2 Reyes 6 - Dios Iwene

Eliseo o̧tomo'a ojwe wame samatibö lamatobö weina jawa

¹ Ja̧danö, ju'wi möle Dios yöawi̧ yöbawadöma Eliseonö yötja̧linobe, —Duluwo̧ Eliseo, ökwödö kwö̧ba̧jadi̧ waisachö do̧ko̧kokwobema, ja'yuwobe, ja̧danö otiwanö dobiökö, dö̧ba̧jekwobetjö̧.

² Jo̧kwajabetjö̧ baikwö dotidobö domukwatobe Eliseo, okobe deinö Jordan ojwebe di̧'yo, ja̧danö jobetjö okobe deinö towi okwi'iju jubö, do̧ko̧kokwakweju jaleju dotido, jobe jalobe dö̧jobö, —jö̧ba̧lö yötja̧linobe. Yötja̧lökwe, —Jau, kwi̧'yaduwo, —jö̧ba̧lö atadinobe Eliseoma.

³ Atadawö̧, jobadötjö bakwo̧ aebinobe, —Chuluwo̧ Eliseo, ökwöbi ökwödö kwömöayedökwö kwichobö atebakwö, kwichakwaji̧? —jö̧ba̧lö. Aebökwe, —Jau, ötjöbi chi̧'yocha, —jö̧ba̧lö atadinobe.

⁴ Ja̧danö, jobadökwö i̧'yinobe Jordan ojwebe. Jordan ojwebe ichibajadö, towibiya jutjinobe.

⁵ Jo̧kwaijayonö, jobadötjö bakwo̧ juemi ja'ötjö, o̧tomo'a dilachajö döbajö, ojwe okwa meinobe. Meiökwe, —Ayö chuluwo̧ Eliseo, dakwö ja̧takwajö? Ja̧ o̧tomo'ama, jelo̧ öbalewinö̧'a̧, dakwö tjetatakwajö, ötjöwe, —jö̧ba̧lö.

⁶ Yöa̧lökwe, Dios yöawi̧ yöbawo̧ Eliseoma abebö a̧ja̧kwinobe, —Dena meaja̧da? Ba̧ja̧ditjö, —jö̧ba̧lö. Ja̧danö, meajemi ö̧ba̧jadenama, ö̧sö̧'a̧ 'wibebö meajena ikwinobe, ja̧danö ikwenama, o̧to̧mo'a samatibö lamatinobe ojwe wame.

⁷ Ja̧danö, lamatiökwe, —Emi, —jö̧ba̧lö weinobe Eliseoma. Ja̧danö, lamatajö̧'a̧ do̧a̧tinobe.

Siria jojodö Eliseonö do̧tjatobö tjichibina jawa

⁸ Ju'wi möle, Siria niji la'aka luwo̧ Israel jojodökwö ölakwabikwawö ö̧jenama, baikwö baledinobe. Iteda ömöayedö, ölakwabikwawa jawa luwedökwö ko̧ko̧kwö yöa̧lakwawinobe tjölakwabikwawakwa̧ jawama, ja̧danö yöba̧lakwawajadö omukwatö tjujuninobe, —Otiwanö Israel jojodönö dujuluwakobetjö̧, yena dabemi dujuno, —jö̧ba̧lö.

⁹ Jo̧kwaijayonö, jobekwö yöba̧lakwawö omudawö tjujuniökwe, Dios ömöayo̧ Eliseoma yöbawo̧nö weinobe Israel la'aka luwo̧nö yöawobö, —Yenama kwöbaledoko, Siria jojodöma jobe ju̧kwawö tjiteada̧lobetjö̧, —jö̧ba̧lö.

¹⁰ Ja̧danö, jobekwö yöa̧liökwe, Israel la'aka luwo̧ma eda̧lakwawa jojonö weinobe, isabenö Eliseo yöa̧laja̧danö jobe tjö̧jojobö jö̧ba̧lö, ja̧danö yöa̧laja̧danö öbadekwajinobe. Jobekwö yöbawiainobe Eliseoma, Israel la'aka luwo̧nö, sule bakwötanödamaökö, ja̧danö sule dötölatajanödamaökö, yemidanö, yemidanö nöinö jobekwö pjabatiainobe. Ja̧danö jobekwö pjaatiökwe, Siria jojodötjö ö̧jibinobe Israel la'aka luwo̧ma.

¹¹ Jobekwö kabatökönö balediökwe, o̧'wo tjo̧bekwö ö̧jinobe Siria luwo̧ma, —Dakwö waisanö chujulutjö̧ ö̧jibobejö, —jö̧ba̧lö. Ja̧danö, iteda ömöayedö ölakwabikwawa luwedönö jwöbö abebö a̧ja̧kwinobe, —Chömöayedö, ökwödö chömöayedötjö diteda israel la'aka luwo̧nö pjaatobeda? Dö̧jakwa̧ omukwatö dujunenama, ökwödötjö diteda Israel la'aka luwo̧nö yöawobeda, chujulutjö̧ ö̧jiboböma? Ökwödö chömöayedötjö bakwo̧ma iyö lobo̧ ö̧jobe ichejekwa, —jö̧ba̧lö.

¹² Yöa̧liökwe, ömöayedötjö bakwo̧ atadinobe, —Chuluwo̧ la'aka luwo̧, ökwödö kwömöayedötjö bakwo̧bi pjabatöködösa Israel la'aka luwo̧nö, baikwö labebö lobö yötawakwö baledi̧ma: Dios yöawi̧ yöbawo̧ Eliseoma Israel nijinö jo̧, ja̧danö jo̧bada okobe jwiinö yöka̧li̧ jawa yöbawo̧ Israel la'aka luwo̧nö. Jau chuluwo̧, kwabȩko̧nö ja̧nö yöka̧li̧ jawabi waiso̧ Eliseoma, ja̧danö Israel la'aka luwo̧nö yöbawo̧, —jö̧ba̧lö atadinobe.

¹³ Yöa̧lökwe, —Kwatjö̧ma Eliseo ö̧jemi edö kwi̧'yaduwo, jo̧banö do̧tjatakwedönö wetakobetjö̧, —jö̧ba̧lö. Ja̧danö, edajadö yötjawinobe, —Duluwo̧, Eliseoma Dotan comunidadnö ö̧jobe, —jö̧ba̧lö.

¹⁴ Yötjawökwe, ömöayedö ölakwabikwawadö ba̧jȩkwadönö weinobe, kolukanö ölakwabikwawadönöbi, kabayudönö wa̧nö ölakwabikwawadönöbi, ja̧danö yö̧te ichibö, comunidad tjötjösawinobe, Eliseonö do̧tjatakobetjö̧.

¹⁵ Ja̧danö, yȩayi Eliseo ömöayo̧ a̧la̧ibenama, yeaibanö edinobe comunidad tjösawö ju̧kwadö ölakwabikwawadönö, bakwachobetenia kolukiyanö ölakwabikwawadönöbi, kabayudönö wa̧nö ölakwabikwawadönöbi edinobe. Jobekwö edö, uluwo̧ Eliseonö yöa̧linobe, —Ayö chuluwo̧, dakwö ja̧dakwajö, ökwödöwe, —jö̧ba̧lö.

¹⁶ Yöa̧lökwe, —Yebabökönui chömöayo̧, tjö̧ba̧jekwijayonö, ökwödökwö ju̧kwadö ölakwabikwawadöma, jobadö tjö̧ba̧jȩkwi̧tjö bajalekwönönö ba̧jȩkwadö pjabatö tju̧ju̧kwobe, —jö̧ba̧lö atadinobe.

¹⁷ Ikenama Diosnö aebinobe Eliseoma, baikwö: —Chuluwo̧ Isabenö Jo̧, ökwönö ateba, bite chömöayo̧ öbajalebiya po̧kebobö, otiwanö edakobetjö̧, —jö̧ba̧lö. Ja̧danö, aebökwe, Isabenö Jo̧ma Eliseo ömöayo̧ öbajalebiya po̧ebinobe, ja̧danö po̧ebenama, bakwachobetenia edö, okobe jwiinö ja̧ comunidad mösa'o ba̧kwemeachibanö Dios ömöayedö ölakwabikwawadönö edinobe, ökwölatjö otikwedö kabayudönöbi, kolukiyabi. Eliseonö tjösawö tjötjeba̧lobe edinobe Eliseo ömöayo̧ma.

¹⁸ Jemi ikenama, Siria jojodö Eliseonö metjibotö jö̧ba̧lö tjichenama, Eliseoma Isabenö Jo̧ Diosnö aebinobe: —Chuluwo̧ Isabenö Jo̧, bidö Siria jojodö tjöbajale tjewawadö batjibanö kwaköbobö atebakwö, —jö̧ba̧lö. Ja̧danö, aebökwe, Eliseo aebaja̧danö weinobe Diosma, Siria ölakwabikwawa jojodö tjöbajale tjewawinö.

¹⁹ Ja̧danö, jobadö tjöbajale tjewawadönö yöa̧linobe Eliseoma: —Ö'öbönö kwichaduwajabe, bimanö kwichaduwoko jö̧ka̧laduwajabe, ja̧danö bemi comunidadbe kwichaduwoko jö̧ka̧laduwajabe. Jo̧kwaijayonö chökömanö kwichaduwitjö̧ma, ökwödönö ötibocha, kwisakwaduwökwe öba a'o kwichibaduwakobetjö̧, —jö̧ba̧lö. Ja̧danö, yöba̧lajo̧, jobadönö öbibö i̧'yinobe, Samaria comunidadbe.

²⁰ Ja̧danö, Samaria comunidad okwa tetjachibenama, juluwanö aebinobe Eliseoma, —Chuluwo̧ Isabenö Jo̧, babe bidö tjöbajalebiya po̧kebobö atebakwö, yemidanö otiwanö tjedakobetjö̧, —jö̧ba̧lö. Aebökwe, yemidanö tjedobö weinobe Isabenö Jo̧ma, ja̧danö edö tjöwaisachibinobe, —Ayö, Samaria comunidad ö'wejenö dö̧jobeta, —jö̧ba̧lö.

²¹ Ja̧danö, Israel la'aka luwo̧ jobadönö edenama, Eliseonö abebö a̧ja̧kwinobe, —Chabe'do Eliseo, bidönö kwabö lotakwa̧ji̧? Babeda jobadönö kwabö lotakwaji̧? —jö̧ba̧lö.

²² Abebö a̧ja̧kwökwe, —Bidönö kwabö loköboko. Ökwöda kwökwölöte'onö, ja̧danö kwitea 'böpönö bidönö juluwajo̧, ina 'yaba̧ladönö do̧katitjö̧ma, jobadönö kwabö loköbenaji̧? Kwabö loköbökena, jö̧tö? Jo̧kwajabetjö̧, bidönö pan tjukwobö kwiyo, ja̧danö ojwiyo tjowobö kwiyo. Ikenama, tjukwaja̧ ikena, ja̧danö tjowaja̧ ikenama, webö loköbodönö, tjuluwo̧ ö̧jobekwö tjȩwa̧jakobetjö̧, —jö̧ba̧lö atadinobe Eliseoma.

²³ Atadökwe, ba'ali tjukwobö otidö ujuninobe Israel la'aka luwo̧ma, ja̧danö siria ölakwabikwawa jojodö tjukwaja̧ ikena, ja̧danö tjowaja̧ ikenama, tjȩwa̧jobö webö loinobe, ja̧danö tjuluwo̧ Siria la'aka luwo̧ ö̧jobekwö tjewa̧jinobe. Ja̧danö, jemi ikenama Siria jojodö katjatibinobe, israel niji tebachö, ölakwabikwawö 'dölanö tjichi̧ma.

Siria jojodöma Samaria comunidad tjötjösawina wene

²⁴ Jemi ikenama, ja'yubenö lekwajabetjö̧ Siria la'aka luwo̧ Ben Adad mikwo̧ma, okobe deinö ömöayedö ölakwabikwawa jojodönö o̧ko̧kodinobe, ja̧danö ko̧ko̧dajo̧, Israel niji la'aka comunidad Samariabe 'ya̧nö, tjötjösawinobe, israel jojodönö tjujuluwobö.

²⁵ Ja̧danö, jobekwö tjötjösawiawö̧, jwiinö a̧wi̧chi̧ lö̧jinobe Samaria jojodönö, kwakwawa tjichejebobö jwiinobetjö̧. Lekwe tjötjösawiawö̧, mikwawökö ji̧ bulu uuma, mikwawachibinobe plata ö̧pi̧biya ochenta ö̧pibiya mikwawenanö baibanö, ja̧danö deja'do̧ bakwa'do̧ yunuku̧dö tjide'oma, bakwamu jawa plata ö̧pibiya mikwawenanö baibanö, jwiinö a̧wi̧chi̧ lö̧jawö̧, ja̧bi tjukwobö tjisakwobetjö̧.

²⁶ Ja̧danö, ju'wi möle baikwö baledinobe: Israel la'aka luwo̧ma, comunidad tjöekwemi wame kwebachö edonö, bakwuju jo̧banö jwöbö ajebinobe, —Chuluwo̧ la'aka luwo̧, pjabatitjö, —jö̧ba̧lö.

²⁷ Yöja̧lökwe, —Isabenö Jo̧ Dios ökwönö pjaatökötjö̧ma, ötjöma dakwö pjatatobö? Kwedemi batjo jawaö̧kö̧, ubasobuö̧kö̧ ökwönö chiyobö jȩnaji̧?

²⁸ Dakwö pjatatobö akebobeda? —jö̧ba̧lö yöa̧linobe la̧'aka luwo̧ma. Yöa̧loko, —Bakwuju chömöledösujuma, mada ötjönö yöja̧linobe, –Babe ökwö kwitji̧nö kwiyo, bakobe jo̧banö tobö dukwakobetjö̧. Ja̧danö, itekwai ötjö chitji̧nö dukwakobe, –jö̧ba̧lö yöja̧linobe chömöledösujuma.

²⁹ Jobekwö yöja̧li̧tjö̧, mada chitji̧nö tobö dukwijatö. Ja̧danö ikena möle jobujunö yöta̧lijatö, –Babe möle ökwö kwitji̧nö kwiyo, babe möle jo̧banö tobö dukwakobetjö̧, –jö̧ba̧lö. Jo̧kwaijayonö, mada, –Chitji̧nö chiyakwujusa, –jö̧ba̧lö yöja̧linajayonö, dukwobö iyökönö, tojö jujunajabe, jobujunö weköbo, a̧'dȩlökönö jitji̧nö jiyobö, —jö̧ba̧lö yöja̧linobe.

³⁰ Jobekwö yöja̧liökwe, jwiinö o̧'wo tjo̧achinobe la'aka luwo̧ma, ja̧danö o̧'wo tjo̧achö, ö̧ka̧miji̧do̧ kȩ'ekwö loinobe. Jobekwö kȩ'ekwö loenama, jojodö tjöba a'o comunidad tjöekwemi wame ö̧jinobe la'aka luwo̧ma, ja̧danö ö̧ka̧miji̧do̧ kȩ'ekwö loenama, ida̧ökö epjuyunö kalukaado̧ 'duawobe tjedinobe. Kweachakwa̧ abönö, okwasa̧do̧ baibanö, la'aka luwo̧ma epjuyunö kalukaado̧ 'duawinobe, ja̧danö wamenö 'duawajiado̧ 'duawinobe, jo̧kwajabetjö ökamijido̧ kȩekwö loenama, jobe ju̧kwadö edö tjöwaisachibinobe, —Aaa, o̧'wo tjo̧achobetjö̧, la'aka luwo̧ 'duawajiado̧ okwa, ida̧ökö o̧'wo tjo̧achö ȩpju̧yunö kalukaa̧do̧ 'dubawo̧tö duluwo̧ma, —jö̧ba̧lö.

³¹ Ja̧danö, jojosuju yöja̧laja̧ a̧ja̧kwajo̧, Dios yöawi̧ yöbawo̧ Eliseonö ödameakwinobe, —Babe usula demawi̧ma, Eliseo jawada, —jö̧ba̧lö. Ja̧danö dameakwö yöa̧linobe: —Isabenö babe möleda Eliseo uu bulatö lotakwo̧sa. Babe möle ikena, Eliseo ina 'ya̧ba̧lo̧ ö̧jitjö̧ma, Dios ötjönö lȩebobö jȩna, isabenö babe möleda jo̧banö kwabö lotobö jo̧be, —jö̧ba̧lö.

³² Ja̧danö yöba̧lajo̧, ömöayo̧ bakwo̧nö weinobe, Eliseonö do̧atobö. Ja̧ baledonö, Eliseoma comunidad luwedökwö ba̧nö ö̧jinobe, Eliseo ejunö. Ja̧danö, la'aka luwo̧ ömöayo̧ ichibakwa̧ abönö, jobadönö yöawinobe Eliseoma: —Jojodönö kwabawö lobo̧ israel la'aka luwo̧ma, iteda ömöayo̧nö weajabe, chuu bulatö loobö. Cheju apjudebe ichibenama, apjude tumatö, 'diinö tjökeba̧laduwo, teachapji jö̧ba̧lö. Ja̧danö, jo̧ba ichiba̧ja̧ ikena, uluwo̧ ömasapiya ökwöi̧bi juluwanö kwa̧ja̧kwaduwakobe, uluwo̧ Israel la'aka luwo̧bi juluwanö ichibakobetjö̧, —jö̧ba̧lö.

³³ Ja̧danö, jobekwö ina yö̧a̧lonö, la'aka luwo̧ weajökwe ichibinobe, ja̧danö ichibajo̧ yöawinobe, —La'aka luwo̧ma yöa̧lobe, –Tajawedö Isabenö Jo̧ Dios pjaatakwa̧ chiteada̧lobö? Babe wene döbaledi̧ma, Isabenö Jo̧ Diostjöda ichi̧, jo̧kwajabetjö̧, Dios pjaatakwo̧ jö̧ba̧lö chiteada̧loböma mikwawokobe, —jö̧ba̧lö la'aka luwo̧ yöa̧li̧ yöawinobe.