2 Reyes 12 - Dios Iwene

Joas Juda niji la'aka luwo̧ ö̧jina jawa

¹ Jehu israel la'aka luwo̧ ö̧jayi, ida̧ökö jelemutjö dötölataja o̧biya baledibanö webö ö̧jenama, Joas mikwo̧ma Juda la'aka luwo̧ baibinobe, ja̧danö cuarenta o̧biya baledibanö Jerusalentjö webö ö̧jinobe. Joas ojo'doma, Beerseba comunidad jojosuju Sibia mikwuju.

² Ja̧danö, Diostjö jojodötjö ö'weje pjabato̧ Joyadama otiwanö Joasnö ba̧ja̧dö pjaatinobe, ja̧danö Joasnö ba̧ja̧dö pjaatemi baledibanö, otiwanö Dios ösödidanö ja̧bö ö̧jinobe Joasma.

³ Jo̧kwaijayonö, ju'wi Dios ösödi̧ jawa otiwanö ja̧bö ö̧jinajayonö, möemitenia ösödakwawemibiya söbebö loinokobe, ja̧danö Jerusalentjöda kwabö juwö Diosnö tjiyo jö̧tja̧lijayonö, ina möemiteniatjö kwabö juwö tjiyinobe, ja̧danö jobetjö omewi̧ jawa tjujuwinobe Juda jojodöma.

Dios eju 'yayi baibanö tjotidina

^4-5 Dios eju suli̧ jwöachi̧ tjotidobö ji̧nobe, jo̧kwajabetjö̧ Joasma Diostjö jojodötjö ö'weje pjabatadönö weinobe: —Isabenö Dios eju suli̧ waekwi̧tenia dotidobö jo̧be, jo̧kwajabetjö̧ baikwö ja̧köbaduwo: Jojodö Dios itea balada baibanö tjiyi̧ balada, bakwo̧nökwena tjiyobö Dios weinabi, idöda tjomajadenö tjiyobö ösödö tjiyi̧ baladabi tjiyenama, ökwödö ö'weje pjabatadöma ja̧ balada emö, Dios eju otiwachibanö kwotidaduwo. Jau, ökwödö bakwo̧nökwena jojodö tjiyi̧ kwemaduwenama, jwii̧ jawa kwemaduwo, ja̧danö emajadö ökwödöda kwotidaduwo, Dios eju suli̧ jwöachöteniama 'yayi baibanö kwotidaduwobö. Ökwödöda edö, –Bi̧ya suli̧ waekwajabe, –kwedaduwenama, jobekwö otiwachibanö kwotidaduwo, —jö̧ba̧lö weinobe Joasma.

⁶ Jo̧kwaijayonö, jobekwö weijayonö, lekwe möle jobekwö tjotidinokobe. Ida̧ökö veintitres o̧biya baledibanö Joas webö ö̧jenama, ö'weje pjabatadöma ina Dios eju otiwachibanö tjotidinokobe.

⁷ Jo̧kwaiökwe, la'aka luwo̧ Joasma ö'weje pjabato̧ Joyadanöbi, ju'wedö ö'weje pjabatadönöbi jwöinobe, ö̧jobekwö tjichobö, ja̧danö tjichibiökwe abebö a̧ja̧kwinobe: —Tajawedö ina Dios eju otiwachibanö kwotidaduwokobeda? Bemi tupakwö ja̧köbaduwakwa̧ baikwö wetaduwakwö, jojodö balada tjiyenama, ja̧ balada kwemaduwoko ökwödöma, ja̧ baladama wainö ji̧ jö̧ba̧lö, 'da̧batö kwujunaduwo, Dios eju otiwachibanö otikwa balada baibanö, ju'wedöda ja̧ baladanö tjotidakobetjö̧, —jö̧ba̧lö.

⁸ Jobekwö yöa̧liawö̧, a̧ja̧kwö tjösödinobe ö'weje pjabatadöma, ja̧danö yöba̧lakwawö omudawö tjujuninobe, —Ökwödödama o̧do dotidökakwedösa, ja̧danö jojodö balada tjiyenama, demökakwedösa, Dios eju otikwa balada baibanö 'da̧batö dujunakwedösa, —jö̧ba̧lö.

⁹ Ja̧danö, Joyadama isapjo emö, muchekwapinö isaju 'da̧ebinobe, ja̧danö otidajo̧, Diosnö iyawöte ö'öbönö ujuninobe, Isabenö Jo̧ eju teachakwawemi öwaisobekwöchobema. Ja̧danö, jemi tupakwö, jojodö balada tjiyenama, Isabenö Jo̧ eju teachakwawemi teada̧ladö ö'weje pjabatadöma, ja̧pjo okwa tjaninobe.

¹⁰ Ja̧danö, ida̧ökö nöinö balada a̧jobe, jö̧ba̧lö tjedenama, inesö la'aka luwo̧ ömöayo̧ secretario jawa otido̧bi, ö'weje pjabatadötjö la'aka luwo̧bi ichö, isapjonö a̧ji̧ balada tjö̧ba̧ja̧dinobe, ja̧danö ba̧jadajadö, tuda'wijunö tjaninobe.

^11-12 Ikenama, ja̧ balada ba̧ja̧dajadö, tjotidakwedönö tjiyinobe, Isabenö Jo̧ eju jawa otikwa jawa luwedönö. Ja̧danö, tjiyajawö, towi ötebiyatjö otidadönöbi, ju'witjö otidadönöbi, inawiya löwö otidadönöbi, inawiyatjö otidadönöbi tjimidinobe, Isabenö Jo̧ eju otiwachibanö tjotidakobetjö̧. Ja̧danö ju'wibi ja̧ baladanö towi o'iyabi, lötjina inawiyabi midö tjeminobe, ja̧danö okobe jwiinö ju'wi o̧do tjotidobö 'dö̧tjȩkwi̧ma, ja̧ baladatjö tjimidinobe.

¹³ Jo̧kwaijayonö, ja̧ baladatjö Isabenö Jo̧ eju dȩja̧piyabi, dȩju̧wa'yu tiekwa jawabi, ju'wi dȩja̧piyabi, trompeta jawabi tjotidinokobe. Ja̧ jojodö Isabenö Jo̧ itea balada baibanö tjiyaja̧ baladatjö, oro otikwa jawabi, plata otikwa jawabi tjotidinokobe,

¹⁴ sule Isabenö Jo̧ eju 'yayi baibanö otikwa jawa balada baibanö, otikwa jojodönö tjimidinobe.

¹⁵ Ja̧danö, ja̧ jawa otikwa luwedöma, otiwanö naukwökönö tjotidinobe. Jweinö tjotido jö̧tja̧li̧danö tjotidinobe ja̧ jawa otidadöma, jo̧kwajabetjö̧ jobadönö wetjinokobe, —Kwotidinaduwa wȩyukwöja kwi̧wȩyudaduwo, —jö̧ba̧lö, —Isabenö tjotido jö̧tja̧li̧danö otidadö, —jö̧ba̧lö tjöwaisobetjö̧. Jo̧kwajabetjö̧, balada iyöda tjiyinobe otikwa luwedönö, ja̧danö jobadöma otiwanö jweinö tjimidinobe tjotidakwedönö.

¹⁶ Jo̧kwaijayonö, ju'wi Isabenö Jo̧ ejutjö jojodö ichejebö tjiyi̧ balada, wene tjujuna̧lobetjö̧ balada tjiyi̧bi, tjusula söbebö loawa jawa balada tjiyi̧bi, Isabenö Jo̧ eju otikwa balada baibanöma 'da̧batö tjujuninokobe. Ja̧ baladama, ö'weje pjabatadö tjitea balada ji̧nobe, jo̧kwajabetjö̧ tjotidaja̧ mikwa baibanö, ja̧ balada emiatjinobe ö'weje pjabatadöma.

Joas Siria luwo̧ Hazaelnö imidina wene

¹⁷ Ja̧danö, ja̧ möle jenanö, baikwö baledinobe Siria la'aka luwo̧ Hazaelma iteda ömöayedö ölakwabikwawa jojodönö öbibö, filisteo tjitebo comunidad Gatbe ölakwabikwawö i̧'yinobe, ja̧danö ölakwabikwawajo̧, Gat comunidad ujuluwinobe. Jemi ikenama, Jerusalen comunidadbe i̧'yobö omukwatö ujuninobe Hazaelma, ja̧danö jobe mebibö ölakwabikwawakwa̧ jawa otidinobe.

¹⁸ Jobekwö itebo Jerusalen comunidad meibobö omukwatiökwe, Juda la'aka luwo̧ Joasma yeabinobe, —Ichitjö̧ma chitebo Jerusalen comunidad ujuluwena, —jö̧ba̧lö. Jo̧kwajabetjö̧, ajayinö jinadö Juda la'aka luwedö Josafatbi, Yorambi, Ocoziasbi, Isabenö Jo̧ itea baibanö 'da̧batö tjujunina jawabi, iteda Isabenö Jo̧ itea baibanö 'da̧batö ujunina jawabi, ju'wi Isabenö Jo̧ eju mikwawi̧ jawa lödawȩko̧nö öbadekwajina oro jawabi o̧ko̧kodinobe, ja̧danö ko̧ko̧dajo̧ Siria la'aka luwo̧ Hazaelnö webö iyinobe, —Bi̧ya mikwawi̧ jawa chiyakwö, chitebo comunidadbe ichö mekibapji, —jö̧ba̧lö. Ja̧danö, iyajökwe, Jerusalen comunidad mebibökönö, itebobe ȩwa̧jinobe.

Joas ö'wö baibina jawa

¹⁹ Jobekwö ja'yubenö laebobe Joas ötidö ö̧jina wenema. Ju'wibi nöinö ja̧bö ö̧jinobe Joasma, ja̧danö okobe jwiinö ja̧ Joas ja̧bö ö̧jina jawama, Juda jojodö la'aka tjuluwedö tjö̧jina wȩyukwa'ye mikwa'yenö laebobe.

²⁰ Ja̧danö, Joas ömöayedötjö ju'wedö omukwatö tjujuninobe, jo̧banö kwabö lotjoböma, ja̧danö ju'wi möle Sila comunidadbe 'ya̧kwawama mana ö'öböseju Milo mikwejunö ö̧jenama, Joasnö kwabö lotjinobe.

²¹ Jobadö Joasnö kwabö lobinadöma, yöne ömöayedö Simeat itji̧ Josacar mikwo̧bi, Somer itji̧ Jozabad mikwo̧bi. Ja̧danö ö'wö babibajo̧nö tjo̧tjinobe a'dödökwö, a'dö David itebo comunidad ötjabena. Ja̧danö, Joas la'aka luwo̧ öjinemi, itji̧ Amasiasma la'aka luwo̧ baibinobe.