2 Corintios 9 - Dios Iwene

Jerusalénnö ju̧kwadö Jesúsnö ösödadönö pjaatakwawa balada Pablo yöawina wene

^1-2 Chömöledö, ökwödönö ida̧ökö chöwaisa, tjo̧wi̧ kwiyaduwobö omukwatadöja jö̧ba̧lö, jo̧kwajabetjö̧ Aaa, Corintio jojodönö chiwȩyudo iyawa tjomukwato jö̧ba̧löma chomukwatökö. Jau chömöledö, chöwaisa ökwödönö, ida̧ökö kwiyaduwobö omukwatö juninadöja jö̧ba̧lö, ja̧danö okobe jwiinö Macedonia niji kwetachenama, ökwödö Acaya nijinö ju̧kwadö Corintio jojodö kwiyaduwobö kwomukwataduwi̧ wene yöbawo̧sa chömöledö, Acaya nijinö ju̧kwadöma, madasabatjö jamatö baikwö bajalenö Jerusalénnö ju̧kwadö Jesúsnö ösödadö usula emawadönö balada tjiyobö omukwatö juninadö, jö̧ba̧lö. Jau chömöledö, jobekwö yötawobe ökwödönö, ja̧danö ba̧jekwadö ko̧ko̧kwö tjö̧baji̧tenia ju̧kwadöma, ökwödö kwiyaduwakwa̧ wene a̧ja̧kwö, jobadöbi tjiyobö tjomukwatobe.

³ Jau chömöledö, kwiyaduwobö kwomukwataduwi̧ chöwaisobetjö̧, bemi jojodönö yötawajabe, Corintio jojodöma tjiyobö omukwatadö jö̧ba̧lö. Ja̧danö jejenö yötawobetjö̧, Titonö ja̧danö Titokwö kwebachadönö wetakobe ja̧ jawa pjatjatobö, kwiyaduwakwa̧ yötawinama waekwapji jö̧ba̧lö, ja̧danö kwiyaduwakwa̧ma, ju'wedönö yötawinadanö jobe ichibö demakwa̧ ida̧ökö 'da̧batö kwujunaduwakobetjö̧.

⁴ Jau chömöledö, baikwö yötawa: Ötjöma Macedonia jojodönö yöbawo̧sa, kwiyaduwobö kwösödaduwi̧ma, ja̧danö jobadötjö ju'wedöma ötjökwö kwiteboduwibe tji̧'yena, ja̧ balada emö chi̧'yenama. Ja̧danö, jobe dichibena kwiyaduwakwa̧ jwiitjö̧ma, taba lö̧jena ökwödö Corintio jojodönö, ¿jö̧tö? Ja̧danö jemi tupakwö ötjöbi tabakwö chö̧jena chömöledö, isabenö chömöledö Corintio jojodöma tjiyobö ösödadö jö̧ba̧lö yöta̧lijayonö, waekwobetjö̧.

⁵ Jejenö omukwatö, dö̧ja̧wo̧dönö di̧'yakwa̧ abönö wetobö chomukwata chömöledö, chichibakwa̧ abönö, kwiyaduwakwa̧ jö̧ka̧linaduwa 'da̧batö kwujunaduwobö. Jau chömöledö, ökwödöda yökawinaduwobe diyobö dösöda jö̧ba̧lö, ¿jö̧tö? Jo̧kwajabetjö̧, chichibakwa̧ abönö ida̧ökö 'da̧batö kwujunaduwobö otiwena, ökwödötjö webö 'dötebobedanö ichejekwapji jö̧ba̧lö.

⁶ Wanedö yötawa chömöledö: Ökwödö kwiyaduwi̧ma, batjo otido̧ önebiya ödi̧danö ichejekwobe. Ja̧danö, kwöwaisaduwa chömöledö, bakwo̧ batjo otido̧ ja'yubeda önebiya öditjö̧ma, ja'yubeda wa̧ji̧ emakwo̧, ¿jö̧tö? Ja̧danö, nöinö lödo̧ma, nöinö wa̧ji̧ emakwo̧, ¿jö̧tö?

⁷ Ja̧danö, kwiyaduwakwa̧ma baikwö yötawa chömöledö, okobe deinö bakwo̧nökwena kwomajadeduwinö omukwatö kwujunaduwo, kwiyaduwakwa̧ma. Ja̧danö, ökwödö kwo̧'wo̧ ösöwanö kwiyaduwobö jö̧ka̧laduwi̧danö kwiyaduwo, Aaa, chöpöjödijayonö, chiyobö jo̧be jö̧ba̧lö omukwatömaökö, ja̧danö ju'wedö kwiyaduwobö wetjawö̧maökö. Jau chömöledö, Diosma tjo̧'wo̧ ösöwanö iyadönö ösödo̧obetjö̧, jejenö kwiyaduwo.

⁸ Ja̧danö baikwö yötawaduwakwö chömöledö, Diosma isabenö juluwo̧, a̧'dȩlökönö okobe jwiinö jwiköbaduwi̧ iyakobetjö̧, ja̧danö jwiköbaduwi̧tjö bajalekwönönö nöinö iyakwo̧ chömöledö. Jau chömöledö, jejenö iyakwo̧, ökwödöbi kwujuna̧laduwakobetjö̧, ja̧danö ju'wedönö pjakataduwoböbi kwujuna̧laduwakobetjö̧.

⁹ Jau chömöledö, baikwö laebobe Dios iwene, Dios wei̧danö ja̧obö ösödo̧nö: Jo̧bama a̧'dȩlökönö ujuna̧li̧tjö iyabo̧ jwibadönöma, ja̧danö jo̧ba otiwanö iyawö̧ma la'akatjöda tjo̧'wo̧ jwitjibökakobe jobadönö otiwanö iyina, jö̧ba̧lö laebobe.

¹⁰ Chömöledö, Diosda önebiya lödo̧nö iyo̧ma, ödobö, ja̧danö Diosda ja̧ ödaja̧tjö kwakwawa ukwobö iyo̧, ¿jö̧tö? Ja̧danö, baikwö wanedö yötawa: Ökwödö pjabatö kwiyaduwi̧ma, önebiyadanö ji̧ chömöledö, ja̧danö Diosma önebiya lödo̧nö iyi̧danö, ökwödönö iyakwo̧, ju'wedönö pjabatö kwiyaduwo jö̧ba̧lö, ja̧danö, wanedö yötawa: Kwiyaduwi̧ pokwö nöinö wa̧jobö ja̧akwo̧ Diosma.

¹¹ Jau chömöledö, baikwö labebö lobö yötawa: Diosma otiwanö ökwödönö iyobe, a̧'dȩlökönö pjabatö kwiyaduwobö, ja̧danö kwiyaduwi̧ Jerusalénnö ju̧kwadö Jesúsnö ösödadönö diyenama, Diosnö ösödakwawa baibakobe, otiwa jö̧ba̧lö.

¹² Jau chömöledö, Jerusalénnö ju̧kwadönö pjaatakwawa baladama isabenö Dios ömöledönö pjaatakwawa ji̧, jwitji̧ jawa iyö, jo̧kwaijayonö sule ja̧damaökö. Jau chömöledö, jemi tupakwö kwiyaduwi̧ma Diosnö tjösödobö baibakwa̧ ji̧, kwiyaduwiawö̧, ba̧jekwadö Diosnö tjösödakobetjö̧, otiwanö pjabato̧ja jö̧ba̧lö.

¹³ Jau chömöledö, jobadönöbi, ju'wedönöbi kwiyaduwi̧ma i̧sekwakobe, isabenö otiwa jawa wene Cristo jawa wene kwösödaduwi̧ma, Dios wei̧danö ja̧köbaduwobetjö̧. Ja̧danö, jejenö kwi̧sebaduwiawö̧, ökwödönö omukwatö Diosnö tjösödakobe, otiwanö pjabato̧ja jö̧ba̧lö.

¹⁴ Ja̧danö, wanedö yötawa: Diosma ökwödönö su̧'bȩ baibanö welachajinö otiwanö ökwödönö iyobetjö̧, jobadöma ökwödönö ösödö, Diosnö atjebakobe ökwödönö chömöledö.

¹⁵ Jau chömöledö, isabenö otiwanö pjabato̧ Diosma ökwödönö, Diosnö dösödaduwo, isabenö otiwanö iyinobetjö̧. Jau chömöledö, ja̧ Dios otiwanö iyina labebö lodobö jö̧da̧litjö̧ma waekwena, diwenenö ja̧jaye otiwi̧ yöda̧lobö waekwobetjö̧.