2 Reyes 18 - Dios Iwene

Ezequias Juda la'aka luwo̧ ö̧jina jawa

¹ Israel la'aka luwo̧ Oseas ö̧jayi, ida̧ökö wapötakwa o̧biya baledibanö webö ö̧jenama, Juda la'aka luwo̧ Acaz itji̧ Ezequias mikwo̧ma Juda la'aka luwo̧ baibinobe.

² Ezequias la'aka luwo̧ baibenama, veinticinco o̧biya ujuna̧linobe, ja̧danö veintinueve o̧biya baledibanö Jerusalen comunidadnö ja̧nö webö ö̧jinobe. Ezequias ojo'doma, Zacarias itjiju Abias mikwuju.

³ Ezequiasma otiwanö ja̧bö ö̧jinobe Isabenö Jo̧ öba a'otjö, a'dö David ja̧bö ö̧jinadanö bakwainö otiwanö ja̧bö ö̧jinobe Ezequiasma.

⁴ Jojodö möemitenia tjiyemi söbebö loinobe, ja̧danö o̧'wo jawa ösödakwawa o'iju 'dobö loinobe, ja̧danö Asera ötjabokonö ösödakwawa o'iju jubö loinobe. Ju'wibi, a̧ko'da o̧'wo jawa, broncetjö Moises otidinabi 'dabebö loinobe Ezequiasma. Jau, ja̧ Moises otidinama, Nehustan jö̧ba̧lö ötjabinobe israel jojodöma, ja̧danö sulabenö ja̧ Moises otidina ösödö, iyawa tjiyinobe, ja̧danö jobekwö sulabenö tjösödiökwe, 'dabebö loinobe Ezequiasma.

⁵ Ezequiasma jwaikwöda o̧'wo wa̧na̧lö, Isabenö Jo̧ israel jojodö tjösödökwe Diosnö ösödö ö̧jinobe. Okobe deinö Juda la'aka luwedö Ezequias abönö ji̧nadötjöbi, ikena ji̧nadötjöbi bakwo̧bi Ezequiasdanöbo̧ma Diosnö o̧'wo wana̧lo̧ma deinobe.

⁶ Jau, isabenö 'diinö do̧ba̧lö, otiwanö Isabenö Jo̧nö o̧'wo wana̧lö ö̧jinobe Ezequiasma. Otiwanö Moises i̧wȩyudina Isabenö Jo̧ weina jawa a̧ja̧kwö ja̧nö, jwaikwöda kabatibökönö Isabenö Jo̧nö ösödö ö̧jinobe Ezequiasma.

⁷ Ja̧danö, jobekwö ösödö ö̧jiökwe, Ezequiaskwö ja̧nö pjaatinobe Isabenö Jo̧ma. Jo̧kwajabetjö̧ okobe jwiinö Ezequias otidi̧teniama otiwanö laebinobe. Ajayinö Asiria la'aka luwo̧ ömöayo̧ ö̧jinajayonö, wei̧ a̧ja̧kwobö öpöjödinobe Ezequiasma, ja̧danö ömöayo̧ ö̧jitjö laebinobe.

⁸ Ju'wibi jwiinö ujuluwinobe filisteo jojodönö, ja̧danö Gaza comunidad nijibe ichibanö, okobe jwiinö ja'yuwemi comunidadbiyabi, 'diinö tjöekwemi comunidadbiyabi ujuluwinobe Ezequiasma.

Asiria la'aka luwo̧ Israel jojodönö ujuluwina jawa

⁹ Juda la'aka luwo̧ Ezequias ida̧ökö ö'wejemu jawa o̧biya webö ö̧jena, ja̧danö Israel la'aka luwo̧ Oseas ida̧ökö jelemutjö dötölataja o̧biya webö ö̧jenama, Asiria la'aka luwo̧ Salmanasar mikwo̧ma ölakwabikwawö i̧'yinobe Israel la'aka comunidad Samariabe, ja̧danö Samaria comunidad ujuluwotö jö̧ba̧lö tjötjösawinobe.

¹⁰ Ja̧danö, wapötakwa o̧biya tjösawajo̧, Samaria comunidad ujuluwinobe Asiria la'aka luwo̧ma. Ja̧ baledina mölema, Juda la'aka luwo̧ Ezequias ida̧ökö jelemutjö̧ bakwöta o̧biya webö ö̧jena baledinobe, ja̧danö Israel la'aka luwo̧ Oseas ida̧ökö jelemutjö ö'wejemu jawa o̧biya webö ö̧jenama baledinobe.

¹¹ Samaria comunidad juluwajo̧, Asiria la'aka luwo̧ma ujuluwajawö̧ israel jojodönö öbibö ȩwa̧jinobe Asiria nijibe, ja̧danö jobadönö ujuninobe Halah comunidadnöbi tjö̧jobö, ja̧danö Gozan niji lödö Habor ojwe ö'öböbi tjö̧jobö, ja̧danö medo jojodö tjitebo comunidadbiyanöbi tjö̧jobö.

¹² Jobekwö baledinama, tjösödo jö̧tja̧lökwe Isabenö Jo̧ Dios wei̧ a̧ja̧kwökönö, sulabenö ja̧tjobetjö̧ baledinobe. Jau, okobe jwiinö Isabenö Jo̧ ömöayo̧ Moises jobadönö weina jawa kabatibö, a̧ja̧kwöbi tja̧ja̧kwobö tjöpöjödinobe, ja̧danö wei̧danö ja̧tjoböbi tjöpöjödinobe, ja̧danö jobekwö sulabenö ja̧tjiökwe, Asiria jojodö jobadönö tjujuluwobö weinobe.

Asiria jojodö Juda nijibe ölakwabikwawö tjichina jawa

¹³ Ezequias mikwo̧ Juda nijitjö inesö la'aka luwo̧ ö̧jinobe, ja̧danö ida̧ökö catorce o̧bia baledibanö webö ö̧jaja̧ ikenama, öpöjojo Asiria jojodötjö la'aka luwo̧ Senaquerib mikwo̧ma ömöayedö ölakwabikwawa jojodönö öbibö ichibinobe Juda nijibe. Ichibajo̧, Jerusalen comunidad meibakwa̧ abönö, okobe jwiinö ju'wi Juda niji comunidad 'diinö tjöbebö tjotidina comunidadbiya mebibö ujuluwinobe.

¹⁴ Jobekwö ölakwabikwawö ichiökwe, Juda la'aka luwo̧ Ezequiasma yöa̧li̧ weinobe Laquis comunidadnö jo̧ Asiria la'aka luwo̧nö, —Chuluwo̧, weköbi̧ katatibobö jö̧ta̧linama, sulabenö chomukwatijatö. Babema chomukwati̧ balewachö, weköbi̧ cha̧ja̧kwakwo̧sa, jo̧kwajabetjö̧ ötjökwö kwölakwabikwawi̧ kakatibobö atebakwö. Ja̧danö, sulabenö ja̧tina mikwa baibanö ökwönö chimidobö weköbi̧ma, weköbi̧danö isabenö ja̧takwo̧sa, —jö̧ba̧lö yöa̧li̧ weinobe Ezequiasma. Yöa̧liökwe, Asiria la'aka luwo̧ma weinobe Juda la'aka luwo̧ Ezequiasnö, plata jawa nueve mil kilo jenanö imidobö, ja̧danö oro jawa nuevecientos kilo jenanö imidobö.

¹⁵ Weökwe, Ezequiasma okobe jwiinö ujuna̧li̧ plata jawa, Isabenö Jo̧ ejunö tjujuna̧li̧bi, iteda eju lödawȩko̧nö ujuna̧li̧bi Asiria la'aka luwo̧nö midö iyinobe.

¹⁶ Ju'wibi ja̧ möle Ezequiasma Isabenö Jo̧ eju apjude tjöpöchina oro kalebö eminobe, ja̧danö apjudenö ji̧ okwi'ijutjöbi oro kalebö eminobe, ajayinö Ezequias jobe pöchö otidina oroma, ja̧danö kalebö emajo̧, ja̧bi Asiria la'aka luwo̧nö iyinobe.

¹⁷ Jo̧kwaijayonö, jobekwö iyajayonö, yayonö Asiria la'aka luwo̧ma iteda ömöayedönö, ölakwabikwawadötjö la'aka luwo̧nöbi, eju teada̧ladötjö la'aka luwo̧nöbi, yöawi̧ la'aka yöbawo̧nöbi weinobe, ba̧jȩkwadö ölakwabikwawadönö öbibö, Jerusalenbe 'yanö Ezequiaskwö yötja̧lakwawobö. Ja̧danö, Jerusalenbe ichibajadö, kamisi dichawemibe 'ya̧kwawama mananö tjöjamatinobe, möakwö ojwese'dotjö i̧sa̧la sotjinemi bajale ö'öbö.

¹⁸ Ichibajadö, inesö la'aka luwo̧ Ezequias ichobö jwötjinobe, ja̧danö ichibö jwötjiawö̧, Ezequias ömöayedöma jobadökwö yötja̧lakwawobö tji̧'yinobe, Ezequias eju teada̧lakwawa luwo̧ Eliaquin mikwo̧bi, wȩyukwa luwo̧ Sebna mikwo̧bi, weawa wȩyu̧kwa luwo̧ Joa mikwo̧bi.

¹⁹ Tjichibiökwe, Asiria luwo̧ yöawi̧ yöbawo̧ma jobadönö yöawinobe: —Baikwö yökawaduwo kwuluwo̧duwi Juda la'aka luwo̧ Ezequiasnö: Inesö juluwo̧ Asiria niji la'aka luwo̧ma baikwö yöa̧lobe ökwönö: –Tajawedö kwomukwatobeda, -Asiria jojodötjö chö̧jibobö jo̧be, -jö̧ba̧lö? Ko̧'wo kwöwana̧li̧ma, di̧yada?

²⁰ Ökwöma yöba̧lo̧ja, -Asiria jojodökwö chölakwabikwawobö juluwo̧sa, chölakwabikwawakwa̧ma waisanö omukwatö omukwatö chujunajabe, -jö̧ba̧lö, jo̧kwaijayonö jobekwö yöka̧li̧ma omöna. Tinö kwo̧'wo wa̧na̧lö, -Asiria luwo̧ wei̧ katatibobö jo̧be, -jö̧ba̧lö kwomukwatinada?

²¹ Chedemi Egipto la'aka luwo̧nö kwo̧'wo wa̧na̧lö kwö̧jena, -Chöjibobö pjaatakwo̧, -jö̧ba̧lö. Jo̧kwaijayonö baikwö yöta̧lakwö: Jobadönö tjo̧'wo wana̧ladönö pjabatökönö, suli̧ waedadö Egipto jojodöma, tokwöte juluwanö 'deawötedanö. Jau, bakwo̧ ja̧jaye tokwöte öwanawitjö̧ma, 'deawena, ja̧danö 'debawö, ömamunö söibena, jö̧tö? Jobekwö ichejekwo̧ Egipto la'aka luwo̧ Faraonma, jo̧banö tjo̧'wo wana̧ladönöma.

²² —–Ju'wibi yöka̧lena, -Ökwödöma dösödökwe Isabenö Jo̧ Diosnö do̧'wo wana̧lö ja̧dösa, dö̧jibinö pjaatakwo̧, -jö̧ba̧lö. Jobekwö kwataditjö̧ma baikwö yöta̧lena: Tajawedö Dios ökwödönö pjaatobö? Ökwö Ezequiasda Juda niji ba̧kwemeachibanö Diosnö ösödö iyawemitenia sulabenö söbebö lobinaja, ja̧danö söbebö lobajo̧, Jerusalennö ju̧kwadönöbi, ju'wedö Juda niji ju̧kwadönöbi weköbajabe, sule bipjo Jerusalennö ja̧pjo Diosnö iyawapjotjöda Diosnö kwiyaduwobö jo̧be, -jö̧ba̧lö. Jobekwö sulabenö ja̧köbiökwe, Isabenö Jo̧ Diosnö ökwödönö pjaatenaji̧? –jö̧ba̧lö yöa̧lobe chuluwo̧ Senaqueribma, kwuluwo̧duwi Ezequiasnö.

²³ —Jau, kwuluwo̧duwi Ezequiasnö yökawaduwo: –Chujuluwobö jo̧be, –jö̧ba̧lö yöka̧lijayonö, juluwö̧kö̧ja. Jau, inesö la'aka chuluwo̧ ömöayo̧ ja̧nö, jo̧ba iminö baikwö yötawakwö: Kwömöayedötjö kabayudönö wa̧nö ölakwabikwawadö dos milbedönö kwöbadekwaitjö̧ma, kabayudö dos milbedönö chiyakwo̧sa, ökwödökwö kwölakwabikwawobö.

²⁴ Jo̧kwaijayonö chedemi kwömöayedötjö dos milbedö kabayudönö wanö ölakwabikwawadö deobe Ezequias, jo̧kwajabetjö̧ ökwödökwö kwölakwabikwawobö juluwö̧kö̧ja. Jau, chuluwo̧ ömöayedö ölakwabikwawa luwedötjö, ju'wedötjö baikwönönö juluwö̧kö̧nöbi kwujuluwobö jwibo̧ja. Ja̧danö, –Egipto jojodöma kolukiyanö ölakwabikwawadönöbi, kabayudönö wanö ölakwabikwawa jojodönöbi wetjakwedö, –jö̧ba̧lö kwo̧'wo kwöwana̧lobö jwiobe, isabenö ökwödötjö kwö̧jibobö jwibo̧ja.

²⁵ —Ju'wibi yötawakwö, –Isabenö Jo̧ma pjaatakwo̧, –jö̧ba̧lö kwo̧'wo kwöwana̧loböma jwiobe, baikwö yöta̧la: Kwedemi Isabenö Jo̧ Dios weokonö, baikwö ökwödökwö dölakwabikwawobö dichinenaji̧? Ja̧maökö, Isabenö Jo̧ Diosda ökwödönö weinobe, –Juda nijibe 'ya̧nö, kwujuluwaduwo, –jö̧ba̧lö, isabenö ökwödö dujulutjö kwö̧jibobö pjaatökakwo̧, —jö̧ba̧lö yöa̧linobe Asiria la'aka luwo̧ ömöayo̧ yöawi̧ yöbawo̧ma.

²⁶ Jobekwö Juda jojodö tjiwenenö yöa̧liawö̧, Eliaquinbi, Sebnabi, Joabi yötja̧linobe, —Ökwödö kwömöayedöma, kwiwene arameo waisadösa, jo̧kwajabetjö̧ kwiwenenöda yöka̧lodönö. Ju'wedö Juda jojodö comunidad tjöekwemi ja̧dö tja̧ja̧kwa̧lonö, Juda jojodö diwenenö yöka̧loko, yöda̧lakwawi̧ tja̧ja̧kwapji jö̧ba̧lö, —yötja̧linobe.

²⁷ Yötja̧liökwe, —Ja̧maökö, ökwödökwöda yöta̧lakwawoböma weinokobe chuluwo̧ Asiria luwo̧ma, okobe deinö bai ju̧kwadökwö yöta̧lakwawobö weinökwesa, baikwö yöta̧la: Kwuluwo̧duwi Ezequias chuluwo̧ wei̧ a̧ja̧kwökötjö̧ma, jobadö tjöekwemi wame wa̧döbi usula tjemawakwedö, jwiinö usula kwemawaduwobetjö̧, ökwödöbi jobadöbi a̧wi̧chi̧ tjöbö, ökwödöda kwide'oduwi kwadö bakibaduwakwedöja, ja̧danö jwiinö ojwiyo o̧ti̧ tjöbö, kwibi̧esobu kwowaduwakwedöja. Jo̧kwajabetjö̧ isabenö jobadöbi yöda̧lakwawi̧ tja̧ja̧kwobö jo̧be, Ezequias chuluwo̧ yöawi̧ otiwanö a̧ja̧kwökötjö̧ma, jobadöbi usula tjemawakobetjö̧, —jö̧ba̧lö atadinobe Asiria la'aka luwo̧ yöawi̧ yöbawo̧ma.

²⁸ Ikenama, jobekwö atadajo̧, Asiria luwo̧ yöawi̧ yöbawo̧ma a̧la̧ibö, labinö jwöeba̧li̧nobe Juda jojodö tjiwenenö: —A̧ja̧kwaduwi inesö juluwo̧ Asiria la'aka luwo̧ ökwödönö yöawi̧ma.

²⁹ Baikwö laebobe inesö la'aka luwo̧ yöawi̧ma: –Kwuluwo̧duwi Ezequias omöna yöa̧li̧, -Kwö̧jibaduwinö pjatatakwo̧sa, -jö̧ba̧lö omöna yöa̧li̧ma kwa̧ja̧kwaduwoko, ö'öbönö ökwödönö öibapji jö̧ba̧lö, –yöawobe.

³⁰ Jau, Ezequiasma ökwödönö yöa̧lena, –Isabenö Jo̧ma isabenö dö̧jibinö pjaatakwo̧, ditebo comunidad Asiria la'aka luwo̧ ujuluwapji jö̧ba̧lö, dö̧jibinö pjaatakwo̧, –jö̧ba̧lö yöa̧lena. Jobekwö yöa̧litjö̧ma, yöa̧li̧ kwösödaduwoko, isabenö waekwakobetjö̧.

^31-32 Jau, jobekwö yöawitjö̧ma, Ezequias yöawi̧ kwa̧ja̧kwaduwoko, omöna jawa yöawobetjö̧. Asiria la'aka luwo̧ yöawi̧da a̧ja̧kwö kwösödaduwo, baikwö yöawi̧ma: –Weti̧ öpöjödö kwö̧jaduwi̧ kabatibö, comunidadtjö labebö ötjönö kwiyawaduwitjö̧ma, lȩlöjinö chedocha. Ötjö chömöayedö bakibaduwanö kwiyawaduwitjö̧ma, ju'winö jelobekwö niji otiwobekwö ökwödönö ötibakwo̧sa, kwiteboduwidanö otiwi̧ niji̧nö kwö̧jaduwobö, trigo jawabi, uba jawabi, olivo towibiyabi otiwanö pokwö wa̧jobe, ja̧danö wa̧yo̧ nöinö jo̧be nijibema. Ötjö chömöayedö bakibaduwanö kwiyawaduwitjö̧ma, ö'wö babibökönö, jobekwö otiwanö kwö̧jaduwakwedöja, jo̧kwajabetjö̧ chömöayedö bakibaduwanö kwiyawaduwo, bakobe okobe deinö debö kwi̧'yaduwapji jö̧ba̧lö. Ja̧danö, jobekwö kwiyawaduwitjö̧ma, yemidanö ökwödönö emö chichibakwa̧ kwiteada̧laduwonö, ajayi kwiteboduwinö otiwanö wene jwiinö kwö̧jaduwobö wetocha, ja̧danö bakwo̧nökwena kwöbatjo uba waji̧bi, higo towi waji̧bi kwukwaduwakwedöja, ja̧danö bakwo̧nökwena kwitea ojwese'dotjö kwowaduwakwedöja.

³³ Ezequias ökwödönö yöa̧li̧, -Isabenö Jo̧ma dö̧jibinö pjaatakwo̧, -jö̧ba̧lö yöa̧li̧ma, ö'öbönö öbibö omöna yöba̧lo̧, yöa̧li̧ kwa̧ja̧kwaduwoko. Jau, kwomukwataduwo, ju'wedö tjitebokwena jojodö tjösödawö diosbedötjö, bakwo̧bi ösödadönö pjabatö, tjö̧jibinö pjaatinaji̧? Jobadötjö jeleso jojodö ötjö Asiria la'aka luwo̧ chujulutjö tjö̧jibinaji̧? Kwöwaisaduwa, ja̧maökö.

³⁴ Jamat comunidad jojodö tjösödawö̧bi, Arfad comunidad jojodö tjösödawö̧bi, Sefarvayin comunidad jojodö tjösödawö̧bi, Hena comunidad jojodö tjösödawö̧bi, Iva comunidad tjösödawö̧bi, dai tjö̧jobeda? Jobadöma israel niji comunidad Samaria jojodönö tjö̧jibinö pjatjatinaji̧?

³⁵ Ja̧danö okobe deinö ju'wedö tjitebotenia jojodö tjösödawö̧tjö, dite ömöledönö tjö̧jibinö pjaatinada, jobadönö chujuluwapji jö̧ba̧löma? Deobe, jö̧tö? Jo̧kwajabetjö̧ ju'wibi öwawinö öwawobe, Isabenö Jo̧ma la'akatjöda pjaatökakwo̧, Jerusalen comunidadbi chujuluwapji jö̧ba̧lö, –chuluwo̧ Asiria luwo̧ yöawi̧ yötawaduwakwö, —jö̧ba̧lö yöawinobe yöbawo̧ma.

³⁶ Ja̧danö jobekwö yöa̧li̧awö̧, atadökönö tjö̧jinobe, Jerusalen jojodöma. Ajayinö la'aka luwo̧ Ezequiasma jweinö weinobe, —Yöbawo̧ yöawi̧ a̧ja̧kwajadö, kwatadaduwoko, —jö̧ba̧lö, ja̧danö wei̧ a̧ja̧kwö atadökönö wi̧inö tjö̧jinobe.

³⁷ Jemi ikenama, Eliaquinbi, Sebnabi, Joabi, yöbawo̧kwö yöba̧lakwawajadö, tjuluwo̧ Ezequias ö̧jobekwö tjȩwa̧jinobe, yötja̧lakwawaja̧ yötjawobö. Jwiinö o̧'wo tjo̧achö, tjökamisi kȩekwö lotjinobe, ja̧danö kȩekwö lobajadö, Ezequias öba a'o ichibö yötjawinobe, yöbawo̧ yöa̧laja̧ jawama.