2 Reyes 7 - Dios Iwene

¹ Jobekwö yöa̧liökwe, Eliseoma yöawinobe: —Baikwö kwa̧ja̧kwo, Isabenö Jo̧ yöawi̧ma, baikwö yöawobe Isabenö Jo̧ma: –Itekwai babedajayenö, cinco kilos harinaso̧pja̧ otiwi̧ma, baladasa̧pi̧ platatjö otikwa̧pi̧ bakwapi̧nöda tjiyakobe. Jadanö diez kilos cebada jawama, baladasa̧pi̧ platatjö otikwa̧pi̧ bakwapi̧nöda tjiyakobe. Jobekwö mikwanö tjiyakobe itekwai mölema, Samaria comunidad apjudetjö, —jö̧ba̧lö yöawinobe Eliseoma.

² Yöa̧liökwe, israel la'aka luwo̧ yöne ömöayo̧ma obö atadinobe: —Yöka̧laja̧danö baledobö jwiena, la'akatjöda. Isabenö Jo̧ma mölejȩbetjö ventanasa'do otidajo̧, po̧bebö iyitjö̧bi, la'akatjöda yöka̧laja̧danö baledobö jwiena, omöna yöba̧lo̧ja, —jö̧ba̧lö atadinobe. Yöa̧lökwe, —Jobekwö baledakwa̧ma, ökwöda kwöbajalenö kwedakwo̧ja, jo̧kwaijayonö ja̧ tjiyakwa̧ jawatjö kwukwökakwo̧ja la'akatjöda, —jö̧ba̧lö yöa̧linobe Eliseoma.

Siria jojodö dötjibajina jawa

³ Ja̧ möle ö'wejemubedö lepratjö 'dö̧bachadöma tju̧ju̧kwinobe, Samaria apjude a'o. Ja̧danö, jobe ba̧nö yötja̧lakwawinobe: —Tajawedö benada ba̧nö, a̧wi̧chitjö ö'wö badibobö? Jelobekwö ladebo, dö̧jibakobetjö̧.

⁴ Jo̧kwaijayonö, Comunidad okwa tebachö dö̧jibo, jö̧ba̧lö yöba̧lajadö tedachitjö̧ma, waekwena, jobetjöbi ö'wö badibena, jobebi a̧wi̧chi̧ lö̧jobetjö̧. Ja̧danö benada ba̧nö dö̧jitjö̧bi ö'wö badibena. Jo̧kwajabetjö̧, baikwö ja̧do, Siria ölakwabikwawa jojodö tjabekwobekwö di̧'yaduwo. Jobe dichibiawö̧, ökwödönö kwabö lotjökötjö̧ma, ina 'yada̧lakwedösa. Ja̧danö ökwödönö kwabö lotjitjö̧ma, bena ba̧nö ö'wö badibi̧danö bakwaiakobe, —jö̧ba̧lö yötja̧lakwawinobe.

⁵ Jobekwö yöba̧lakwawajadö, yi̧ibena jenanö tja̧la̧ibinobe, Siria jojodö tjabekwobekwö tji̧'yobö. Ja̧danö, tjabekwobe ö'öbö tjichibenama, tjöbajale jalaka baibanö jojodö deobeda tjöbadekwajinobe.

⁶ Ja̧ jojodö deobe labebö loawama baikwö laebobe: Isabenö Jo̧ma weinobe, Siria ölakwabikwawa jojodö ju'wedö ölakwabikwawa jojodö tjichobe tja̧ja̧kwobö, kolukiyakwöbi, kabayudökwöbi, inesö ba̧jȩkwaso ölakwabikwawa jojodö tjichobema. Jobekwö a̧ja̧kwö, yötja̧lakwawinobe idödada: —Ayö, Israel la'aka luwo̧ma imidajabe, hitita jojodötjö la'aka luwedönöbi, Egipto la'aka luwo̧nöbi, ökwödönö metjibakobetjö̧, —jö̧ba̧lö.

⁷ Ja̧danö, jobekwö yöba̧lakwawajadö, yebabinö dötjibajinobe, sabana'wotjö otikwejubiya junibö, ja̧danö tjajwimu kabayudönöbi, buludönöbi junibö, tjitea e'ewökönö dötjibajinobe, tjö̧jibakobetjö̧.

⁸ Jo̧kwajabetjö̧, lepra 'dö̧bachadö tjabekwobe ö'öbö tjichibenama, bakweju sabana'wotjö otikweju okwa tebachö, kwanöbi tjukwinobe, ja̧danö owöbi tjowinobe. Jemi ikenama, plata jawabi, oro jawabi, kamiji̧do̧bi tje'ewinobe, ja̧danö tojö tjujuninobe. Ikenama, jeleju okwa tebachö, jobe ji̧bi tje'ewinobe, ja̧danö ja̧bi tojö tjujuninobe.

⁹ Jemi ikenama yötja̧lakwawinobe, —Bejenö ja̧di̧ma otiwökö. Babe mölema, otiwa jawa wene ji̧ möle, isabenö ju'wedönöbi yödawobö jo̧be. Wi̧inö ja̧nö, yȩayi dewachenanö baibanö diteada̧litjö̧ma, isabenö Dios lȩebena. Jo̧kwajabetjö̧, juluwanö a̧la̧ibö yödawaduwo, israel la'aka luwo̧ ömöledönö, —jö̧ba̧lö.

¹⁰ Jo̧kwajabetjö̧ a̧la̧ibö, comunidad apjude teada̧lo̧ ö̧jobekwö tji̧'yinobe, ja̧danö jo̧banö jwöbö yötjawinobe, —Siria jojodö tjabekwobe dichibenama, bakwo̧nöbi dedökötö, ja̧danö bakwo̧nöbi da̧ja̧kwökötö. Jo̧kwaijayonö, jojodö deijayonö, kabayudönöbi, buludönöbi jobe di̧batö junawobe döbadekwatö, ja̧danö sabana'wotjö otikwejubiyama, ina jojodö tjuju̧kwobedanö döbadekwatö, —jö̧ba̧lö.

¹¹ Yötjawökwe, tupakwö bajalenö yöawinobe apjude teada̧lo̧ma, ja̧danö la'aka luwo̧ ejunö ju̧kwadöbi tja̧ja̧kwinobe.

¹² Jobekwö yötjawiökwe, yö̧te ja'ö a̧la̧ibinobe israel la'aka luwo̧ma, ja̧danö iteda ömöayedönö yöa̧linobe: —Ötjöma chöwaisa, Siria jojodö ökwödönö suli̧ tjöwaedobö ja̧tja̧ja̧ma. Jobadöma tjöwaisa, a̧wi̧chi̧ tjöbö dö̧ji̧ma, jo̧kwajabetjö̧ tjabekwelö latjebajabe, meje'yetjö tjuju̧kwawobö, –Du̧kwa tjemotö jö̧ba̧lö comunidadtjö latjebenama, ina 'yaba̧ladönö do̧datakwedösa, ja̧danö comunidad okwa tedachakwedösa, –jö̧ba̧lö. Deobedanö ichejekwijayonö, ju̧kwawö tjö̧jena, —jö̧ba̧lö yöa̧linobe la'aka luwo̧ma.

¹³ Yöa̧liökwe, ömöayedötjö bakwo̧ yöa̧linobe: —Chuluwo̧, ökwödö israel jojodötjö ida̧ökö jwiinö ba̧jȩkwadö ö'wö batjibajabe, ja̧danö kwakwawa jwiditjö̧ma, okobe deinö comunidadnö ju̧kwadö debö di̧'yakwedösa. Jo̧kwajabetjö̧ baikwö weköbobö atebakwö: Kwömöayedö edadönö weköbo, kwajwimu kabayudö ina 'ya̧baladötjö bakwamubedönö wa̧nö tji̧'yobö, Siria jojodö isabenö tju̧ju̧kwawojobö, deojobö jö̧ba̧lö döwaisakobetjö̧. Ja̧danö jobekwö latjebiawö̧, Siria jojodö jobadönö kwabö lotjitjö̧ma, bai labebökönö tjö̧jobedanö bakwaiakobe, bai ja̧nöbi a̧wi̧chi̧ tjöbö debö tji̧'yakobetjö̧. Jau chuluwo̧, kwakwawa jwiitjö̧ma okobe deinö bakwainö debö di̧'yakobe, —jö̧ba̧lö.

¹⁴ Ja̧danö, yöa̧laja̧danö weinobe. Du̧ju̧taja kabayudönö wa̧nö ölakwabikwawadönö weinobe, Siria ölakabikwawa jojodönö tjisakwobö, —Isabenö deojobö jö̧ba̧lö, isakwö 'ya̧duwi, —jö̧ba̧lö.

¹⁵ Ja̧danö, weawö̧, isakwö tji̧'yinobe, ja̧danö dötjibaja̧ mana badekwajadö, lutjinobe, Jordan ojwe ö'öbö tjichibenanö kabatö. Ja̧danö dötjibaja̧ mana edö, Siria jojodö juluwanö dötjibajotö jö̧ba̧lö ikwö lotjibaja̧ jawa tjedinobe, kamisibi, ölakwabikwawa jawabi ikwö lotjibaja̧ tjedinobe. Ja̧danö, jobekwö edajadö, ȩwa̧bijö la'aka luwo̧nö yötjawinobe.

¹⁶ Jobekwö yötjawiawö̧, Samaria jojodö comunidadtjö labebö, Siria jojodö tjiteaja̧ 'dötjebinobe. Ja̧danö kwakwawa emajadö, ile seinö tjiyinobe, cinco kilos harinaso̧pja̧ otiwi̧ma, baladasa̧pi̧ platatjö otikwapi̧ bakwapi̧nöda tjiyinobe, ja̧danö diez kilos cebada jawama baladasa̧pi̧ platatjö otikwapi̧ bakwapi̧nöda tjiyinobe, Isabenö Jo̧ yöawinadanö.

¹⁷ Ja̧danö, jojodö comunidadtjö latjebenama, Israel la'aka luwo̧ma iteda yö̧ne ömöayo̧, ajayinö Eliseokwö yöba̧lakwawinanö ujuninobe, comunidad apjude iteada̧lobö. Jo̧kwaijayonö, juluwanö comunidadtjö latjebotö jö̧ba̧lö tji̧'yobetjö̧, jo̧banö ja̧tö lotjinobe, ja̧danö ö'wö baibinobe. Ja̧bi Isabenö Jo̧ yöawi̧ yöbawo̧ Eliseo yöawinadanö baledinobe, la'aka luwo̧ Eliseonö do̧atobö ichena yöawinadanö.

¹⁸ Jau, Eliseo la'aka luwo̧nö yöawena, —Itekwai babedajayenö, cinco kilos harinaso̧pja̧ otiwi̧ma, baladasa̧pi̧ platatjö otikwapi̧ bakwapi̧nöda tjiyakobe, ja̧danö diez kilos cebada jawama baladasa̧pi̧ platatjö otikwapi̧ bakwapi̧nöda tjiyakobe. Jobekwö mikwanö tjiyakobe itekwai mölema, Samaria comunidad apjudetjö, —jö̧ba̧lö yöawenama,

¹⁹ jo̧ba la'aka luwo̧ ömöayo̧ma atadinobe Eliseonö: —Yöka̧laja̧danö baledobö jwiena, la'akatjöda. Isabenö Jo̧ma mölejȩbetjö ventanasa'do otidajo̧, po̧bebö iyitjö̧bi, la'akatjöda yöka̧laja̧danö baledobö jwiena, omöna yöba̧lo̧ja, —jö̧ba̧lö atadinobe. Ja̧danö yöa̧lökwe, —Jobekwö baledakwa̧ma, ökwöda kwöbajalenö kwedakwo̧ja, jo̧kwaijayonö ja̧ tjiyakwa̧ jawatjö kwukwökakwo̧ja, —jö̧ba̧lö atadinobe Eliseoma.

²⁰ Ja̧danö, Eliseo yöa̧linadanö baledinobe, edijayonö, ukwakwa̧ abönö jojodöma jo̧banö ja̧tö lotjinobe, ja̧danö ö'wö baibinobe.