2 Pedro 1 - Dios Iwene

Pedro iwȩyudina'ye ikenasa'yetjö ajayi jawa

¹ Dokwa chömöledö, Ötjöma Simón Pedrosa, ja̧danö Jesucristo webawo̧sa, ja̧danö ju'wibi jo̧ba ömöayo̧sa. Ötjöma böja kwialusöja wȩyudö wetaduwakwö, ökwödö Cristonö chösödi̧danö bakwainö ösödadönö. Jau chömöledö, dö̧jibinö pjabato̧ Dios Jesucristoma bakweminö jojodönö edo̧obetjö̧, ötjönö pjaatinadanö ökwödönöbi pjaatinobe, Cristonö chösödi̧danö ökwödöbi bakwainö kwösödaduwobö. Ja̧danö, ökwödö bakwainö ösödadönö böja kwialusöja wȩyudö wetaduwakwö.

² Böjatjö jamatö, wȩyudö yötawaduwakwö chömöledö, tupakwönönö Diosnöbi, Duluwo̧ Jesúsnöbi kwöwaisachibaduwonö, Dios ajayitjö bajalekwönönö ökwödönö lȩlö̧jinö iyobö chösöda. Ja̧danö ajayitjö bajalekwönönö ökwödönö pjaatobö chösöda, kwo̧'wo̧ luwo̧ ösöwachibanö kwö̧jaduwobö.

Diosma ökwödönö jwöinobetjö̧, jo̧ba ösödi̧danö ja̧bö kwö̧jaduwo jö̧ba̧lö Pedro yöawina wene

³ Chömöledö, Duluwo̧ma Diosdaobetjö̧, okobe jwiinö juluwo̧, ¿jö̧tö? Jau chömöledö, okobe jwiinö juluwo̧ duluwo̧ma, ja̧danö, ju'wibi, iteda ujulu ökwödönö iyobe, jo̧ba ujulunö Dios ösödi̧danö ja̧bö dö̧jobö. Jau chömöledö, Duluwo̧ma ökwödönö jwöinobe, iteda dejatinö ujulu ökwödöbi dujuna̧lobö, ja̧danö iteda inesö otiwi̧ ökwödöbi dujuna̧lobö. Ja̧danö chömöledö, jo̧banö waisadö dö̧jobetjö̧, iteda ujulu ökwödönö iyobe, jo̧kwajabetjö̧ ina böjȩnö dö̧jayi, okobe jwiinö juna̧ladösa, böjȩnö ina dö̧jayi Dios ösödi̧danö ja̧bö dö̧jakobetjö̧.

⁴ Jau chömöledö, Duluwo̧ma dejatinö juluwo̧obetjö̧, ja̧danö jwiinö otiwo̧obetjö̧, inesö mikwawi̧ wene ökwödönö yöbawö ujunajabe, yöawi̧ ösödö, suli̧tjö dö̧jibobö, ja̧danö iteda otiwi̧ ökwödöbi dujuna̧lobö. Jau chömöledö, kwöwaisaduwa, böjȩ jojodö sulabenö tjösödi̧tjö böjȩma suli̧ jwöachobe, ¿jö̧tö? Jo̧kwaijayonö ja̧ suli̧ jwöachi̧tjö dö̧jibanö pjabato̧ Duluwo̧ma, ja̧danö böjȩ suli̧ jwöachijayonö, ökwödöma Duluwo̧ inesö otiwi̧ dujuna̧lakwedö dö̧jobe.

⁵ Ja̧danö jejenö dujuna̧lakobetjö̧, baikwö wetaduwakwö, ja̧bö kwö̧jaduwo jö̧ba̧lö: Ökwödöma Dios yöawi̧ ösödadöja, jo̧kwajabetjö̧ jemi tupakwö otiwanö ja̧bö kwö̧jaduwobö kwisakwaduwo. Ja̧danö jemi tupakwö kwöwaisachibaduwobö kwisakwaduwo.

⁶ Ja̧danö jemi tupakwö sulabenö kwösödaduwi̧ ja̧bökönö kwö̧jaduwobö kwisakwaduwo. Ja̧danö jemi tupakwö kwo̧'wo̧ 'dibachibö kwö̧jaduwobö kwisakwaduwo. Ja̧danö jemi tupakwö jwaikwöda Dios ösödi̧da ja̧bö kwö̧jaduwobö kwisakwaduwo.

⁷ Ja̧danö jemi tupakwö kwömöledöduwinö ösödabikwawö kwö̧jaduwobö kwisakwaduwo, Ja̧danö jemi tupakwö okobe deinö jojodönö isabenö kwösödaduwobö kwisakwaduwo chömöledö.

⁸ Jejenö ja̧bö ja̧kwawama inesö mikwawi̧ chömöledö, ja̧danö jejenö ja̧bö kwö̧jaduwitjö̧ma, ja̧danö wanedö yötawa, jejenö ja̧bö ja̧kwawa ökwödönötjö nöachitjö̧ma, kwö̧jaduwi̧ma isabenö waekwökena, ja̧danö Duluwo̧ Jesucristonö isabenö otiwanö kwöwaisachibaduwena chömöledö.

⁹ Jau chömöledö, jejenö ja̧bö kwö̧jaduwi̧ma isabenö mikwawobe, ja̧bö kwö̧jaduwobö. Ju'wedö tjomukwatena, jejenö ja̧bö ja̧kwawama mikwawökö jö̧ba̧lö, jo̧kwaijayonö jejenö omukwatadöma tjöbajale tjewawadödanö ichejekwadö chömöledö, inesö mikwawi̧ tjomukwatokobetjö̧. Ja̧danö ju'wibi chömöledö, tjo̧'wo̧ jwitjibobe, ajayi tjusula Jesús dichö loinama. Jau chömöledö, jejenö ja̧bö ja̧kwawa mikwawokobe jö̧ba̧lö omukwatadöma waekwadö, ja̧danö jobadödanö kwöwaekwaduwapji jö̧ba̧lö, isabenö jejenö ja̧bö kwöjaduwobö kwisakwaduwo, jejenö ja̧bö kwö̧jaduwobö isabenö mikwawobetjö̧.

¹⁰ Jau chömöledö, ajayitjö o̧penönö jwaikwöda isakwö kwö̧jaduwo, yötawaja̧danö otiwanö ja̧bö kwöjaduwobö, Dios ömöledö kwö̧jaduwi̧ öwaetjöda kwi̧sebaduwakobetjö̧. Jau chömöledö, Diosma ökwödönö jwöinobe, ja̧danö ökwödönö omudawö ujuninobe, ¿jö̧tö? Ja̧danö yötawaja̧danö otiwanö ja̧bö kwö̧jaduwitjö̧ma, Dios ömöledö kwö̧jaduwi̧ öwaetjöda kwi̧sebaduwena. Jau chömöledö, jejenö ja̧bö kwö̧jaduwitjö̧ma, Jesúsnö ösödö kwö̧jaduwi̧ma la'akatjöda waekwökakobe.

¹¹ Jau chömöledö, kwöwaisaduwa, dö̧jibinö pjabato̧ Duluwo̧ Jesucristoma, la'aka luwo̧ ja̧nö yöbawö ö̧jakobe, ja̧danö ökwödö jo̧banö ösödadöma jo̧bakwö dö̧jakwedösa, ¿jö̧tö? Ja̧danö chömöledö, ju'wibi yötawaduwakwö, yötawaja̧danö jwaikwöda ja̧bö kwö̧jaduwobö kwisakwaduwitjö̧ma, jobe tekachaduwenama Diosma isabenö jwiinö otiwanö ökwödönö iyakobe, ina böjȩnö kwö̧jaduwayi chösödi̧danö otiwanö ja̧bö ji̧nadöja jö̧ba̧lö.

¹² Yötawaja̧danö ja̧bö ja̧kwawama isabenö otiwobe, ökwödö Dios ömöledö ja̧bö dö̧jo jö̧ba̧lö chömöledö, jo̧kwajabetjö̧, ba̧kwȩlö̧jatebö ja̧ jawa kwomukwatibaduwobö yötawakobe. Ja̧ jawa ida̧ökö waisadöja, ja̧danö ida̧ökö ja̧ jawa omukwatö 'diinö ja̧döja chömöledö.

¹³ Jo̧kwaijayonö yayonö ina yaba̧lö chö̧jayi, ba̧kwȩlö̧jatebö ja̧ jawa yemidanö kwomukwataduwo jö̧ba̧lö yöbawo̧sa chömöledö.

¹⁴ Chöwaisa chömöledö, ö'wö batibakwa̧ma yöneawachibobe ida̧ökö jö̧ba̧lö, Duluwo̧ Jesucristoma ötjönö jejenö i̧sebinobetjö̧.

¹⁵ Jo̧kwajabetjö̧ ja̧ jawa chiwȩyudobe chömöledö, ö'wö batibaja̧ ikenabi chiwȩyudina eda̧lö, ja̧ jawa ba̧kwȩlö̧jatebö kwomukwataduwakobetjö̧.

Isabenö Duluwo̧ma yemidanö ichakobe jö̧ba̧lö Pedro yöawina wene

¹⁶ Chömöledö, ökwödönö Duluwo̧ Jesucristo iteda ujulu i̧sebö ichakwa̧ wene yödawijatö, ¿jö̧tö? Jau chömöledö, Jesús yemidanö ichakwa̧ yödawijatö, ja̧danö jejenö yödawenama, jojodö omöna yötjawi̧dama yödawinokobe chömöledö. Jau chömöledö, isabenö duluwo̧ Jesucristo ujulu waisadösa, ja̧danö Jesucristo inesö ujulu döbajalenö edinadöda yödawijatö chömöledö.

^17-18 Jau chömöledö, belö Diosnö ösödakwawa'o mö'ösa'onö Duluwo̧kwö dö̧jenama, Dabe'do Diosma jo̧banö i̧sebinobe, Bitema otiwanö chomukwatökwe, jö̧ba̧lö. Jau chömöledö, otiwanö omukwati̧ i̧sebö Duluwo̧ Jesús salöinö idejatobö weinobe, ja̧danö Duluwo̧ jejenö idejatenama, ökwödöma ja̧ baledi̧ dedijatö. Ja̧danö, inesö salöinö dewobe mölejȩbetjö ökwöi̧: —Bitema ötjöda chitji̧, jwiinö chösödökwe— jö̧ba̧lö Dios yöawi̧ ökwöenama, ökwödöma ja̧ ökwöi̧ mölejȩbetjö da̧ja̧kwijatö chömöledö. Jau chömöledö, Duluwo̧kwö ja'o mö'ösa'onö dö̧jena, ja̧ baledi̧ma döbajalenö dedijatö, ja̧danö dölakiyunö da̧ja̧kwijatö. Jau chömöledö, jejenö edinadösa, ja̧danö jejenö a̧ja̧kwinadösa, jo̧kwajabetjö̧ isabenö yödawi̧ kwösödaduwobö jo̧be chömöledö.

¹⁹ Ja̧danö jejenö dedinobetjö̧, ajayitjö bajalekwönönö isabenö döwaisobe chömöledö, Duluwo̧ma isabenö iteda ujulu i̧sebö yemidanö ichakwo̧ jö̧ba̧lö. Jau chömöledö, Dios yöawi̧ yöbawadöma tjiwȩyudinobe, Duluwo̧ 'dö̧ibaji̧ möle yemidanö ichakwa̧ wenema, ja̧danö ida̧ökö jobadö tjiwȩyudi̧ dösödinobe. Ja̧danö, jemi ikenama ökwödöma jo̧ba ujulu i̧sebina dedijatö chömöledö. Ja̧danö jejenö dedinobetjö̧, ajayitjö o̧penönö döwaisobe, Dios yöawi̧ yöbawinadö tjiwȩyudinadanö iteda ujulu i̧sebö ichakobe jö̧ba̧lö. Isabenö jweinö tjiwȩyudinobe chömöledö, jo̧kwajabetjö̧ jobadö tjiwȩyudina otiwanö omukwatö kwösödaduwo chömöledö, jweinö kwomukwataduwakobetjö̧. Jau chömöledö, jobadö tjiwȩyudinama isabenö otiwanö domukwatobö pjaati̧, wanedö yötawa: Jobadö tjiwȩyudinama dejewa'yu̧ ubö dejati̧danö jo̧be, ichakwo̧nö jweinö kwomukwataduwobö, ja̧danö jejenö dejatakobe, inesö möle Cristo yemidanö ichakwa̧ möle dewachena kabatö. Ja̧danö ja̧ möle salöinö dejato̧ Cristoda ichö kwomajadeduwinö idejatakobe chömöledö, damötjö tjiwȩyudinadanö.

²⁰ Jau chömöledö, isabenö Dios yöawi̧ yöbawadö tjiwȩyudina kwösödaduwobö jo̧be, Dios yöawi̧da tjiwȩyudinobetjö̧. Jau chömöledö, ju'wi jayetjö bajalekwönönö inesö kwöwaisaduwobö ji̧ma biya̧ chömöledö, Dios yöawi̧ yöbawadö tjiwȩyudinenama, la'akatjöda idöda omukwatö tjiwȩyudinokobe, jö̧ba̧lö.

²¹ Jau chömöledö, la'akatjöda idöda omukwatö yötjawinokobe Dios yöawi̧ yöbawadöma, Dios O̧'wo̧ Luwo̧ jobadönö yöawawö̧da, yötjawinobe. Jau chömöledö, Dios yöawi̧da tjiwȩyudinobe, ja̧danö jobadöma Duluwo̧ yemidanö ichakwa̧ wene tjiwȩyudinobetjö̧, öwaetjöda kwöwaisaduwobö jo̧be, Duluwo̧ma isabenö yemidanö ichakwo̧ jö̧ba̧lö.