2 Reyes 9 - Dios Iwene

Jehu Israel la'aka luwo̧ baibina jawa

¹ Ja̧danö, Jorambi, Ocoziasbi Jezreel comunidadnö tjö̧jonö, Dios yöawi̧ yöbawo̧ Eliseoma jelo̧ Dios yöawi̧ yöbawo̧nö weinobe: —Kwö̧ka̧mijido̧ di̧bati, juluwanö kwi̧'yakobetjö̧, ja̧danö bi̧yu̧ i̧sa̧yu e'ewö 'ya̧wi, Ramot de Galaad comunidadbe.

² Ja̧danö, jobe ichibajo̧, Jehu mikwo̧nö kwisakwo. Jehunö badekwajo̧, a̧la̧ibö, ju'wedö ömöledötjö 'da̧bachibö i̧'yobö ökibo, okwasȩko̧be.

³ Ikenama, uunö o̧te tobebö, yökawo: –Isabenö Jo̧ma baikwö yöawobe: Ökwö Jehunö omudawö chujunakwö, Israel la'aka luwo̧ bakibanö, –jö̧ba̧lö yökawonö. Ikenama yöbawajo̧, apjude po̧bebö, juluwanö dökibajo. Jau, jobe teada̧lökönö, juluwanö jobetjö dökibajo, —jö̧ba̧lö weinobe Eliseoma.

⁴ Weökwe, jo̧ba Eliseo ömöayo̧ma Ramot de Galaad comunidadbe i̧'yinobe.

⁵ Ja̧danö, jobe ichibenama, israel jojodötjö ölakwabikwawadö tjuluwedönö öbadekwajinobe, tjölakwabikwawakwa̧ yöba̧lakwawadönö. Ja̧danö, jobadönö badekwajo̧, —Ökwö ölakwabikwawa la'aka luwo̧kwö yöta̧lakwawobö jo̧be, yöawakwawa ökwönö yötawakobetjö̧, —jö̧ba̧lö yöa̧linobe. Yöa̧lökwe, —Ökwödö ölakwabikwawa luwedötjö ditenö yöka̧lobö? —jö̧ba̧lö abebö a̧ja̧kwinobe Jehuma. Abebö a̧ja̧kwökwe, —Ökwö ölakwabikwawa luwo̧nöda yöta̧lobö, —jö̧ba̧lö atadinobe.

⁶ Atadökwe, Jehuma a̧la̧ibinobe, ja̧danö o̧do okwa teachinobe. Ja̧danö, teachiökwe, Dios yöawi̧ yöbawo̧ma Jehu uunö o̧te tobebö yöawinobe: —Baikwö yöawobe Isabenö Jo̧, Israel jojodö tjösödökwe Diosma: Ökwö Jehunö o̧te totebakwö, Isabenö Jo̧ ömöledö Israel jojodötjö inesö la'aka luwo̧ bakibanö.

⁷ Ja̧danö, baikwö ja̧köbobö wetakwö: Okobe deinö kwuluwo̧mine Acab yöne ömöledönö kwabawö loköbo. Jau Jehu, Acab ilekwo Jezabelma ba̧jȩkwadö ötjö yötawi̧ yöbawadönö kwabö lobinuju, ja̧danö ba̧jȩkwadö ju'wedö ötjö Isabenö Jo̧ chömöayedönö kwabö lobinuju. Jo̧kwajabetjö jobekwö ja̧ji̧na lȩtebakobetjö̧, balekwa mikwa Acab yöne ömöledönö kwabawö loköbobö wetakwö.

⁸ Jau, okobe deinö Acab itji̧mu tupadanö jojodöma ö'wö batjibakwedö, okobe deinö Acab itji̧mu tupadanö jojodötjö Israel nijinö ju̧kwadö ömadöma, tjömöayedöbi, tjömöayedöböködöbi debö tji̧'yakwedö.

⁹ Ja̧danö, Acab ömöledönö baledobö ja̧takwo̧sa, ajayi la'aka luwo̧bina Jeroboan ömöledönö baledinadanö, ja̧danö la'aka luwo̧ Basa ömöledönö baledinadanö, israel nijitjö itji̧mu tupadanö jojo bakwo̧bi deakobetjö̧.

¹⁰ Ja̧danö, Acabmine ilekwo Jezabelnö baledakwa̧ baikwö yötawa: Jezreel comunidad niji awilidöma Jezabelnö tjukwakwedö, ja̧danö bakwo̧bi Jezabelnö o̧tjökakobe, —jö̧ba̧lö Dios yöawi̧ yöawinobe. Ikenama, yöbawajo̧, apjude po̧bebö, jobetjö döibajinobe.

¹¹ Jemi ikenama, ju'wedö iteda uluwo̧ ömöayedö ölakwabikwawa luwedö tjö̧jobekwö ȩwa̧bijinobe Jehuma, ja̧danö ichibiawö̧, abebö tja̧ja̧kwinobe: —Wene jwiiji̧? Ite o̧'wo jwibo̧ma, tajawedö ökwönö yöa̧lobö ichaja̧da? —jö̧ba̧lö. Abebö tja̧ja̧kwökwe, —Omöna. Ökwödöma kwöwaisaduwa, jo̧baja̧yo̧ yöa̧li̧ma, —jö̧ba̧lö atadinobe.

¹² Atadawö̧, —Omöna yöka̧la, jweinö yöbawi yöa̧laja̧ma, —jö̧ba̧lö wetjinobe. Wetjökwe, —Yöa̧laja̧ma, baikwö yöa̧latö: –Isabenö Jo̧ma baikwö yöawobe: O̧te totebakwö, Israel inesö la'aka luwo̧ bakibanö, —jö̧ba̧lö atadinobe Jehuma.

¹³ Yöa̧liawö̧, okobe deinö juluwanö tja̧la̧ibinobe, ja̧danö okobe deinö jobadöma tjökamisi wamesa̧do̧ 'yobekwö, o̧do tebachö nöchawemi wame sedatö pjatjinobe, jobe Jehu kweachobö, ja̧danö trompeta pjubö yötja̧linobe, —Jehuma la'aka luwo̧ baibajabe, —jö̧ba̧lö.

Jehu israel la'aka luwo̧ Joramnöbi, Juda la'aka luwo̧ Ocoziasnöbi kwabö loina wene

¹⁴ Baikwö laebobe Jehu iteda uluwo̧ Joram wei̧ kabatibö, jo̧banö ujuluwina wenema: Ajayinöma Joramma okobe deinö Israel jojodötjö ölakwabikwawa jojodökwö, Ramot de Galaad comunidadnö tjöbeba̧lö ö̧jinobe, Siria la'aka luwo̧ Hazaelma israel niji tebachö ujuluwapji jö̧ba̧lö.

¹⁵ Ja̧danö, Hazael ömöayedö Joramkwö ölakwabikwawö, inia tjöinö kwatjinobe Joramnö, jo̧kwajabetjö̧ inia tjöinö ja̧tjökwe, la'aka luwo̧ Joramma jobetjö ȩwa̧jinobe, Jezreel comunidadbe, inia tjöi̧tjö ö̧bibajobö. Jo̧kwajabetjö̧, Dios yöawi̧ yöbawo̧ o̧te toebaja̧ ikenama, Jehuma ju'wedö ölakwabikwawa luwedönö yöa̧linobe: —Babe kwi̧sȩbaduwaja̧danö, isabenö la'aka luwo̧ batibobö kwösödaduwitjö̧ma, baikwö wetaduwakwö: Teada̧lönö kwö̧jaduwo, bakwo̧bi bemi comunidadtjö labebö, Jezreel comunidadbe yöbawö i̧'yapji, —jö̧ba̧lö.

¹⁶ Ikenama, iteaka koluka a̧ji̧bö, Jezreel comunidadbe i̧'yinobe Jehuma, Joramma jobe ö̧bibajotö jö̧ba̧lö ö̧bobetjö̧. Ja̧danö ju'wibi, Juda la'aka luwo̧ Ocoziasma Juda nijitjö ichajo̧, jobe Joramnö edö ichajo̧ ö̧jinobe.

¹⁷ Ja̧danö, Jezreel comunidadtjö, teada̧lö eda̧lo̧ma, möakanö ja̧nö eda̧linobe, ja̧danö Jehu ömöayedökwö ichobe ödötjö edinobe. Edö yöawinobe, —Ölakwabikwawadö baikwö tjichobe chedajabe, —jö̧ba̧lö. Yöawiökwe, Joramma weinobe, —Bakwo̧nö webaduwi, kabayunö wanö tjichobekwö ö'öakwawobö, ja̧danö jobadökwö ichibenama, abebö a̧ja̧kwo, –Wene jwibö, dösölö̧jinö kwichaduwiji̧? —jö̧ba̧lö.

¹⁸ Weiökwe, bakwo̧ kabayunö wa̧nö ö'öakwawinobe tjichobekwö, ja̧danö tjöba a'o ichibajo̧, —La'aka luwo̧ Joramma abebö a̧ja̧kwa, –Wene jwiinö, dösölö̧jinö kwichaduwiji̧? —jö̧ba̧lö. Aebökwe, —Wene jwiinö chichojobö jö̧ba̧lö, ökwö jawamaökö, jalachibö chökömanö ichi, —jö̧ba̧lö atadinobe Jehuma. Ja̧danö ja̧ baledi̧ ödötjö edinobe teada̧lö eda̧lo̧ma, ja̧danö yöawinobe, —Wedajökwe tjöba a'o ichibajayonö, yöbawö tjebachajö̧kö̧, —jö̧ba̧lö.

¹⁹ Yöawiökwe, jelo̧nöbi weinobe Joramma, ja̧danö jo̧babi abebö a̧ja̧kwinobe, —La'aka luwo̧ Joramma abebö a̧ja̧kwa, –Wene jwiinö, dösölö̧jinö kwichaduwiji̧? —jö̧ba̧lö. Aebökwe jo̧banöbi atadinobe Jehuma, —Wene jwiinö chichojobö jö̧ba̧lö, ökwö jawamaökö, jalachibö chökömanö ichi, —jö̧ba̧lö.

²⁰ Jobekwö balediökwe, eda̧lo̧ma yemidanö yöawinobe, —Tjöba a'o ichibajayonö, tjebachajö̧kö̧. Ja̧danö kolukiyanö tjichobe edö, Jehuda ömöayedökwö baikwö ichena ichejekwa. Jau, Jehuma kolukanö kweachenama, labinö kwebacho̧, ja̧danö idö baikwö ichadöma jobekwö labinö kwebachadö, jo̧kwajabetjö̧ chedemi Jehuda baikwö ichena, —jö̧ba̧lö.

²¹ Yöawökwe, Joramma ömöayedönö weinobe, —Chiteaka koluka otidaduwi, tjö̧jobekwö edö chi̧'yakobetjö̧, —jö̧ba̧lö. Ja̧danö, weawö̧ tjotidinobe. Ikenama, Israel la'aka luwo̧ Jorambi, Juda la'aka luwo̧ Ocoziasbi, bakwo̧nökwena tjiteakakwena kwebachö, Jehunö tjöbadekwajobö latjebinobe. Ja̧danö, labebajadö, Jezreel jojo Nabotmine öbatjosayu jȩna, Jehunö tjöbadekwajinobe.

²² Ja̧danö, Jehunö tjöbadekwajenama, —Jehu, wene jwiiji̧? —jö̧ba̧lö abebö a̧ja̧kwinobe Joramma. Abebö a̧ja̧kwökwe, —Wene jwibö dö̧joböma jwiobe la'akatjöda. Kwojo'do Jezabel jwaikwöda sulabenö diosböködönö ösödö jö̧jonö, ja̧danö jwaikwöda mea bobö jö̧jonö, dakwö wene jwiinö dö̧jobö? —jö̧ba̧lö atadinobe Jehuma.

²³ Atadökwe, öwaisachibinobe Joramma, ja̧danö juluwanö kabayudönö jalatö, Jehu öba a'otjö döibajinobe, ja̧danö Ocoziasnö jwöeba̧linobe, —Ocozias, döpöjojota, döbibaji! —jö̧ba̧lö.

²⁴ Ja̧danö, öba a'o döibajiökwe, Jehuma okobe jwiinö ujulunö 'böpö sedatö Joramnö 'böinobe, ja̧danö nayunu 'böajanuma, Joram öböbe'o ö'wejenö söibinobe, omajade okwa söibinö. Jobekwö söibiökwe, iteaka koluka okwa mebö ö'wö baibinobe Joramma.

²⁵ Ö'wö baibiökwe, iteda ömöayo̧nö Bidcarnö weinobe Jehuma, —Iteakatjö meatö, Jezreel jojo Nabotminö öbatjoinatjonö ikwö lobinö. Jau, Bidcar, kwomukwatibo damötjö dedina jawa, ökwöbi, ötjöbi bakobe Joram abe'do Acab ökömanö kwedachenama. Ja̧ möle, Isabenö Jo̧ Diosma jo̧banö baledakwa̧ yöawinobe, baikwö:

²⁶ –Isabenö mada Nabot ökwösobubi, itji̧mu tjökwösobubi ku̧kwobe ötjö Isabenö Jo̧ma chedijatö, ja̧danö isabenö yöbawö chujunakwö, jobekwö sulabenö jobadönö kwabö loköbinobetjö̧, balekwa mikwa biyu öbatjoinemitjöda ökwönö lȩtebakwo̧sa, –jö̧ba̧lö yöawinobe. Jo̧kwajabetjö̧, ja̧ Isabenö Jo̧ yöawina badekwachinö, ja̧ Nabot öbatjo ji̧nena ikwö lobinö Acab itji̧ Joramnö, —jö̧ba̧lö weinobe Jehuma.

²⁷ Juda niji la'aka luwo̧ Ocoziasma ja̧ baledobe edinobe, ja̧danö edajo̧, iteda iteakanö döibajinobe, Bet-hagan comunidad jo̧bekwö. Ja̧danö jo̧banöbi luinobe Jehuma, ja̧danö ömöayedönö weinobe, —Ocoziasnöbi 'böbaduwinö, —jö̧ba̧lö. Ja̧danö, iteaka kolukanö a̧jonö Ocoziasnö 'bötjinobe, Ibleam comunidad pjeanö, nöchawemi Gur ötjabemi nöchawemi ja'ötjö. 'Bötjökwe, tupakwö döibajinobe, Meguido comunidadbe, ja̧danö jobe Meguido comunidadtjö ö'wö baibinobe Ocoziasma.

²⁸ Ja̧danö, ö'wö baibiawö̧, Ocozias ömöayedöma tjuluwo̧ iteba'o tje'ewinobe Jerusalen comunidadbe, ja̧danö ichibajadö, a'dödökwö tjo̧tjinobe Ocoziasnö, David itebo comunidad ötjabena.

²⁹ Jo̧ba Ocozias la'aka lu̧wo̧ baibinenama, Acab itji̧ Joram ida̧ökö a̧li̧nösamutjö bakwöta o̧ba webö ö̧jenama, Juda la'aka luwo̧ baibinobe.

Jehu Jezabelnö kwabö loina wene

³⁰ Joramnö kwabö lobajo̧, tupakwö i̧'yinobe Jezreel comunidadbe, ja̧danö, Joram ojo'do Jezabelma ichaja̧ wene ja̧ja̧kwinobe. A̧ja̧kwaju, otikwö ja̧bö, jöba dujawinobe, ja̧danö jöwö'ye jotikwinobe. Ikenama, Jehu ichibakwa̧ teada̧lö, ventanasa'dotjö jeda̧linobe.

³¹ Ja̧danö, Jehu apjude teachenama, jo̧banö yöja̧linobe, —Ökwö kwuluwo̧nö kwabö lobo̧ Zimri, wene jwibö kwichaji̧? —jö̧ba̧lö.

³² Yöja̧lökwe, möakwö ventanasa'do jö̧jobekwö edinobe, ja̧danö jwöinobe, —Bakobe ötjökwö pjabatö ja̧döma, didöda? —jö̧ba̧lö. Ja̧danö jwöiawö̧, Jezabel jömöayedö ömadötjö du̧ju̧tajaö̧kö̧, wamedukwaö̧kö̧ ventanasa'dotjö tjedinobe Jehu ö̧jobekwö, —Ökwönö pjadatakwedösa, —jö̧ba̧lö.

³³ Tjediökwe, —Nijakwö ikwijö, —jö̧ba̧lö weinobe, ja̧danö weawö̧, Jezabelnö do̧batö, mötjö nijakwö tjikwinobe Jezabelnö. Ja̧danö tjikwajoko, nijinö mejenama, jökwösobu dödeibinobe, o̧do tjöekwemibi, kabayudönöbi, ja̧danö Jezabel jiteba'o tjö̧jatinobe Jehu ajwimu kabayudöma.

³⁴ Jemi ikenama, Jezabelnö kwabö lobajo̧, o̧do okwa tebachö, kwanöbi ukwinobe, ja̧danö owöbi owinobe Jehuma. Ikenama, kabatajo̧, ömöayedönö weinobe Jehuma, —Isu Dios lȩebajoko jojosuju Jezabel jiteba'o e'ewö, kwo̧tja̧duwojö. Jau, jobujuma inesö la'aka luwo̧ itjiju, jo̧kwajabetjö̧ jiteba'o otiwanö kwo̧tjaduwobö jo̧be, —jö̧ba̧lö.

³⁵ Jo̧kwaijayonö, weawö̧, tjo̧tjo̧tö jö̧ba̧lö latjebenama, jiteba'o tjöbadekwajinokobe, sule juusöseda, ja̧danö jömasapiyada, ja̧danö jömamijuda tjöbadekwajinobe. Ju'wi jiteba'o jawama tjöbadekwajinokobe.

³⁶ Ja̧danö, ȩwa̧bijö Jehunö yötjawenama, yöa̧linobe: —Ja̧ baledaja̧ma, Dios ömöayo̧ Eliasmine yöawinadanö badekwachajabe. Eliasma baikwö yöawinobe Isabenö Jo̧ yöawinama: –Jezreel nijitjö, awili̧döma Jezabel jiteba'o tjukwakwedö,

³⁷ ja̧danö jiteba'o jawama, tjide'o ikwö lotji̧danö, meje'ye ba̧kwemeachibanö pjelekwachibakobe. Ja̧danö, jobekwö baledobetjö̧, bakwo̧bi jiteba'o edö, bisuma Jezabel jö̧ba̧lö yöawobö jwiakobe, –jö̧ba̧lö yöawinobe Eliasma, ja̧danö ja̧ badekwachinö baledajabe, —jö̧ba̧lö yöawinobe Jehuma.