2 Reyes 11 - Dios Iwene

Atalia mikwuju Juda nijitjö webö jö̧jina wene

¹ Jehu ajayinö Israel la'aka luwo̧ Joramnö kwabö loenama, Juda la'aka luwo̧ Ocoziasnöbi kwabö loinobe. Ja̧danö, Ocozias ojo'do Atalia jitji̧ ö'wö baibaja̧ jöwaisachibenama, isuda la'aka luwuju jö̧jobö jomukwatinobe. Jo̧kwajabetjö̧, okobe deinö jitji̧mine itji̧munö kwabö lojobö jisakwinobe, isudada la'aka luwuju jö̧jakobetjö̧.

² Jo̧kwaijayonö, ju'wedö Ocozias itji̧munö kwabö lojonö, Ocozias öpöo, la'aka luwo̧ Yorammine itjiju Josaba mikwujuma, Ocozias itji̧ bajaliya jojo Joas mikwo̧nö ö̧jibinö pjajatinobe. Atalia ju'wedönö kwabawö lojonö, Josabama Joasnöbi, Joasnö teada̧lujunöbi jotojinobe, jelȩko̧ abȩko̧ okwa. Jobekwö ju'wedö Joas öpöedönö Atalia kwabawö lojonö, Joasnö ö̧jibinö tjotojinobe, ja̧danö ö̧jibinobe.

³ Ja̧danö, ja̧ möle tupakwö, jelemutjö bakwöta o̧biya baledibanö Atalia webö jö̧jonö, Isabenö Jo̧ eju okwa ju̧kwawö ö̧jinobe Joasma öja'u Josabakwö.

Joas Juda la'aka luwo̧ baibina jawa

⁴ Ja̧danö, Atalia ida̧ökö jelemutjö bakwöta o̧biya baledibanö webö jö̧jaja̧ ikena, jelemutjö döbalataja o̧ba baibenama, Diostjö jojodötjö ö'weje pjabato̧ Joiadama jwöinobe, inesö la'aka luwo̧nö teada̧lakwawa jojodö catiteos ötjabawö tjuluwedönöbi, ju'wedö inesö la'aka luwo̧ eju teada̧lakwawa jojodö tjuluwedönöbi, Dios ejube tjichobö. Ja̧danö, ichajadöma bakobe Joyadakwö otiwanö ja̧tjakwa̧ jawa omukwatö tjujuninbe, ja̧danö omukwatö junajadö jobe Isabenö Jo̧ Dios ejutjö yöbawö tjujunobö weinobe, —Isabenö omukwatö dujunaja̧danö otiwanö ja̧dakwedösa, —jö̧ba̧lö. Jemi ikenama, Ocozias itji̧ Joasnö i̧sebinobe jobadönö, —Inesö la'aka luwo̧ itji̧ma ina 'yaba̧lo̧, —jö̧ba̧lö.

⁵ Ja̧danö, i̧sebajo̧, jobadönö weinobe: Bitenö kwiteada̧laduwakwa̧ma, baikwö yötawaduwakwö: Ökwödö teada̧lakwawa jojodöma, wapösokwabedö, jö̧tö? Jo̧kwajabetjö̧, otikwökö möle, balekwaso kwiteada̧laduwobö badekwachenama, ökwödö ja̧so jojodöma wapösokwa bakibaduwanö teada̧lö kwö̧jaduwo. Ökwödö wapösokwa jojodötjö bakwaso inesö la'aka luwo̧ eju kwiteada̧laduwonö,

⁶ bakwaso apjude Sur mikwade kwiteada̧laduwo, ja̧danö bakwaso la'aka luwo̧ eju comunidad kwiteada̧laduwo. Ökwödö otikwökö möle jamatö kwiteada̧laduwakwedöma, jobekwö kwiteada̧laduwo.

⁷ Ja̧danö, ju'wedö dosolataja teada̧lakwawa jojodö, ja̧ möle tjiteada̧loko jö̧ba̧ladöma, baikwö Isabenö Jo̧ eju tjöbeba̧lö kwichaduwo, bite la'aka luwo̧ Joasnö tjökeba̧laduwo.

⁸ Jo̧banö tjösawö ja̧nö, okobe jwiinö kweachi̧tenia ökwödöbi teadö tjöbeba̧lö kwi̧'yaduwo. Kwiteaduwi ölakwabikwawa jawa do̧ba̧lö, tjöbeba̧lö kwö̧jaduwo, ja̧danö jelo̧ kwö̧jaduwobekwö ichibitjö̧ma, jo̧ba ichibo̧nö kwabö loköbaduwo, la'aka luwo̧ Joasnö sulabenö ja̧apji jö̧ba̧lö, —weinobe Joyadama, la'aka luwo̧nö teada̧lakwawa luwedönö.

⁹ Ja̧danö, Joyada weaja̧danö ja̧tjinobe teada̧lakwawa luwedöma. Otikwökö möle tjötjeba̧lo jö̧ba̧ladöbi, ja̧ möle tjötjeba̧loko jö̧ba̧ladöbi tjömöayedönö öbibö ö'weje pjabato̧ Joyada ö̧jobekwö tjichibinobe.

¹⁰ Jobe Isabenö Jo̧ ejunö, la'aka luwo̧ Davidmine iteaina ölakwabikwawa jawa otokwötebiyabi, tjöekwapibiyabi ujuna̧linobe Joyadama, ja̧danö teada̧lakwawa jojodö tjichibiökwe, ja̧ David iteaina jobadönö iyinobe, otiwanö Joasnö tjöbeba̧lö tjö̧jakobetjö̧.

¹¹ Ja̧danö, iyajawö̧, otiwanö tjötjeba̧linobe, a̧li̧kwöbi u'dakwöbi baibanö isa'banö ja̧nö, Dios ejubi, Diosnö iyawötebi tjösawö ja̧nö tötjeba̧linobe, otiwanö la'aka luwo̧ Joasnö tjiteada̧lakobetjö̧.

¹² Jemi ikenama, Joasnö laebinobe Joyadama, ja̧danö uunö ubutjatinobe inesö la'aka luwo̧ ubutjawakama, ja̧danö Dios wei̧ wȩyukwa'ye jo̧banö iyinobe. Jemi ikenama Joas uunö o̧te toebinobe, ja̧danö jo̧banö yötjawinobe, —Isabenö bite Joasda inesö la'aka duluwo̧ baibajabe, —jö̧ba̧lö. Ja̧danö, 'bȩbö ösödö, labinö jwötjeba̧linobe, —Inesö la'aka duluwo̧ Joas lekwe webö ö̧jobö dösöda, —jö̧ba̧lö.

¹³ Teada̧lakwawa jojodöbi, ju'wedöbi labinö ökwöinö tjö̧jioko, Ataliama Isabenö Jo̧ eju jo̧bekwö edö ji̧'yinobe, tajawedö labinö ökwöojobö jö̧ba̧lö jedakobetjö̧.

¹⁴ Ja̧danö, ichibö jedenama, la'aka luwo̧ Dios eju okwi'o ö'öbö ö̧jobekwö jedinobe, Juda nijitjö inesö la'aka luwedö batjibena jamatajitjadanö, ja̧danö teada̧lakwawa luwedöbi, trompeta pjubadöbi la'aka luwo̧ ö'öbö tjö̧jobe jedinobe, ja̧danö okobe deinö jobe ju̧kwadö Juda jojodö tjo̧'wo ösöwachibanö tjösödobebi, trompeta pjutobebi ja̧ja̧kwinobe. Jobekwö edaju, —Ötjönö kabatibö iyö lobadötö, —jö̧ba̧lö jwöbeba̧lö, jö̧ka̧miji̧do̧ kȩ'ekwö lojinobe Ataliama.

¹⁵ Jemi ikenama, ö'weje pjabato̧ Joiadama ölakwabikwawa jojodö tjuluwedönö weinobe, —Atalianö do̧batö, Dios eju a̧petukwö labebö kwabö lobaduwijö. Isabenö Jo̧ eju a'otjö kwabö loköbaduwoko, döjibapji jö̧ba̧lö tjöeba̧linö, jelobekwö öbibö jobujunö kwabö loköbaduwo, ja̧danö okobe deinö jobujunö pjatjato jö̧ba̧ladönöbi kwabö loköbaduwo, —jö̧ba̧lö weinobe.

¹⁶ Weawö̧, Atalianö do̧tjatinobe, ja̧danö öbibö tje'ewinobe inesö la'aka luwo̧ ejube. Ja̧danö, kabayudö inesö la'aka luwo̧ eju a̧petu tjeachakwawelö, Atalianö kwabö lotjinobe.

¹⁷ Ja̧danö, jemi ikenama Joyadama Isabenö Jo̧kwöbi, la'aka luwo̧ Joaskwöbi, jojodökwöbi bakobe yöbawö tjujunobö pjaatinobe, Isabenö Jo̧ ömöledö isabenö tjö̧jakwedö, jö̧ba̧lö. Ja̧danö, la'aka luwo̧ Joaskwöbi, Juda jojodökwöbi bakobe yöbawö tjujunobö pjaatinobe.

¹⁸ Jemi ikenama, jobekwö yöbawö junajadö, okobe deinö jobe ju̧kwadö Juda jojodöma Baalnö ösödakwawejube 'ya̧nö, pjolö lotjinobe. Ja̧danö, Baalnö ösödakwawötebi, o̧'wo jawabi 'dabebö lotjinobe, ja̧danö Baaltjö jojodötjö ö'weje pjabato̧ Matan mikwo̧nö, ösödakwawöte a'otjö kwabö lotjinobe. Ja̧danö, ju'wibi tjöbeba̧lö eda̧ladönö ujuninobe Joyadama, Isabenö Jo̧ eju otiwanö tjötjeba̧lobö.

¹⁹ Ikenama, ölakwabikwawadö tjuluwedönöbi, cariteo ötjabawö̧nöbi, teada̧lakwawa jojodönöbi, ju'wedö Juda niji jojodönöbi öibinobe Joyadama, ja̧danö inesö la'aka luwo̧ Joasnö tji'yȩjebinobe Isabenö Jo̧ ejutjö, iteda eju inesö la'aka luwo̧ ejube ichibanö. Joasnö öbibö, teada̧ladö tetjachade apjudebenö tetjatinobe Joasnö, ja̧danö inesö la'aka luwo̧ iteakanö öbamatinobe.

²⁰ Jobekwö balediawö̧, okobe deinö Juda niji jojodöma tjo̧'wo ösöwachibanö tjösödinobe. Ja̧danö, jobadönö sulabenö webö ji̧nuju Atalia ida̧ö̧kö inesö la'aka luwo̧ ejutjö kwabö lotjinobetjö̧, Jerusalen jojodöma wene jwiinö wiinö tjö̧jinobe.

²¹ Jobekwö inesö la'aka luwo̧ babibö, jamatö webö ö̧jenama, la'aka luwo̧ Joasma jelemutjö dötölataja o̧biya ujuna̧linobe.