yadönöbi, obejadönöbi,

³ jo̧kwaijayonö usulaso̧ma sule bakwuju obejasujunöda ujuna̧linobe, ajayinö midö eminokoma. Nöinö ile niebinobe ajwinö, i̧tji̧mukwö jö̧da̧peachinobe, ja̧danö jo̧ba u̧kwatjö jukwinobe, ja̧danö owawatjö jowinobe, jo̧ba ajwima. Ja̧danö, iteda itjijudanö apjö̧a̧lö e'ewinobe, nöinö ile niebinobe ajwinö, itjijunö ile niebi̧danö.

⁴ Ja̧danö, ju'wi möle, baikwö baledinobe, jelobetjö bakwo̧ ichinobe, luwo̧danö jo̧nö edobö. Jejenö ichiökwe, jo̧bama iteda ajwimutjö bakwo̧nö kwabö tobö, ichajo̧ ukwobö iyoböma a̧'dȩlö öpöjödinobe. Jo̧kwajabetjö̧, iteda ajwi kwabö tobökönö, jelo̧ ajwinöda, usulaso̧ ajwinöda önaukwinobe, ja̧danö naukwajo̧ kwabö toinobe, jelobetjö ichajo̧ ukwobö, —jö̧ba̧lö yöawinobe Natanma.

⁵ Jejenö yöawajökwe, jwiinö ödameakwinobe Davidma, luwo̧danö jo̧ Natan yöa̧lajökwenö. Ja̧danö dameakwö yöa̧linobe, —Isabenö Jo̧ ö̧ji̧ wene isabenö ji̧danö isabenö yötawakwö, jejenö ja̧bo̧ma ö'wö baibo jö̧a̧lobe, jwiinö sulabenö ja̧inobetjö̧.

⁶ Jelo̧ ajwinö önaukwajabema, nöinö tjebatö imidobö jo̧be, obeja bakwujunö önaukwajabema, ö'wejemubedö obejadönö tjeatobö jo̧be, lȩlöinö edökönö, sulabenö jelo̧ usulaso̧ ajwinö önaukwinobetjö̧, —jö̧a̧linobe Davidma.

⁷ Jö̧a̧liökwe, Natanma Davidnö yöawinobe: —¡Ökwödaja David luwo̧danö jo̧nö yötawajökwema! Yöta̧laja̧ma ökwönöda wanekwachobe. Ja̧danö jejenö ja̧köbiökwe, baikwö yöawobe Isabenö Jo̧ israel jojodö Tjuluwo̧ Diosma: –David, Ötjödasa israel jojodö tjuluwo̧ bakibanö juninama, ja̧danö ötjödasa kwö̧jibinö pjabatinama, Saulmine ökwönö kwabö loapji jö̧ba̧löma.

⁸ Ja̧danö, kwuluwo̧bina Saul ejubi, ilekwamunöbi ökwönö chiyijatö, ja̧danö okobe deinö israel jojodönöbi, juda jojodönöbi chiyijatö, kwömöayedö batjibanö. Jejenö nöinö chiyijatö, ja̧danö ja̧tjö bajalekwönönö chiyobö akebinatjö̧ma, jemi tupakwöbi ina nöinö chiyo jö̧ta̧lijatö David.

⁹ Jo̧kwajabetjö̧, tajawedö ötjö Isabenö Jo̧ weti̧ kwöpöjödinada? Tajawedö sulabenö chöpöjödi̧ jawa ja̧köbinada? Isabenö chöpöjödinö ja̧köböbajabetija David, ilekwonö kwemotö jö̧ba̧lö, hitita jojo Uriasnö kwabö loköbijatö. Jau David, amonitas ölakwabikwawa jojodönötjö̧, ökwöda Uriasnö kwabö loköbijatö, ja̧danö kwabö lobajo̧, jo̧ba ilekwonö kwemijatö, kwilekwo bajibanö.

¹⁰ Jo̧kwajabetjö̧, jejenö ja̧köbi̧tjö̧, baikwö yötawakwö tupakwö baledakwa̧ma: Dios wei̧ma mikwawökö ji̧ jö̧ba̧lö, Hitita jojo Urias ilekwonö 'döbebö, kwilekwo bajibanö kweminobetjö̧, bemi tupakwö kwi̧tji̧mu tupadanö jojodötjö ba̧kwelöjatebö ölakwabikwawa ja̧kobe, —jö̧ba̧lö Dios yöawi̧ yöawinobe Natanma Davidnö.

¹¹ Tupakwö yöawinobe Natanma, Davidnö: —Jau David, isabenö wene ja̧kobe bemi tupakwöma, baikwö laebobe Isabenö Jo̧ ökwönö yöawi̧ma: –Isabenö yö̧ne kwömöledötjö wene baibobö wetocha David, ja̧danö kwilekwamunö 'döbebö, jelo̧ kwömöledöso̧nö chiyocha, ja̧danö jo̧bama waapji ö̧jakobe kwilekwamukwö, kwömöayedöbi, ökwöbi baledi̧ kwöwaisaduwinö.

¹² Jau David, ökwöma tojata̧lö, ju'wedö wajwitjonö jelo̧ ilekwokwö kwö̧jijatö, jo̧kwaijayonö tojata̧lö ja̧köbinama, waapjida ökwönö baledobö wetocha. Jau David, ökwö kwilekwamukwö jelo̧ ö̧ja̧kwa̧ma, okobe deinö israel jojodö tjöba a'otjö baledakobe, okobe deinö tjöwaisinö, —jö̧ba̧lö Dios yöawi̧ yöawinobe Natanma, Davidnö.

¹³ Jejenö yöawiökwe, Davidma Natannö atadinobe, —Isabenö sulabenö ja̧tajabe, Isabenö Jo̧ Dios öpöjödi̧nö, —jö̧ba̧lö. Atadökwe, Natanma Davidnö yöawinobe, —Ju'wibi yötawakwö David, Isabenö Jo̧ma sulabenö ja̧köbaja̧tjö kwusula söbebö loajabe, ja̧danö ja̧köbina lȩbebö, kwabö loökakobe ökwönö David.

¹⁴ Jo̧kwaijayonö, sulabenö ja̧köbinama, Isabenö Jo̧ Dios öpöjojodö sulabenö jo̧banö yötja̧lobö ja̧köbajabetija David, jo̧kwajabetjö Dios lȩebakwa̧ baikwö yötawakwö, kwitji̧ Betsabe jeminökwema isabenö ö'wö baibakobe, —jö̧ba̧lö yöawinobe Natanma, Davidnö.

¹⁵ Ikenama, yöbawajo̧, Natanma ȩwa̧jinobe. Jemi ikenama Isabenö Jo̧ma weinobe, David itji̧, Urias ilekwo jeminökwema nöinö ö'wöchobö.

David itji̧ ö'wö baibina jawa

¹⁶ Jejenö balediökwe, Davidma Diosnö aebinobe itji̧nö, ja̧danö Diosnö abebö, u̧kwa ö̧tö̧chö, yö̧te baledibanö nijinöda ö̧binobe, Diosnö abebö.

¹⁷ Jejenö nijinö ö̧biawö̧, David ömöayedötjö luwedöma, yöne ja̧nö, ujuluwachibanö pjatjatotö jö̧ba̧lö a̧la̧ibobö atjebinobe, jo̧kwaijayonö a̧la̧ibinokobe, ja̧danö jobadökwö kwakwawa ukwinokobe. Jwaikwöda ö̧töchö, nijinö ba̧nö aeba̧linobe Diosnö, itji̧ ö̧bibajobö.

¹⁸ Jejenö jelemutjö̧ dötölataja möle baledibanö, itji̧nö abeba̧lö nijinö ö̧binobe Davidma. Jemi ikenama, tjemu jelemutjö dötölataja möle 'dö̧achaja̧ ikenama, ö'wö baibinobe David itji̧ma. Jejenö ö'wö baibiawö̧, Davidnö yötjawobö yetjabinobe, ja̧danö tjo̧'omanö yötja̧lakwawinobe baikwö: —Ayö, tjemu ina 'yaa̧layi, yöda̧li̧ atadökönö itji̧nö o̧'wo tjo̧achö atadinokobe Davidma. Jo̧kwajabetjö̧, itji̧ ö'wö baibaja̧ wenema, dakwö jo̧banö yödawakwa̧da? Ina 'yaa̧layi jejenö o̧'wo tjoachatjö̧ma, ö'wö baibaja̧ wene a̧ja̧kwö dakwö ja̧akwajö, itedada suli̧ waedakwawena, —jö̧ba̧lö yötja̧lakwawinobe.

¹⁹ Jejenö yötja̧lakwawiökwe, Davidma edinobe ko̧ko̧kwö tjo̧'omanö yötja̧lakwawi̧ma, ja̧danö edö, abebö a̧ja̧kwinobe, —Tjemu ida̧ökö ö'wö baibaji̧? —jö̧ba̧lö. Abebö a̧ja̧kwawö̧, —Jau, ö'wö baibajabe, —tjatadinobe.

²⁰ Ikenama, yötjawiökwe, Davidma a̧la̧ibinobe, ja̧danö ojwe ibö, omewi̧sobu duawinobe, ja̧danö ökamiji̧do̧ balekwado̧ 'duawinobe. Ikenama, Isabenö Jo̧ eju tebachö, Isabenö Jo̧nö ösödinobe. Ikenama, ösödajo̧, ejube ȩwa̧jinobe. Ja̧danö ejube ichibö, kwakwawa aebinobe, ja̧danö tjiyenama, ukwinobe.

²¹ Jejenö balediawö̧, tajijö jö̧ba̧lö tjedinobe David ömöayedöma, ja̧danö jo̧banö abebö tja̧ja̧kwinobe: —Duluwo̧, ja̧köbaja̧ma, wajwida, Tajawedö jejenö ja̧köbajobejö jö̧ba̧lö. Baikwö abebö da̧ja̧kwakwö: Tjemu ina 'yaa̧layi, ö̧töchö, budekwabinö kwö̧bijatö, jo̧kwaijayonö debö i̧'yaja̧ ikenama, –Davidma ajayitjö bajalekwönönö o̧'wo tjo̧achö ö̧jakwo̧, –jö̧ba̧lö domukwatijayonö, debö i̧'yaja̧ wene a̧ja̧kwö a̧la̧ibö kwakwawa kwukwajabe. Tajawedö jejenö ja̧köbaja̧da duluwo̧, döwaisachibökö, —jö̧ba̧lö abebö tja̧ja̧kwinobe Davidnö.

²² Atjebökwe labebö lobö atadinobe, —Tjemu ina 'yaa̧layi, ö̧töchö Diosnö abebö chubudekwijatö, baikwö omukwatö: Cho̧'wo tjo̧achö atebitjö̧ma, Isabenö Jo̧ma a̧ja̧kwö, lȩlöinö edö pjaatena, chitji̧ debö i̧'yapji jö̧ba̧lö.

²³ Jo̧kwaijayonö, babema tjemuma ö'wö baibajabe ida̧ökö, tajawedö bemi tupakwö ö̧töchö ja̧nö jo̧banö atebobö? Sule ina 'ya̧alayida jo̧banö ö̧töchö atebobö ji̧nobe. Isabenö ötjö ö'wö batibenama, jo̧ba ö̧jobe chi̧'yakwo̧sa, jo̧kwaijayonö la'akatjöda bö̧jekwö tjeachökakwo̧ chitji̧ma, —jö̧ba̧lö atadinobe Davidma.

Salomonnö jemina jawa

²⁴ Jemi ikenama, Davidma ilekwo Betsabe jitji̧nö jo̧'wo tjo̧achajatjö söawobö pjaatinobe, ja̧danö jobujukwö ö̧jinobe, metu'wo bajibanö. Ja̧danö, jitji̧nö jeminobe, ja̧danö Davidma itji̧nö imidinobe, Salomon jö̧ba̧lö. Ja̧danö, Isabenö Jo̧ma nöinö ösödinobe Salomonnö,

²⁵ ja̧danö Dios yöawi̧ yöbawo̧ Natannö weinobe, Davidnö yöawobö, —Isabenö Jo̧ ösödökwe kwitji̧nöma, —jö̧ba̧lö. Jo̧kwajabetjö̧ ju'wi imi Jededias jö̧ba̧lö imidinobe, Isabenö Jo̧ ösödökwe jö̧ba̧lö.

David Raba comunidad jojodönö ujuluwina jawa

²⁶ Ja̧ jawa baledonö, Joabma David ömöayedö ölakwabikwawa jojodökwö ölakwabikwawinobe Amonitas jojodökwö, Raba comunidad jȩna. Ja̧danö, jo̧be ölakwabikwawö, amonitas jojodö tjuluwo̧ 'diinö tjöbebö otidinemi ujuluwinobe.

²⁷ Jejenö juluwajo̧, Joabma yöbawadönö weinobe, Davidnö yötjawobö baikwö: —Chuluwo̧ David, Raba comunidad jojodökwö ölakwabikwawö, ojwese'do comunidad jojodö tjowe'do comunidad tjöekwobe chujuluwajabe, Raba jojodöma juluwanö ojwiyo jwibadö batjibanö.

²⁸ Jo̧kwajabetjö̧ baikwö yötawakwö David, juluwanö ju'wedö ölakwabikwawa jojodönö ko̧ko̧dö, baikwö kwicho, ökwöda ölakwabikwawa jojodönö weköbonö Raba comunidad dujuluwakobetjö̧. Jau David, deköbonö ötjöda Raba comunidad chujuluwitjö̧ma, ötjönöda juluwina jö̧ba̧lö ötjabikobe, ja̧danö Raba comunidadma, Joab ujuluwinemi jö̧ba̧lö ötjabikobe. Jejenö baledapji jö̧ba̧lö, juluwanö kwicho, —jö̧ba̧lö yöawinobe Joabma.

²⁹ Jejenö yötjawökwe, Davidma okobe deinö israel jojodötjö ölakwabikwawa jojodönö ko̧ko̧dö i̧'yinobe Raba comunidadbe. Ja̧danö ichibö, mebibö tjujuluwinobe comunidad jojodönö.

³⁰ Ja̧danö, juluwajo̧, amonitas jojodö inesö la'aka tjuluwo̧ ubutjawaka 'döebinobe, ja̧danö iteda uunö ubutjawinobe, amonita jojodö tjuluwo̧ma ötjödasa jö̧ba̧lö. Jakama treinta cuatro kilo jenanö ömökaka, ja̧danö orotjöbi, nöinö mikwawi̧ inawiyatjöbi otikwaka. Ja̧danö, ju'wibi, comunidad juluwajo̧, nöinö tjitea eminobe, yelösöda.

³¹ Ja̧danö, okobe deinö Raba comunidad jojodönö iteda ömöayedö batjibanö ujuninobe, ja̧danö 'diinö tjotidobö weinobe. Towi ötebiya löawakwöbi, picokwöbi, o̧tomo'akwöbi, 'diinö tjotidobö weinobe, ja̧danö ju'wibi bloke juwawemi tjotidobö weinobe. Jejenö weinobe Davidma, amonita jojodö tjitebo ba̧kwemeachibanö, tjitebokwena ju̧kwadönö. Ja̧danö, amonita jojodönö juluwajo̧, Davidbi, okobe deinö ömöayedö ölakwabikwawa jojodöbi Jerusalenbe tjȩwa̧jinobe.