2 Reyes 21 - Dios Iwene

Manases Juda la'aka luwo̧ öjina jawa

¹ Juda la'aka luwo̧ baibenama, a̧linösa̧mutjö dötölataja o̧biya ujuna̧linobe Manasesma, ja̧danö cincuenta y cinco o̧biya baledibanö Jerusalen comunidadnö ja̧nö webö ö̧jinobe. Manases ojo'doma, Hepsiba mikwuju.

² Manasesma jwiinö sulabenö ja̧bö ö̧jinobe Isabenö Jo̧ öba a'otjö. Israel nijinö ajayinö ji̧nadö, israel jojodö tjöba a'otjö Isabenö Jo̧ a'dewö loinawö̧ sulabenö ja̧bö tjö̧jina jawa, Manasesbi sulabenö ja̧bö ö̧jinobe.

³ Jau, isabenö sulabenö ja̧bö ö̧jinobe Manasesma, baikwö laebobe sulabenö ja̧bö ö̧jina jawama: Abe'do Ezequias möemitenia otiwanö söbebö loinajayonö, ja̧ söbebö loinemi yemidanö otidinobe Manasesma. Ja̧danö ju'wibi, Israel la'aka luwo̧ Acab sulabenö ja̧inadanö, Manasesbi Baal ötjabökwenö ösödö iyawemibiya otidö ujuninobe, ja̧danö Asera ötjaboko jo̧'wo jawa otidö ujuninobe. Ju'wibi okobe deinö mölȩjȩnö löjadönö bȩbachibö ösödinobe, —Chösödawö̧ chuluwedöja, —jö̧ba̧lö.

⁴ Ju'wibi, a̧dekwanö Isabenö Jo̧ ejutjöbi, ju'wedö tjösödawö̧nö iyawemi otidö ujuninobe. Jau, Jeruselennö jȩju, Isabenö Jo̧ ejuma, Isabenö Jo̧ Dios yöa̧lineju, —Beju Jerusalennö jȩjuma, ötjöda cheju baibanö 'da̧batö chujunajabe, —jö̧ba̧lö, jo̧kwaijayonö ju'wedö tjösödawö̧nö iyawemi jobe otidö ujuninobe Manasesma.

⁵ Ja̧danö Isabenö Jo̧ eju a̧petunö, bakwachakwadanö, iyawemibiya otidö ujuninobe, okobe deinö mölejȩnö lö̧jadönö iyawemi baibanö.

⁶ Ja̧danö ju'wibi iteda itji̧nö kwabö juwö iyinobe, ösödökwenö iyawo̧ baibanö, ja̧danö mea boawa ja̧inobe, ja̧danö tupakwö baledakwa̧ öwaisachobö ja̧inobe, ja̧danö ö'wö babibinadökwö yöa̧lakwawa jojodönö abebö a̧ja̧kwinobe. Isabenö Jo̧ öba a'otjö, jwiinö sulabenö ja̧bö ö̧jinobe Manasesma, Isabenö Jo̧ jwiinö ödameakwenanö baibanö.

⁷ Isabenö jwiinö sulabenö ja̧bö ö̧jinobe Manasesma. Asera ötjaboko jo̧'wo jawa otidajo̧, a̧dekwanö Isabenö Jo̧ eju okwa ujuninobe. Ja̧ ejuma, Isabenö Jo̧ma ajayinö Davidnöbi, itji̧ Salomonnöbi yöawinobe, —Okobe jwiinö israel nijitjö, bejuda, ja̧danö bemi comunidad Jerusalenda 'da̧batö chujunajabe, ba̧kwelöjatebö ötjöda cheju baibanö, ja̧danö ba̧kwelöjatebö chitebo comunidad baibanö.

⁸ Ja̧danö israel jojodönö weti̧, chömöayo̧ Moisesmine i̧wȩyudina jawa teada̧lönö a̧ja̧kwö tjö̧jitjö̧ma, la'akatjöda jobadönö a'dewö lobö, jelobe kwebachö tjö̧joböma wetökakwo̧sa, ba̧kwelöjatebö otiwanö bemi nijinö tjö̧jobö pjatatakwo̧sa, —jö̧ba̧lö ja̧ eju jawa yöbawö ujuninobe.

⁹ Jo̧kwaijayonö otiwanö tja̧ja̧kwinokobe israel jojodöma, ja̧danö Manases sulabenö öibawö̧, jwiinö sulabenö ja̧bö tjö̧jinobe, ajayinö israel nijinö ji̧nadö, Israel jojodö tjöba a'otjö Isabenö Jo̧ a'dewö loinawö̧ sulabenö ja̧bö tjö̧jitjö bajalekwönönö jwiinö sulabenö ja̧bö tjö̧jenanö baibanö.

Dios lȩebakwa̧ yöawina jawa

¹⁰ Ja̧danö, Manases jobekwö sulabenö ja̧bö ö̧jiökwe, Isabenö Jo̧ma iteda yöawi̧ yöbawadönötjö yöawinobe:

¹¹ —Juda la'aka luwo̧ Manasesma bi̧ya inesö suli̧ jawa sulabenö ja̧ajabe, jo̧batjö ajayinö ji̧nadö amorita jojodö sulabenö ja̧tjinatjö bajalekwönönö sulabenö ja̧ajabe. Ja̧danö, o̧'wo jawa otidajo̧, itedama sulabenö ösödinokobe, ju'wibi ju'wedö Juda jojodö sulabenö otidajawö̧nö tjösödobö sulabenö weinobe.

¹² Jo̧kwajabetjö̧, jobekwö sulabenö ja̧bö ö̧jobetjö̧, ötjö Isabenö Jo̧ Israel jojodö tjösödökwe Diosma lȩtebakwa̧ baikwö yötawa: Inesö suli̧ waedi̧ Jerusalen comunidadbi, ju'wi Juda nijibi baledobö wetakwo̧sa. Isabenö inesö labi̧ jawa baledobö wetakwo̧sa, okobe deinö baledaja̧ wene a̧ja̧kwajadöma, —Tajijö? —jö̧ba̧lö yetjaibenanö.

¹³ Jau, kwöwaisa Samaria comunidadbi, israel la'aka luwo̧ Acab ömöledönöbi söbebö lotjakwa̧ omudawö chujuninama. Ja̧ söbebö lotjakwa̧ma, teada̧lönö ba̧ja̧dö chedijatö, bakobe söbebö lotjakobetjö̧, jö̧tö? Ja̧danö, jobekwö Jerusalen comunidad söbebö lotjakwa̧bi teada̧lönö ba̧ja̧dö chedajabe, ja̧danö Jerusalen comunidad baledakwa̧ baikwö wanedö yötawa: Jojo deja'do̧ okwa ji̧ 'do̧bö lobajo̧, mu'dudö ujuni̧danö, Jeruselen comunidad ju̧kwadönö söbebö lotjobö wetocha.

¹⁴ Ötjöda chömöledö batjibanö omudawö chujuninawö̧tjö ina ji̧badönö le'dedibö lotakwo̧sa, ja̧danö tjöpöjojodö jobadönö tjujuluwobö iyö lotakwo̧sa. Jobekwö iyö lotajawö̧, tjöpöjojodöma jobadönö tjujuluwakwedö, ja̧danö tjitea tjönaukwakwedö.

¹⁵ Chöba a'otjö sulabenö ja̧bö, chödameakwi̧nö ja̧bö tjö̧jobetjö̧, jobekwö baledakwawö̧. Jau, isabenö chödameakwobö sulabenö ja̧bajibö ju̧kwadö israel jojodöma, tja'dödö Egipto nijitjö latebina möletjö, babe möle baibenanö, chödameakwinö sulabenö ja̧bajibö ju̧kwadö, jo̧kwajabetjö̧ jobekwö bajaliyanö lȩtebakwawö̧, —jö̧ba̧lö yöawinobe.

¹⁶ Isabenö jwiinö sulabenö ja̧bö ö̧jinobe Manasesma. Manasesma sulabenö webö öibinobe Juda jojodönö, tjösödo jö̧tja̧lökwe Isabenö Jo̧ öba a'o sulabenö ja̧tjobö, jo̧kwaijayonö ja̧damaökö. Ju'wi sulabenö ja̧aja̧tjö bajalekwönönö, ju'wibi ba̧jȩkwadö wene jwibadönö kwabawö loinobe, Jerusalen comunidad ba̧kwemeachibanö tjökwösobu ku̧kwö isuwenanö baibanö.

¹⁷ Jobekwö ja'yubenö laebobe Manases Juda la'aka luwo̧ ö̧jina jawama, ja̧danö ju'wibi nöinö ja̧bö ö̧jinobe. Ja̧ ja̧bö ö̧jina wenebi, Dios öba a'o sulabenö ja̧bö ö̧jina wenebi, Juda la'aka luwedö tjö̧jina'ye mikwa'yenö laebobe.

¹⁸ Ja̧danö, Manasesma ö'wö baibinobe, ja̧danö ö'wö babibajo̧nö tjo̧tjinobe iteda eju ö'öbösayunö, Uza öbatjo ötjabena. Ja̧danö, Manases webö ö̧jinemi, itji̧ Amon mikwo̧ma Juda la'aka luwo̧ baibinobe.

Amon Juda la'aka luwo̧ ö̧jina jawa

¹⁹ Juda la'aka luwo̧ baibenama, veintidos o̧biya ujuna̧linobe Amonma, ja̧danö dötölataja o̧biya baledibanö, Jerusalen comunidadnö ja̧nö webö ö̧jinobe. Amon ojo'doma, Jotba comunidad jojo Harus itjiju Mesulemet mikwuju.

²⁰ Abe'do Manases sulabenö ja̧bö ö̧jinadanö, Amonbi Isabenö Jo̧ öba a'otjö sulabenö ja̧bö ö̧jinobe.

²¹ Okobe jwiinö abe'do sulabenö ja̧bö ö̧jina jawama, bakwainö sulabenö ja̧inobe Amonma, ja̧danö abe'do ösödinawö̧ o̧'wo jawama, Amonbi bȩbachibö jobadönö ösödinobe, —Chuluwedö chösödawö̧ja, —jö̧ba̧lö.

²² Ja̧danö iteda ösödo jö̧a̧lökwe, a'dödö tjösödinökwe Isabenö Jo̧ Diosnö kaatibinobe Amonma, ja̧danö Isabenö Jo̧ wei̧, ja̧bö ö̧jobö wei̧ma a̧ja̧kwinokobe.

²³ Ja̧danö, Amon ömöayedöma tjuluwo̧nö kwabö lotjakwa̧ omukwatö tjujuninobe, ja̧danö iteda ejunö ö̧jonö, la'aka luwo̧ Amonnö kwabö lotjinobe.

²⁴ Jo̧kwaijayonö, jobekwö tjuluwo̧nö kwabö lotjiawö̧, ju'wedö Juda niji jojodöma okobe deinö Amonnö kwabö lotjobö omukwatö juninadönö kwabawö lotjinobe, ja̧danö kwabawö lobajadö, Amon webö ö̧jinemi, itji̧ Josiasnö tjujuninobe, Juda niji la'aka luwo̧ baibanö.

²⁵ Jobekwö ja'yubenö laebobe Amon Juda la'aka luwo̧ ö̧jina jawa, ja̧danö ju'wibi nöinö ja̧bö ö̧jinobe Amonma. Ja̧ Amon ja̧bö ö̧jina jawama, Juda la'aka luwedö tjö̧jina'ye mikwa'yenö laebobe.

²⁶ Ja̧danö, Amonnö tjo̧tjinobe wobiakonö, Uza öbatjo mikwayunö, ja̧danö Amon webö ö̧jinemi, itji̧ Josias mikwo̧ma Juda la'aka luwo̧ baibinobe.