2 Pedro 3 - Dios Iwene

Duluwo̧ Jesús yemidanö ichakwa̧ Pedro yöawina wene.

¹ Chösödawö̧ chömöledö, belö ökwödönö kwialusöja chiwȩyudijatö, ja̧danö babe yemidanö ökwödönö chiwȩyudobe. Ja̧danö ajayisöjabi, böja ikenasöjabi, damötjö baledina jawa kwomukwataduwobö yötawa, bakwainö otiwanö kwomukwataduwobö chömöledö.

² Jau chömöledö, Dios ömöayedö iteda yöawi̧ yöbawadö damötjö yötjawina jawa kwomukwatibaduwobö chösöda, jo̧kwaijayonö ja̧damaökö. Jau chömöledö, ökwödö Jesús webawedö ökwödönö yödawinabi kwomukwatibaduwobö chösöda. Jau chömöledö, Duluwo̧ma böjȩnö ja̧nö ökwödönö yödawakwa̧ weinobe, ja̧danö ja̧ ökwödönö yödawinabi kwomukwatibaduwobö chösöda. Jo̧kwajabetjö̧, jejenö kwomukwatibaduwakobetjö̧, böja ökwödönö chiwȩyudajabe.

³ Jau chömöledö, inesö kwöwaisaduwobö ji̧ma biya̧: 'Dö̧ibaji̧ mölema, sulabenö obadö tjichakobe, idöda tjösödi̧ jawada ja̧bö ju̧kwadöma. Jobadöma ökwödönö obö

⁴ yötja̧lakobe: Cristoma, yemidanö chichakobe jö̧a̧linajayonö, ichö̧kö̧, ökwödönö lȩebökakobe Cristoma. La'akatjöda da'dödö wotjinemitjö jamatö baikwö bajalenö okobe jwiinö böjȩ jawama balewachokobe. Okobe jwiinö böjȩma, ina Dios ajayinö otidinadanö ina bakwainö jo̧be, la'akatjöda böjȩ jojodönö lȩebinokobe Diosma, jo̧kwajabetjö̧ jo̧ba lȩebakwa̧ yedaboböma jwiobe jö̧ba̧lö yötja̧lakobe. Jau chömöledö, ökwödönö otjakobe, Cristo yemidanö chichakwo̧sa jö̧ba̧lö yöawina kwösödaduwi̧ma, omöna wene ösödadöja jö̧ba̧lö.

⁵ Jobadö sulabenö obadöma jejenö omukwatö, damötjö baledina tjöpöjödobe chömöledö, Dios lȩebina wene öwaetjöda laebobetjö̧. Jau chömöledö, baikwö yötawa: Dios ajayinö böjȩ otidinenama, iteda yöbawö weinobe, ja̧danö mölejȩbi, böjȩbi baibinobe, ¿jö̧tö? Ja̧danö chömöledö, iteda yöbawö weinobe, ja̧danö ojwetjö niji otidinobe, ja̧danö ojwiyoma nijitjö wainö baibanö 'da̧batö ujuninobe, ¿jö̧tö?

⁶ Ja̧danö, jejenö weobetjö, ojwiyo wainö ji̧nobe chömöledö, Dios ojwe okwatobö weenanö kabatö. Jau chömöledö, ajayinö 'da̧batö ujunina ojwiyonö, Diosma ajayi jinöjȩ böjȩma söbebö loinobe, ojwe okwatobö weenama. Jau chömöledö, okobe jwiinö Dios yöbawö weinadanö baledinobe.

⁷ Ja̧ okobe jwiinö Dios yöbawö weobetjö̧ baledinobe chömöledö. Ja̧danö, babe ji̧ mölejȩbi, böjȩbi jo̧bada weobetjö̧ ina jo̧be chömöledö, tupakwö mölejȩbi böjȩbi Dios söbebö loenanö kabatö. Jau chömöledö, tupakwöda böjȩbi, mölejȩbi juwö söbebö lotakwo̧sa, jö̧ba̧lö Dios omukwatö ujuninobetjö̧, böjȩbi mölejȩbi te'ada̧lobe ichejekwa, inesö Dios böjȩ jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö, ja̧danö Diosnö öpöjödadönö söbebö loakwa̧ möle baibenanö kabatö. Ja̧danö, ja̧ möle baibenama, Diosma böjȩbi mölejȩbi juwö söbebö loakobe chömöledö. Jau chömöledö, damötjö okobe jwiinö Dios yöawi̧danö baledinobe, jo̧kwajabetjö̧ ju'wibi döwaisobö jo̧be, Cristo yemidanö ichakwo̧ yöawinadanö isabenö ichakwo̧, ja̧danö isabenö jobadö sulabenö obadönö lȩebakwo̧.

⁸ Jau chömöledö, lekwe ichokobe jö̧ba̧lö ichejekwijayonö, isabenö lekwökö, baikwö inesö mikwawi̧ wene labebö lobö yötawaduwakwö, kwomukwataduwobö: Diosma ba̧kwȩlö̧jatebö jo̧obetjö̧, ökwödönö lekwe ji̧ma lekwokobe jo̧banöma. Baikwö yötawa: Dios edemi, mil o̧biyama, bakwöta möledanö ichejekwobe, ja̧danö bakwöta mölema, mil o̧biyadanö ichejekwobe, bakwaiobe jo̧banö chömöledö. Jo̧kwajabetjö̧ ökwödönö lekwe ichokobe jö̧ba̧lö ichejekwijayonö, Dios edemi lekwokobe chömöledö.

⁹ Ja̧danö ju'wedö jo̧banö tjomukwatobe, Aaa, Duluwo̧ma iteda yöbawö ujuninadanöma juluwanö yemidanö ichö̧kö̧, juluwanö ichatjö̧bö, jö̧ba̧lö tjomukwatobe. Jo̧kwaijayonö, ja̧maökö chömöledö, ökwödö böjȩ jojodönö lȩlö̧jinö edobetjö̧, juluwanöma ichokobe chömöledö. Jau chömöledö, bakwo̧bi Dios lȩebi̧tjö emoböma öpöjöda Duluwo̧ma, okobe deinö sulabenö tjomukwati̧ kabatibö tjöbalewachobö ösödo̧. Ja̧danö jejenö ösödobetjö̧ juluwanöma ichokobe, ju'wedöbi sulabenö tjomukwati̧ kabatibö tjöbalewachakobetjö̧.

¹⁰ Jo̧kwaijayonö Duluwo̧ma lekwe ite'ada̧lijayonö, isabenö yemidanö ichakwo̧ chömöledö. Ja̧danö wanedö yötawa, naukwabo̧ ju'wedö tjomukwatokonö tebachö önaukwi̧danö, jojodö jo̧ba ichakwa̧ tjomukwatokonö ja̧ inesö lȩebakwa̧ möle baibakobe chömöledö. Ja̧danö, ja̧ baibenama, labinö ökwöobetjö mölejȩma jwiinö baibakobe, ja̧danö mölejȩnö la̧jadöma ökwölanö ubö jwiinö baibakobe, ja̧danö böjȩbi, okobe jwiinö böjȩnö ji̧bi ubö jwiinö baibakobe. Jau chömöledö, obadö ichökena jö̧ba̧lö otjijayonö, isabenö ichakwo̧ Duluwo̧ma.

¹¹ ¿Dakwö kwomukwataduwa chömöledö? Jejenö okobe jwiinö dedi̧ma jejenö ubö jwiinö baibakobema, ¿böjȩ jawada omukwatö kwö̧jaduwobö otiwenaji̧? Ja̧maökö chömöledö, sulabenö ja̧bökönö Dios ösödi̧ ja̧bö kwö̧jaduwo chömöledö.

¹² Jau chömöledö, Duluwo̧ yemidanö ichakwa̧ kwite'ada̧laduwonö, Dios ösödi̧ ja̧bö kwö̧jaduwo, Dios lȩebakwa̧ möle juluwanö baibowe jö̧ba̧lö. Jau chömöledö, ja̧ möle baibenama, mölejȩ juwö loakobe Diosma, ja̧danö mölejȩnö ji̧ma, okobe jwiinö ubö jwiinö baibakobe.

¹³ Ja̧danö, ökwödö dite'ada̧li̧ma biya̧ chömöledö, mölejȩ 'yayöjȩ, ja̧danö böjȩ 'yayöjȩ Dios otidobö te'ada̧ladösa chömöledö, Dios yöbawö ujuninadanö. Ja̧danö, ja̧ 'yayöjȩ Dios otidakwöjȩma, suli̧ma jwiakobe, Dios inesö otiwi̧da ja̧kobe chömöledö. Jo̧kwajabetjö̧ ina böjȩnö dö̧jayi, Dios ösödi̧danö ja̧bö kwö̧jaduwo chömöledö, ökwödöma mölejȩ 'yayöjȩ jojodököbaduwobetjö̧.

¹⁴ Jau chömöledö, Dios 'yayöjȩ otidobö te'ada̧ladösa ökwödöma. Jo̧kwajabetjö̧ ja̧ baledakwa̧ möle baibobö dite'ada̧lonö, jwaikwöda wene jwiinö kwö̧jaduwobö kwisakwaduwo, ökwödönö edö, bakwainö sulabenö ja̧böködönöda Duluwo̧ edakobetjö̧.

¹⁵ Ja̧danö Duluwo̧ juluwanö ichökö wenema, baikwö kwomukwataduwobö jo̧be, Ba̧jekwadö tjö̧jibobö ite'ada̧lobetjö̧ juluwanö ichö̧kö̧, jö̧ba̧lö. Jau chömöledö ökwödönö chiwȩyudi̧danö, dösödökwe döjawo̧ Pablobi iwȩyudinobe, Duluwo̧ yemidanö ichakwa̧ jawama. Jau chömöledö, Diosma Pablonö ja̧ jawa waisanö omukwatobö iyinobe,

¹⁶ ja̧danö okobe jwiinö jo̧ba iwȩyudi̧ kwialusöjanö, Duluwo̧ yemidanö ichakwa̧ tjomukwatobö iwȩyudobe. Jau chömöledö, Pablo iwȩyudi̧ jawatjö, ju'wi laebachi̧ labebö loawama waiya, ja̧danö ba̧jekwadö otiwanö do̧tjatijayonö, ju'wedö ja̧ jawa do̧tjatokobe. Jau chömöledö, isabenö wene 'diinö do̧ba̧löködötjobetjö, ja̧danö wajwibadötjobetjö̧, Pablo iwȩyudina sulabenö balewö lobö yötjawobe, ju'wi Dios iwene jawa sulabenö balewö lobö yötjawi̧danö. Ja̧danö, jejenö ja̧tji̧ma, jobadönö lȩebakwa̧ baibakobe chömöledö. Jau chömöledö, jobadö balewö lobö sulabenö yötjawijayonö, Pabloma isabenö otiwanö iwȩyudinobe, Duluwo̧ yemidanö ichakwa̧ wenema. Ja̧danö jo̧ba iwȩyudinabi, böja chiwȩyudöjabi, Duluwo̧ yemidanö ichakwa̧ kwomukwataduwobö diwȩyudobe.

¹⁷ Jau chömöledö, sulabenö yöbawadöma isabenö yötjawakobe, ja̧danö sulabenö yötjawakwa̧ abönö ökwödönö chiwȩyudajabe, kwöwaisaduwobö. Ja̧danö, ida̧ökö kwöwaisaduwobetjö̧, te'ada̧lönö kwö̧jaduwo chömöledö, jobadö yötjawi̧ kwa̧ja̧kwaduwenama, yötjawi̧ ösödö jobadö sulabenö ja̧tji̧danö ja̧köbaduwapji jö̧ba̧lö, ja̧danö 'diinö kwö̧jaduwi̧ma waekwapji jö̧ba̧lö.

¹⁸ Jau chömöledö, jobadö sulabenö yötjawi̧ ösödökönö, ökwödö Jesúsnö ösödadöma jo̧ba mikwa jwiinö iyi̧tjö kwöda̧peachaduwobö jo̧be, ja̧danö tupakwönönö Duluwo̧ dö̧jibinö pjabato̧ Jesucristonö döwaisachibobö jo̧be. Jo̧banöda otiwo̧ja jö̧ba̧lö dösödobö jo̧be chömöledö, babebi, ja̧danö ba̧kwȩlö̧jateböbi dösödobö jo̧be, jejenö otiwa. Biya̧da ötjö Simón Pedroma ökwödönö pjabatö wȩyudö wetaduwakwö chömöledö. Biya̧data.