2 Corintios 8 - Dios Iwene

Jerusalénnö ju̧kwadö Jesúsnö ösödadönö pjaatakwawa balada weköbaduwakwa̧ma, 'da̧batö kwujunaduwo jö̧ba̧lö Pablo yöawina wene

¹ Chömöledö, kwöwaisaduwobö yötawaduwakwö Macedonia nijinö otiwanö baledinama. Diosma isabenö lȩlö̧jinö pjabato̧ Macedonia nijitjö ko̧ko̧kwö tjö̧baji̧tenia ju̧kwadö Jesúsnö ösödadönöma, otiwanö ju'wedönö pjatjatakobetjö̧.

² Jau chömöledö, jobadöma isabenö usula emawadö, ja̧danö isabenö jwibadö usulasedö jobadöma, jo̧kwaijayonö, jwibö tjö̧jijayonö, tjo̧'wo̧ ösöwachibanö nöinö balada tjiyinobe, Jesúsnö ösödadö Jerusalénnö ju̧kwadönö pjabatö.

³ Isabenö otiwanö tjiyinobe chömöledö, ötjöma jobadö tjujuna̧li̧ edö waiso̧sa, ja̧danö jweinö yötawaduwakwö, jobadöma ja'yubeda balada tjujuna̧lijayonö, ja'yubedama tjiyinokobe, isabenö nöinö balada pjabatö tjiyinobe. Ja̧danö, jejenö tjiyinama, wedawö̧ma tjiyinokobe, idödada ösödö tjiyinobe chömöledö.

⁴ Ja̧danö, dömöledö Jerusalénnö ju̧kwadönö pjadatowe jö̧ba̧lö, ökwödönö budekwödanö abebiatjinobe, jobadöbi Jesúsnö ösödadö usula emawadönö balada iyö pjatjato jö̧ba̧lö.

⁵ Ajayinöma, ökwödöma domukwatijatö, Aaa, Macedonia jojodöbi ja'yubenö pjatjatena jö̧ba̧lö, jo̧kwaijayonö domukwatinatjö bajalekwönönö nöinö tjiyinobe chömöledö. Jau chömöledö, jobadöma Duluwo̧nö tjiyawinobe, Duluwo̧ ösödi̧danö ja̧tjakwedö batjibanö, ja̧danö Dios ösödi̧danö, ökwödönöbi tjiyawinobedanö ichejekwa, yödawi̧danö ja̧bö. Jo̧kwajabetjö̧ jejenö tjiyinobe Jerusalénnö ju̧kwadö Jesúsnö ösödadönö pjabatö chömöledö.

⁶ Ja̧danö, ja̧ wene omukwatö, Titonö yödawijatö, yemidanö ökwödö Corintio jojodö kwiteboduwibe i̧'yobö, ökwödö kwiyaduwakwa̧ jawa pjaatobö. Jau chömöledö, belö Titoda ökwödönö pjaatinobe, ja̧ iyawa baladama 'da̧batö kwujunaduwobö, ¿jö̧tö? Jo̧kwajabetjö̧ jo̧banö yödawijatö, ja̧ Jerusalénnö ju̧kwadönö kwiyaduwobö kwomukwatinaduwa balada jawa pjaatobö, ajayinö kwomukwatinaduwadanö otiwanö kwiyaduwakobetjö̧.

⁷ Jau chömöledö, ida̧ökö otiwanö Dios yöawi̧ ösödadöja, ja̧danö ju'wibi ida̧ökö otiwanö yöbawadöja, ja̧danö ju'wibi ida̧ökö otiwanö waisakwawa waisadöja, ja̧danö ju'wibi ida̧ökö jwaikwöda Jesús jawa otidadöja, ja̧danö ju'wibi ida̧ökö ökwödönö otiwanö ösödadöja chömöledö. Jejenö ida̧ökö otiwanö ja̧bö ju̧kwadöja chömöledö, jo̧kwaijayonö jenadama kakataduwobömaökö. Jau chömöledö, jemi bajalekwönönö ju'wibi otiwanö lȩlö̧jinö iyö pjabatadö bakibaduwobö chösöda chömöledö.

⁸ Chömöledö, jejenö yötawi̧ma, weawa baibanöma yötawökö, iyaduwi jö̧ba̧lö. Jau chömöledö, ju'wedö ösödabikwawö tjiyi̧ wene yötawajabe, jobadönö a̧ja̧kwö, bakwainö jobadö ösödabikwawö tjiyi̧danö ökwödöbi ösödabikwawö kwiyaduwojobö chöwaisakobetjö̧.

⁹ Isabenö pjabatö kwiyaduwobö otiwa chömöledö, baikwö yötawa: Kwöwaisaduwa chömöledö, Duluwo̧ Jesucristo mikwa jwiinö otiwanö iyina wenema, ¿jö̧tö? Jau chömöledö, jo̧bama nöinö ujuna̧linajayonö, ujuna̧li̧ junibö, jwibo̧danö usulaso̧ baibinobe, ökwödönö pjabatö. Jejenö baibinobe, ökwödöma jo̧ba usulaso̧ ö̧jinatjö nöinö juna̧ladö bakibaduwakobetjö̧.

^10-11 Jau chömöledö, weawa baibanöma yötawökö ja̧ iyawa jawama, jo̧kwaijayonö ja̧ iyawa isabenö ökwödönö pjaati̧ jawaobetjö̧, ötjöma ja̧ jawa chomukwati̧ma yötawobe ökwödönö. Jau chömöledö, Jerusalénnö ju̧kwadönö pjaatakwawa balada iyadötjö ökwödöda abönö omukwatö kwujuninaduwobe pjabatö kwiyaduwobö, ¿jö̧tö? Jau chömöledö, madasaba ökwödö Corintio jojodöma: Aaa, dömöledö Jerusalénnö ju̧kwadönö pjadatowe jö̧ba̧lö, belöda jamatö 'da̧batö kwujuninaduwobe baladama, jobadönö kwiyaduwoböma. Jo̧kwajabetjö̧, ja̧ kwiyaduwobö kwomukwatinaduwama, babe badekwachinö kwiyaduwobö otiwa chömöledö, babe kwiyaduwi̧ma, madasaba kwiyaduwobö kwösödinaduwadanö badekwachakobetjö̧. Jo̧kwajabetjö̧, ajayinö omukwatö kwujuninaduwi̧danö kwiyaduwobö kwujuna̧laduwi̧tjö 'da̧batö kwiyaduwitjö̧ma otiwena chömöledö.

¹² Jau chömöledö, isabenö iyö pjakataduwobö jö̧ka̧laduwitjö̧ma otiwa, baikwö yötawa: Isabenö iyö pjakataduwobö ösödö, kwujuna̧laduwi̧tjö kwiyaduwitjö̧ma, Diosma edö ösödakobe, jo̧bama kwujuna̧laduwi̧ öwaisobetjö̧. Jau chömöledö, Diosma sule kwujuna̧laduwi̧da edo̧, kwiyaduwi̧ otiwojobö jö̧ba̧lö, ja̧danö kwiyaduwobö kwujuna̧laduwi̧danö kwiyaduwenama, edö ösödo̧ Diosma, bidöma otiwanö pjatjatobö ösödadö jö̧ba̧lö.

¹³ Jau chömöledö, kwiyaduwobö otiwa jö̧ba̧lö yötawaja̧ma, Aaa, ökwödö Corintio jojodöda usula emawö 'diinö kwotidaduwo, Jerusalénnö ju̧kwadöda otiwanö tjö̧jakobetjö̧ jö̧ba̧löma yöta̧lökö chömöledö. Bakweminö okobe deinö Jerusalénnö ju̧kwadöbi ökwödöbi otiwanö kwujuna̧laduwobö yöta̧la chömöledö.

¹⁴ Baikwö yötawa, babema ökwödö nöinö kwujuna̧laduwonö, jobadöma jwibö tjö̧jobe, ¿jö̧tö? Jo̧kwajabetjö̧, babema ökwödö Corintio jojodöma jobadönö pjakataduwobö otiwa, tupakwö jobadö tjujuna̧lonö ökwödö jwibadö kwö̧jaduwenama, balekwa mikwa jobadöma ökwödönö pjatjatakobetjö̧. Jejenö bakweminö 'yȩna chömöledö,

¹⁵ damötjö Israel jojodö Dios kwakwawa iyina tjeminadanö. Jau chömöledö, baikwö laebobe Dios iwene jobadönö: Jobadötjö nöinö kwakwawa e'dö emajadöma, u'yukwi̧ jwiinö tjomeawinö tjukwinobe, ja̧danö jobadötjö ja'yubeda e'dö emajadöbi, tjomeawinö tjukwinobe, okobe deinö bakweminö tjomeawinö tjukwobö tjujuna̧linobe otiwanö, jö̧ba̧lö laebobe.

Tito Corintio nijibe i̧'yakwa̧ Pablo yöawina wene

¹⁶ Chömöledö, Diosma isabenö otiwanö pjaatinobe Titonö, ökwödönö pjatatobö chösödi̧danö, Titobi bakwainö ökwödönö pjaatobö ösödo jö̧ba̧lö, ja̧danö jejenö pjaatinobetjö̧, Diosnö ösödö ateba, otiwa jö̧ba̧lö.

¹⁷ Ja̧danö, Titonö kwiteboduwibe i̧'yobö adebenama, adebi̧ ösödinobe chömöledö, ja̧danö jo̧babi ökwödönö pjabatö i̧'yobö jwiinö ösödobetjö̧ kwiteboduwibe i̧'yakobe Titoma.

¹⁸ Ja̧danö, Titokwö jelo̧nö wedakobe kwiteboduwi Corintiobe chömöledö, Jesúsnö ösödo̧ döjawo̧nö. Jo̧bama Titokwö bakobe otidö, ökwödönö pjaatakobe, ja̧ balada kwoko̧ko̧daduwobö. Jo̧banö baikwö yötawa: Okobe deinö bemi niji ko̧ko̧kwö tjö̧baji̧tenia ju̧kwadö Jesúsnö ösödadö tjöwaisökwe jo̧bama, otiwa jawa wene otiwanö yöbawo̧ jö̧ba̧lö.

¹⁹ Ja̧danö, ju'wibi yötawa jo̧banö chömöledö, Jesúsnö ösödadö ko̧ko̧kwö tjö̧baji̧tenia ju̧kwadöma jo̧banö 'da̧batö tjujuninobe, jobadö tjiminö Jerusalénnö ju̧kwadönö iyawa balada jawa pjaatobö. Jau chömöledö, ja̧ balada iyawa dotidobe, Duluwo̧nö ösödakwawa baibakobetjö̧, ja̧danö dömöledönö pjaatakwawa dösödi̧ öwawakobetjö̧.

²⁰ Jo̧kwajabetjö̧ te'ada̧lönö dotidobe chömöledö, bakwo̧bi ökwödönö bidöma tjiyina balada sulabenö otidadö jö̧ba̧lö yöba̧lo̧ma deakobetjö̧. Jau chömöledö, bemi niji tjö̧baji̧tenia ju̧kwadö Jesúsnö ösödadöma a̧'dȩlökönö otiwanö tjiyinobe, ja̧danö ökwödöma ja̧ iyawa luwedödanö dö̧jobe.

²¹ Jo̧kwajabetjö̧ otiwanö dotidobö disakwobe chömöledö, Duluwo̧ma edö otiwanö otidadö jö̧ba̧lö edakobetjö̧. Jau chömöledö, Duluwo̧ öba a'otjö otiwanö dotidobö disakwobe, jo̧kwaijayonö ja̧damaökö. Ju'wibi jojodö tjöba a'otjö otiwanö dotidobö disakwobe, okobe deinö jojodöbi edö dotidi̧ tjöwaisakobetjö̧, tjotido jö̧tja̧li̧danö isabenö otiwanö otidadö jö̧ba̧lö.

²² Ja̧danö chömöledö, Titobi, jelo̧ yöta̧lajökwekwö kwiteboduwibe i̧'yakobe, kwiyaduwakwa̧ balada jawa pjabatö, ja̧danö jelo̧nöbi wedakobe jobadökwö i̧'yobö chömöledö, döjawo̧ Jesúsnö ösödo̧nö. Jo̧banö döwaisa, isabenö Dios wei̧ otidobö ösödo̧ chömöledö, ba̧kwȩlö̧jatebö jejenö ösödi̧ i̧sebiainobetjö̧. Jo̧bama ökwödönö a̧ja̧kwinobe, Corintio jojodöma tjömöledö Jerusalénnö ju̧kwadönö pjatjatobö ösödadö jö̧ba̧lö. Jejenö a̧ja̧kwö, o̧'wo̧ ösöwachibanö a̧ja̧kwinobe, ja̧danö ajayinö ösödinatjö bajalekwönönö, nöinö ja̧ pjaatobö ösödobe, Corintio jojodöbi otiwanö pjabatadö jö̧ba̧lö.

²³ Jobadöma kwiteboduwibe tji̧'yakwedö chömöledö, ja̧danö ökwödötjö ju'wedöma, idöma didöjayedöjö jö̧ba̧lö tjomukwatitjö̧ma, baikwö atadakwawa yötawa: Titoma, bakobe ötjökwö otido̧, ja̧danö ötjö ökwödönö pjabatö chotidi̧danö, Titobi bakobe ötjökwö otidobe ökwödönö pjabatö. Ja̧danö ju'wedö Titokwö kwebachadöma, ko̧ko̧kwö tjö̧baji̧tenia ju̧kwadö Jesúsnö ösödadö wetjinawö̧ chömöledö. Jobadönö wetjinobe, ko̧ko̧kwö tjö̧baji̧tenia ju̧kwadö tjiminö kwetjacho jö̧ba̧lö, ja̧danö jobadöma otiwanö ja̧bö ju̧kwadö. Jobadö ja̧bö tjö̧ji̧ edö jojodö tjösödakobe, ja̧danö ju'wibi Duluwo̧ Cristonö otiwanö tjomukwatakobe, isabenö bidö tjuluwo̧ma otiwo̧ jö̧ba̧lö.

²⁴ Jau chömöledö, jobadöma kwiteboduwibe tji̧'yakobe, ja̧ kwiyaduwakwa̧ balada jawa pjabatö. Jobe tjichibenama, pjaatakwawa balada iyö Jerusalénnö ju̧kwadönö kwösödaduwi̧ wene kwi̧sebaduwo chömöledö, ko̧ko̧kwö tjö̧baji̧tenia ju̧kwadö Jesúsnö ösödadöma tjöwaisakobetjö̧, Aaa, isabenö Corintio jojodöma otiwanö tjömöledönö ösödadö jö̧ba̧lö. Jau chömöledö, ju'wedönö yötawijatö ökwödö Corintio jojodö otiwanö kwiyaduwobö kwösödaduwi̧ma, ja̧danö otiwanö kwiyaduwi̧ edö tjöwaisakobe, Aaa, Pablo Corintio jojodönö otiwanö tjiyakwedö jö̧a̧linama, jweinö yöawinobe jö̧ba̧lö.