2 Reyes 10 - Dios Iwene

Ju'wedö Acab itji̧munö kwabö lotjina jawa

¹ Israel la'aka luwo̧bina Acab itji̧mu tupadanö jojodötjö, setentabedö Samaria comunidadnö tjö̧jinobe. Jo̧kwajabetjö̧ Jehuma kwiyalu öjiya wȩyudö weinobe, Samaria comunidad la'aka luwedönöbi, ju'wedö luwedönöbi, Acab itji̧mu tupadanö jojodönö teada̧lakwawa luwedönöbi, baikwö:

² —Ökwödö kwuluwo̧mine itji̧muma, ökwödökwö tju̧ju̧kwobe, ja̧danö jobe Samaria comunidadtjö, kolukiyabi, kabayudönöbi, tjöekwemibi, ölakwabikwawa jawabi juna̧ladöja. Jo̧kwajabetjö̧, böja kwiyalusöja kwedaduwenama,

³ kwuluwo̧mine itji̧mu tupadanö jojodötjö bakwo̧nö omudawö kwujunaduwo, ju'wedötjö bajalekwönönö webö ö̧jobö waiso̧nö. Ja̧danö, jo̧banö omudawö junajadö, abe'do ö̧jinemi inesö la'aka luwo̧ iteakanö ö̧bobö kwujunaduwo. Ikenama, ötjökwö ölakwabikwawö kwö̧jaduwo, kwuluwo̧ Acab ömöledönö chujuluwapji jö̧ba̧lö, —wȩyudö weinobe Jehuma.

⁴ Iwȩyudiawö̧, jwiinö yetjaibinobe Samaria jojodöma, ja̧danö yötja̧lakwawinobe, —Ayö, du̧ju̧taja la'aka luwedö Jorambi, Ocoziasbi ite Jehu öba a'o tjö̧jobö jwibinadö, jo̧ba öba a'o ö'wö batjibinobe. Jobekwö baledinobema, ökwödöma dakwö öba a'o ja̧nö dölakwabikwawobö, waekwena, —jö̧ba̧lö.

⁵ Yöba̧lakwawajadö, la'aka luwo̧ eju teada̧lakwawa luwo̧bi, comunidad la'aka luwo̧bi, ju'wedö comunidad luwedöbi, Acab itji̧munö teada̧lakwawa luwedöbi yötja̧li̧ wȩyudö wetjinobe Jehunö: —Ökwödöma ökwöda kwömöayedösa. Bakwo̧nöbi la'aka luwo̧ baibanö dujunökakwedösa. Ökwöda kwösödi̧danö ja̧köbo Jehu, ja̧danö okobe jwiinö ökwödönö weköbi̧ma, otiwanö da̧ja̧kwakwedösa, —jö̧ba̧lö.

⁶ Yötja̧lökwe, yemidanö kwiyalusöja wȩyudö weinobe jobadönö, baikwö: —Isabenö bakobe ötjökwö ja̧dö, chömöayedö kwö̧jaduwitjö̧ma, ja̧danö weti̧ kwa̧ja̧kwaduwobö kwomukwataduwitjö̧ma, baikwö wetaduwakwö: —Kwuluwo̧duwi Acabmine itji̧mu tupadanö jojodö tjuubiya ko̧ko̧dö kwichejebaduwo, ja̧danö itekwai, babedajayena Jezreel comunidadbe chö̧jobekwö kwichaduwo, —jö̧ba̧lö wȩyudö weinobe. Ja̧ möle la'aka luwo̧ Acabmine itji̧mu tupadanö jojodö setentabedöma, Samaria comunidad la'aka luwedökwö tjö̧jinobe, ja̧danö jobadö Samaria luwedöma jobadönö da̧pedö tjö̧jinobe.

⁷ Ja̧danö, Jehu iwȩyudaja̧ tjedenama, juluwanö okobe deinö tjuluwo̧mine itji̧mu ömadönö do̧batö, tjuubiya tjubulatinobe, ja̧danö tjuubiya wi̧lȩyubiyanö anö, Jezreel comunidadbe wetjinobe, Jehunö.

⁸ Wetjiökwe, bakwo̧ ichibö yöawinobe Jehunö, La'aka luwo̧ Acab itji̧mu ömadö tjuubiya tjichejebajabe, —jö̧ba̧lö. Yöawökwe, —Comunidad apjude a'o mö japopo dopolatajanö kwödaduwo tjuubiyama, yȩayi dewachenanö baibanö jobe kwödaduwo, —jö̧ba̧lö weinobe.

⁹ Ja̧danö, ikena möle dewachenama, labebö jojodö tjöba a'o jamatö yöa̧linobe jojodönö: —Chömöledö, ökwödöma kwuluwo̧mine Joram wei̧ kabatibinöködöja, ötjödasa chuluwo̧nö katatibobö omukwatinasa, ja̧danö omukwatajo̧ jo̧banö kwabö lobinasa̧. Jo̧kwajabetjö̧ Joramnö kwabö loawama, ökwödö jawamaökö, ja̧tjö wene jwibadöja. Jo̧kwaijayonö, ötjöma bidö ju'wedö Acab itji̧munö kwabö lobinö̧kö̧sa, tida bidönö kwabö lobinama?

¹⁰ Isabenö baikwö yötawaduwakwö, bi̧ya baledaja̧ edö, kwöwaisaduwobö jo̧be, okobe jwiinö Isabenö Jo̧ yöawina, Acab ömöledönö baledakwa̧ jawa Isabenö Jo̧ yöawinama, isabenö okobe jwiinö badekwachakobe. Jau, yöawina jawa, iteda ömöayo̧ Eliasnötjö yöawina jawatjö, bakwöta jawabi waekwökönö, okobe jwiinö badekwachakobe, —jö̧ba̧lö yöa̧linobe Jehuma.

¹¹ Ja̧danö, jobekwö yöba̧lajo̧, okobe deinö ju'wedö Acab ömöledötjö ina Jezreel comunidadnö ju̧kwadönö kwabawö loinobe Jehuma. Ja̧danö ömöayedö juluwadönöbi, yöne ömöledönöbi, ömöayedö ö'weje pjabatadönöbi kwabawö loinobe, Acab ömöledöbinadötjö bakwo̧bi deenanö baibanö.

¹² Ikenama, Jezreel comunidadtjö labebö, Samaria comunidadbe i̧'yinobe Jehuma. Ja̧danö, i̧'yemi ja'ötjö, obejadönö teada̧ladö tjitebo Bet Eked ötjabobe ichibenama,

¹³ Juda la'aka luwo̧ Ocozias ömöledötjö ju'wedönö öbadekwajinobe. Jobadönö badekwajo̧, abebö a̧ja̧kwinobe: —Ökwödöma didököbaduwa? —jö̧ba̧lö. Abebö a̧ja̧kwawö̧, —Ökwödöma la'aka luwo̧ Ocozias ömöledösa, ja̧danö ökwödöma la'aka luwuju Jezabel jitji̧munöbi, ju'wedö israel la'aka luwo̧ ömöledönöbi edö dichajabe, —jö̧ba̧lö tjatadinobe.

¹⁴ Tjatadiökwe, ömöayedönö weinobe Jehuma, —Do̧bataduwidönö, ja̧danö ina 'yaba̧ladönö ichejebaduwi, —jö̧ba̧lö. Weawö̧, okobe deinö jobadönö do̧tjatinobe, ja̧danö 'yaba̧ladönö ötjibinobe Bet Eked lajube. Ja̧danö, jobe Bet Eked lajutjö okobe deinö jobadö Ocozias ömöledönö kwabawö loinobe, cuarenta y dosbedönö, bakwo̧bi ö̧jibökönö okobe deinö jobadönö kwabawö loinobe.

¹⁵ Ja̧danö, jobetjö labebajo̧, tupakwö i̧'yenama, jo̧banö öbadekwajobö icho̧nö öbadekwajinobe Recab jojodötjö luwo̧ Jonadab mikwo̧nö. Jo̧banö badekwajo̧, abebö a̧ja̧kwinobe Jehuma: —Ökwönö ösödö chö̧ji̧danö, bakwainö ötjönö ösödo̧ chömöledöso̧ kwö̧jiji̧? —jö̧ba̧lö. Abebö a̧ja̧kwökwe, —Jau, ökwönö ösödö, kwömöledöso̧sa, —jö̧ba̧lö atadinobe Jonadabma. Yöa̧lökwe, —Isabenö chömöledöso̧köbitjö̧ma, kwömamu debati, —jö̧ba̧lö weinobe Jehuma. Weökwe, ömamu deatinobe, ja̧danö ömamu do̧batö, iteaka kolukanö aninobe Jehuma.

¹⁶ Ja̧danö, tebatajo̧, Jonadabnö yöa̧linobe: —Ötjökwö kwicho, ja̧danö kwedakwo̧ja, Isabenö Jo̧ wei̧ cha̧ja̧kwobö isabenö ösödo̧sa, —jö̧ba̧lö. Ja̧danö, Jonadabma bakobe Jehukwö kolukanö i̧'yinobe Samaria comunidadbe.

¹⁷ Ja̧danö, Samaria comunidadbe ichibenama, okobe deinö Acab ömöledötjö ina Samarianö ju̧kwadönö kwabawö loinobe, okobe deinö jobadönö söbebö loenanö kabatö. Ja̧ baledi̧ma, Isabenö Jo̧ Eliasnö yöawinadanö badekwachinö baledinobe.

Baalnö ösödadönö Jehu kwabö loina wene

¹⁸ Jemi ikenama, israel jojodönö ko̧ko̧dö, jobadönö yöawinobe: —La'aka luwo̧ Acabminema, ja'yubeda Baalnö ösödina, jo̧kwaijayonö ötjö Jehuma, isabenö nöinö otiwanö Baalnö ösödö, wei̧ otiwanö cha̧ja̧kwakwo̧sa.

¹⁹ Jo̧kwajabetjö̧, okobe deinö Baal yöawi̧ yöbawadönöbi, okobe deinö Baalnö ösödadönöbi, okobe deinö Baaltjö jojodötjö ö'weje pjabatadönöbi jwököbaduwo, bakwo̧bi deinö okobe deinö tjichobö jo̧be, inesö otiwi̧ iyawa Baalnö chiyakobetjö̧. Isabenö okobe deinö tjichobö jo̧be, ja̧danö Baalnö ösödadötjö bakwo̧ ichobö öpöjöditjö̧ma, ö'wö baibobö ja̧kobe, —jö̧ba̧lö yöbawö weinobe Jehuma. Jo̧kwaijayonö, jobekwö yöa̧li̧ma, isabenö wene yöa̧linokobe, 'daliwadanö omöna yöawinobe, okobe deinö Baalnö ösödadönö söbebö loakobetjö̧.

²⁰ Ja̧danö, tupakwö weinobe Jehuma, —Inesö Baalnö dösödakwa̧ möle omudawö kwujunaduwo, okobe deinö ichibö ja̧ möle otiwanö Baalnö dösödakobetjö̧, —jö̧ba̧lö. Ja̧danö, weaja̧danö ösödakwawa möle yötjawinobe.

²¹ Ja̧danö, Israel niji ba̧kwemeachibanö yöbawadönö weinobe, okobe deinö Baalnö ösödadö ichö tjo̧ko̧kokwobö, ja̧danö okobe deinö Baalnö ösödadö, bakwo̧bi deinö Samaria comunidadbe tjichibinobe. Ja̧danö, ichibajadö, Baalnö ösödakwaweju okwa tetjachinobe, Baalnö ösödakwaweju jwiinö su̧'bȩ baibenanö kabatö.

²² Ja̧danö, Baalnö ösödakwawa 'dutjawi̧ jawa teada̧lo̧nö weinobe, —'Dutawi̧ jawa ichejebi, okobe deinö Baalnö ösödadö otiwanö 'dutjawakobetjö̧, —jö̧ba̧lö. Ja̧danö weökwe, ichejebinobe, 'dutjawobö.

²³ Jemi ikenama, Recab jojo Jonadabkwö, Baalnö ösödakwaweju okwa teachinobe Jehuma, ja̧danö Baalnö ösödadönö weinobe, —Otiwanö kwö̧'da̧deduwi isakwö kwedaduwo, Isabenö Jo̧ ömöayedötjö bakwo̧bi kwö̧'da̧deduwi ö̧japji jö̧ba̧lö. Bai Baalnö ösödakwaweju okwa, bakwainö Baalnö ösödadöda tju̧ju̧kwobö jo̧be, —jö̧ba̧lö.

²⁴ Jemi ikenama o̧do okwa tetjachinobe, jwiinö ubinö iyawabi, ju'wi iyawabi Baalnö juwö tjiyobö. Jobe teachakwa̧ abönö, Jehuma ochentabedö ölakwabikwawadö tjöbeba̧ladönö ujuninobe a̧petukwöchobema, ja̧danö jobadönö weinobe, —Teada̧lönö kwö̧jaduwo, idö Baalnö ösödadötjö bakwo̧bi döibapji jö̧ba̧lö. Ökwödönö iyö wetajabe, okobe deinö jobadönö kwabö loköbaduwobö, jo̧kwajabetjö̧ bakwo̧ iteada̧lo̧nö, ö̧jelö bakwo̧ döbibajö ö̧jibitjö̧ma, jo̧ba teada̧lo̧da ö'wö baibobö ja̧kobe, —jö̧ba̧lö.

²⁵ Jemi ikenama, jwiinö ubinö iyawa juwajo̧, laebenama, Jehuma ölakwabikwawa luwedönöbi, ju'wedö tjöbeba̧ladönöbi weinobe, —Tebachö okobe deinö jobadönö kwabawö lobaduwidönö. Bakwo̧bi ö̧jiboböma webökönaduwi, —jö̧ba̧lö. Ja̧danö weawö̧, Baalnö ösödakwaweju okwa tebachö, okobe deinö jobadönö dȩdȩbö lotjinobe. Jemi ikenama, dȩdȩbö lobajadö, tjiteba'iju a̧petukwöchobe ikwö lotjinobe. Jemi ikenama, okwasȩko̧ okwa tetjachinobe.

²⁶ Tebachajadö, jȩko okwa jo̧, Baal o̧'wo jawa 'döbebö, latjebinobe, ja̧danö labebajadö, ökwölanö juwö lotjinobe.

²⁷ Jobekwö Baal o̧'wo jawa söbebö lotjinobe, ja̧danö Baalnö ösödakwaweju söbebö lotjinobe. Ja̧danö, Baalnö ösödakwawinejuma, yo'otjeju baibanö balewö lotjinobe, ja̧danö babe mölebi baibanö, yo'otjejuda jo̧be, ja̧ Baalnö ösödakwawinejuma.

Jehu israel jojodötjö inesö la'aka luwo̧ ö̧jina jawa

²⁸ Jobekwö laebobe Jehu Baalnö ösödakwawa söbebö loinama, ja̧danö jemi tupakwö Israel nijitjö Baalnö tjösödinokobe.

²⁹ Jo̧kwaijayonö, otiwanö Baalnö ösödakwawa söbebö loinajayonö, ayayi israel la'aka luwo̧bina Jeroboan sulabenö ja̧ina jawa kaatibinokobe. Jeroboanma du̧ju̧taja pakaya itji̧mu tjo̧'wo jawa orotjö otidinobe, ja̧danö otidajo̧, Betel comunidadnöbi, Dan comunidadnöbi ujuninobe, ja̧danö israel jojodönö weinobe, jobadönö tjösödobö. Ja̧danö, ina jobadönö sulabenö ösödinobe Jehuma, ja̧danö israel jojodö jobadönö tjösödobö weinobe.

³⁰ Isabenö Jo̧ weina a̧ja̧kwö, okobe deinö Acabmine ömöledönö söbebö loinobe, ja̧danö ja̧ weina a̧ja̧kwiökwe, Jehunö yöawinobe Isabenö Jo̧ma: —Wetina a̧ja̧kwö, otiwanö chösödi̧danö okobe deinö Acab ömöledönö söbebö loköbajabe, chomajadenö jo̧banö baledakwa̧ omukwatö chujuninadanö badekwachinö. Ja̧danö, ja̧ wetina kwa̧ja̧kwinobetjö̧, isabenö otiwanö pjatatakwo̧sa ökwönö, ja̧danö la'aka luwo̧ kwö̧jinemi, ökwö kwitji̧mu tupadanö jojodöbi luwedö tjö̧jobö wetakwo̧sa, kwitji̧bi, kwö̧'dö̧bi, kwö̧'dö itji̧bi, kwö̧'dö̧ ö̧'döbi inesö la'aka luwedö batjibanö, la'aka luwo̧ iteakanö tjöbamatobö chiyakwo̧sa, —jö̧ba̧lö yöbawö ujuninobe Isabenö Jo̧ma.

³¹ Ja̧danö, teada̧lönö ö̧jo jö̧a̧linobe Jehuma, okobe jwiinö ju'wi Dios wei̧bi a̧ja̧kwö ö̧joböma. Jo̧kwaijayonö ju'wi Dios weinama, otiwanö a̧ja̧kwinokobe. Okobe jwiinö omajadenö, Israel jojodö tjösödökwe Isabenö Jo̧ Dios wei̧ a̧ja̧kwö ö̧jo jö̧a̧lijayonö, otiwanö a̧ja̧kwökönö, Jeroboan sulabenö ja̧ina, israel jojodö sulabenö ja̧tjobö weina jawama kaatibinokobe Jehuma.

³² Ja̧danö, jobekwö a̧ja̧kwökönö ö̧jiökwe, israel jojodönö lȩebinobe Isabenö Jo̧ma. Ja̧ möle jenanö, Siria la'aka luwo̧ Hazael israel jojodönö ujuluwobö iyinobe, israel nijitjö jelobebi, jelobebi 'döebenanö baibanö. Jobekwö israel niji ja'yuwachibanö weinobe. Ja̧ Hazael 'döebenemima, baikwö laeobe:

³³ Jordan ojwetjö jawo̧ laebobekwöchobe niji 'döebinobe, Gadsaso jojodö tjitebo nijibi, Rubensaso jojodö tjitebo nijibi, Manasessaso jojodö tjitebo nijibi. Dios wei̧ a̧ja̧kwökönö tjö̧jiökwe, Arnon wabeko ö'öbö jȩmi comunidad Aroertjö, Galaad nijibe, ja̧danö Basan nijibe baibanö, Hazaelma juluwajo̧ 'döebobö weinobe.

³⁴ Jobekwö ja'yubenö laebobe Jehu la'aka luwo̧ ö̧jina jawama. Ju'wibi nöinö otidö ö̧jinobe Jehuma, ja̧danö ja̧ otidö ö̧jina jawabi, ujulu i̧sȩbina jawabi, jele'yenö laebobe, Israel la'aka luwedö tjö̧jina'ye mikwa'yenö laebobe.

³⁵ Ja̧danö, Jehuma ö'wö baibinobe, ja̧danö ö'wö babibajo̧nö tjo̧tjinobe, Samaria comunidadtjö. Ja̧danö, Jehu la'aka luwo̧ ö̧jinemi, itji̧ Joacazma Israel inesö la'aka luwo̧ baibinobe.

³⁶ Jehu ö'wö baibakwa̧ abönö, Samaria comunidadnö ja̧nö, veintiocho o̧biya baledibanö Israel jojodönö webö ö̧jinobe.