2 Reyes 5 - Dios Iwene

Naaman mikwo̧ lepratjö ö̧bibajina jawa

¹ Bakwo̧ Naaman mikwo̧, siria jojodötjö ölakwabikwawadö tjuluwo̧ ö̧jinobe. Jo̧ba Naamanma, isabenö juluwo̧ ö̧jinobe, ja̧danö Isabenö Jo̧ma iyinobe, Naaman weonö, Siria jojodö tjujuluwobö. Jo̧kwajabetjö̧ Naaman uluwo̧ Siria inesö la'aka luwo̧bi, ju'wedö jojodöbi otiwanö tjomukwatökwe ö̧jinobe Naamanma. Isabenö juluwo̧ ö̧jinobe Naamanma, jo̧kwaijayonö ju'wibi, inesö labi̧ tjö'wöchi̧ lepratjö 'dö̧achinobe Naamanma.

² Siria jojodöma israel jojodökwö ölakwabikwawö tjö̧jinobe, ja̧danö ju'wikwenama israel niji tebachö, 'dölanö tjölakwabikwawinobe. Bakwötanö jobekwö 'dölanö tjölakwabikwawenama, israel jojodötjö bakwuju möayujunö do̧tjatinobe, ja̧danö jobuju möayujuma, Naaman ilekwo jömöayuju bajibinobe. Ja̧danö, jobuju Naaman ilekwo jömöayuju jö̧jonö, lepratjö 'dö̧achinobe Naamanma.

³ Jobekwö 'dö̧achioko, juluwuju Naaman ilekwonö yöja̧linobe, —Samaria comunidadtjö Dios yöawi̧ yöbawo̧ juluwo̧ ö̧jobe chuluwuju, ja̧danö jo̧ba öba a'o chuluwo̧ Naaman ö̧jitjö̧ma, otiwo jö̧a̧lena chuluwuju. Jau, jo̧ba öba a'ö ö̧jitjö̧ma, chuluwo̧ Naaman lepratjö ö'wöchi̧ otidö loena, —jö̧ba̧lö yöja̧linobe Naaman ilekwonö.

⁴ Jobekwö yöja̧liökwe, Namaanma uluwo̧ inesö la'aka luwo̧ ö̧jobekwö ichibö yöawinobe, —Israel jojosujuma baikwö yöjawajabe, —jö̧ba̧lö.

^5-6 Yöa̧liökwe, ösödinobe Siria la'aka luwo̧ma, ja̧danö Naamannö weinobe, —Otiwa, jo̧ba ö̧jobekwö kwi̧'yo, ja̧danö ötjöma kwiyalusöja wȩyudö wetocha, Israel la'aka luwo̧nö e'ewö kwi̧'yobö, —jö̧ba̧lö. Ja̧danö kwiyalusöja i̧wȩyudinobe, baikwö: —Israel la'aka luwo̧, böja kwiyalusöja wȩyudö wetakwö chömöayo̧ Naamankwö. Chiwȩyudaja̧ edö, kwöwaisobö jo̧be, ötjö Siria la'aka luwo̧da bite Naamannö kwö̧jobekwö wetajabe, lepra ö'wöchi̧tjö ö̧bibajinö pjakatakobetjö̧, —jö̧ba̧lö. Weökwe, Israel nijibe i̧'yinobe Naamanma, ja̧danö nöinö baladabi, kamiji̧do̧ otiwa̧do̧bi e'ewinobe, ö̧bibajinö tjotidakwa̧ mikwa baibanö iyobö. E'ewi̧ma, baikwö laebobe: Plata ö̧pibiyatjö, treciento cuarenta kilo jenanö e'ewinobe, ja̧danö oro ö̧pibiyatjö, sesenta y ocho kilo jenanö e'ewinobe, ja̧danö kamiji̧do̧ otiwa̧do̧ma, domulataja jawasa̧do̧ e'ewinobe. Ja̧danö, israel nijibe ichibö, kwiyalusöja iyinobe Israel la'aka luwo̧nö.

⁷ Jobekwö iyajökwe, yeaibinobe Israel la'aka luwo̧ma, ja̧danö ökamiji̧do̧ kȩ'ekwö lobö yöa̧linobe, —Ötjöma Diosbö̧kö̧sa, ötjöma ö'wö batjibanö wetoböbi, 'yatja̧linö wetoböbi juluwö̧kö̧sa. Siria la'aka luwo̧ ötjönö weaja̧ma, tajawedö weobejö, bite ömöayo̧ ö'wöchi̧tjö ö̧bibajinö pjatatoböma. Ötjönö suli̧ öwaedotö jö̧ba̧lö jobekwö weajena, pjabatökönö chöjiökwe, sulabenö pjabatö̧kö̧ jö̧ba̧lö ötjönö ölakwabikwawakobetjö̧, —jö̧ba̧lö.

⁸ Ja̧ baledaja̧ a̧ja̧kwinobe Dios yöawi̧ yöbawo̧ Eliseoma, —Siria luwo̧ kwiyalusöja weiökwe, ö̧kamiji̧do̧ kȩ'ekwö loajabeta, —jö̧ba̧lö. Jo̧kwajabetjö̧ yöbawo̧nö weinobe Israel la'aka luwo̧nö, yöawobö: —Tajawedö o̧'wo tjo̧achö kwö̧kamijido̧ kȩ'ekwö loköbaja̧da? Naamannö weköbo, chö̧jobekwö ichobö, –Israel nijitjö isabenö Dios yöawi̧ yöbawo̧ ö̧jobe, –jö̧ba̧lö öwaisachibakobetjö̧, —jö̧ba̧lö.

⁹ Weiökwe, Naamanma itea kolukiyanöbi, ajwimu kabayudökwöbi i̧'yinobe Eliseo ejube, ja̧danö ichibajo̧, Eliseo eju apjude a'o öjamatinobe.

¹⁰ Ichibiökwe, yöbawo̧nö weinobe Eliseoma, Namaannö yöawobö: —Jordan ojwebe 'ya̧wi, ja̧danö jobetjö jelemutjö dötölatajanö kwidichawo. Jemi ikenama, kwi̧sȩdo̧ma yemidanö otiwachibakobe, ja̧danö lepra kwö'wöchi̧tjö otiwanö kwö̧bibajakwo̧ja, —jö̧ba̧lö.

¹¹ Jobekwö yöawiökwe, ödameakwinobe Naamanma, ja̧danö Eliseo ejutjö labebö yöa̧linobe: —Chomukwatatö, Dios yöawi̧ yöbawo̧ma, itedada isabenö chö̧jobekwö laebena, ja̧danö chöba a'o jamatö, ösödökwe Isabenö Jo̧ Diosnö jwöena, –Isabenö Jo̧, bitenö pjabati, –jö̧ba̧lö. Ja̧danö ömamu wechö, lepra chö'wöchi̧tjö chö̧bibajinö otidö loena, jö̧ba̧lö chomukwatatö.

¹² Jo̧kwaijayonö, jobekwö ja̧bökönö, sule Jordan ojwenö chidichawobö weajabe. Isabenö jobekwö chö̧jibobö ji̧tjö̧ma, chitebo comunidad Damasconö lö̧dönö dichawö chö̧jibobö jȩna, Abana ojwenöena, Farfar ojwenöena. Jau, ja̧ ojwebiyama, israel niji lö̧dötjö bajalekwönönö otiwödö, —jö̧ba̧lö dameakwö yöa̧linobe Naamanma, ja̧danö dameakwö jobetjö laebinobe.

¹³ Jo̧kwaijayonö, Naaman ömöayedöma ö̧jobekwö ichibö, bakwo̧ dösölö̧jinö yöa̧linobe, baikwö: —Chabe'do Naaman, Dios yöawi̧ yöbawo̧ ökwönö waiyi̧ jawa weatjö̧ma, öpöjödökönö ja̧köbo jö̧ka̧lajena, jö̧tö? Ja̧danö ökwönö weaja̧ma, –Ojwenö kwidichawitjö̧ma, lepra jwiinö kwö̧jakwo̧ja, –jö̧ba̧lö weaja̧ma, waiyökö ji̧ chabe'do. Weaja̧ kwa̧ja̧kwobö otiwena, a̧ja̧kwö ja̧köbakwa̧ji̧? —jö̧ba̧lö.

¹⁴ Yöa̧lökwe, a̧ja̧kwinobe Naamanma, ja̧danö Jordan ojwe okwa tebachö, Dios yöawi̧ yöbawo̧ weaja̧danö, jelemutjö dötölatajanö u̧bu̧dachinobe. Jemi ikenama, i̧sȩdo̧ma bakwainö otiwachibinobe, tjemu ja'yuwo̧ i̧sȩdo̧ otiwi̧danö, ja̧danö lepra ö'wöchi̧ jwiinobe.

¹⁵ Jobekwö balediökwe, okobe deinö ömöayedö jo̧bakwö kwebachadönö öbibö tjeachajinobe Dios yöawi̧ yöbawo̧ Eliseo ö̧jobekwö, ja̧danö öba a'o öjamatinobe. Ichibajo̧, Eliseonö yöa̧linobe, —Isabenö yötawakwö, babe chöwaisachibajabe, bö̧jȩ ba̧kwemeachibanö jelo̧ Diosbo̧ma deobe, sule bemi niji israeltjöda isabenö Diosbo̧ma ö̧jobe. Ja̧danö, babe atebakwö, ötjö kwömöayo̧ma, bi̧ya iyawa ökwönö chiyobö chichejebajabe, ja̧danö kwemobö atebakwö, —jö̧ba̧lö.

¹⁶ Yöa̧lökwe, —Iyawa chemökö Naaman, ötjöma Isabenö Jo̧ ömöayo̧sa, ja̧danö chuluwo̧ öba a'o ja̧nö, isabenö yöbawö chujunakwö, iyawa chemökakwo̧sa, —jö̧ba̧lö. Yöa̧liökwe, —Kwemobö jo̧be, —jö̧ba̧lö yöa̧lijayonö, öpöjödinobe Eliseoma, —Chemökö, —jö̧ba̧lö.

¹⁷ Yöa̧liökwe, Naamanma aebinobe: —Ja̧ kwemobö kwöpöjöditjö̧ma, jo̧kwada. Jo̧kwaijayonö, ju'wibi atebakwö chuluwo̧, ja'yubenö niji ötjönö kwiyobö atebakwö, du̧ju̧taja kabayudö tje'ewobö jö̧tja̧li̧ niji kwiyobö atebakwö. Jobekwö sobö chemobö weköbakwa̧ji̧? Jau Eliseo, bemi tupakwö jwiinö ubinö iyawabi, ju'wi iyawabi, la'akatjöda ju'wedö diosbedö jö̧ba̧lö tjösödawö̧nö chiyökakwo̧sa, sule Isabenö Jo̧ Diosnöda chiyakwo̧sa, jo̧kwajabetjö jo̧ba itebo israel nijitjö ja'yubenö niji chemobö chösöda, ja̧ chödaja̧ niji wameda Diosnö chiyakobetjö̧.

¹⁸ Jo̧kwaijayonö, jelo̧nö chösödökakwo̧sa jö̧ba̧lö yöta̧lijayonö, yayonö chitebo jojodö tjösödökwe Rimon ötjabökwe eju tetachobö ja̧kobe, baikwö labebö lobö yöta̧la: Ötjö chuluwo̧ Siria la'aka luwo̧ma, jobe tebachö Rimonnö ösödenama, chöjanö do̧ba̧lö teachobö jö̧a̧lakwo̧, jo̧kwajabetjö̧ jo̧bakwö tetachobö ja̧kobe. Ja̧danö jo̧ba Rimon öba a'o bȩbachibö ösödenama, ötjöbi bȩtachibobö ja̧kobe. Jobekwö baledijayonö, Isabenö Jo̧nö ateba, bȩtachibobe edö, –Sulabenö Rimonnö ösödo̧, –jö̧ba̧lö omukwatökönö, lȩlöjinö ötjönö edobö, —jö̧ba̧lö yöa̧linobe Naamanma.

¹⁹ Ja̧danö yöa̧lökwe, —Jau, wene jwiinö daji̧, —jö̧ba̧lö atadinobe Eliseoma. Ikenama Naamanma Eliseo ö̧jelö laebinobe, iteda itebobe ȩwa̧jobö. Jo̧kwaijayonö ödö ichibakwa̧ abönö,

Eliseo ömöayo̧ Giezi iteda ujuna̧lotö jö̧ba̧lö sulabenö ja̧ina wene

²⁰ Eliseo ömöayo̧ Giezima yöa̧linobe itedada, —Chuluwo̧ Eliseoma Naaman iyi̧tjö emo jö̧a̧lajabe, midökönö jo̧ba siria jojo ȩwa̧jobö weoko jö̧a̧lajabe. Iyobö ichejebajayonö, emö̧kö̧ chuluwo̧ma. Jo̧kwaijayonö ötjöma isabenö iyi̧tjö chemakwo̧sa, Isabenö Jo̧ öba a'o, isabenö yöta̧la, ökömanö ö'öbakwawö, iyi̧tjö chemakwo̧sa, —jö̧ba̧lö.

²¹ Yöba̧lajo̧, ökömanö lubö ö'öakwawinobe Giezima, ja̧danö ökömakwö edö, ö'öakwawobe edenama, kolukatjö yutubajö abebö a̧ja̧kwinobe Giezinö, —Wene jwiiji̧? —jö̧ba̧lö.

²² Abebö a̧ja̧kwökwe, —Wene jwiobe. Jo̧kwaijayonö chuluwo̧ Eliseoma ötjönö weajabe, ökwönö yöta̧lobö: –Babeda mösa'iju jȩmi Efrain nijitjö, Dios yöawi̧ yöbawadötjö du̧ju̧taja tjichajabe. Jo̧kwajabetjö̧, jobadönö kwiyobö atebakwö, plata jawatjö treinta y cuatro kilobi, ba̧kwo̧nökwena tjö̧ka̧miji̧do̧bi, –jö̧ba̧lö yöta̧lobö weajabe chuluwo̧ Eliseoma, —jö̧ba̧lö.

²³ Yöa̧lökwe, —Jau, otiwa, chiyocha, jo̧kwaijayonö treinta y cuatro kilodamaökö, sesenta y ocho kilo plata jawa kwemo, —jö̧ba̧lö, aebaja̧tjö bajalekwönönö emobö jwaikwöda weinobe Naamanma. Jemi ikenama tuda'wo do'wolatajanö aninobe ja̧ sesenta y ocho kilo plata jawama, ja̧danö kamijido̧ otiwa̧do̧ do̧do̧lataja iyinobe, ja̧danö iteda ömöayedötjö du̧ju̧tajanö weinobe, iyaja̧ tje'ewoböma. Ja̧danö weawö̧, ȩwa̧bijö Giezikwö e'ewö tji̧'yinobe.

²⁴ Ja̧danö, mösa'o Eliseo ö̧ja'obe tjichibenama, tje'ewaja̧ emö eju okwa ödinobe Giezima, ja̧danö emajo̧ webö loinobe, yemidanö tjuluwo̧ Naamankwö tji̧'yobö.

²⁵ Ikenama, kabatajo̧, eju okwa tebachibö, uluwo̧ Eliseo öba a'o öjamatinobe Giezima. Öba a'o ichibiökwe, —Detjö kwȩwa̧ja̧ Giezi? —jö̧ba̧lö abebö a̧ja̧kwinobe Eliseoma. Abebö a̧ja̧kwökwe, —Ȩwa̧ja̧kwawokobe, ötjö kwömöayo̧ma jelobe chi̧'yökötö chuluwo̧, —jö̧ba̧lö.

²⁶ Omöna yöa̧lökwe, —Naaman ökwökwö yöa̧lakwawobö meibenama, ötjö cho̧'wo luwo̧ma jobe deaji̧? Deokobe Giezi, cho̧'wo luwo̧bi ökwödökwö ja̧nö edajabeta. Ja̧danö baikwö yötawakwö Giezi, babe Dios iteda ujulu i̧sȩbaja̧ mölema, tea emawa mölemaökö, baladabi, kamijido̧bo, olivo batjobi, uba batjobi, obejadönöbi, pakayadönöbi, tjömöayedönöbi tjiyitjö kwemoböma.

²⁷ Ja̧danö, jobekwö sulabenö kwemobö kwisakwajobetjö̧, baikwö yötawakwö Giezi, Naaman ö'wöchaja̧ leprama, ökwönöda samakobe, ja̧danö ökwöbi, kwitji̧mu tupadanö jojodöbi ba̧kwelöjatebö lepratjö ö'wöchadö kwö̧jaduwakwedöja, —jö̧ba̧lö yöawinobe Eliseoma. Ja̧danö, Giezi Eliseo ö̧jelö laebenama, i̧sȩdo̧ bakwainö dewo̧ laebinobe, Naaman ö'wöchaja̧ jo̧banö samobetjö̧.