2 Reyes 3 - Dios Iwene

Moab niji jojodö israel jojodökwöbi, Juda jojodökwöbi tjölakwabikwawina jawa

¹ Juda la'aka luwo̧ Josafat ö̧jayi, ida̧ökö dieciocho o̧biya baledibanö webö ö̧jenama, Acab itji̧ Joramma israel la'aka luwo̧ baibinobe Samaria comunidadtjö, ja̧danö a̧li̧nösamutjö dötölataja o̧biya baledibanö israel jojodönö webö ö̧jinobe.

² Jo̧ba Joramma sulabenö ja̧bö ö̧jinobe Isabenö Jo̧ öba a'otjö, jo̧kwaijayonö abe'dobi, ojo'dobi sulabenö ja̧tjinadanöma, bakwainö sulabenö ja̧bö öjinokobe Joramma. Jwiinö sulabenö ja̧bö, Acabma Baal ötjabökwenö ösödakwawa'o itebo Samarianö ujuninobe, ja̧danö itji̧ Joranma ja̧ ösödakwawa'o kabatibö, otiwanö meatö loinobe.

³ Jo̧kwaijayonö, Baalnö ösödakwawa kaatibinajayonö, ajayinö ji̧na Israel la'aka luwo̧ Jeroboan mikwo̧ sulabenö ja̧bö ö̧jinadanö ja̧bö ö̧jinobe. Jeroboanma pakayadö o̧'wo jawa otidajo̧, israel jojodönö sulabenö weinobe, —Bidöma dösödawö̧ diosbedö, —jö̧ba̧lö jobadönö tjösödobö, ja̧danö ja̧ ösödakwawa kabatibökönö, Jorambi jwaikwöda Jeroboan sulabenö ja̧bö ö̧jinadanö ja̧bö ö̧jinobe.

⁴ Moab niji la'aka luwo̧ Mesa mikwo̧ma, obejadönö ajwikwö ö̧jinobe, ja̧danö Israel niji la'aka luwo̧ ömöayo̧ ö̧jobetjö̧, o̧bakwena obejadö tji̧tji̧munö cien milbedönö iyobö ji̧nobe, ja̧danö obejadö ömadö cien milbedö tjöwö'yebi iyobö ji̧nobe.

⁵ Jo̧kwaijayonö, Israel la'aka luwo̧ Acab ö'wö baibaja̧ ikenama, ikena luwo̧ Acab itji̧ wei̧ a̧ja̧kwö kaatibinobe, —Kwömöayo̧bö̧kö̧sa, —jö̧ba̧lö.

⁶ Jobekwö kaatibiökwe, Samaria comunidadtjö labebö, okobe deinö israel niji ölakwabikwawadönö o̧ko̧kodinobe Joramma, Moab niji jojodökwö tjölakwabikwawakobetjö̧.

⁷ Ja̧danö ju'wibi yöawi̧ yöbawadönö weinobe, Juda niji la'aka luwo̧ Josafat mikwo̧nö yötja̧lobö, baikwö: —Chömöledöso̧ Josafat, Moab niji la'aka luwo̧ma weti̧ a̧ja̧kwökönö kaatibajabe. Jo̧kwajabetjö̧, jo̧banö chujuluwobö ölakwabikwawö chi̧'yakwo̧sa, ökwöbi ichö chujuluwobö pjakatakwaji̧? —jö̧ba̧lö. Aebökwe, —Jau chömöledöso̧, ökwöbi ötjöbi bakwaibedösa, ja̧danö chömöledöbi, ökwö kwömöledöbi bakwaibedö, ja̧danö chajwimu kabayudöbi, kwajwimu kabayudöbi bakwaibedö, isabenö bakwaibedö ja̧nö, ökwönö pjadatakwedösa, —jö̧ba̧lö atadinobe Josafatma.

⁸ Ja̧danö ju'wibi abebö a̧ja̧kwinobe Josafatma, —Moab nijibe di̧'yenama, dima mananö di̧'yakwada, —jö̧ba̧lö. Aebökwe, —Edom niji jojodö deobe baledö kwedachakwedösa, —jö̧ba̧lö atadinobe Joramma.

⁹ Ja̧danö, jobekwö yöba̧lakwawajadö, Israel niji la'aka luwo̧ Jorambi, Juda niji la'aka luwo̧ Josafatbi, Edom niji la'aka luwo̧bi bakobe tji̧'yinobe, Moab nijibema. Ja̧danö, jwaibalawa söpödö, jelemutjö dötölataja möle kwetjachaja̧ ikenama, ojwiyo 'dö̧tjekwajinobe, tjömöayedö ölakwabikwawadö tjowakwa̧bi, tjajwimu tjökömanö ichadö tjowakwa̧bi.

¹⁰ Jobekwö ojwiyo 'dö̧ibiökwe, Israel la'aka luwo̧ Joramma yöa̧linobe, —Ayö, Isabenö Jo̧ma ökwödö Israel la'aka luwo̧nöbi, Juda la'aka luwo̧nöbi, Edom la'aka luwo̧nöbi baikwö dichibobö jwöajabe, Moab la'aka luwo̧nö iyö loobö, ökwödönö ujuluwakobetjö̧, —jö̧ba̧lö.

¹¹ Jobekwö yöa̧liökwe, Juda luwo̧ Josafatma abebö a̧ja̧kwinobe: —Isabenö Jo̧ Dios yöawi̧ yöbawo̧ deiji̧, jo̧banö Dios yöawi̧ abebö da̧ja̧kwoböma? —jö̧ba̧lö. Abebö a̧ja̧kwiawö̧, Israel luwo̧ ömöayedötjö bakwo̧ yöawinobe, —Ajayinö Elias ömöayo̧ ji̧na, Eliseo mikwo̧ma ökwödökwö ö̧jobe, —jö̧ba̧lö.

¹² Atadökwe, —Jo̧bama Isabenö Jo̧ yöawi̧ isabenö yöbawo̧, jo̧banö abebö da̧ja̧kwo, —jö̧ba̧lö yöa̧linobe Josafatma. Jo̧kwajabetjö Josafatbi, israel la'aka luwo̧bi, Edom la'aka luwo̧bi Eliseonö abebö tja̧ja̧kwobö tji̧'yinobe.

¹³ Jobekwö tjichibiökwe, Eliseoma Israel la'aka luwo̧ Joramnö yöa̧linobe: —Ökwödöma bakwaiböködösa, ötjöma Diosnö ösödo̧ chö̧jonö, ökwöma ju'wedönö ösödo̧ja. Jo̧kwajabetjö ötjönö abebö a̧ja̧kwökönö, kwabe'do ja̧danö kwojo'do abebö tja̧ja̧kwinawö̧, tjösödawö̧ yötjawi̧ yöbawadönö abebö kwa̧ja̧kwo, —jö̧ba̧lö. Yöa̧liökwe, —Ja̧maökö Eliseo, Isabenö Jo̧ Diosda ökwödönö ko̧ko̧dö jwöbina, baikwö dichibanö iyö loobö, Moab la'aka luwo̧ ökwödönö ujuluwakobetjö̧. Ja̧danö jo̧bada ökwödönö iyö loobetjö̧, jo̧ba yöawi̧ abebö da̧ja̧kwakwö, —jö̧ba̧lö atadinobe Israel luwo̧ Joramma.

¹⁴ Yöa̧liökwe, Eliseoma Joramnö yöa̧linobe: —Ötjöma Isabenö Jo̧ Okobe Jwiinö Juluwo̧ Dios ömöayo̧sa, ja̧danö chuluwo̧ Dios öba a'o ja̧nö, isabenö yötawakwö, Josafatma ökwökwö deitjö̧ma, ökwönö edökönö, ja'yubebi pjatatoko jö̧ta̧lena. Jo̧kwaijayonö, Juda luwo̧ Josafatnö otiwanö chomukwatökwe, isabenö mikwawo̧ jö̧ba̧lö, ja̧danö jo̧bama ökwökwö ö̧jobetjö̧, Dios yöawi̧ yötawocha.

¹⁵ Jo̧kwajabetjö̧ baikwö wetakwö, lo̧awa jawa waiso̧nö ichejebaduwi, lo̧awa jawa pjeonö, Isabenö Jo̧ yöawi̧ cha̧ja̧kwakobetjö̧, —jö̧ba̧lö. Jemi ikenama, lo̧awa jawa waiso̧ arpa pjeonö, Isabenö Jo̧ ujulu ichibinobe Eliseokwö,

¹⁶ ja̧danö Eliseo yöawinobe baikwö: —Isabenö Jo̧ma baikwö yöawobe: –Wabeko ba̧kwemeachibanö, ojwiyo welachobö soawemi soköbaduwo.

¹⁷ Ja̧danö, jwa̧le'epjobi, ojwiyo o̧bakwa̧bi kwedaduwököjayonö, ötjö Isabenö Jo̧ma wabeko okwatibobö wetakwo̧sa, ökwödöbi, kwa̧jwi̧muduwibi ojwiyo kwowaduwakobetjö̧, –jö̧ba̧lö yöawobe Isabenö Jo̧ma.

¹⁸ Ja̧ isȩbakwa̧ma, Isabenö Jo̧ edemi waiyökö, ja̧danö ja̧da i̧sȩbökakwo̧. Ju'wibi iteda ujulu i̧sȩbö pjaatakwo̧ Isabenö Jo̧ma, ökwödönö iyakobe, Moabitas jojodönö kwujuluwaduwobö.

¹⁹ Ja̧danö, jobekwö pjaatiawö̧, Moab niji ba̧kwemeachibanö tjöekwemi comunidadtenia mebibö kwujuluwaduwakwedöja, ja̧danö okobe jwiinö inesö otiwemi comunidadtenia kwujuluwaduwakwedöja. Ja̧danö okobe jwiinö towibiya otiwowibiya jubö loköbaduwakwedöja, ja̧danö ojwese'dotenia tumatö loköbaduwakwedöja, ja̧danö batjo otiwayutenia suli̧ waedö, inawiya kwödaduwakwedöja. Jobekwö jwiinö Moabitas jojodönö kwujuluwaduwobö pjaatakwo̧ Isabenö Jo̧ma, —jö̧ba̧lö yöawinobe Eliseoma.

²⁰ Ja̧danö, yöawaja̧danö, ikena möle dewachena, yeayi Diosnö iyawa iyajitjena hora jenanö, Edom nijikwötjö ojwiyo ichibinobe, ja̧danö juluwanö okobe jwiinö ja̧ niji̧ ba̧kwemeachibanö ojwiyo lamatinobe, tjowobö.

²¹ Israel jojodö tjichibiawö̧, Moabitas jojodöma tja̧ja̧kwinobe, jobadö wamedukwa la'aka luwedö tjölakwabikwawobö tjichaja̧ wene, ja̧danö a̧ja̧kwajadö, okobe deinö moabitas jojodötjö ölakwabikwawadönö tjo̧ko̧kodinobe. Okobe deinö ölakwabikwawa jawa 'dutjawobö juluwadö, möayedönöbi, damönöbi tjo̧ko̧kodinobe, ja̧danö tjitebo bakwachobe ichibö tjötjeba̧linobe, Moab niji tebachö tjujuluwapji jö̧ba̧lö.

²² Ja̧danö, yeayi tja̧la̧ibenama, ichajadö tjö̧jobekwö edö, jawo̧ ojwiyo dejatobe tjedinobe, ja̧danö edö, badeibö ji̧ ojwiyoma, tjökwösobu duwinö ichejekwinobe Moabitas jojodönö.

²³ Tjökwösobudanö ichejekwiawö̧, —Jobuma döpöjojodö tjökwösobu. Ichajadö, la'aka luwedöma tjö̧dameakwajena, ja̧danö bakwo̧nökwena tjömöayedöma, ju'wedö tjömöayedönö mebibö tjölakwabikwawajena, okobe deinö debi batjibanö. Ökwödö Moab jojodöma juluwanö tjölakwabikwawajobe di̧'yaduwo, tjiteaja̧ demakobetjö̧, —jö̧ba̧lö yötja̧linobe Moabitas jojodöma, ja̧danö yöba̧lajadö, emö tji̧'yinobe.

²⁴ Jo̧kwiajayonö, israel jojodö tjabekwobe tjichibenama, Israel jojodöma a̧la̧ibö Moabitas jojodönö metjibinobe, ja̧danö ölakwabikwawö tjujuluwinobe, Moabitas jojodö tjöba a'otjö dötjibajenanö. Ja̧danö, tjökömanö lubö, Moabitas jojodönö kwabawö lotjinobe, jwiinö tjujuluwenanö baibanö.

²⁵ Comunidadtenia pjolö lotjinobe, ja̧danö batjo otiwayutenia ichibö, bakwo̧nökwena inawa tjikwinobe, batjosayutenia inawiyatjö muchekwayu ji̧benanö baibanö. Ja̧danö ojwese'dotenia tjutumatinobe, ja̧danö okobe jwiinö towibiya kwakwawa wa̧jowibiya jubö lotjinobe. Jwiinö suli̧ tjöwaedinobe Moab niji, la'aka comunidad Kir-haresetda ji̧benanö baibanö. Ja̧danö, ja̧ comunidadbi tjujuluwotö jö̧ba̧lö, tjötjösawinobe, ja̧danö inawa wökwebö ikwawa waisadöma, comunidad tjujuluwotö jö̧ba̧lö ikwö metjibinobe.

²⁶ Jobekwö balediökwe, Moab la'aka luwo̧ma edö öwaisachibinobe, —Ötjönö tjujuluwobeta, —jö̧ba̧lö. Ja̧danö, jobetjö döibajotö jö̧ba̧lö, Edom la'aka luwo̧ ö̧jemi badeibö, dötjibajotö jö̧ba̧lö mebibö tjölakwabikwawinobe, tjötjösawemi baledö dötjibajakobetjö̧, jo̧kwaijayonö waekwinobe.

²⁷ Jobekwö balediökwe, Moab la'aka luwo̧ma iteda itji̧ abönö pöe, jo̧ba ikena la'aka luwo̧ baibo jö̧ba̧lo̧nö do̧batö, kwabö juwö iyinobe ösödökwe o̧'wo jawanö, öpöjojodötjö ö̧jibakobetjö̧. Comunidad tjöekwemi wame, öwawinö jobekwö kwabö juwö iyinobe Moab la'aka luwo̧ma, ja̧danö iyaja̧ edö dameakwö tjöpöjödinobe Israel jojodöma, inesö labi̧, jö̧ba̧lö. Jemi ikenama, ölakwabikwawö kabatibö, idöda tjitebobe tjȩwa̧jinobe.