2 Reyes 19 - Dios Iwene

¹ Asiria luwo̧ yöa̧laja̧ yötja̧liökwe, inesö la'aka luwo̧ Ezequiasbi jwiinö o̧'wo tjo̧achinobe, ja̧danö o̧'wo tjo̧achö, ökamiji̧do̧ kȩ'ekwö loinobe. Ikenama o̧'wo tjo̧achadö 'dubawajitja̧do̧ epju̧yunö kalukaa̧do̧ 'duawinobe, ja̧danö 'dubawajo̧, Isabenö Jo̧ ejube i̧'yinobe.

² Ju'wibi ömöayedö Eliaquinnöbi, Sebnanöbi, Diostjö jojodötjö ö'weje pjabatadötjö luwedönöbi weinobe, epju̧yu̧nö kalukaa̧do̧ 'dubawö, Dios yöawi̧ yöbawo̧ Isaiaskwö yötja̧lakwawobö.

³ Weawö̧, Isaias ö̧jobekwö tji̧'yinobe, ja̧danö ichibajadö, yötja̧linobe baikwö: —Duluwo̧ Ezequiasma baikwö yöa̧lobe: –Babe mölema, inesö do̧'wo tjo̧ekwi̧ möle, döpöjojodö jwiinö sulabenö ökwödönö yöba̧lö, dötabakwobö yötja̧lobetjö̧. Dö̧ji̧ma baikwö wanedö yöta̧la, Metu'wo ju̧ju, ida̧ökö jitji̧nö jemakwa̧ möle badekwachijayonö, jemobö jujulu jwibujudanö ichejekwadösa, ja'yubebi juluwöködösa.

⁴ Jo̧kwaijayonö chedemi kwuluwo̧ Isabenö Jo̧ Diosma Asiria la'aka luwo̧ yöawi̧ yöbawo̧ yöa̧laja̧ a̧ja̧kwajena, 'yaba̧lo̧ Diosnö obö sulabenö yöa̧laja̧ma. Ja̧danö a̧ja̧kwajo̧, kwuluwo̧ Isabenö Jo̧ Diosma öpöjödö, jobadönö lȩebena. Jo̧kwajabetjö̧ ökwönö ateba Isaias, Diosnö akebobö, ökwödö Juda niji ju̧kwadötjö ina 'ya̧ba̧ladönö pjaatakobetjö̧, –jö̧ba̧lö yöa̧lobe duluwo̧ Ezequiasma, —jö̧ba̧lö Isaiasnö yötja̧linobe.

⁵ Ezequias ömöayedö jobekwö yöba̧lö tjichibiökwe,

⁶ jobadönö yöa̧linobe Isaiasma: —Baikwö yökawaduwo kwuluwo̧duwi Ezequiasnö: –Isabenö Jo̧ yöawi̧ma baikwö laebobe: Yebabökönuwi Ezequias. Asiria la'aka luwo̧ ömöayedö ötjönö sulabenö yötja̧laja̧ a̧ja̧kwajo̧, jobadönö yebabökönui.

⁷ Baikwö yöta̧lakwö baledakwa̧ma: Asiria la'aka luwo̧ omukwati̧ balewö lotocha, ja̧danö ju'wedö yötja̧li̧ a̧ja̧kwobö wetocha. Ja̧danö yötja̧li̧ a̧ja̧kwajo̧, iteda itebobe ȩwa̧ja̧kwo̧. Jemi ikenama, iteda itebo nijinö ö̧jonö, ju'wedö dȩdȩbö lotjökwe ö'wö baibobö wetakwo̧sa, –jö̧ba̧lö Isabenö Jo̧ yöawi̧ yökawaduwo kwuluwo̧duwi Ezequiasnö, —jö̧ba̧lö yöawinobe Isaiasma.

Asiria luwo̧ Ezequiasnö kwiyalu wȩyudö weina jawa

⁸ Asiria la'aka luwo̧ yöawi̧ yöbawo̧ma a̧ja̧kwinobe, —Chuluwo̧ Asiria la'aka luwo̧ma Laquis comunidadtjö labebajo̧, Libna comunidad jojodökwö ölakwabikwawobetö, —jö̧ba̧lö. Ja̧danö, a̧ja̧kwajo̧, Jerusalentjö labebö, uluwo̧ Asiria la'aka luwo̧ ö̧jobekwö i̧'yinobe, Libna comunidadbe.

⁹ Jemi ikenama Asiria la'aka luwo̧ Senaqueribma a̧ja̧kwinobe, —Cus niji la'aka luwo̧ Tiracama, ökwökwö ölakwabikwawotö jö̧ba̧lö ichobetö, —jö̧ba̧lö. Jo̧kwajabetjö̧ jo̧bakwö ölakwabikwawö i̧'yakwa̧ abönö, yemidanö Ezequiasnö yöawi̧ weinobe. Iteda yöawi̧ wȩyukwöja tje'ewobö weinobe, baikwö:

¹⁰ —Juda niji la'aka luwo̧ Ezequiasnö baikwö yöbawö kwi̧'yaduwo: –Ezequias, isabenö ötjö Asiria luwo̧ chujulutjö kwö̧jibobö jwibo̧ja. Kwösödökwe Diosma ökwönö yöa̧lobe, -Asiria la'aka luwo̧ma Jerusalen comunidad ujuluwökakwo̧, -jö̧ba̧lö, jo̧kwaijayonö ö'öbönö kwomukwatobö öibijayonö, Dios ökwönö omöna yöa̧li̧ kwösödoko Ezequias.

¹¹ Jau Ezequias, ju'wedö tjitebotenia jojodönö baledina kwa̧ja̧kwajabe, jö̧tö? Ökwödö Asiria niji la'aka luwedöma döpöjojodö tjitebotenia nijima, jwiinö söbebö lodajabe, jö̧tö? Ja̧ omukwatö, isabenö ökwödö Juda jojodö chujulutjö kwö̧jibaduwobö jȩnaji̧? Jwiobe Ezequias, kwösödökwe Dios omöna yöa̧li̧ kwa̧ja̧kwoko.

¹² Jau Ezequias, ötjötjö ajayinö ji̧nadö la'aka luwedö tjujuluwinawö̧ tjitebokwena jojodönö kwomukwato. Gozan niji jojodö tjösödawö̧tjöbi, Jaran niji jojodö tjösödawö̧tjöbi, Resef niji jojodö tjösödawö̧tjöbi, Telasar nijinö ju̧kwadö Eden jojodö tjösödawö̧tjöbi, bakwo̧ diosbo̧ma iteda ömöledö tjö̧jibinö pjaatobö ji̧naji̧, jobadönö dujuluwapji jö̧ba̧löma? Jwiinobe, jö̧tö?

¹³ Taji baledinada Jamat comunidad la'aka luwo̧nö, ja̧danö Arfad comunidad la'aka luwo̧nö, ja̧danö Sefarvayin comunidad la'aka luwo̧nö, ja̧danö Hena comunidad la'aka luwo̧nö, ja̧danö Iva comunidad la'aka luwo̧nö? Tjösödökwe tjö̧jibinö pjaatinaji̧? Ja̧maökö Ezequias, chujulutjö tjö̧jibinö pjabato̧ma deobe, —jö̧ba̧lö yöawi̧ yöawöja kwiyalusöja e'ewö Ezequiasnö tjiyobö weinobe.

Ezequias Diosnö aebina jawa

¹⁴ Asiria luwo̧ i̧wȩyudinöja e'ewö tjiyinobe Ezequiasnö, ja̧danö tjiyökwe, emö yöa̧linobe Ezequiasma. Ikenama yöba̧lajo̧, kwiyalusöja e'ewö i̧'yinobe Isabenö Jo̧ ejube, ja̧danö ichibajo̧, Isabenö Jo̧ öba a'otjö kwiyalusöja sedatö i̧sȩbinobe.

¹⁵ Ja̧danö Isabenö Jo̧ öba a'o ja̧nö, baikwö aebinobe Ezequiasma: —Chuluwo̧ Isabenö Jo̧, Israel jojodö dösödökwe Dios, ökwö angeledö querubines tjöwame kwiteaka inesö la'aka luwo̧ ö̧bakanö bo̧nö baikwö atebakwö: Chuluwo̧ Dios, ökwödaja isabenö Diosbo̧ma, bö̧jȩ ba̧kwemeachibanö tjiteboteniatjö, jelo̧ Diosbo̧ma deobe. Ökwödaja mölȩjȩbi bö̧jȩbi otidinaja chuluwo̧ Dios.

¹⁶ Jo̧kwajabetjö̧ baikwö atebakwö chuluwo̧ Isabenö Jo̧ Dios, kwölakiyu chö̧jobekwö bȩbachibö, otiwanö atebi̧ kwa̧ja̧kwobö atebakwö. Baikwö otiwanö kwedo chuluwo̧, ja̧danö otiwanö kwa̧ja̧kwo, okobe jwiinö Asiria la'aka luwo̧ Senaquerib sulabenö yötja̧lobö weinama, isabenö ökwö 'yaba̧lo̧ Diosnö sulabenö yöa̧lajobetjö̧.

¹⁷ —Jau chuluwo̧ Dios, isabenö yöa̧laja̧danö, Asiria la'aka luwedöma okobe deinö tjitebotenia jojodönö tjujuluwinobe, ja̧danö tjitebo niji suli̧ waedö söbebö lotjinobe.

¹⁸ Ja̧danö isabenö juluwajadö, tjösödawö̧ diosbedönö söbebö lobö, ökwölanö juwö lotjinobe, jobadö tjösödawö̧ma, Diosböködönöda tjösödobetjö̧. Jau chuluwo̧, jobadö tjösödawö̧ma ökwödanöböködö, jobadöma sule jojodö tjotidinawö̧, inawatjöö̧kö̧, towitjöö̧kö̧, ja̧danö tjujulu jwibadö, jo̧kwajabetjö̧ Asiria jojodö jobadönö tjujuluwobö ji̧nobe.

¹⁹ Jobadödanöbö̧kö̧ja chuluwo̧ Isabenö Jo̧ Dios, jo̧kwajabetjö̧ atebakwö, jo̧ba Senaquerib ujulutjö dö̧jibinö pjakatobö, okobe deinö tjitebotenia jojodöma edö ökwönö tjöwaisakobetjö̧, ökwö Isabenö Jo̧daja isabenö Diosbo̧ma, jelo̧ma deobe jö̧ba̧lö —Diosnö aebinobe Ezequiasma.

²⁰ Jemi ikenama Isaiasma yöawi̧ weinobe Ezequiasnö: —Baikwö yöawobe Isabenö Jo̧, Israel jojodö tjösödökwe Diosma ökwönö: –Ezequias, Asiria la'aka luwo̧ Senaqueribnö akebaja̧ cha̧ja̧kwajabe.

²¹ Ja̧danö akebaja̧ a̧ja̧kwajo̧, ötjö Isabenö Jo̧ma baikwö yöta̧la jo̧banö: Senaquerib, Sion mösa'o ya̧dö möayedöma ökwönö öpöjödö yö̧ba̧ladö, -Senaqueribma juluwö̧kö̧, -jö̧ba̧lö, Jerusalen ya̧döma tjuu löwö löwö obadö ökwönö.

²² Tinö oköbinada Senaquerib, tinö juluwö̧kö̧ jö̧ba̧lö kwöpöjödinada? Ötjödasa juluwo̧ma jö̧ba̧lö, tinö öpöjödö jwökeba̧linada Senaquerib? Ötjö Israel jojodö tjösödökwe Sulabe Jwibo̧ Diosnöda sulabenö kwöpöjödajabe Senaquerib.

²³ Ökwö kwömöayedö yökawi̧ yöbawadönötjö̧ ötjönö obö yöka̧lajabe Senaquerib. Ja̧danö ökwöda kwujulu omukwatö yöka̧lajabe, -Nöinö kolukiya chujuna̧lobetjö̧, mösa'iju wa̧pekwa'obe chichibanö chujuluwajabe, ödö Libano niji tebo okwa chichibajabe, ja̧danö ichibajo̧ inesö otiwowi möowi cedro towibiya jubö chemajabe, ja̧danö otiwi̧ cipre towibiya jubö chemajabe. Inesö ötjöda chujulunö, tebo okwa chichibajabe, ju'wi tebotjö bajalekwönönö otiwowibiya jȩmi chichibanö, ja̧danö jwiinö ödö chichibanö.

²⁴ Ju'wibi ju'wedö tjitebotjö ojwese'diju sobö, ojwiyo dowobö chemijatö, ja̧danö jwiinö ba̧jȩkwadö chömöayedönö öbibö, Egipto nijinö kwetachijatö, ba̧jȩkwadö kwedachajabetjö̧ Egipto niji ojwebiya kököachibenanö baibanö, -jö̧ba̧lö ötjönö öpöjödö yöka̧lajabe.

²⁵ Jobekwö yöka̧litjö̧, baikwö atadö yöta̧lakwö: Kwa̧ja̧kwinökiji̧, ötjö Diosda jobekwö kwujuluwobö webinasa. Damötjö ja̧ baledakwa̧ omukwatö chujunijatö, damötjö ajayinö ji̧nadö tjö̧jayi ida̧ökö baledakwa̧ omukwatö chujunijatö, ja̧danö babe omukwatö chujuninadanö badekwachinö baledobö wetobe. Jau, omukwatö chujunijatö tjöbebö tjotidina comunidad kwujuluwobö, ja̧danö pjolö lobö, mö japopo baibanö söbebö loköbobö.

²⁶ Jo̧kwajabetjö̧, jobekwö omukwatö chujuninobetjö̧, ja̧ comunidad jojodöma kwöba a'otjö juluwöködö, kwöba a'otjö tjo̧'wo tjobekwö ja̧dö, taji ja̧dakwajö, jö̧ba̧lö. Jau, ötjöda omukwatö chujuninobetjö̧, batjo pokwi̧danö, ja̧danö isa'ye yayinö pjoawaja'yedanö juluwöködö, ja̧danö jwa̧le'epjo jawo̧ laebobekwötjö tubinö jwa̧le'ewena, o̧do mö pokwi̧ isa'ye juluwanö kököbachibö woi̧danö, juluwanö ö'wö babibadö kwöba a'otjö.

²⁷ Otiwanö ökwönö edö waiso̧sa Senaquerib, ökwö kwö̧ji̧ma waiso̧sa, dena kwö̧jojobö jö̧ba̧lö. Okobe jwiinö kwekachi̧tenia edö waiso̧sa, kwejutjö lakebenabi, tekachenabi edö waiso̧sa, ja̧danö dameakwö ötjönö jwöbeba̧lö yöka̧li̧bi a̧ja̧kwö waiso̧sa.

²⁸ Jau, ötjönö dameakwö jwökeba̧li̧ma chöwaisa, ja̧danö ju'wedötjö bajalekwönö bo̧sa jö̧ba̧lö omukwatö yöka̧li̧ma, chölakiyunö cha̧ja̧kwajabe Senaquerib, jo̧kwajabetjö̧ baikwö ja̧takwo̧sa ökwönö: Ökwö kwi̧su̧nö, chitea o̧jwo̧'ye chakwatocha, ja̧danö kwaanö chitea kabayu aanö jweeba̧laka chanocha, ja̧danö ökwönö jalatö jwetebocha, kwichina mananö tjebachajö kwȩwa̧jakobetjö̧, –jö̧ba̧lö yöa̧lobe Diosma Senaqueribnö.

²⁹ —Ja̧danö baikwö baledakwa̧ yötawakwö Ezequias, edö, –Jweinö yöawajabe Isaiasma, —jö̧ba̧lö kwöwaisakobetjö̧. Biba o̧ba batjo jawa kwukwaduwakwa̧ma, a̧dekwanö pokwaja̧ wa̧ji̧ kwukwaduwakwedöja, ja̧danö babe ikenasababi a̧dekwanö pokwaja̧ wa̧ji̧ kwukwaduwakwedöja. Jo̧kwaijayonö jemi ikenasabama, batjo otidö, ödebiya kwödaduwakwedöja, ja̧danö kwödaduwina waji̧ kwemaduwakwedöja. Ja̧danö ubasa'ba junajadö, waji̧ kwukwaduwakwedöja.

³⁰ Ja̧danö towi bö'dia 'diinö niji̧ do̧a̧lidanö, ökwödö Juda jojodötjö ina 'yaba̧ladöma, otiwanö 'diinö kwö̧jaduwakwedöja, ja̧danö kwö̧ba̧jekwachaduwinö kwujuluwaduwakwedöja.

³¹ —Jau Ezequias, ökwödö Juda jojodötjö Asiria jojodö tjujulutjö ji̧bajadöma, o̧bukwedöda kwö̧jaduwijayonö, Jerusalentjö labebö Juda nijinö kwö̧jaduwakwedöja, isabenö ji̧bajadö Sion mösa'otjö otiwanö lakebaduwakwedöja. Jobekwö isabenö baledakobe Ezequias, Isabenö Jo̧ Dios jobekwö ökwödönö pjaatobö jö̧a̧lobetjö̧.

³² —Ja̧danö baikwö yötawakwö Isabenö Jo̧ Asiria la'aka luwo̧nö yöawi̧ma: –Asiria la'aka luwo̧ma Jerusalen comunidad teachökakwo̧. Ju'wibi, nayunu bakwanubi Jerusalentjö 'böökakwo̧, ja̧danö tjöekwapi kwebatö, meibökakwo̧, ja̧danö Jerusalen tjöekwemi pjolö lootö jö̧ba̧lö, pjolö loawakama ujunökakwo̧.

^33-34 Jau, comunidad ujuluwotö jö̧ba̧lö ölakwabikwawökönö, ichina manabenö ȩwa̧jakwo̧, la'akatjöda biya̧ comunidad teachökakwo̧. Jau Ezequias, ötjönö otiwanö tjomukwatakobetjö̧ jobekwö Jerusalen comunidad tjöbeba̧lö pjatatocha, ja̧danö ju'wibi chömöayo̧bina Davidnö ösödö chomukwatobetjö̧, iteboinemi comunidad tjöbeba̧lö, Jerusalennö ju̧kwadö tjö̧jibinö pjatatocha. Ötjö Isabenö Jo̧ma jobekwö yöbawö chujunakwö, –jö̧ba̧lö yöawobe Isabenö Jo̧ma, —jö̧ba̧lö yöawi̧ weinobe Ezequiasnö yötjawobö.

Dios Asiria jojodötjö ölakwabikwawa jojodönö kwabö loina jawa

³⁵ Ja̧danö, ja̧ yöte Isabenö Jo̧ weökwe angelma Asiria ölakwabikwawa jojodö tjabakwemi tebachö i̧'yinobe, ja̧danö jobadötjö ciento ochenta y cinco milbedö ölakwabikwawadönö kwabö loinobe. Ja̧danö, yȩayi ju'wedö wilubö tja̧la̧ibenama, okobe deinö Dios weajökwe angel kwabö loaja̧wö̧ tjiteba'iju nijinö bo̧be tjedinobe.

³⁶ Jobekwö balediökwe, Asiria la'aka luwo̧ Senaqueribma labebö ȩwa̧jinobe iteda itebo Asiriabe, ja̧danö ichibajo̧, iteda itebo comunidad Ninevenö ö̧jinobe.

³⁷ Jo̧kwaijayonö, jobe ö̧jemi ja'ötjö, baikwö baledinobe: Ju'wi möle iteda ösödökwe Nisroc eju okwa tebachö, ösödökwe o̧'wo jawa ösödemi ja'ötjö, itji̧mu Adramelec mikwo̧bi, Sarezer mikwo̧bi kwölöte'onö dȩdȩbö lotjinobe tjabe'donö, ja̧danö dȩdȩbö lobajadö, jobetjö labebö dötjibajinobe Ararat nijibe. Jemi ikenama Senaquerib itji̧ Esarjadon mikwo̧ma, abe'do ö̧jinemi Asiria jojodötjö inesö la'aka luwo̧ baibinobe.