2 Reyes 20 - Dios Iwene

Ezequias jwiinö 'dö̧achina wene

¹ Ja̧ möle jenanö, la'aka luwo̧ Ezequiasma jwiinö 'dö̧achinobe, ö'wö baibo jö̧a̧lenanö. Ja̧danö, Dios yöawi̧ yöbawo̧ Isaiasma ichibö yöawinobe, —Baikwö yöawobe Isabenö Jo̧ma ökwönö, –Juluwanö ö'wö bakibakwo̧ja, bi̧ya kwö'wöchi̧tjö kwö̧bibajökakwo̧ja, jo̧kwajabetjö̧ ö'wö bakibaja̧ ikena jawa webö yökawo kwömöledönö, —jö̧ba̧lö yöawinobe Isaiasma.

² Jobekwö yöawiökwe, o̧'wo tjo̧achö, tjöekwemi jo̧bekwö edö öjalachibinobe Ezequiasma, ja̧danö o̧'wo tjo̧achö aebinobe Isabenö Jo̧nö:

³ —Chuluwo̧ Isabenö Jo̧, budekwö atebakwö, ökwönö ösödö cho̧ji̧ wene kwomukwatibobö. Jau chuluwo̧, ba̧kwelöjatebö weköbi̧ a̧jakwö jo̧sa, jwaikwöda ökwönöda ösödö jo̧sa̧, ja̧danö ökwö kwösödi̧ jawa ja̧bö jo̧sa, lȩlöjinö edö pjakatotjö, —jö̧ba̧lö aebinobe. Ja̧danö, jwiinö o̧'wo tjo̧achö, labinö ubudekwinobe Ezequiasma.

⁴ Ja̧danö, Ezequiasnö yöbawajo̧, Isaias ȩwa̧jemi ja'ötjö, Ezequias eju ö'wejenö ina ö̧jayi, Isabenö Jo̧ma Isaiasnö yöawinobe:

⁵ —Tjebachajö chömöledö Juda jojodötjö la'aka luwo̧ Ezequiasnö yökawo: –Ezequias, baikwö yöawobe kwa'dö Davidmine ösödinökwe Isabenö Jo̧ Diosma: Akebaja̧ cha̧ja̧kwajabe, ja̧danö kwubudekwaja̧ chedajabe. Ja̧danö a̧ja̧kwajo̧, baikwö chatadakwö: Kwö̧bibajinö pjatatakwo̧sa Ezequias. Wapötakwa möle baibenama, ida̧ökö bi̧bajo̧, ötjö Isabenö Jo̧ chejube kwi̧'yakwo̧ja,

⁶ ja̧danö bemi tupakwö quince o̧biya ina 'yaka̧lobö wetocha. Ju'wibi ökwöbi, bemi comunidad jojodönöbi, Asiria la'aka luwo̧ ujulutjö kwö̧jibaduwinö pjatatakwo̧sa. Jau Ezequias, ötjönö otiwanö tjomukwatakobetjö̧ jobekwö Jerusalen comunidad tjöbeba̧lö pjatatocha, ja̧danö ju'wibi chömöayo̧bina Davidnö ösödö chomukwatobetjö̧, iteboinemi comunidad tjöbeba̧lö, Jerusalennö ju̧kwadö tjö̧jibinö pjatatocha, –jö̧ba̧lö Ezequiasnö yökawo yötawaja̧ma, —jö̧ba̧lö Isaiasnö weinobe Isabenö Jo̧ma.

⁷ Weökwe, weaja̧danö Ezequiasnö yöawinobe Isaiasma, ja̧danö Ezequias ömöayedönö weinobe: —Higo waji̧ dalawa kwichejebaduwo, ja̧danö wale'denö kwöwanaduwo, ja̧danö jemi ikenama ja̧tjö ö̧bibajakwo̧, —jö̧ba̧lö.

⁸ Ö̧bibajakwa̧ wene yöawökwe, Isaiasnö abebö a̧ja̧kwinobe Ezequiasma: —Otiwa Isaias, ja̧danö i̧sȩkwa jawa, taji i̧sȩbakwa̧da Isabenö Jo̧ma, edö, –Isabenö chö̧bibajinö pjaatakwo̧ Isabenö Jo̧ma, ja̧danö wapötakwa möle baibenama, Isabenö Jo̧ ejube chi̧'yakwo̧sa, –jö̧ba̧lö edö chöwaisoböma? —jö̧ba̧lö abebö a̧ja̧kwinobe.

⁹ Abebö a̧ja̧kwökwe, —Ökwönö yöawaja̧danö isabenö baledakwa̧ i̧sȩbö, Isabenö Jo̧ma möle jawo̧nö wainö kweachobö weakwo̧, ökwöda omudawö kwujuni̧danö. Ökwöma dakwö i̧sȩbobö kwösödobeda, hora jawa ba̧ja̧daka edö, möle jawo̧ domulataja ba̧ja̧di̧ jawa abönö kweachoböö̧kö̧, domulataja ba̧ja̧di̧ jawa ökömakwö kweachöböö̧kö̧? Ökwöda akebi̧danö i̧sȩkwa baibanö weakwo̧ Isabenö Jo̧ma, —jö̧ba̧lö atadinobe Isaiasma.

¹⁰ Atadökwe, —Möle jawo̧ma ba̧kwelöjatebö mebajo̧, jo̧kwajabetjö̧ wayökena ichejekwa, meajo jö̧a̧litjö bajalekwönönö juluwanö meajobö. Jo̧kwaijayonö, ökömakwö kwebachajibö̧kö̧ möle jawo̧ma, jo̧kwajabetjö̧ ökömakwö kweachakwa̧ weobö ateba, isabenö yöawaja̧danö baledakwa̧ i̧sȩbö, —jö̧ba̧lö yöa̧linobe Ezequiasma.

¹¹ Yöa̧lökwe, Dios yöawi̧ yöbawo̧ Isaiasma Isabenö Jo̧ Diosnö aebinobe, ja̧danö aebökwe Isabenö Jo̧ma weinobe jawo̧ ökömakwö kweachobö. Ja̧danö, abe'do Acaz otidinaka, jawo̧ dejatena isadanö hora ba̧ja̧daka edö, domulataja ba̧ja̧di̧ jawa ökömakwö kweachobe edinobe Ezequiasma, veinte minutos jenanö ökömakwö kweachobe ba̧ja̧di̧ma.

Babilonia jojodö Ezequiasnö edö tjichina jawa

¹² Jemi ikenama, ja'yubenö lekwajabetjö̧ Babilonia niji la'aka luwo̧ Merodac Baladan mikwo̧ma Ezequiasnö baledina wene a̧ja̧kwinobe, —Ajayinö nöinö 'dö̧achinajayonö, otiwanö ö̧bibajinobe Ezequiasma, —jö̧ba̧lö. A̧ja̧kwajo̧, ömöayedönö weinobe, Ezequiasnö iyakwa̧ e'ewö tjiyobö, ja̧danö i̧wȩyudaja̧ kwiyalusöja e'ewö tji̧'yobö.

¹³ Tjichibiökwe, ösödinobe Ezequiasma, —Otiwanö kwichaduwajabe chömöledö, —jö̧ba̧lö. Ja̧danö, Ezequiaskwö tjö̧jonö, okobe jwiinö itea jobadönö i̧sȩbinobe, nöinö mikwawi̧ jawa lödawejunö ujuna̧li̧ jawabi, ölakwabikwawa jawa ujuna̧li̧bi, okobe jwiinö ju'wi jaye ko̧ko̧dö lödawejubiyanö ujuna̧li̧bi. Okobe jwiinö iteda ejunö ji̧bi, ju'wi itebonö ji̧bi tojökönö i̧sȩbinobe Ezequiasma.

¹⁴ Jemi ikenama Dios yöawi̧ yöbawo̧ Isaiasma ichibö, la'aka luwo̧ Ezequiasnö abebö a̧ja̧kwinobe: —Idöma dakwö yötja̧linada? Ja̧danö, didö tjitebotjö tjichinada? —jö̧ba̧lö. Aebökwe, —Ödö tjitebotjö tjichinobe, Babilonia nijitjö, —jö̧ba̧lö atadinobe Ezequiasma.

¹⁵ Atadökwe, —Kwejunö ji̧ jawatjö, diya jawa tjedinada? —jö̧ba̧lö abebö a̧jakwinobe Isaiasma. Aebökwe, —Okobe jwiinö chejunö ji̧ jawa tjedajabe, ja̧danö okobe jwiinö lödawejubiyanö ji̧ jawabi tjedajabe, ju'wi jayebi tojökönö, okobe jwiinö chi̧sȩbajabe, —jö̧ba̧lö atadinobe Ezequiasma.

¹⁶ Jobekwö yöawiökwe, Ezequiasnö yöawinobe Isaiasma: —Isabenö Jo̧ yöawi̧ kwa̧ja̧kwo, baikwö yöawi̧ma:

¹⁷ –Ezequias, yadakwö baledakwa̧ baikwö yötawakwö: Ju'wi möle okobe jwiinö kwejunö ji̧ma, kwa'dödö ko̧ko̧dö tjödina jawabi, ökwö ko̧ko̧dö kwödaja̧ jawabi, Babilonia nijibe tje'ewakwedö. Ja'yubebi ji̧bökönö, okobe jwiinö tje'ewakwedö, –jö̧ba̧lö yöawobe Isabenö Jo̧ma.

¹⁸ Ja̧danö ju'wibi baikwö yötawakwö, ökwö a̧dekwanö kwitji̧mu tupadanö jojodötjö ju'wedönö tje'ewakwedö, Babilonia nijibe. Ja̧danö jobadönö e'ewajadö, Babilonia niji inesö la'aka luwo̧ ömöayedö, iteda ejunö ja̧nö otidadö batjibanö wetjakwawö̧, —jö̧ba̧lö yöawinobe Isaiasma.

¹⁹ Jobekwö yöawiökwe, Ezequiasma omukwatinobe, —Jobekwö yadakwö baledobö ji̧jayonö, ina 'yata̧layi, ötjöbi ju'wedö chömöledö Juda jojodöbi otiwanö dö̧jakwedösa, debö chi̧'yaja̧ okobe baledakwa̧da yöawajabe, —jö̧ba̧lö. Ja̧danö jobekwö omukwatö, Isaias yöawi̧ ösödö atadinobe: —Jau Isaias, Isabenö Jo̧ yöawi̧ yökawajama, otiwa, otiwanö yökawajabe, —jö̧ba̧lö.

²⁰ Jobekwö ja'yubenö laebobe Ezequias Juda la'aka luwo̧ ö̧jina jawama. Ju'wibi nöinö ja̧bö ö̧jinobe Ezequiasma, ja̧danö ja̧ ja̧bö ö̧jina jawabi, ujulu i̧sȩbina jawabi, o̧pesobu sobö otidinabi, ojwiyo Jerusalen comunidad okwa ichibanö niji teebe soawemi tjotidobö weinabi, Juda la'aka luwedö tjö̧jina'ye mikwa'yenö laebobe.

²¹ Ja̧danö, Ezequiasma ö'wö baibinobe, ja̧danö Juda la'aka luwo̧ ö̧jinemi, Ezequias itji̧ Manases mikwo̧ma Juda la'aka luwo̧ baibinobe.