2 Pedro 2 - Dios Iwene

Sulabenö yöbawadönö Pedro yöawina wene

¹ Jau chömöledö, Dios yöawi̧ yöbawadöma Dios O̧'wo̧ Luwo̧ yöawi̧da yötjawinobe, jo̧kwaijayonö, jobadö otiwanö yötjawonö, Dios yöawi̧ yöbawöködöbi yötjawinobe. Jobadöma Dios yöawi̧ yötjawököjayonö, Dios yöawi̧ yöbawadösa, jö̧ba̧lö omöna yötja̧linobe. Ja̧danö chömöledö, ökwödö kwö'da̧deduwitjö jobadöjayedö omöna yöbawadö tjö̧jakobe chömöledö, Dios iwene yöbawadösa, jö̧ba̧lö omöna yöba̧ladöma. Jobadöma isa̧ökö wene yötjawakobe, suli̧ tjöwaedotö jö̧ba̧lö. Ja̧danö ju'wibi, Duluwo̧nö, jobadö tjö̧jibobö midawinanö tjöpöjödakobe, la'aka luwo̧bö̧kö̧ jö̧ba̧lö. Jejenö suli̧ waedadöma, Dios juluwanö jobadönö lȩebobö ja̧badö chömöledö.

² Ba̧jekwadö jobadö yötjawi̧ tjösödakobe chömöledö, ja̧danö sulabenö yötjawi̧ ösödö, taba lö̧ji̧ jawa sulabenö ja̧tjakobe, sulabenö yöbawadö sulabenö ja̧tji̧danö. Ja̧danö chömöledö, jobadö sulabenö yötjawobetjö̧, ba̧jekwadö jojodöma isabenö wene tjöpöjödakobe. Jau chömöledö, jobadö sulabenö yöbawadöma, Jesús jawa wene yötjawököjayonö, Jesús jawa wene yöbawadösa, jö̧ba̧lö yötja̧lakobe. Ja̧danö, jejenö yötja̧lonö sulabenö ja̧bö tjö̧jobetjö̧, ba̧jekwadö isabenö wene tjöpöjödakobe, Jesús jawa wenema, omöna wene, mikwawökö wene, jö̧ba̧lö.

³ Ja̧danö, idöda tjemotö jö̧ba̧lö tjösödobetjö̧, jobadö sulabenö yöbawadöma ökwödönö omöna yötja̧lakobe, ökwödötjö balada tjemo jö̧ba̧lö. Jo̧kwaijayonö Diosma damötjö jobadönö lȩebobö omukwatö ujuninobe chömöledö, ja̧danö isabenö jobadönö lȩebakobe.

⁴ Jau chömöledö, isabenö jobadönö Dios lȩebakwa̧ wene döwaisobe, jobadöjayedönö Diosma ida̧ökö damötjö lȩebinobetjö̧. Jau chömöledö, damötjö ángelesdötjö sulabenö ja̧binadöma Dios lȩebi̧tjö tjö̧jibinokobe, sulabenö ja̧tjiökwe Diosma jobadönö ödinobe, Dios lȩebakwawö̧ tjö̧jena tjö̧bobö, ja̧danö jobe ka̧lena tjö̧bobe, inesö Dios lȩebakwa̧ möle baibenanö kabatö, ¿jö̧tö?

⁵ Ja̧danö, damötjö Noé ö̧jinena ju̧kwadöbi Dios lȩebi̧tjö tjö̧jibinokobe chömöledö, Diosnö öpöjödadönö ojwe okwatobö weinobe. Jau chömöledö, Diosma isabenö jo̧banö öpöjödadönö lȩbebo̧, ja̧ wene domukwatobö jo̧be chömöledö. Jo̧kwaijayonö ju'wi wenebi domukwatobö jo̧be chömöledö. Diosma iteda öpöjojodönö lȩebijayonö, jo̧banö ösödadönö pjabato̧, baikwö yötawa: Diosma Noé ö̧jinena ju̧kwadönö lȩebijayonö, jobadö tjö'da̧detjö, Noénöbi, Noé ömöledö jelemutjö du̧ju̧taja jojodönöbi tjö̧jibinö pjaatinobe, ¿jö̧tö? Jau chömöledö, Noéma Diosnö ösödö, otiwanö ja̧bö ja̧kwawa jawa jojodönö yöbawö ö̧jinobe, ja̧danö ju'wedönö lȩebonö, Noénöbi, ömöledönöbi tjö̧jibinö pjaatinobe Diosma.

⁶ Ja̧danö, Sodoma comunidadnö ju̧kwadöbi, Gomorra comunidadnö ju̧kwadöbi Dios lȩebitjö̧ tjö̧jibinokobe chömöledö. Jobadönö okobe deinö söbebö loinobe, ja̧danö jobadö tjiteboma ökwölaso̧pja̧ baibanö söbebö loinobe, ¿jö̧tö?

⁷ Jo̧kwaijayonö otiwanö ja̧bö ji̧na Lot mikwo̧nö ö̧jibinö pjaatinobe, ¿jö̧tö? Jo̧ba Lotma, jobadö sulabenö 'da̧'da̧bakwawö ja̧tji̧ edö o̧'wo̧ tjo̧achinobe, ja̧danö jobadö tjö'da̧detjö Diosma jo̧banö ö̧jibinö pjaatinobe, ¿jö̧tö?

⁸ Jau chömöledö, otiwanö ja̧bö ji̧na Lotma jobadö tjö'da̧de ja̧nö, mölekwena sulabenö ja̧tji̧ edö, ja̧danö sulabenö ja̧tji̧ a̧ja̧kwö o̧'wo̧ tjo̧achinobe. Ja̧danö jobadönö Dios söbebö loinajayonö, bakwo̧nö, Lotnö ö̧jibinö pjaatinobe Diosma, ¿jö̧tö?

⁹ Ja̧danö baikwö yötawaduwakwö chömöledö, ja̧ wene edö, baikwö döwaisachibobö jo̧be, Diosma ökwödö jo̧banö ösödadönö isabenö usula demawi̧tjö dö̧jibinö pjaatobö waiso̧, jö̧ba̧lö. Ja̧danö, ju'wibi waiso̧ chömöledö, Diosnö öpöjödadö iteda lȩebakwa̧tjö dötjibapji jö̧ba̧lö ite'ada̧lobö waiso̧, inesö jojodö ja̧tji̧ otiwojobö sulojobö jö̧ba̧lö yöawakwa̧ möle baibenanö kabatö.

¹⁰ Ja̧danö chömöledö, ida̧ökö i̧sebinadanö isabenö ökwödönö sulabenö yöbawadönö lȩebobö waiso̧. Jau chömöledö, jobadöma sulabenö 'da̧'da̧akwawa ösödö jwaikwöda sulabenö ja̧bö tjuju̧kwobe, ja̧danö Dios wei̧ öpöjödö tjuju̧kwobe, jo̧kwaijayonö Dios lȩebi̧tjö dötjibajökakwedö. Jau chömöledö, damötjö ji̧nadö jojodönö lȩebinadanö, ökwödönö sulabenö yöbawadönöbi ite'ada̧lobö waiso̧ Diosma chömöledö, lȩebakwa̧tjö dötjibapji jö̧ba̧lö. Jau chömöledö, jobadö sulabenö yöbawadöma, tjujuluwököjayonö, Aaa, juluwadösa, jö̧ba̧lö omukwatö, yebabökönö sulabenö yöba̧ladö ángelesdö juluwadönöma, idö ángelesdöma sulabedö jö̧ba̧lö.

¹¹ Mölejȩbe ju̧kwadö ángelesdöma jobadö sulabenö yöbawadö tjujuluwi̧tjö bajalekwönönö juluwadö chömöledö. Jo̧kwaijayonö, Dios öba a'otjö jejenöma ju'wedö ángelesdönö sulabenö yöba̧löködö chömöledö, tjöwaisobetjö̧, Diosda ja̧tji̧ otiwojobö sulojobö jö̧ba̧lö yöbawo̧ma jö̧ba̧lö. Jau chömöledö, ángelesdö waisanö jejenö yötja̧lököjayonö, sulabenö yöbawadöma omukwatökönö jejenö yöba̧ladö.

¹² Jau chömöledö, jobadö sulabenö yöbawadöma tebonö ju̧kwadö omukwatöködödanö tjichejekwobe. Jau chömöledö, tebonö ju̧kwadöma, omukwatöködö, idöda la'akatjöda a̧dekwanö tjöwaisi̧ jawada ja̧badö, ¿jö̧tö? Ja̧danö, jobadö tebonö ju̧kwadöma, ju'wi jaye ja̧tjoböma bötjachibinöködö, sule 'daliwanö tjö̧lajibobö bötjachibinadö, ja̧danö jelo̧ kwabö loobö bötjachibinadö, ¿jö̧tö? Jobadö sulabenö yöbawadöbi ja̧danö chömöledö, okobe jwiinö wajwitji̧ jawama, omukwatökönö sulabenö yöba̧ladö. Ja̧danö tebonö ju̧kwadönö söbebö lotji̧danö, Diosma jobadönö söbebö loakobe.

¹³ Ja̧danö chömöledö, jobadöma sulabenö ja̧tjaja̧ mikwa baibanö, usula tjemawakwedö. Jau chömöledö, okobe jwiinö tjösödi̧ jawama taba jwiinö ja̧badö, ja̧danö tojabinöma ja̧böködö, mölebi jojodö tjedonö taba jwiinö sulabenö ja̧bö ju̧kwadö. Ja̧danö chömöledö, kwö'da̧de ja̧nö sulabenö ja̧bö tjö̧jobetjö̧, jobadötjö taba lö̧jobe ökwödönö. Baikwö wanedö yötawa, kamijido̧ otiwado̧nö yȩabibi̧danö, jobadöma ökwödönö yetjebobedanö jo̧be, ökwödönö jojodö sulabenö tjomukwatobö ja̧tjobetjö̧. Jau chömöledö jobadöma jwaikwöda omöna yöba̧lö tjö̧jonö, tabakwökönö ökwödökwö Duluwo̧ midawö woina omukwatö kwukwaduwi̧ bakobe kwadö chömöledö, ökwödöbi Jesúsnö ösödadösa jö̧ba̧lö. Ja̧danö chömöledö, ökwödökwö bakobe tjö̧jobetjö̧, ökwödötjöböködötjijayonö, jojodö jobadö sulabenö ja̧bö tjö̧ji̧ edö, okobe deinö ökwödönö tjomukwatakobe, Jesúsnö ösödadöma jwaikwöda sulabenö ja̧bö ju̧kwadö, jö̧ba̧lö.

¹⁴ Jobadö sulabenö yöbawadöma jwaikwöda tji̧lȩkwa̧muböködökwö ja̧tjotö jö̧ba̧lö isakwadö, ja̧danö öpöjödachibökönö jwaikwöda sulabenö ja̧böda ju̧kwadö. Ja̧danö, ju'wibi, jwaikwöda balada tjemotö jö̧ba̧löda omukwatadö ja̧nö, tjo̧'wo̧ luwo̧nö ina da̧peachöködönö ötjibobedanö ichejekwa, 'daliwanö tjö̧libobö. Isabenö sulabenö ja̧bö tjö̧jobe chömöledö, jo̧kwajabetjö̧ Dios lȩebakwawö̧ tjö̧jobe.

¹⁵ Jau chömöledö, otiwanö ja̧awatjö 'da̧bachibö, Balaam mikwo̧ ökömanö lutja̧libobedanö ichejekwa, jo̧ba ja̧inadanö ja̧bö. Jau chömöledö, kwöwaisaduwa, jo̧ba Beor mikwo̧ itji̧ Balaam mikwo̧ma, balada emotö jö̧ba̧lö sulabenö yöawobö ösödinobe, ¿jö̧tö?

¹⁶ Jejenö ösödina chömöledö, ja̧danö jelo̧ma jo̧banö sulabenö yökawa jö̧ba̧lö yöawinobe. Jau chömöledö, jejenö sulabenö yöawobö omukwatiökwe, iteda ajwida jojodö tjiwenenö lȩbebö yöawinobe. Kwöwaisaduwa chömöledö, ajwikwawedö bu̧lu̧döma yöba̧löködö, jo̧kwaijayonö Balaam ajwi buluma jojodö tjiwenenö yöawinobe, ja̧danö Balaam o̧'wo̧ jwiinö sulabenö yöawobö omukwataja̧ma kaatibobö yöawinobe. Jau chömöledö, ökwödönö sulabenö yöbawadöma, jo̧ba Balaam omukwatinadanö omukwatadö, balada tjemotö jö̧ba̧lö omukwatö. Jobadönö kwa̧ja̧kwaduwobö isabenö jwiobe chömöledö.

¹⁷ Jau chömöledö, jobadö sulabenö yöbawadöma mikwawöködö, baikwö yötawa: Ojwese'do kököe'dodanö mikwawöködö, ja̧danö ojwiyo'wo o̧bökö'wo, jwa̧lȩ'epjo jelobe e'ewa'wodanö mikwawöködö, ja'yubebi pjatjatokobetjö̧. Jobadönö baikwö yötawa chömöledö, Diosma jobadönö lȩebakwa̧ omukwatö ujuninobe, ja̧danö ökwöla nöolanö, inesö yȩa'wo okwada tjö̧bakobe.

¹⁸ Ja̧danö ju'wibi yötawa jobadö tjo̧'wo̧ jwibadö sulabenö yöbawadönö chömöledö. Jobadöma labinö waisadösa yöba̧lö, iya̧nö Dios iwene a̧ja̧kwö sulabenö ja̧bö ja̧kwawatjö ji̧bajadönö yötjawobe, böjȩ jojodö sulabenö tjösödi̧ma otiwa jö̧ba̧lö, ja̧danö jobadönö ötjibobedanö ichejekwa, 'daliwanö tjö̧libobö. Jejenö sulabenö ötjibobe jojodönö chömöledö, jo̧kwajabetjö̧ Diosma isabenö jobadönö lȩebakobe.

¹⁹ Jau chömöledö, jobadöma, Aaa, yödawi̧danö ja̧köbaduwitjö̧ma kwuluwedö deinö okobe jwiinö kwösödaduwi̧ma, wene jwiinö ja̧köbaduwena, jö̧ba̧lö yötjawobe. Jejenö yötjawobe chömöledö, ja̧danö, jobadö yötjawi̧ a̧ja̧kwö, ju'wedöma tjösödobe, isabenö dösödi̧ ja̧bö dö̧jenama wene jwiinö dö̧jena, jö̧ba̧lö. Jo̧kwaijayonö, yötjawi̧danömaökö chömöledö. Isabenö kwuluwedö deinö kwö̧jaduwena jö̧ba̧lö yötjawijayonö, jobadö sulabenö yöbawadöma tjuluwedö deinö jö̧ködö, suli̧ ömöayedö, ja̧danö suli̧ waekwi̧ ömöayedöda tjö̧jobe. Jau chömöledö, baikwö yötawa: Ju'wi jaye bakwo̧nö ujuluwitjö̧ma, iya̧da ömöayo̧ ö̧jena. Ja̧danö, jobadö sulabenö tjösödi̧ jobadönö juluwobetjö̧, sulabenö tjösödi̧ ömöayedö tjö̧jobe. Jau chömöledö, jobadö sulabenö yöbawadöma Dios yöawi̧ yöbawadösa, jö̧ba̧lö, yötjawijayonö, isabenö sulabenö yötjawobe. Ja̧danö, jejenö yötjawiökwe, Diosma isabenö jobadönö lȩebakobe.

²⁰ Ja̧danö chömöledö, ju'wibi yötawaduwakwö, Isabenö Dios jobadönö lȩebobö jo̧be, jö̧ba̧lö. Jau chömöledö, jobadöma Duluwo̧ dö̧jibinö pjabato̧ Jesucristonö waisachibö, böjȩ jawa suli̧ waedakwawa ji̧tjö tjö̧jibinobe ichejekwa, jo̧kwaijayonö öpöjödö tjebachajö ajayinö sulabenö ja̧tjina ja̧tjobe, ja̧danö sulabenö tjösödi̧ma jobadönö juluwobe. Ja̧danö chömöledö, ajayinö sulabenö ja̧bö tjö̧jitjö o̧penönö sulabenö ja̧badö batjibobe.

²¹ Jobadöma la'akatjöda Dios yöawi̧ tja̧ja̧kwinökötjö̧ma jobadönö o̧penönö otiwo jö̧a̧linena chömöledö, jo̧kwaijayonö, ja̧ jawa a̧ja̧kwibö, Dios wei̧ tjöpöjödinobetjö̧, ajayitjö o̧penönö Dios lȩebi̧tjö tjemakwedö.

²² Jobadönö badekwachobe, lȩekwa waisadö wanedö yötja̧li̧ma, baikwö laebobe: Awilima etekwaja̧ yemidanö tjebatakwawö kwo̧, jö̧ba̧lö Ja̧danö ju'wibi: Kusi okobe jwiinö tjidichajökwe kusima, tjebachajö lete'dinö pelebo̧ jö̧ba̧lö. Jobadö sulabenö yöbawadöbi ja̧danö chömöledö, tjebachajö ajayitjö bajalekwönönö jwiinö sulabenö ja̧bö ju̧kwadö, ja̧danö Dios iwene a̧ja̧kwibö, Dios wei̧ tjöpöjödinobetjö̧, ajayitjö o̧penönö Dios lȩebi̧tjö tjemakwedö.