2 Reyes 13 - Dios Iwene

Joacaz Israel la'aka luwo̧ ö̧jina jawa

¹ Juda la'aka luwo̧ Joas öjayi, ida̧ökö veintitres o̧biya baledibanö webö ö̧jenama, Jehu itji̧ Joacaz mikwo̧ma Israel la'aka luwo̧ baibinobe, ja̧danö diecisiete o̧biya baledibanö, Samaria comunidadnö ja̧nö webö ö̧jinobe.

² Joacazma Isabenö Jo̧ öba a'otjö sulabenö ja̧bö ö̧jinobe, ja̧danö Jeroboan sulabenö ja̧bö ö̧jinadanö, Joacazbi sulabenö ja̧inobe. Jeroboanma sulabenö o̧'wo jawa otidajo̧, israel jojodö otidajawö̧nö tjösödobö weinobe, ja̧danö Joacazbi Jeroboan otidinawö̧nö kabatibökönö, bakwainö israel jojodö sulabenö ja̧tjobö weinobe.

³ Jobekwö sulabenö ja̧tjiökwe, Israel jojodönö ödameakwinobe Isabenö Jo̧ma, ja̧danö jobadönö ödameakwobetjö̧, Siria la'aka luwedö Hazael mikwo̧bi, Hazael itji̧ Ben Adad mikwo̧bi yemidanö yemidanö jobadönö tjujuluwobö weinobe.

⁴ Jobekwö nöinö balediökwe, bajaliyanö Isabenö Jo̧nö aebinobe Joacazma, lȩlöjinö edobö, ja̧danö aebiökwe, a̧ja̧kwö pjaatinobe Isabenö Jo̧ma. Jau, Isabenö Jo̧ma edö öwaisinobe israel jojodö usula tjemawi̧ma, —Siria luwedöma labinö israel jojodönö usula tjemawinö webadötö, —jö̧ba̧lö.

⁵ Jo̧kwajabetjö̧, pjabato̧nö weinobe Isabenö Jo̧ma, israel jojodö tjö̧jibinö pjaatobö, ja̧danö Siria jojodö tjujulutjö ji̧bajadö, yemidanö idöda tjejubiyanö otiwanö tjö̧jinobe israel jojodöma.

⁶ Jo̧kwaijayonö, jobekwö otiwanö israel jojodönö pjaatinajayonö, Jeroboan sulabenö otidinawö o̧'wo jawa katjatibinokobe. Ajayinö, Jeroboanma israel jojodönö sulabenö weinobe, otidinawö̧ o̧'wo jawa tjösödobö, ja̧danö jwaikwöda jobadönö ösödö tjö̧jinobe israel jojodöma. Ja̧danö, ju'wibi Asera ötjaboko jo̧'wo jawa Samarianö ju̧junö söbebö lotjinokobe, ja̧danö jemi tupakwö Asera jo̧'wo jawama ina Samaria comunidadnö jö̧jobö sulabenö wetjinobe.

⁷ Joacaz bajaliyanö Isabenö Jo̧nö aebakwa̧ abönö, isabenö ujulu jwiamachibinobe. Siria la'aka luwedö Joacazkwö ölakwabikwawö, isabenö ba̧jȩkwadö ömöayedönö kwabawö lotjinobe, wanedö yöta̧la: Jwiinö israel jojodönö ja̧tö lotjinobe, trigo sula'wodanö batjibenanö kabatö, ja̧danö Joacaz ömöayedö ba̧jȩkwadöbinadötjö, sule kabayudönö wa̧nö ölakwabikwawadö cincuentabedö tjö̧jibinobe, ja̧danö kolukiya domulataja jawa kolukiyada ji̧binobe, ja̧danö tjömasapiyanö kwebachö ölakwabikwawadötjö, sule diez milbedöda tjö̧jibinobe.

⁸ Jobekwö ja'yubenö laebobe Joacaz la'aka luwo̧ ö̧jina jawama. Ju'wibi nöinö otidö ö̧jinobe Joacazma, ja̧danö ja̧ otidö ö̧jina jawabi, ujulu i̧sȩbina jawabi, jele'yenö laebobe, Israel la'aka luwedö tjö̧jina'ye mikwa'yenö laebobe.

⁹ Ja̧danö, Joacazma ö'wö baibinobe, ja̧danö ö'wö babibajo̧nö tjo̧tjinobe, Samaria comunidadtjö. Ja̧danö, Joacaz la'aka luwo̧ ö̧jinemi, itji̧ Yoasma Israel inesö la'aka luwo̧ baibinobe.

Yoas israel la'aka luwo̧ ö̧jina jawa

¹⁰ Juda la'aka luwo̧ Joas öjayi, ida̧ökö treinta y siete o̧biya baledibanö webö ö̧jenama, Joacaz itji̧ Yoas mikwo̧ma Israel la'aka luwo̧ baibinobe, ja̧danö dieciseis o̧biya baledibanö, Samaria comunidadnö ja̧nö webö ö̧jinobe.

¹¹ Abe'do sulabenö ja̧bö ö̧jinadanö, Yoasbi Isabenö Jo̧ öba a'otjö sulabenö ja̧bö ö̧jinobe, Jeroboan o̧'wo jawa otidinawö̧nö kabatibökönö. Jeroboanma sulabenö o̧'wo jawa otidajo̧, otidajawö̧nö israel jojodö tjösödobö weinobe, ja̧danö Yoasma jwaikwöda Jeroboan otidinawö̧nö sulabenö ösödö ö̧jinobe.

¹² Jobekwö ja'yubenö laebobe Yoas la'aka luwo̧ ö̧jina jawama. Ju'wibi nöinö otidö ö̧jinobe, ja̧danö ja̧ otidö ö̧jina jawabi, ujulu i̧sȩbö, Juda la'aka luwo̧ Amasiaskwö ölakwabikwawina jawabi, jele'yenö laebobe, Israel la'aka luwedö tjö̧jina'ye mikwa'yenö laebobe.

¹³ Ja̧danö, Yoasma ö'wö baibinobe, ja̧danö webö ö̧jinemi, itji̧ Jeroboanma Yoas iteaka la'aka luwo̧ ö̧bakanö öbamatinobe. Ja̧danö, Samaria comunidadtjö, ju'wedö israel la'aka luwedönö o̧tjawemi, Yoasnö tjo̧tjinobe.

Eliseo ö'wö baibina jawa

¹⁴ Eliseoma jwiinö 'dö̧achinobe, ja̧danö ja̧ 'dö̧achi̧tjö ö'wö baibo jö̧a̧linobe. Jobekwö ö'wöchiökwe, Israel la'aka luwo̧ Yoasma jo̧banö edö i̧'yinobe, ja̧danö öba a'o ubudekwinobe, —Chabe'do Eliseowe, israel jojodötjö kolukiyanö ölakwabikwawadödanö, ja̧danö kabayudönö wanö ölakwabikwawadödanö juluwajibo̧we, —jö̧ba̧lö.

¹⁵ Öba a'o ichibiökwe, Eliseoma Yoasnö weinobe, —'Böpöbi, nayunubi emajo̧ ichejebi, —jö̧ba̧lö. Weökwe, 'böpöbi, nayunubi eminobe Yoasma.

¹⁶ Emiökwe, —'Böpö do̧bati, 'bököbobö, —jö̧ba̧lö weinobe Eliseoma, ja̧danö weökwe 'böpö do̧a̧linobe. Jemi ikenama, Eliseoma iteda ömamu la'aka luwo̧ Yoas ömamunö 'bieba̧linobe.

¹⁷ Ja̧danö tupakwö weinobe Eliseoma, —Ventanasa'do jawo̧ laebobekwöchobe ja̧'do po̧bebi, —jö̧ba̧lö, ja̧danö weökwe po̧ebinobe. Ikenama, —'Böbi, —jö̧ba̧lö weinobe, ja̧danö weökwe, nayunu 'böinobe. 'Böiökwe, —Ja̧nu 'bököbajanuma, Isabenö Jo̧ kwujuluwobö weajanu, Siria jojodönö kwujuluwakobetjö̧. Jau Yoas, Dios pjaatökwe, Afec comunidadtjö Siria jojodökwö kwölakwabikwawakwo̧ja, jobadönö kwujuluwenanö baibanö, —jö̧ba̧lö yöawinobe Eliseoma.

¹⁸ Ikenama tupakwö weinobe Eliseoma: —Nayunubiya do̧batö emi, —jö̧ba̧lö weökwe, do̧batö eminobe. Ja̧danö tupakwö weinobe israel la'aka luwo̧ Yoasnö, —Nayunubiya nijakwö 'böbi, —jö̧ba̧lö, ja̧danö weökwe wapötakwanö niji 'böinobe Yoasma, ja̧danö wapötakwanö 'böbajo̧, 'böbö kaatibinobe.

¹⁹ Jobekwö wapötakwanöda 'böbö kaatibiökwe, Dios yöawi̧ yöbawo̧ Eliseoma Yoasnö ödameakwinobe, ja̧danö jo̧banö yöa̧linobe, —Jemi tupakwö 'bököbo jö̧ka̧latö, bakwamu jawaö̧kö̧, jelemutjö bakwötanöö̧kö̧ nijakwö̧ 'bököbatjö̧ma, jwiinö Siria jojodönö kwujulo jö̧ka̧lajena, bakobe jobadönö söbebö loköbenanö baibanö. Jo̧kwaijayonö wapötakwanöda 'bököbajobetjö̧, wapötakwanöda jobadönö kwujuluwakwo̧ja, —jö̧ba̧lö yöa̧linobe Eliseoma.

²⁰ Jemi ikenama ö'wö baibinobe Eliseoma, ja̧danö ö'wö babibajo̧nö tjo̧tjinobe. Ja̧danö, jo̧banö tjo̧tjaja̧ ikena baledina jawa, baikwö laebobe. O̧ba bakwabakwena, o̧ba baibenama, Moabitas jojodötjö 'dölanö ölakabikwawadöma israel nijibe ichibiatjinobe, israel jojodö tjitea tjö̧naukwobö.

²¹ Ja̧danö, ju'winö bakwo̧ ö'wö babibajo̧nö o̧tjö tjö̧jemi ja'ötjö, ödötjö tjedinobe, Moabitas jojodötjö naukwabidö tjichobema. Jobekwö edajadö, juluwanö dötjibajotö jö̧ba̧lö, jojo iteba'o tjikwinobe, Eliseonö tjo̧tjinemi. Ja̧danö, jo̧ba iteba'o Eliseo iwe'ijukwö pöaibenama, 'yaibajinobe jojoma, ja̧danö 'yabibajo̧ ömasapiyanö öjamatinobe.

Yoas Siria jojodökwö ölakwabikwawina jawa

²² Yoas abe'do Joacaz 'yaba̧lö ö̧jayi, Siria la'aka luwo̧ Hazaelma israel jojodönö usula tjemawinö ja̧inobe.

²³ Jo̧kwaijayonö, Isabenö Jo̧ma lȩlöjinö edinobe Israel jojodönö, ja̧danö lȩlöjinö edö, otiwanö pjaatinobe. Ajayinö Abrahamnöbi, Isaacnöbi, Jacobnöbi yöbawö ujunina wene omukwatö, öba a'otjö israel jojodö sulabenö ja̧bö tjö̧jijayonö, jobadönö bakobe söbebö loobö öpöjödinobe Isabenö Jo̧ma, ja̧danö babe mölebi baibanö, ina öba a'otjö a'dewö lobö̧kö̧ israel jojodönö.

²⁴ Siria la'aka luwo̧ Hazael ö'wö baibaja̧ ikenama, webö ö̧jinemi itji̧ Ben Adadma Siria la'aka luwo̧ baibinobe.

²⁵ Jemi ikenama, Joacaz itji̧ Yoasma Siria la'aka luwo̧ Ben Adadkwö ölakwabikwawö ujuluwinobe. Ajayinö Ben Adad abe'do Hazael Yoas abedo Joacazkwö ölakwabikwawinenama, jo̧batjö 'döebinobe israel niji comunidadbiyama, ja̧danö ja̧ 'döebinemi comunidadbiyama yemidanö 'döebinobe Yoasma, yemidanö israel niji comunidadbiya baibanö. Wapötakwanö Ben Adadkwö ölakwabikwawö ujuluwinobe Yoasma, ja̧danö jobekwö itebo comunidadbiya tjebatö, yemidanö israel niji comunidad baibanö eminobe.