2 Samuel 1 - Dios Iwene

La'aka luwo̧ Saul ö'wö baibina David a̧ja̧kwina jawa

¹ Baikwö laebobe israel jojodö la'aka tjuluwo̧ Saul ö'wö baibaja̧ ikena baledina wenema: Davidma amalecita jojodönö juluwajo̧, itebo Siclagbe ȩwa̧jinobe, ja̧danö jobe ö̧jena dötölataja mölȩ baledinobe.

² Jemi ikenama, dötölataja möle baledibajenama, Saul ömöayedö ölakwabikwawa jojodö tjö̧jinelö bakwo̧ David ö̧jobekwö ichibinobe. Jo̧bama kamiji̧do̧ kȩ'ekwö, uunö niji̧so̧pja̧ wanawö o̧'wo tjo̧achi̧ isȩbö ichibinobe, ja̧danö ichibajo̧, David öba a'o bȩbachibö öbamatinobe, Inesö la'aka chuluwo̧ja, jö̧ba̧lö.

³ Jejenö ichibiökwe, Davima abebö a̧ja̧kwinobe, —Detjö kwichaja̧da? —jö̧ba̧lö. Abebö a̧ja̧kwökwe, —Israel ölakwabikwawa jojodö tjö̧jinelö döbibajinasa, —jö̧ba̧lö atadinobe.

⁴ Atadökwe, —Tjölakwabikwawinama, dakwö baledinadaja? Yöbawitjö chöwaisobö, —jö̧ba̧lö abebö a̧ja̧kwinobe Davidma. Abebö a̧ja̧kwökwe, atadinobe, —Filisteo jojodöma israel ölakwabikwawa jojodönö tjujuluwinobe, israel jojodö dötjibajenanö baibanö. Jobe kwakwatjakwawelö ba̧jȩkwadö israel jojodöma debö tji̧'yinobe, ja̧danö ju'wibi la'aka luwo̧ Saulbi, itji̧ Jonatanbi debö tji̧'yinobe, —jö̧ba̧lö atadinobe.

⁵ Yöawökwe, —Dakwö kwöwaisa, Saulbi itji̧ Jonatanbi debö tji̧'yinobe jö̧ba̧löma? —abebö a̧ja̧kwinobe Davidma.

⁶ Abebö a̧ja̧kwökwe, yöbawö ichibajo̧ma Davidnö yöawinobe: —Ötjöma jobe tjölakwabikwawelö ja̧nö, a̧dekwanö mösa'o Guilboa ötjaba'otjö chö̧jijatö, ja̧danö jobe ja̧nö, Saulnö chedijatö, otokwötenö wanebo̧nö. Ja̧danö, jobe wanebö ö̧jonö, filisteo jojodö kolukiyanö ölakwabikwawadöbi, kabayunö wanö ölakwabikwawadöbi yöne tjichibinobe.

⁷ Ja̧danö, ökömakwö jalachibö edö, ötjönö edinobe Saulma, ja̧danö edö, ötjönö jwöinobe. Jwöitjö̧, –Tajida chuluwo̧? –jö̧ba̧lö chatadijatö.

⁸ Chatadökwe, –Diso jojoköbobeda? –jö̧ba̧lö abebö a̧ja̧kwitjö̧, –Ötjöma amalecita jojosa, –jö̧ba̧lö chatadijatö.

⁹ Chatadökwe, weinobe, –Ötjöma nöinö inia tjöbö usula emawo̧sa, ö'wö batibo jö̧ta̧lijayonö, ina inia tjöbö jo̧sa. Jo̧kwajabetjö̧ baikwö ichi kwabö lobitjö, –jö̧a̧linobe.

¹⁰ Jo̧banö edö, öwaetjöda öwawinobe, nöinö kwakwatjaja̧ ö̧bibajobö jwii̧ma, isabenö ö'wö baibakwo̧ jö̧ba̧lö. Jo̧kwajabetjö̧, wei̧ a̧ja̧kwö yöne ichibö jo̧banö kwabö lotijatö. Jemi ikenama, uutjö la'aka luwo̧ ubutjawakabi, öjatjö luwedö tjöjanö 'duatakwawa jawabi chemijatö, ja̧danö emajo̧, baikwö chichejebajabe, ökwö chuluwo̧nö chiyobö, —jö̧ba̧lö atadö yöawinobe Davidnö.

¹¹ Jejenö yöawökwe, Davidma o̧'wo tjo̧achö ö̧kamiji̧do̧ do̧batö ikȩ'ekwinobe, ja̧danö okobe deinö David ömöayedöbi tjo̧'wo tjo̧achö tjö̧ka̧miji̧do̧ do̧batakwawö tjikȩ'ekwinobe.

¹² Ja̧danö, möle baledibanö budekwö, tju̧kwa ö̧töchö o̧'wo tjo̧achö tjö̧jinobe, yi̧bena baibenanö kabatö, —Dömöledö israel jojodöwe, —jö̧ba̧lö. Saulbi, Saul itji̧ Jonatanbi, Isabenö Jo̧ Dios ömöayedö israel ölakwabikwawa jojodötjö ba̧jȩkwadöbi ö'wö batjibiawö̧, möle baledibanö tjubudekwinobe, —Dömöledöwe, dömöledönö kwabö lotjajabetija, —jö̧ba̧lö.

¹³ Ja̧danö Davidma yöbawö ichibajo̧nö abebö a̧ja̧kwinobe, —Ökwöma didö tjitebo jojoköbobeda?— jö̧ba̧lö. Abebö a̧ja̧kwökwe, atadinobe, —Chabe'doma amalecita jojodö tji̧tji̧ tupadanö jojo, jo̧kwaijayonö kwitebo israel niji̧nö ju̧kwadösa, —jö̧ba̧lö.

¹⁴ Yöawökwe, Davidma abebö a̧ja̧kwinobe, —Tajawedö Isabenö Jo̧ Dios omudawö ujuninökwe Saulnö kwabö loköbobö yebabökönö kwomukwataja̧da? –Saulnö kwabö lotijayonö wene jwiena, –jö̧ba̧löma.

^15-16 Isabenö yekabo jö̧ka̧linobe. Babe ö'wö bakibakwa̧ma ökwöda jawa, ökwöda yökawajabetjö̧, –Ötjöma Isabenö Jo̧ omudawö ujuninökwe Saulnö kwabö lotajabetija, –jö̧ba̧lö yökawajabetjö̧, —jö̧ba̧lö yöa̧linobe Davidma yöbawö ichibajo̧nö. Ja̧danö Davidma iteda ömöayedötjö bakwo̧nö weinobe, —Bite sulabo̧nö kwabö lobinö, —jö̧ba̧lö. Ja̧danö weökwe, David ömöayo̧ma jo̧banö kwabö loinobe.

David Saulnöbi, Jonatannöbi o̧'wo tjo̧achö lo̧ina jawa

¹⁷ Ja̧danö, Davidma lo̧awa wȩyudö lo̧inobe, Saulnöbi, itji̧ Jonatannöbi o̧'wo tjo̧achö lo̧awama.

¹⁸ Ja̧danö, David weinobe ja̧ lo̧awa israel jojodötjö judasaso jojodönö tjö̧ba̧jadobö. Ja̧ lo̧awama 'Böpö jawa lo̧awa, jö̧ba̧lö ötjaba'ba, ja̧danö kwiyalu'ye Jaser ötjaba'yenö laebobe ja̧ lo̧awama. Baikwö lo̧awa lo̧inobe Davidma:

¹⁹ —Ökwödö israel jojodötjö inesö juluwadönö kwabö lotjajabetija mösa'otjöma, isabenö ökwödötjö juluwadöma debö tji̧'yajabe.

²⁰ Baledina wene yöbawökönaduwi döpöjojodö tjitebo comunidad Gatnöma, Ascalon comunidad mananö kwebachö yöbawökönaduwi. Jobadö filisteo jojodö tjitebo comunidadnö yöbawökönaduwi, filisteo jojodötjö ya̧döma tjo̧'wo ösöwachibanö tja̧ja̧kwapji jö̧ba̧lö, ja̧danö a̧ja̧kwajadö, jobadö Diosnö öpöjödadötjö ya̧döma tjo̧'wo ösöwanö jwötjeba̧lapji jö̧ba̧lö, –Israel jojodönö dujuluwajabe, –jö̧ba̧löma.

²¹ Mösa'o Guilboa mikwa'oma, bemi tupakwö la'akatjöda si̧li̧'idö tji'olitjö 'bȩkwokobö, ja̧danö la'akatjöda ojwiyo o̧bokobö, ja̧danö jobetjö trigosa'ye la'akatjöda pokwokobö chösöda, jobetjö juluwo̧ Saulma debö i̧'yinobetjö̧, tjöekwapi sulamachibanö. Jau, Saul ujuluwinatjö̧ma, itea tjöekwapi salöachibanö o̧tenö 'do̧tjo jö̧tja̧linobe, jo̧kwaijayonö jobe Guilboa mösa'otjö debö i'yi̧nobetjö̧, ja'otjö suli̧ waekwinobe Saul iteapi tjöekwapima. Jo̧kwajabetjö̧, ja'otjö jobekwö baledinobetjö̧, ja'o Guilboa mösa'o kököbachibö suli̧ waekwobö chösöda.

²² Isabenö juluwadö tjö̧jinobe Saulbi Jonatanbi, Jonatanma 'böpönö 'böbö juluwi̧nö ölakwabikwawinobe, ja̧danö Saulma kwölöte'onö kwabawö juluwi̧nö ölakwabikwawinobe, ba̧jȩkwadö tjöpöjonodönö kwabö lotjenanö, inesö juluwadö tjöpöjojodönöbi tjujuluwenanö baibanö.

²³ Isabenö otiwadö ba̧jȩkwadö tjösödawö̧ tjö̧jinobe Saulbi Jonatanbi, otiwanö bakobe tjö̧jinobe ina 'ya̧tja̧layima, ja̧danö debö tji̧'yenabi, bakobe ja̧nö debö tji̧'yinobe. Isabenö juluwadö tjö̧jinobe, muko köa̧litjö bajalekwönönö juluwadö tjö̧jinobe, ja̧danö didiba ujulutjö bajalekwönönö tjujuluwinobe.

²⁴ Ökwödö israel jojodötjö ya̧döma, Saulnö kwubudekwaduwo, ökwödönö otiwanö iyinanöma. Jo̧bama isabenö kamiji̧do̧ otiwa̧do̧ 'dukawaduwobö iyinobe, ja̧danö orotjö otikwa jawabi iyinobe, kwökamiji̧do̧nö kwönaduwobö.

²⁵ Jobadöwe, isabenö juluwadöma mebö, debö tji̧'yajabe, tjölakwabikwawelö debö tji̧'yajabe, ja̧danö jobe möena kwabö lotjökwe, Jonatan iteba'oma jobe mösa'onö bo̧be.

²⁶ Isabenö cho̧'wo tjoachobe ökwönö yö̧ne chömöledöso̧ Jonatan, isabenö ile nitebökweja Jonatan. Isabenö otiwanö ötjönö ile nikebinobe Jonatan, ile nikebinama, ya̧dö ile nitjȩbi̧tjö bajalekwönönö otiwanö ile nibebinaja.

²⁷ Jobadö juluwadöwe, ölakwabikwawö debö tji̧'yajabetija, ja̧danö jobadö ölakwabikwawa jawama, suli̧ waekwajabetija, —jö̧ba̧lö lo̧inobe Davidma, Saulnöbi Jonatannöbi.