2 Juan 1 - Dios Iwene

Juan ajayinö yöawina wene

¹ Jesústjö chö̧ja̧wo̧dö dokwa. Ötjöma Jesúsnö ösödadö tjuluwo̧sa, ja̧danö te'ada̧lakwawa jojosa. Ja̧danö, böjanö wȩyudö yötawa ökwödö Jesúsnö ösödadö ko̧ko̧kwa̧ladönö, Dios omudawö ujuninawö̧nöma. Ja̧danö, chö̧ja̧wo̧dö yötawaduwakwö. Ökwödönö ile nibebo̧sa bakwainö Dios yöawi̧, isabenö ji̧ iwenema dösödobetjö̧. Ja̧danö chö̧ja̧wo̧dö ötjödamaökö, okobe deinö Dios isabenö ji̧ yöawi̧ ösödadöma ökwödönö ile nitjebobe.

² Jau chö̧ja̧wo̧dö, Dios isabenö ji̧ iwenema do̧'wo̧ luwo̧nö jo̧betjö̧ ökwödönö öbibö pjaatobe dö̧ja̧wo̧dönö ile nidebobö. Babebi ba̧kwȩlö̧jateböbi ja̧ Dios isabenö ji̧ iwenema do̧'wo̧ luwo̧nö jo̧be, ökwödönö pjabatö.

³ Chö̧ja̧wo̧dö, Dabe'do Diosbi, ja̧danö iteda Itji̧ Jesucristobi ökwödönö jwiinö pjatjatakobe. Ja̧danö, ökwödönö lȩlö̧jino tjedakobe. Ja̧danö, do̧'wo̧ luwo̧nö wene jwiinö dö̧jobö pjatjatakobe. Jau chö̧ja̧wo̧dö, jejenö ökwödö Dios isabenö ji̧ yöawi̧ ösödadönö, ja̧danö dö̧ja̧wo̧dönö ösödabikwawö ju̧kwadönö pjatjatakobe Dabe'do Diosma, ja̧danö iteda Itji̧ Jesucristobi.

Juan yöawina wene: —Omöna yöbawadö yötjawi̧ kwösödaduwoko— jö̧ba̧lö

⁴ Ja̧danö chö̧ja̧wo̧dö, ökwödötjö ju'wedö kwö̧jaduwi̧ma cha̧ja̧kwijatö, Jobadöma Dios isabenö ji̧ yöawi̧ ösödö tjö̧jobe, jö̧ba̧lö. Jejenö cha̧ja̧kwena yelösöda cho̧'wo̧ ösöwanö chö̧jijatö chö̧ja̧wo̧dö.

⁵ Ja̧danö chö̧ja̧wo̧dö, ökwödö Jesúsnö ösödadöma dö̧ja̧wo̧dökwö ösödabikwawö duju̧kwobö jo̧be, Diosma jejenö duju̧kwobö weinobetjö̧. Ja̧danö, ja̧ Dios wei̧ma babe möledama weökö, ajayitjöda weina. Babe möledama wei̧maökö, Jesúsnö do̧batö deminemitjö baikwö döwaisina ja̧ Dios wei̧ma.

⁶ Ja̧danö, ökwödöma Dios wei̧ a̧ja̧kwö dö̧jena di̧sekwobe, Diosnö ile nibebadösa, jö̧ba̧lö. Ja̧ wei̧ma biya̧da: Jesúsnö do̧batö kweminaduwemitjö baikwö kwa̧ja̧kwinaduwama, Jesústjö kwö̧ja̧wo̧dökwö ösödabikwawö kwuju̧kwaduwo, jö̧ba̧lö. Jejenö Dios wei̧ a̧ja̧kwö kwi̧'yaduwobö jo̧be, kwö̧ja̧wo̧dökwö ösödabikwawö.

⁷ Ja̧danö chö̧ja̧wo̧dö, ba̧jekwadö tjö̧jobe ökwödötjö labebö kwebachadö, ökwödönö jelobekwö kwomukwataduwobö ötjibotö jö̧ba̧lö yöbawadöma. Jobadöma omöna yöbawadö, Jesúsma Dios weinökwemaökö, jö̧ba̧lö. Ja̧danö, Jesúsma jojo babibinö̧kö̧, jö̧ba̧lö, omöna yöbawadö. Ja̧danö, Jojodö tjö̧jibinö pjabatö̧kö̧, jö̧ba̧lö, yelösöda omöna yöbawadö. Jejenö yöbawadöma jojodönö jelobekwö tjomukwatobö ötjibotö jö̧ba̧lö yötjawobe. Jobadöma jelo̧ jojo, Cristo öpöjojo ötjabökwe omöna yöawi̧danö omöna yöbawadö.

⁸ Jo̧kwaobetjö̧ chö̧ja̧wo̧dö, tjöbeba̧lö̧jönö kwite'ada̧laduwo ökwödö yödawina kakatibaduwapji jö̧ba̧lö, jobadö yötjawi̧ ösödö. Jejenö jelobekwö omukwatö kwi̧'yaduwitjö̧ma Dios ju'winö iyakwa̧, jo̧banö kwo̧'wo̧duwi wana̧lö kwö̧jaduwina mikwa iyakwa̧tjö okobe jwiinö kwemaduwökena. Jo̧kwaobetjö̧ chö̧ja̧wo̧dö, tjöbeba̧lö̧jönö kwite'ada̧laduwo, ju'winö okobe jwiinö Dios otiwi̧ iyakwa̧tjö okobe jwiinö kwemaduwobö.

⁹ Ja̧danö chö̧ja̧wo̧dö, Cristo yöawina kabatibö, idöda tjomukwati̧da 'ya̧döma Dioskwö dötewinö 'yö̧ködö. Jo̧kwaijayonö Cristo yöawina ösödö 'ya̧döma isabenö Dabe'do Dioskwöbi, iteda Itji̧ Jesucristokwöbi dötewinö 'ya̧dö.

¹⁰ Ja̧danö chö̧ja̧wo̧dö, lȩtebaduwakwö. Cristo yöawina öpöjödadö, jelobekwö yöbawö ichadönö tekataduwoko kwejuduwi okwa. Ja̧danö, ja'yubebi ösödö yöka̧laduwoko jobadönöma.

¹¹ Isabenö jobadönö yöka̧laduwoko, dokwa jö̧tja̧lenabi, jobadö sulabenö omukwatadökwö kwödötekwaduwapji jö̧ba̧lö.

Juan bajaliapo yöawina wene

¹² Chö̧ja̧wo̧dö, ina nöinö yöta̧lo jö̧ta̧lijayonö̧ kwialusöjanö wȩyudö yöta̧lo jö̧ta̧lökö. Kwö̧jaduwobe chichobö chosöda, ökwödönö ediakwawö yöta̧lobö. Jejenö ökwödönö ediakwawöda yöta̧lobö jö̧ta̧la, do̧'wo̧ ösöwanö dö̧jobö.

¹³ Bena Jesúsnö ösödö ko̧ko̧kwa̧ladö kwö̧ja̧wo̧döduwima debawö atjebobe, Dokwa, jö̧ba̧lö. Tjo̧wi̧ta biya̧da yöbawö chiwȩyuda.