2 Reyes 2 - Dios Iwene

Elias mölejȩbe ȩwa̧jina jawa

¹ Isabenö Jo̧ Diosma omudawö ujuninobe, ömöayo̧ yöawi̧ yöbawo̧ Eliasnö mölejebe jalawapjo jwa̧lȩ'epjonö e'ewobö. Ja̧danö, ja̧ baledakwa̧ möle badekwachenama, baikwö baledinobe. Ja̧ möle, Eliasbi, ömöayo̧ Eliseobi Guilgal comunidadtjö labebö kwetjachinobe.

² Ja̧danö, Eliasma Eliseonö yöa̧linobe, —Eliseo, Isabenö Jo̧ma ötjönö weajabe, Betel comunidadbe chi̧'yobö. Jo̧kwajabetjö̧, jobe chi̧'yonö, ökwöma bada kwö̧jibo, —jö̧ba̧lö. Yöa̧lökwe, —Ja̧maökö, isabenö le'dedibökönö ökwökwö chi̧'yakwo̧sa, Isabenö Jo̧ öba a'otjöbi, kwöba a'otjöbi, jweinö yöbawö chujunakwö, ökwötjö 'da̧bachibö chi̧'yökakwo̧sa, —jö̧ba̧lö. Jo̧kwajabetjö̧, bakobe Betel comunidadbe tji̧'yinobe.

³ Ja̧danö, Betel comunidadbe tjichibenama, Dios yöawi̧ yöbawadö Betel comunidadnö ju̧kwadöma tjichobekwö labebö, Eliseonö yötja̧linobe, —Eliseo, kwöwaisiji̧? Babe möle Isabenö Jo̧ma kwuluwo̧ Eliasnö kwö̧jelö emakobe, —jö̧ba̧lö. Yötja̧lökwe, —Jau, chöwaisa Eliasnö emakwa̧ma, wi̧inö ja̧duwi, —jö̧ba̧lö.

⁴ Jemi ikenama, Eliasma Eliseonö yöa̧linobe, —Eliseo, Isabenö Jo̧ma ötjönö weajabe, Jerico comunidadbe chi̧'yobö, jobe chi̧'yonö bada Betelnö kwö̧jibo, —jö̧ba̧lö. Yöa̧lökwe, —Ja̧maökö, isabenö le'dedibökönö ökwökwö chi̧'yakwo̧sa, Isabenö Jo̧ öba a'otjöbi, kwöba a'otjöbi, jweinö yöbawö chujunakwö, ökwötjö 'da̧bachibö chi̧'yökakwo̧sa, —jö̧ba̧lö. Jo̧kwajabetjö̧, bakobe Jerico comunidadbe tji̧'yinobe.

⁵ Ja̧danö, Jerico comunidadbe tjichibenama, Dios yöawi̧ yöbawadö Jerico comunidadnö ju̧kwadöma tjichobekwö labebö, Eliseonö yötja̧linobe, —Eliseo, kwöwaisiji̧? Babe möle Isabenö Jo̧ma kwuluwo̧ Eliasnö kwö̧jelö emakobe, —jö̧ba̧lö. Yötja̧lökwe, —Jau, chöwaisa Eliasnö emakwa̧ma, wi̧inö ja̧duwi, —jö̧ba̧lö atadinobe.

⁶ Jemi ikenama, Eliasma Eliseonö yöa̧linobe, —Eliseo, Isabenö Jo̧ma ötjönö weajabe, Jordan ojwebe chi̧'yobö, jobe chi̧'yonö bada Jericonö kwö̧jibo, —jö̧ba̧lö. Yöa̧lökwe, —Ja̧maökö, isabenö le'dedibökönö ökwökwö chi̧'yakwo̧sa, Isabenö Jo̧ öba a'otjöbi, kwöba a'otjöbi, jweinö yöbawö chujunakwö, ökwötjö 'da̧bachibö chi̧'yökakwo̧sa, —jö̧ba̧lö. Jo̧kwajabetjö̧, bakobe tupakwö kwebachö tji̧'yinobe.

⁷ Ja̧danö, Jordan ojwebe kwebachö tji̧'yonö, Dios yöawi̧ yöbawadötjö cincuentabedöma ödökwönönö ja̧nö, eda̧lö kwetjachinobe, ja̧danö Eliasbi, Eliseobi ojwe ö'öbö tjö̧jonö, jobadöma ödökwönönö ja̧nö tjeda̧linobe.

⁸ Ja̧danö, ojwe ö'öbö ichibajadö, Eliasma ökamijido̧ wa̧mesa̧do̧ 'bo̧dibö, ojwenö kwainobe, ja̧danö kwaenama, ö'wejenö 'da̧bachibö bakwachobebi, bakwachobebi lamatinobe, ö'wejenö mana kököama lamatinö. Ja̧danö, Eliasbi, Eliseobi mana kököamabenö tjöbaledinobe, ojwe bakwachödöbe.

⁹ Jemi ikenama, ojwe baledajadö, Eliasma Eliseonö abebö a̧ja̧kwinobe: —Eliseo, kwö̧jelö Dios ötjönö emakwa̧ abönö, abebö cha̧ja̧kwakwö, ökwönö pjabatö dakwö ja̧tobö akebobeda? —jö̧ba̧lö. Abebö a̧ja̧kwökwe, —Chuluwo̧ Elias, ökwö lakebaja̧ okobe, abönö pöe dötölatajanö emi̧danö, kwujulutjö dötölatajanö chemobö chösöda, ökwö Dios yöawi̧ yöbawo̧ kwö̧ji̧danö, ötjöbi yöbawo̧ juluwo̧ chö̧jakobetjö̧, —jö̧ba̧lö atadinobe.

¹⁰ Atadökwe, —Akebaja̧ma waiya Eliseo, ötjöma jobekwö wetoböma juluwö̧kö̧sa. Jo̧kwaijayonö, baikwö yötawakwö: Kwö̧jelö Dios ötjönö emenama, latebobe kweditjö̧ma, kwö̧waisakwo̧ja, isabenö akebaja̧danö weajabe Diosma jö̧ba̧lö. Jo̧kwaijayonö latebobe kwedökötjö̧ma, akebaja̧danö baledökakobe, —jö̧ba̧lö.

¹¹ Ja̧danö, jemi ikena, jemi tupakwö kwebachö, yötja̧lakwawemi ja'ötjö, jobadönö 'da̧batö junö, juluwanö tjö'wejenö ökwöla, kabayudödanö, ja̧danö kolukadanö ichejekwöla baledinobe. Ja̧danö, jemi ikenama jwa̧le'epjo labinö jalawapjoma Eliasnö kabeibö e'ewinobe, mölejȩbe.

¹² Ja̧ baledi̧ edinobe Eliseoma, ja̧danö edö jwöeba̧linobe, —Chabe'do Elias, chabe'do. Ökwö Israel niji ju̧kwadötjö inesö tjöbeba̧lö pjabato̧nö Dios emajabe!—jö̧ba̧lö. Ja̧danö, Eliseo ö̧jelö debi baibinobe Eliasma, edökenanö. Jobekwö edajo̧, o̧'wo tjo̧achö iteda ökamiji̧do̧ kȩ'ekwö loinobe, dö̧do̧lataja baibanö.

¹³ Ja̧danö, Elias mölejȩbe kaekwajenama, ökamiji̧do̧ wamesa̧do̧ma nijakwö meinobe, jo̧kwajabetjö̧ ja̧do̧ eminobe Eliseoma. Ja̧danö, tjeachajinobe Jordan ojwebe, ja̧danö ojwe ö'öbö öjamatinobe.

¹⁴ Ichibajo̧, Elias iteaja̧ wamesa̧do̧ 'bo̧dibö ojwenö kwabö yöa̧linobe, —Eliasnö pjabatina Isabenö Jo̧ Diosma ötjönöbi Dios ujulu chi̧sȩbobö pjaatakwa̧ji̧? —jö̧ba̧lö. Ja̧danö, kwaenama, bakwachobebi, bakwachobebi lamatinobe ojwema, ja̧danö ö'wejenö öbaledinobe.

Elias Dios yöawi̧ yöbawadötjö la'aka yöbawo̧ ö̧jinemi, Eliseo la'aka yöbawo̧ ö̧jina jawa

¹⁵ Jobekwö baledi̧ tjedinobe Jericonö ju̧kwadö Dios yöawi̧ yöbawadöma, ja̧danö badeibö Eliseonö tjedenama, edö yötja̧linobe, —Aaa, ajayinö Dios ujulutjö Elias ujuna̧linama, Eliseoda ujuna̧lobe babema, —jö̧ba̧lö. Ja̧danö Eliseo ichobekwö 'ya̧wibö, öba a'o bȩbachibö tjöbamatinobe, —Duluwo̧ja, —jö̧ba̧lö.

¹⁶ Ja̧danö jobe ju̧kwadö Dios yöawi̧ yöbawadöma Eliseonö yötja̧linobe, —Eliseo, ökwödö kwömöayedötjö̧, cincuentabedö kwetjachobö juluwadö tjuju̧kwobe, weköbobö adebakwö, ajayi kwuluwo̧bina Elias iteba'o isakwö kwetjachobö. Dedemi Isabenö Jo̧ O̧'wo Luwo̧ma, Eliasnö emajo̧, iteba'o jelobe ikwö loajena, mösa'o jele'otjöena, wabeko jelekotjöena, weköbakwa̧ji̧? —jö̧ba̧lö atjebökwe, —Tjisakwobö weköbaduwoko, —jö̧ba̧lö atadinobe Eliseoma.

¹⁷ Jo̧kwaijayonö, —Tjisakwoböma weköbaduwoko, —jö̧ba̧lö atadijayonö, ina, —Weköbo, —jö̧ba̧lö, nöinö atjeba̧linobe, ime'dawachibenanö baibanö, ja̧danö bajalianö, —Jau, webaduwi, —jö̧ba̧lö weinobe. Jo̧kwajabetjö̧ cincuentabedönö tjisakwobö wetjinobe, ja̧danö wapötakwa möle baledibanö tjisakwinobe. Jo̧kwaijayonö Elias iteba'o tjöbadekwajinokobe.

¹⁸ Ja̧danö, isakwö kabatajadö, Jericobe tjȩwa̧jenama, Eliseoma ina Jericonö ö̧jinobe, ja̧danö badekwajökönö tjichibiökwe, —Yöta̧linadanö jo̧be, jö̧tö? Belö yötawijatö, kwisakwaduwobö jwiobe, kwa̧ja̧kwaduwo jö̧ka̧linaduwobe, —jö̧ba̧lö.

¹⁹ Ja̧danö, Jerico comunidad jojodöma Eliseonö yötja̧linobe, —Duluwo̧ Eliseo, kwöwaisa, wamenö bemi comunidadma, otiwobe ja̧dösa, jö̧tö? Jo̧kwaijayonö, wamenö otiwobe ichejekwijayonö, bemi ojwese'dotjö, ojwiyo sulobuda welachobe, ja̧danö sulobuda dowobetjö̧, bemi nijinö ju̧kwadöma di̧tji̧munö emöködösa, —jö̧ba̧lö yötja̧linobe.

²⁰ Yötja̧lökwe, jobadönö weinobe Eliseoma, —Deja̧pa̧ 'yayapa̧ ichejebaduwi, ja̧danö ja̧pa̧nö sayu anaduwi, —jö̧ba̧lö weinobe. Weawö̧, weaja̧danö tjichejebinobe.

²¹ Jemi ikenama Eliseoma ojwese'dobe i̧'yinobe, ja̧danö ojwese'do okwa sayu wa̧ebinobe. Jobekwö wa̧bebajo̧, —Baikwö yöawobe Isabenö Jo̧ma, –Bi'do ojwese'do otidö lotajabe, welachobu ojwiyoma otiwachibanö. Bemi tupakwö bi'dotjö welachobuma jojodö tjö'wöchinö ja̧ökakwobu, ja̧danö tji̧tji̧munö emökönö tjö̧joböma ja̧ökakwobu, —jö̧ba̧lö yöawinobe Eliseoma.

²² Ja̧danö, ja̧ möletjö baikwö baibanö, Eliseo yöawinadanö jo̧be, je'doma otiwe'do baibinobe, ja̧danö otiwobuda welachobe.

²³ Jemi ikenama, Jericotjö labebö, Betelbe i̧'yinobe Eliseoma, ja̧danö Betelbe i̧'yemi ja'ötjö, comunidadtjö ju'wedö möayedöma labebö, jo̧banö obö yötja̧linobe, —Ökwö pöe kwuu 'do̧apobo̧, da̧ji̧, ökwö pöe kwuu 'do̧apobo̧ da̧ji̧, —jö̧ba̧lö.

²⁴ Jobekwö obö yötja̧liökwe, jalachibö jobadönö yöa̧linobe Eliseoma, —Isabenö Jo̧ lȩebakwawö̧ja, —jö̧ba̧lö. Jemi ikenama, tebotjö ojwe yawidö ya̧dö du̧ju̧tajama labebö, jobadö möayedönö metjibinobe, ja̧danö möayedötjö cuarenta y dosbedönö nöinö suli̧ tjöwaedinobe.

²⁵ Ja̧danö, jemi ikenama, Beteltjö labebö, Carmelo mösa'obe i̧'yinobe Eliseoma, ja̧danö jemi ikenama, bajaliyanö Samaria comunidadbe ȩwa̧jinobe.