2 Reyes 4 - Dios Iwene

Eliseo jilekwe wobö ujunibinokonö pjaatina jawa

¹ Ju'wi möle, Dios yöawi̧ yöbawadötjö̧ bakwo̧ wobö ujunibinokoma Eliseo öba a'o ichibö budekwö yöja̧linobe: —Chuluwo̧ Eliseo, kwömöayo̧bina chilekweminema ökwö kwöwaisinökwe, Isabenö Jo̧ Diosnö isabenö yebabinö ösödina jö̧ba̧lö, jö̧tö? Ina 'yaalayi, jelo̧nö umusidinobe chilekweminema, ja̧danö dumusidina dimidiökökwe, umusidinökwema chitji̧mu du̧ju̧tajanö 'döbebö ichakobe, iteda ömöayedö batjibakobetjö̧, —jö̧ba̧lö.

² Yöja̧lökwe, —Dakwö pjatatobö kwösödobeda? Yöbawitjö, kwejunö taji kwujuna̧lobeda? —jö̧ba̧lö abebö a̧ja̧kwinobe Eliseoma. Abebö a̧ja̧kwoko, —Ötjö kwömöayujuma, chejutjö jwibujusa, sule o̧tesa̧yu bakwayuda junalujusa, ju'wima jwiobe, —jö̧ba̧lö jatadinobe.

³ Yöjawökwe, weinobe: —Kwejutjö labebö, okobe deinö kwipjeanö ju̧kwadönö akebo, i̧sa̧yu jwiayu̧ tjöbalewobö. Ja'yubema kwisakwoko, ba̧jȩkwa'oyu kwisakwo.

⁴ Ikenama, ökwöbi kwitji̧mubi kweju okwa tebachö, apjude kwutumato. Ikenama, kwiteayu o̧tȩsa̧yutjö, ba̧kwayu̧kwena kwipe'o. Bakwayu su̧'me baibenama, wainö kwujuno, ja̧danö wainö junaju, jeleyunö kwipe'o, okobe jwiinö su̧'be baibenanö kabatö, —jö̧ba̧lö weinobe.

⁵ Weoko, weaja̧danö emaju jitji̧mukwö tejachinobe jeju okwa, ja̧danö tebachaju apjude jutumatinobe. Ikenama, o̧te jipe'onö, jitji̧muma i̧sa̧yu jwii̧ oyu tjichejebinobe.

⁶ Ja̧danö, okobe jwiinö su̧'bȩ baibenama, ju'wi oyu jitji̧ ichejebobö wejinobe. Wejökwe, —Jwia, —jö̧ba̧lö atadinobe. Ja̧danö jenada bajalianö 'dö̧ibajinobe o̧tesa̧yuma.

⁷ Kabataju, Dios yöawi̧ yöbawo̧ Eliseonö yöjawobö ji̧'yinobe, ja̧danö yöjawökwe, —Mikwanö ja̧ o̧te kwiyo, ja̧danö iyaju kwumusidi kwimido. Ikenama, ökwöbi, kwitji̧mubi ja̧ ji̧baja̧ baladanö kwö̧jaduwo, —jö̧ba̧lö weinobe.

Sunem comunidad jojosuju jitji̧nö jemakwa̧ Eliseo yöawina jawa

⁸ Ja̧danö, ju'wi möle Eliseo jelobe kwebachö i̧'yenama, Sunem comunidadbe ichibinobe. Ja̧danö, jobe ichibioko, jobe ju̧ju̧ nöinö juna̧lujuma, Eliseonö ja̧debinobe, jejutjö ukwobö. Ja̧danö, jemi ikenama, jelobekwö kwebachö, Sunem comunidadbenö öbaledenama, ba̧kwelöjatebö jejube tebachö ukwiainobe.

⁹ Ja̧danö, Sunem jojosujuma jilekwenö yöja̧linobe, —Chilekwe, chöwaisa, ite ba̧kwelöjatebö ditebobe ichiba̧lajiabo̧ Eliseoma, Dios ömöayo̧ iteda yöawi̧ yöbawo̧, jö̧ba̧lö.

¹⁰ Jo̧kwajabetjö̧ baikwö jo̧banö pjadatobö chösöda, deju mötjö, i̧sȩko̧ dotidobö chösöda, Eliseo abȩko̧ baibanö. Ja̧danö otidajadö, kamapjobi, mesasötebi, teakabi, dȩju̧wa'yubi jobe dujuno, Eliseo baikwö ichibenama, jobe tebachö ö̧jakobetjö̧, —jö̧ba̧lö. Ja̧danö, yöja̧laja̧danö tjotidinobe.

¹¹ Ja̧danö, ju'wi möle Eliseoma yemidanö Sunem comunidadbe ichibinobe, ja̧danö ichibajo̧, jȩko̧ mösȩko̧be teachinobe, jobetjö ö'wachobö.

^12-13 Ja̧danö, Eliseoma iteda ömöayo̧ Giezi mikwo̧nö weinobe, —Sunem jojosujunö jwököbo, ja̧danö jobujunö yöka̧lo, –Jojosuju, isabenö otiwanö dösölö̧jinö pjakatajabe ökwödönö. Jobekwö otiwanö pjakati̧tjö̧, balekwa mikwa dakwö pjadatakwa̧da ökwönö? Inesö la'aka luwo̧nö, ju'wi jaye adebobö kwösödi̧ji̧? Ölakwabikwawadö tjuluwo̧nö, ju'wi jaye adebobö kwösödiji̧?, –jö̧ba̧lö abebö kwa̧ja̧kwo, —jö̧ba̧lö. Weökwe, Giezima Sunem jojosujunö jwöinobe, ja̧danö öba a'o jichibiökwe, Eliseo weaja̧danö abebö a̧ja̧kwinobe. Abebö a̧ja̧kwoko, —Jobekwö pjakataduwobö jwiobe, ötjöma ida̧ökö wene jwiinö chömöledö tjö̧'da̧de otiwanö ju̧ju̧sa, —jö̧ba̧lö jatadinobe.

¹⁴ Jobekwö jatadiökwe, Eliseoma ömöayo̧ Giezinö yöa̧linobe, —Jobekwö jatadajayonö, 'yayonö pjatatobö chösöda, kwedemi otiwanö pjadatakwa̧ma di̧yada? —jö̧ba̧lö. Abebö a̧ja̧kwökwe, —Jilekwema ida̧ökö pöe ö̧jijayonö, ina jitji̧ debuju jobujuma, —jö̧ba̧lö atadinobe Giezima.

¹⁵ Yöawökwe, —Jwöbijö, chöba a'o jichibobö, —jö̧ba̧lö weinobe. Ja̧danö, jwöoko, ichö, apjude a'o jöjamatinobe.

¹⁶ Jichibiökwe, —Jojosuju, makösaba, babedajayenö, ökwö kwitji̧nö wo̧ba̧lö do̧ka̧lakwujuja, —jö̧ba̧lö yöawinobe Eliseoma. Yöawioko, —Ayö chuluwo̧ Dios yöawi̧ yöbawo̧, jobekwö chujuna̧lobö jwiena ichejekwa, jobekwö chösödachibanö omöna yökawoko, jweinöda yöbawitjö, —jö̧ba̧lö.

¹⁷ Ja̧danö, Eliseo yöawaja̧danö baledinobe, ja'yubenö lekwajabetjö metu'wo bajibinobe, ja̧danö ikenasaba, o̧ba baibena jenanö, jitji̧nö jeminobe.

Sunem jojosuju jitji̧nö woawatjö Eliseo tjeatajina wene

¹⁸ Sunem jojosuju jitji̧ma öda̧peachinobe, ja̧danö ju'wi o̧ba baikwö baledinobe. Tjemu abe'doma ömöayedökwö batjo wa̧ji̧ emö otidinobe, ja̧danö tjemubi tjotidobekwö labebö i̧'yinobe.

¹⁹ Ja̧danö, abe'dokwö ö̧jonö, abe'donö yöa̧linobe, —Akö, chuu nia, chuu nia, —jö̧ba̧lö. Yöa̧liökwe, abe'doma ömöayo̧nö weinobe, —Tjemunö e'ewö da̧ji̧, ojo'do jö̧jobekwö, —jö̧ba̧lö.

²⁰ Weökwe, tjemunö e'ewö i̧'yinobe ojo'do Sunem jojosuju jö̧jobekwö, ja̧danö iyajoko, ju̧yu̧kijunö apjö̧alö̧ jitji̧nö do̧ja̧linobe, möle ja'ö baibenanö, ja̧danö möle ja'ö ö'wö baibinobe jitji̧ma.

²¹ Ö'wö baibioko, ojo'doma mö nöchö je'ewinobe, Eliseo iteako̧be, ja̧danö Dios yöawi̧ yöbawo̧ Eliseo iteapjo kamapjonö jöwaninobe. Ikenama, apjude tumatö, lajebinobe.

²² Labebaju, jilekwenö jwöjinobe, —Chilekwe, kwömöayedötjö bakwo̧nöbi, bulu bakwo̧nöbi webi, juluwanö Dios yöawi̧ yöbawo̧ Eliseo ö̧jobekwö chi̧'yakobetjö̧, ja̧danö 'ya̧ju, tjetachakobetjö̧, —jö̧ba̧lö.

²³ Yöja̧lökwe, —tajawedö jo̧ba ö̧jobekwö kwi̧'yobö chilekwo? Babema otikwökö mölemaökö, ja̧danö ju'wibi yö̧te jawo̧ 'yabayo̧ jawa ba'ali mölemaökö. Tajawedö ö̧jobekwö kwi̧'yobö, wene jo̧beji̧? —jö̧ba̧lö abebö a̧ja̧kwoko, —Wene jwia, —jö̧ba̧lö jatadinobe.

²⁴ Ikenama bulu oma'anö wanawaka jöwaninobe, ja̧danö wanaju, bulu oma'anö wanö jömöayujunö wejinobe, —Juluwanö chajwinö öbibi, ja'yubebi tjo̧'omanöma di̧'yoko. Juluwanö chi̧'yobö chösöda, jo̧kwajabetjö̧ tjo̧'omanö jö̧ba̧lö wetökötjö̧ma, jwaikwöda juluwanö öbibi, —jö̧ba̧lö wejinobe.

²⁵ Yöba̧laju, juluwanö ji̧'yinobe, Carmelo mösa'o, Eliseo ö̧jobekwö. Ja̧danö, jichibiökwe, ödötjö jichobe edinobe Eliseoma, ja̧danö edajo̧ ömöayo̧ Giezinö weinobe, —Edi, Sunem jojosuju dö̧jobekwö jichobeta.

²⁶ Juluwanö jö̧jobekwö ö'öbakwawi, ja̧danö ichibajo̧, abebö kwa̧ja̧kwo, –Wene jwiiji̧? Ökwöbi, kwilekwebi, kwitji̧bi, otiwanö wene jwiinö kwö̧jaduwiji̧? —jö̧ba̧lö weinobe. Weökwe, Giezi abebö a̧ja̧kwenama, —Wene jwiobe, —jö̧ba̧lö jatadinobe.

²⁷ Jo̧kwaijayonö, mösa'obe, Eliseo öba a'o jichibenama, öba a'o bamatö ömasapiya do̧jatinobe, —Chuluwo̧, pjabatitjö, —jö̧ba̧lö. Jobekwö uluwo̧ ömasapiya do̧ja̧tiökwe, Giezima uluwo̧tjö 'da̧batö junö jiebotö jö̧ba̧lö ichinobe, jo̧kwaijayonö Eliseoma jo̧banö yöa̧linobe, —'Wainö ju̧ju. Bisuma jwiinö jo̧'wo tjo̧bekwö ju̧ju̧, jo̧kwaijayonö tajawedöjö jö̧ba̧lö wajwita, Isabenö Jo̧ma chöwaisapji jö̧ba̧lö tojajobetjö̧, —jö̧ba̧lö.

²⁸ Ikenama Eliseonö yöja̧linobe, —Chuluwo̧, ökwönö atebijökötö, chi̧tji̧nö chujuna̧lobö, jö̧tö? Ja̧danö, chitji̧nö chujuna̧lakwa̧ yökawenama, omöna yöba̧lökönuitjö, jö̧ba̧lö chatadijatö, jö̧tö? Ötjöwe! —jö̧ba̧lö yöja̧linobe.

²⁹ Yöja̧liökwe, Giezinö weinobe, —Juluwanö kwö̧ka̧mijido̧ di̧batakwawi, juluwanö ö'öbakwawö kwi̧'yakobetjö̧, ja̧danö chotokwöte e'ewö, jejube kwi̧'yo. Jobekwö kwi̧'yonö, jelo̧nö kweditjö̧ma, dokwa jö̧ba̧lökönö, jwaikwöda tupakwö kwi̧'yo, ja̧danö bakwo̧ ökwönö edö, dokwa aebitjö̧bi, atadökönö jwaikwöda juluwanö kwi̧'yo. Ja̧danö, ichibajo̧, chotokwöte tjemu öbanö kwöwano, —jö̧ba̧lö.

³⁰ Yöa̧lioko, tjemu ojo'doma yöja̧linobe, —Ökwöbi kwichobö jo̧be chuluwo̧, Isabenö Jo̧ öba a'otjöbi, ökwö chuluwo̧ kwöba a'otjöbi, jweinö yöbawö chujunakwö, ökwöbi kwichökötjö̧ma, chejube tjetachajökakwujusa, —jö̧ba̧lö. Yöja̧lökwe, Eliseobi a̧la̧ibö jobujukwö i̧'yinobe,

³¹ ja̧danö tjabönö Giezima otokwöte e'ewö, tjemu ö̧jobekwö i̧'yinobe, ja̧danö ichibajo̧, tjemu öbanö öwaninobe otokwötema. Jo̧kwaijayonö, edemi, ja'yubenö ökwöi̧ma a̧ja̧kwinokobe, ja̧danö ja'yubebi peleaninokobe tjemuma, ö'wö babibajo̧da kamapjonö ö̧binobe. Jo̧kwajabetjö̧ Eliseo ö̧jobekwö ȩwa̧bijö yöawinobe, —Wilubö̧kö̧ tjemuma, —jö̧ba̧lö.

³² Sunem jojosuju jejube tjichibenama, Eliseo teachinobe, ja̧danö tebachajo̧, ö'wö babibajo̧ tjemunö öbadekwajinobe, iteda iteapjo kamapjo̧nö bo̧nö.

³³ Jo̧kwajabetjö̧, jo̧dawa'ye teachinobe Eliseoma, tjȩmukwö, ja̧danö tebachajo̧ apjude utumatinobe, ja̧danö tumatajo̧, Isabenö Jo̧nö aebinobe.

³⁴ Ikenama tjemu öwame öwamatinobe Eliseoma, iteda aama, tjemu aa wame ji̧nö, ja̧danö öbajalebiya tjemu öbajalebiya wame ji̧nö, ja̧danö ömamiju tjemu ömamiju wame ji̧nö. Ja̧danö, jobekwö tjemu öwame ö̧jonö, tjemu iteba'oma ja'yubenö tubamachibinobe.

³⁵ Jemi ikenama a̧la̧ibö, i̧sȩko̧ bakwachobebi, bakwachobebi kweachinobe, ja̧danö ikenama yemidanö tjemu iteba'o öwame, yemidanö debatö öwamatinobe. Jemi ikenama tjemuma ja'i̧ibinobe, jelemutjö dötölatajanö, ja̧danö öbajalebiya 'boebinobe tjemuma.

³⁶ Jobekwö balediökwe, ömöayo̧ Giezinö jwöinobe, ja̧danö weinobe, —Sunem jojosujunö jwöbi, —jö̧ba̧lö. Weökwe, jobujunö jwöinobe, ja̧danö Eliseo öba a'o jichibenama, —Kwiti̧nö kabebö emi, —jö̧ba̧lö weinobe.

³⁷ Weioko, Eliseo oba a'o ichibö, nijakwö bȩbachibö jöbamatinobe, —Otiwanö pjakatajabe chuluwo̧, —jö̧ba̧lö. Jemi ikenama, jitji̧nö kabebö, jȩko̧tjö labebö je'ewinobe.

Eliseo 'di̧atakwawa ji̧ kwakwawa otiwachibanö ja̧ina jawa

³⁸ Ju'wi möle, yemidanö Guilgal comunidadbe i̧'yinobe Eliseoma, ja̧danö jobe ichibenama, a̧wi̧chi̧ lö̧ji̧ ji̧nobe ja̧ nijitjö. Ja̧danö, ju'wedö Dios yöawi̧ yöbawadö Eliseo öba a'o ba̧nö tja̧ja̧kwa̧lonö, iteda ömöayo̧nö weinobe Eliseoma, —Chömöayo̧, palaka'do nöa'donö kwakwawa tobi, bidö Dios yöawi̧ yöbawadö tjukwakobetjö̧, —jö̧ba̧lö.

³⁹ Ja̧danö, Dios yöawi̧ yöbawadötjö bakwo̧ma batjobe i̧'yinobe, batjo jawa emö toobö. Ja̧danö, jobe 'ya̧jo̧, a̧dekwanö pokwa'ba isa'ba öbadekwajinobe. Badekwajo̧, waji̧tjö 'döbö aninobe ökamiji̧do̧nö, su̧'be baibenanö. Wa̧ji̧ jawasa'ba wajwiijayonö, kwakwawa wa̧ja̧'baö̧kö̧ jö̧ba̧lö, o̧dobe ichibajo̧ emaja̧ 'wi'wibö pa̧laka'do okwa aninobe, tjukwobö.

⁴⁰ Ja̧danö, tjukwobö badekwachenama, toawa tjiyabinobe, ja̧danö jamatö tjukwinobe. Ja̧danö̧ jamatö tjukwenama, jwötjeba̧linobe, —Ayö duluwo̧ Dios yöawi̧ yöbawo̧ Eliseo, labi̧, pa̧laka'do okwa 'di̧atakwawa a̧ja̧, ja̧tjö ö'wö badibena, —jö̧ba̧lö. Ja̧danö tjukwobö tjöpöjödinobe.

⁴¹ Yötja̧liökwe, —Harinaso̧pja̧ ichejebaduwi, —jö̧ba̧lö weinobe, ja̧danö tjichejebiökwe, pa̧laka'do̧ okwa ikwinobe. Ikenama, weinobe, —Tjukwobö iyabidönö, —jö̧ba̧lö weinobe. Ja̧danö, tjiyabenama, 'di̧atakwawa jwiinö otiwanö tjukwinobe.

⁴² Ja̧danö ju'wibi baledinobe. Ju'wi möle bakwo̧ Baal-salisa comunidadtjö ichinobe, ja̧danö batjo waji̧ ajayi waja̧ja̧ jawatjö ichejebö iyinobe Dios yöawi̧ yöbawo̧ Eliseonö. Cebada jawatjö otikwapja̧ veinte öpji̧yabi, ochiju a̧ja̧'wo tuda'wobi ichejebinobe, Eliseo u̧kwa baibanö iyobö. Ichejebiökwe, iteda ömöayo̧nö weinobe Eliseoma, —Dios yöawi̧ yöbawadönö iyi, tjukwobö, —jö̧ba̧lö.

⁴³ Weökwe, —Chuluwo̧, dakwö jobadönö chiyobö, ba̧jȩkwachökena. Jobadöma ömadö cienbedö chuluwo̧, bi̧ya ja'yubeda kwakwawatjö dakwö otiwanö tjukwobö? —jö̧ba̧lö. Abebö a̧ja̧kwökwe, yemidanö weinobe Eliseoma, —Jobadönö iyi, tjukwobö. Jau chömöayo̧, ba̧jȩkwachobe tjukwobö, Isabenö Jo̧ma baikwö yöawobetjö̧, –Ja̧tjö tjomeawachibanö tjukwakwedö, ja̧danö ju'wibi u̧'yu̧kwinö tjukwakwedö, –jö̧ba̧lö yöawobe Diosma, jo̧kwajabetjö̧ tjukwobö iyidönö, —jö̧ba̧lö.

⁴⁴ Jo̧kwajabetjö̧ weaja̧danö tjöba a'o ujuninobe tjukwobö, ja̧danö Isabenö Jo̧ yöawaja̧danö, tjomeawachibanö tjukwinobe, ja̧danö tjukwaja̧ ikenama ina u̧'yukwinobe kwakwawama.