2 Reyes 17 - Dios Iwene

Oseas Israel la'aka luwo̧ ö̧jina jawa

¹ Juda la'aka luwo̧ Acaz ö̧jayi, ida̧ökö a̧li̧nösamutjö dötölataja o̧biya baledibanö webö ö̧jenama, Oseas mikwo̧ma Israel la'aka luwo̧ baibinobe, ja̧danö jelemutjö ö'wejemu jawa o̧biya baledibanö, Samaria comunidadnö ja̧nö webö ö̧jinobe.

² Isabenö Jo̧ öba a'otjö, sulabenö ja̧bö ö̧jinobe Oseasma, jo̧kwaijayonö jo̧batjö ajayinö ji̧nadö Israel la'aka luwedö inesö sulabenö ja̧tji̧nadanömaökö.

³ Oseas webö ö̧jonö, Asiria la'aka luwo̧ Salmanasar mikwo̧ma ölakwabikwawotö jö̧ba̧lö ichinobe, ja̧danö ichibiökwe, Salmanasar ömöayo̧ baibanö iyawinobe Oseasma, ja̧danö ömöayo̧ ja̧nö, o̧bakwena iteatjö Salmanasarnö midö iyobö ji̧nobe.

⁴ Jo̧kwaijayonö, ja'yubenö lekwajabetjö̧, Salmanasar wei̧ kaatibobö jö̧a̧linobe Oseasma, ja̧danö imido jö̧a̧li̧ jawa midökönö, Egipto la'aka luwo̧ So mikwo̧nö aebinobe, Asiria la'aka luwo̧ Salmanasar ujulutjö ö̧jibinö pjaatobö. Ja̧ wei̧ kaatibobö jö̧a̧li̧ma öwaisachibinobe Asiria la'aka luwo̧ma, ja̧danö waisachibajo̧, Oseasnö do̧atinobe, ja̧danö ka̧lena ba̧kwawejunö ödinobe.

Asiria la'aka luwo̧ Israel jojodönö ujuluwina wene

⁵ Baikwö laebobe Asiria luwo̧ Oseasnö ujuluwina wenema: Israel nijibe ichö, Israel niji ba̧kwemeachibanö mebibö ujuluwinobe, ja̧danö Samaria comunidadbe ichibajo̧, wapötakwa o̧biya baledibanö ujuluwotö jö̧ba̧lö tjötjösawinobe.

⁶ Ja̧danö, wapötakwa o̧biya tjösawajo̧, Oseas ida̧ökö jelemutjö ö'wejemu jawa o̧biya baledibanö webö ö̧jenama, bajaliyanö Samaria comunidad ujuluwinobe Asiria la'aka luwo̧ma. Ja̧danö, juluwajo̧, ujuluwajawö̧ israel jojodönö öbibö laebinobe tjitebotjö, ja̧danö iteda itebobe öbibajo̧, Halah comunidadnöbi, Habor ojwe ö'öbö comunidad Gozannöbi, medo jojodö tjitebo comunidadbiyanöbi tjö̧jobö weinobe.

Israel jojodönö tjujuluwina labebö loawa jawa

⁷ Ja̧ baledina labebebö loawama baikwö laebobe: Idöda tjösödökwe Isabenö Jo̧ Dios jobadönö pjabatö, Egipto la'aka luwo̧ Faraon ujulutjö tjö̧jibanö, Egipto nijitjö labebö, idöda tjitebo nijinö tjö̧jobö pjaatinajayonö, Israel jojodöma tjösödökwe Isabenö Jo̧ Dios weökö jawa sulabenö ja̧tjinobe, ja̧danö jo̧banö kabatibö, ju'wedö tjösödawö̧nö tjösödinobe.

⁸ Dios wei̧ a̧ja̧kwökönö, ju'wedö tjitebo jojodö, tjöba a'otjö Isabenö Jo̧ a'dewö loinawö̧ sulabenö ja̧bö tjö̧jinadanö, israel jojodöbi sulabenö ja̧bö tjö̧jinobe, ja̧danö israel la'aka luwedö sulabedö ja̧bö tjö̧jidanö, ju'wedö israel jojodöbi sulabenö ja̧bö tjö̧jinobe.

⁹ Isabenö tjösödo jö̧tja̧lökwe Isabenö Jo̧ Dios öba a'otjö sulabenö ja̧tjinobe israel jojodöma, —Isabenö Jo̧ma dösödobö mikwawö̧kö̧, —jö̧ba̧lö. Tjösödo jö̧tja̧lökwenö kabatibö, tjitebo ba̧kwemeachibanö, comunidad ja'yuwemiteniatjöbi, 'diinö tjöekwemi comunidadteniatjöbi möemi o̧'wo jawa ösödakwawemi otidö tjujuninobe.

¹⁰ Jau, mösa'iju wa̧pekwa'oteniatjöbi, towibiya teebetjöbi o̧'wo jawanö ösödakwawa o'iju tjujuninobe, ja̧danö Asera ötjabokonö ösödakwawa o'iju tjujuninobe,

¹¹ ja̧danö möemitenia jobadönö kwabö juwö tjiyinobe, töba a'otjö Isabenö Jo̧ a'dewö loinawö̧ sulabenö ja̧bö tjö̧jinadanö. Jwiinö sulabenö ja̧tjinobe israel jojodöma, Isabenö Jo̧ jobadönö ödameakwenanö baibanö.

¹² Isabenö Jo̧ jweinö jobadönö weinajayonö, —O̧'wo jawa kwösödaduwoko, —jö̧ba̧lö jweinö weinajayonö, yayonö o̧'wo jawa sulabenö ösödö tjö̧jinobe israel jojodöma.

¹³ Jobekwö sulabenö ja̧bö tjö̧jiökwe, yemidanöbi, yemidanöbi iteda yöawi̧ yöbawadönö webiainobe Isabenö Jo̧ma, Israel jojodönöbi Juda jojodönöbi yötjawobö: —Sulabenö ja̧bö kwö̧jaduwi̧ kabatibö, ja̧bö kwö̧jaduwobö weti̧bi, ju'wi weti̧bi a̧ja̧kwö kwö̧jaduwo, kwa'dödönö wetina Moises i̧wȩyudinadanö, ja̧danö ju'wedö yötawi̧ yöbawinadö yötjawinadanö a̧ja̧kwö kwö̧jaduwo, —jö̧ba̧lö iteda yöawi̧ yötjawobö weinobe.

¹⁴ Jo̧kwaijayonö, tja̧ja̧kwobö tjöpöjödinobe israel jojodöma. Tja'dödö, tjösödökwe Isabenö Jo̧ Dios yöawi̧ ösödödöködö tjuubiya 'dibadö tjö̧jinadanö, jobadöbi tjuu 'dibadö ja̧nö, Dios yöawi̧ tja̧ja̧kwobö tjöpöjödinobe.

¹⁵ Isabenö Jo̧ma tja'dödökwö bakobe ja̧bö tjö̧jakwa̧ jawa wene yöbawö ujuninobe, —Isabenö weti̧ kwa̧ja̧kwaduwobö jö̧ba̧ladöja, —jö̧ba̧lö, ja̧danö jobadönö webajo̧, jweinö yöawinobe, a̧ja̧kwökönö tjö̧jitjö̧ma lȩebakwa̧ma. Jo̧kwaijayonö ja̧ jobadönö weinama tjöpöjödinobe israel jojodöma, mikwawökö ji̧ jö̧ba̧lö. Ja̧danö omöna yöba̧ladö batjibanö, tjösödo jö̧tja̧lökwenö kabatibö, mikwawöködö o̧'wo jawanö tjösödinobe. Ja̧danö ajayinö jweinö, —Ju'wedö tjitebotenia jojodö, kwitebo ö'öbö ju̧kwadö sulabenö ja̧bö tjö̧jidanö ja̧bö jö̧kö̧naduwi, —jö̧ba̧lö Isabenö Jo̧ jweinö weinajayonö, wei̧ a̧ja̧kwökönö, bakwainö ju'wedö sulabenö ja̧bö tjö̧ji̧danö ja̧bö tjö̧jinobe israel jojodöma.

¹⁶ Isabenö okobe jwiinö tjösödökwe Isabenö Jo̧ Dios wei̧ katjatibinobe Israel jojodöma. Jo̧banö kabatibö, idöda tjösödawö̧ batjibanö du̧ju̧taja pakayadö tji̧tji̧mu tjo̧'wo jawa tjotidinobe, ja̧danö Asera ötjabokonö ösödakwawa'o tjujuninobe, ja̧danö okobe deinö mölejȩnö lö̧jadönö bȩbachibö tjösödinobe, ja̧danö Baal ötjabökwenö tjösödinobe.

¹⁷ Ja̧danö, o̧'wo jawa ösödö, idöda tji̧tji̧mu ömadönöbi ya̧dönöbi kwabö juwö tjiyinobe. Ja̧danö tupakwö baledakwa̧ yöbawadönö abebö tja̧ja̧kwinobe, ja̧danö mea boawa sulabenö ja̧tjinobe. Isabenö okobe jwiinö Isabenö Jo̧ öpöjödi̧ jawa ja̧badö batjibanö tjiyawinobe israel jojodöma, Isabenö Jo̧ jwiinö jobadönö ödameakwawenanö baibanö.

¹⁸ Ja̧danö jobekwö sulabenö ja̧tjiökwe, jwiinö jobadönö ödameakwinobe Isabenö Jo̧ma, ja̧danö ö̧jelö labebö loinobe, ja̧danö israel jojodötjö sule Juda jojodöda ina tjitebo nijinö tjö̧jinobe.

¹⁹ Jo̧kwaijayonö, ju'wedö israel jojodönö Dios a'dewö loaja̧ tjedijayonö, Juda jojodöbi tjösödo jö̧tja̧lökwe Isabenö Jo̧ Dios wei̧ a̧ja̧kwökönö tjö̧jinobe. Wei̧ a̧jakwökönö, tjömöledö ju'wedö israel jojodö sulabenö ja̧awa tji̧sȩbinadanö, jobadöbi sulabenö ja̧bö tjö̧jinobe.

²⁰ Ja̧danö jobekwö sulabenö ja̧tjiökwe, okobe deinö Israel itji̧mu tupadanö jojodönö kaatibinobe Isabenö Jo̧ma, ja̧danö jobadönö iyö loinobe, tjöpöjojodö 'dölanö ichadö jobadönö tjujuluwobö, bakobe okobe deinö israel jojodönö iteda ö̧jelö a'dewö loenanö baibanö.

²¹ Ajayinö israel sasoteniatjö domulataja jawa oso David ömöledö tjujulutjö Dios 'yebö loenama, jobadö domulataja jawa oso jojodöma Nebat itji̧ Jeroboannö tjujuninobe, idöda tjuluwo̧ inesö la'aka luwo̧ baibanö. Ja̧danö Israel la'aka luwo̧ babibajo̧, ömöayedö israel jojodönö Isabenö Jo̧ ö̧jelö 'da̧bachibö tji̧'yobö weinobe, ja̧danö inesö sulabenö ja̧awa ja̧tjobö weinobe.

²² Ja̧danö jobekwö weawö̧, okobe jwiinö tjuluwo̧ Jeroboan sulabenö ja̧bö ö̧ji̧danö, jobadöbi sulabenö ja̧bö tjö̧jinobe. Ja̧danö Jeroboan sulabenö ja̧bö ö̧jina jawa katjatibinokobe Israel jojodöma,

²³ bajaliyanö Isabenö Jo̧ma iteda ö̧jelö israel jojodönö a'dewö loenanö baibanö. Ja̧ a'dewö loinama, ajayinö Isabenö Jo̧ yöawinadanö badekwachinobe. Isabenö Jo̧ yöawi̧ yöbawadöma yötjawinobe, a̧jakwökönö tjö̧jitjö̧ma Dios a'dewö loakwa̧ wenema, ja̧danö yöawinadanö Israel jojodönö idöda tjitebotjö a'dewö loinobe, ja̧danö babe mölebi baibanö, ina Asiria nijinö tju̧ju̧kwobe.

Ju'wedö tjitebo jojodö israel nijinö tjö̧jina jawa

²⁴ Ja̧danö, Israel jojodönö tjitebotjö öbibö labebajo̧, balekwedönö ju'wedö tjitebo jojodönö ichejebö ujuninobe Asiria la'aka luwo̧ma, jobadöda Samarianöbi, ö'öbö comunidadnöbi tjö̧jakobetjö̧. Babilonia comunidad jojodönöbi, Cuta comunidad jojodönöbi, Ava comunidad jojodönöbi, Hamat comunidad jojodönöbi, Sefarvaim comunidad jojodönöbi ichejebinobe Asiria la'aka luwo̧ma, ja̧danö ichejebiawö̧, idöda tjitebo baibanö Samaria comunidadnöbi, ju'wi ö'öbö comunidadtenianöbi tjö̧jinobe.

²⁵ Ajayinö jobadö jelobetjö ichajadöma Isabenö Jo̧nö yebabinö tjomukwatinokobe. Jo̧kwajabetjö̧, jo̧banö tjöwaisachibakobetjö̧, Isabenö Jo̧ma didibadönö weinobe, tjö̧'da̧de tjö̧jobö, ja̧danö jobadötjö ju'wedönö kwabö lotjinobe didibadöma.

²⁶ Jobekwö balediökwe, Asiria la'aka luwo̧ma a̧ja̧kwinobe, —Jelobetjö öbibö, Samaria niji comunidadbiyanö tjö̧jobö weköbinawö̧ma, ja̧ niji̧ diosbo̧nö wajwibadö. Jo̧kwajabetjö̧ jo̧ba diosbo̧ma weajabe, tjö̧'da̧de didibadö tjö̧jobö, ja̧danö tjö̧'da̧de ja̧nö jobe ju̧kwadönö kwabö lobadötö, jobe jo̧ diosbo̧ wei̧ wajwitjobetjö̧, —jö̧ba̧lö a̧ja̧kwinobe.

²⁷ Jobekwö a̧ja̧kwajo̧, Asiria la'aka luwo̧ma weinobe iteda ömöayedönö, —Israel nijitjö öbibö dichejebinawö̧tjö bakwo̧ ö'weje pjabato̧nö weköbaduwo, tjebachajö jobadökwö ö̧jobö, jobe jo̧ diosbo̧ wei̧ jobadönö ö̧ba̧ja̧dakobetjö̧, —jö̧ba̧lö.

²⁸ Weiökwe, Samariatjö latjebinawö̧tjö bakwo̧ ö'weje pjabato̧ma tjebachajö Betel comunidadnö ö̧jinobe, ja̧danö jobe ju̧kwadönö ö̧ba̧jadinobe, —Isabenö Jo̧nö baikwö yebabinö kwösödaduwo, —jö̧ba̧lö.

²⁹ Jo̧kwaijayonö, Isabenö Jo̧ Diosnö tjösödobö ö̧ba̧ja̧dinajayonö, sule Isabenö Jo̧ Diosnöda tjösödinokobe. Tjitebokwena jojodöma, idöda tjömöledö tjösödawö̧ o̧'wo jawabi tjotidinobe. Ja̧danö, ajayinö Samarianö jinadö israel jojodö tjotidina möemitenia, jobadö jelobetjö ichajadöma idöda tjösödawö̧ o̧'wo jawa tjujuninobe. Ja̧danö, israel nijinö ja̧nö, tjitebokwena jojodöma idöda tjösödinawö̧ o̧'wo jawanö ösödö tjö̧jinobe.

³⁰ Babilonia jojodöma, Sucot-benot ötjabökwe o̧'wo jawa tjotidinobe, ja̧danö Cuta jojodöma, Nergal ötjabökwe o̧'wo jawa tjotidinobe, ja̧danö Hamat jojodöma Asima ötjabökwe o̧'wo jawa tjotidinobe,

³¹ ja̧danö avitas jojodöma tjösödawö̧ Nibhaz ötjabökwe o̧'wo jawabi, Tartac ötjabökwe o̧'wo jawabi tjotidinobe, ja̧danö otidajadö jobadönö ösödö tjö̧jinobe. Ja̧danö Sefarvaim jojodöma Adramelec ötjabökwe o̧'wo jawabi, Anamelec ötjabökwe o̧'wo jawabi tjotidinobe, ja̧danö otidajadö, jobadö Sefarvain jojodö tjösödawö̧nö ösödö, idöda tji̧tji̧munö kwabö juwö tjiyinobe.

³² Jobekwö ajayinö tjösödinawö̧nö ina ösödö tjö̧jinobe jobadö jelobetjö ichinadöma, ja̧danö ju'wibi Isabenö Jo̧nö yebabinö tjomukwatinobe, —Israel niji Diosbo̧ Isabenö Jo̧nöbi dösödo, —jö̧ba̧lö. Jo̧kwajabetjö̧, idöda tjömöledötjö ju'wedönö 'da̧batö tjujuninobe, Diostjö jobadötjö ö'weje pjabatadö batjibanö, ja̧danö jobadönö wetjinobe möemiteniatjö Isabenö Jo̧nöbi kwabö juwö tjiyobö.

³³ Jobekwö Isabenö Jo̧nö yebabinö tjomukwatonö, ina tjitebokwena ju̧kwadö ösödö ja̧jitjadanö ösödö tjö̧jinobe. Asiria la'aka luwo̧ jobadönö israel nijibe öibakwa̧ abönö, jobadönö ösödö ji̧atjinobe, ja̧danö israel nijibe ichibajadö, Isabenö Jo̧nö yebabinö tjomukwatonö, ina ajayinö tjösödinawö̧nöbi ösödö tjö̧jinobe.

^34-35 Ja̧danö, babe mölebi baibanö, ina jobekwö ajayinö tjösödinadanö ösödö tju̧ju̧kwobe. Israel nijinö tjö̧jijayonö, Isabenö Jo̧ wei̧ a̧ja̧kwöködö otiwanöma. Diosnö yebabinö omukwatö, Israel jojodönö weina tja̧ja̧kwo jö̧tja̧lijayonö, ja̧bö tjö̧jo weinabi, ju'wi weinabi a̧ja̧kwöködö otiwanöma. Isabenö Jo̧ma Jacob itji̧mu tupadanö jojodö, Israel jö̧ba̧lö imidinawö̧nö weinobe, ja̧danö Diosbi Israel jojodöbi ja̧bö tjö̧jakwa̧ wene yöba̧lakwawö tjujuninobe. Jobadökwö yöba̧lakwawö junö, Isabenö Jo̧ma jobadönö weinobe, —Ju'wedö diosbedönö yebabinö kwösödaduwoko, ja̧danö jobadönö bȩbachibö kwösödaduwoko, ja̧danö wetji̧ a̧ja̧kwö kwö̧jaduwoko, ja̧danö jobadönö kwabö juwö kwiyaduwoko.

³⁶ Jobadönö ösödökönö, jwaikwöda ötjö Isabenö Jo̧ Diosnöda ösödö kwö̧jaduwo, chujulu i̧sȩbö, ötjöda chujulunö Egipto nijitjö lakebaduwinö pjabatinanö. Ötjö Isabenö Jo̧ Dios chöba a'otjöda bȩbachibö kwösödaduwo, ja̧danö ötjönöda kwabö juwö kwiyaduwo.

^37-38 Ja̧danö ja̧bö kwö̧jaduwobö weti̧bi, ju'wi weti̧ Moises i̧wȩyudobö wetina jawabi, ba̧kwelöjatebö teada̧lönö a̧ja̧kwö kwö̧jaduwo. Ökwödökwö bakobe yöba̧lakwawö dujunina o̧'wo jwibibökönö, ju'wedö tjösödawö̧nö yebabinö kwösödaduwoko. Jau chömöledö, ju'wedö diosbedönö yebabinö kwösödaduwoko,

³⁹ sule ötjö kwösödaduwökwe Isabenö Jo̧ Diosnöda yebabinö kwösödaduwo, ja̧danö jobekwö ötjönö ösödö kwö̧jaduwitjö̧ma, ötjö Isabenö Jo̧ma okobe deinö kwöpöjojodöduwi tjujulutjö kwö̧jibaduwinö pjatatocha, —jö̧ba̧lö weinobe Isabenö Jo̧ma, israel jojodönö.

⁴⁰ Ja̧danö, jelobetjö ichajadö Asiria luwo̧ ichejebinawö̧ israel nijinö ju̧kwadöma, ja̧ weina tja̧ja̧kwo jö̧tja̧linobe, jo̧kwaijayonö ja̧ weina a̧ja̧kwökönö, ajayinö tjö̧jinadanö ju'wedö diosbedönö ösödö tjö̧jinobe.

⁴¹ Jobekwö laebobe jelobetjö ichajadö, israel nijinö ju̧kwadö tjö̧ji̧ wenema. Jobadöma dötölatajanö ösödö tjö̧jinobe, Isabenö Jo̧nö yebabinö omukwatö tjö̧jonö, idöda tjotidinawö̧ o̧'wo jawanöbi ösödö tjö̧jinobe. Jobadö tji̧tjimubi ja̧danö, ja̧danö jobadö tji̧ti̧mubi ja̧danö. Jau, babe mölebi baibanö, jobadö tji̧tji̧mu tupadanö jojodöma ina tja'dödö ja̧bö tjö̧ji̧nadanö ina ja̧bö ju̧kwadö.