2 Corintios 7 - Dios Iwene

¹ Ja̧danö chömöledö, ja̧ wene Dios yöbawö ujuninobetjö̧, okobe jwiinö yȩdekwinö ja̧i̧ jawatjö didichawaduwo chömöledö, wamenö jojodö tjedi̧ jawatjöbi, okwanö jojodö tjedökö jawatjöbi, ja̧danö Diosnö yebabinö ja̧nö, bakwainö sulabe jwii̧ jawada isakwö dö̧jaduwo.

Isabenö sulabenö ja̧dijökötö ökwödönö, jo̧kwajabetjö̧ ökwödönö kwösödaduwo jö̧ba̧lö Pablo yöa̧lina wene

² Chömöledö, jo̧da yöta̧laja̧danö, isabenö ökwödönö kwösödaduwo, ökwödönö sulabenö ja̧dokobetjö̧. Jau chömöledö, ökwödötjö bakwo̧nöbi sulabenö ja̧dijökötö, ja̧danö bakwo̧nöbi sulabenö yöda̧lijökötö omöna wene ösödo jö̧ba̧lö, ja̧danö ökwödöda demotö jö̧ba̧lö bakwo̧nöbi omöna yöda̧lijökötö chömöledö. Jau chömöledö, bakwainö otiwanö ja̧dijatö ökwödönö, jo̧kwajabetjö̧ isabenö ökwödönö kwösödaduwobö jo̧be.

³ Jejenö yöta̧li̧ma, sulabedöja, sulabenö ökwödönö öpöjödadöja jö̧ba̧löma yöta̧lökö chömöledö. Jau chömöledö, sulabedöja jö̧ba̧löma ja'yubebi chöpöjödökö ökwödönö. Isabenö chösödawö̧ja, ja̧danö chomajadenö kwö̧jaduwobedanö ichejekwa, jwiinö ökwödönö chösödobetjö̧, ja̧danö chö̧jitjö̧böbi, debö chi̧'yitjö̧böbi bakweminö chösödakwo̧sa ökwödönö chömöledö.

⁴ Jau chömöledö, sulabenö öpöjödadö jö̧ba̧lö chomukwatökö ökwödönö, isabenö ötjönö ösödadöja jö̧ba̧lö chöwaisobe, ja̧danö jejenö ökwödönö chöwaisobetjö̧ yebabökönö jweinö yötawobe ökwödönö, Corintio jojodöma otiwanö tja̧ja̧kwakwedö jö̧ba̧lö. Jau chömöledö, ökwödönö chösöda, yötawi̧ otiwanö a̧ja̧kwadöja jö̧ba̧lö, ja̧danö jejenö chöwaisi̧ma chujuluwachibanö pjaatobe, cho̧'wo̧ ösöwachibanö chö̧jobö. Jau chömöledö, nöinö wene döbaledijayonö, ökwödönö omukwatö, chömöledö Corintio jojodöma isabenö otiwanö a̧ja̧kwadö jö̧ba̧lö cho̧'wo̧ ösöwachibanö jo̧sa.

Ajayinö sulabenö ja̧bö tjö̧jina kabatibö otiwanö tjö̧ji̧ Pablo yöawina wene

⁵ Jau chömöledö, isabenö ökwödönö omukwatö cho̧'wo̧ ösöwachibanö jo̧sa, baikwö yötawa: Jo̧da yöta̧laja̧danö, Macedoniabe di̧'yijatö. Ja̧danö, jobe dichibenama, kwedachajabetjö̧ dö'wachobö dösödijatö, jo̧kwaijayonö dö'wachobö jwiinobe chömöledö, wamenöbi, okwanöbi nöinö wene ökwödönö tjösawobedanö ichejekwobetjö̧. Jau chömöledö, wamenö, nöinö jwöjwöakwawa ji̧nobe, ja̧danö okwanöma, yeabikwawa ji̧nobe chömöledö.

⁶ Jo̧kwaijayonö, Diosma o̧'wo̧ tjo̧achadönö tjujuluwachibanö pjabato̧ chömöledö, ja̧danö ökwödönö pjaatinobe. Jau chömöledö, do̧'wo̧ luwo̧nö ujuluwachibanö pjabatö, döjawo̧ Tito ichobö weinobe Diosma.

⁷ Ja̧danö, Titonö edö, do̧'wo̧ luwo̧ ujuluwachibanö jo̧banö dedijatö chömöledö, jo̧kwaijayonö ja̧damaökö do̧'wo̧ luwo̧ ujuluwachibanö ja̧inama chömöledö. Ju'wibi ökwödö Corintio jojodöma Tito o̧'wo̧ luwo̧nö ujuluwachibanö pjakatinaduwobetjö̧, ja̧bi do̧'wo̧ luwo̧ ujuluwachibanö pjaatinobe chömöledö. Ja̧danö, jemi tupakwö cho̧'wo̧ ösöwachibanö Tito yöawinobe chömöledö, ökwödö Corintio jojodönö yöawinobe, ötjönö kwedaduwobö ösödadöja jö̧ba̧lö yöawinobe. Ja̧danö ju'wibi yöawinobe, Corintio jojodöma tjö'da̧de sulabenö baledina omukwatö, sulabenö tjomukwatina kabatibö balewachö tjubudekwinobe jö̧ba̧lö. Ja̧danö ju'wibi yöawinobe, ökwödönö yötawi̧ kwa̧ja̧kwaduwenama, öpöjödökönö jwaikwöda kwösödinaduwobe, jö̧ba̧lö yöawinobe Titoma chömöledö. Jau chömöledö, jejenö yöawitjö̧, ajayitjö bajalekwönönö cho̧'wo̧ ösöwachibanö cha̧ja̧kwijatö.

⁸ Jau chömöledö, kwöwaisaduwa, sulabenö ja̧köbaduwitjö̧, ökwödö Corintio jojodönö lȩbebö kwialusöja chiwȩyudijatö, ¿jö̧tö? Ja̧danö, ökwödönö lȩekwa chiwȩyudina kwialusöja kwedinaduwenama, Ayö, sulabenö ja̧dajabe jö̧ba̧lö kwo̧'wo̧ tjo̧achinaduwobe, ¿jö̧tö? Jo̧kwaijayonö, chiwȩyudina kwialusöja yöba̧lö, kwo̧'wo̧ tjo̧achinajayonö, Aaa, lȩbebö chiwȩyudinokowe jö̧ba̧löma chomukwatökö, isabenö ökwödönö pjaatinobetjö̧. Isabenö jejenö chomukwatijatö ajayinöma, Aaa, chömöledö tjo̧'wo̧ tjo̧achena, tjo̧'wo̧ tjo̧achinö chiwȩyudinokowe jö̧ba̧lö. Jo̧kwaijayonö lekwema kwo̧'wo̧ tjo̧achinaduwokobe chömöledö,

⁹ ja̧danö babema cho̧'wo̧ ösöwachibanö chomukwatobe ökwödönö. Chömöledö, kwo̧'wo̧ tjo̧achaduwi̧ wene omukwatö cho̧'wo̧ ösöwanöma chomukwatokobe, kwo̧'wo̧ tjo̧bekwö sulabenö kwomukwatinaduwa kabatibö kwöbalewachinaduwada cho̧'wo̧ ösöwachibanö chomukwatobe. Jau chömöledö, kwo̧'wo̧ tjo̧achinaduwama, Dios ösödi̧danö kwo̧'wo̧ tjo̧achinaduwobe chömöledö, jo̧kwajabetjö̧ kwo̧'wo̧ tjo̧achaduwinö kwialusöja chiwȩyudinöjama, isabenö ökwödönö pjaatinobe.

¹⁰ Jau chömöledö, böjȩ jojodö tjo̧'wo̧ tjo̧achi̧danö o̧'wo̧ tjo̧achakwawama, pjaatökö ji̧ chömöledö, sulabenö tjomukwati̧ tjöbalewachokobetjö̧ woawada ji̧. Jo̧kwaijayonö Dios ösödi̧danö o̧'wo̧ tjo̧achakwawama otiwa, sulabenö tjomukwati̧ tjöbalewachinö ji̧obetjö̧, ja̧danö tjö̧jibinö ja̧i̧.

¹¹ Ja̧danö chömöledö, ökwödö kwo̧'wo̧ tjo̧achinaduwama isabenö Dios ösödi̧danö kwo̧'wo̧ tjo̧achinaduwobe, baikwö yötawa: Kwomukwataduwi̧ balewachibö, jwaikwöda kwisakwinaduwobe suli̧ kwö'da̧deduwitjö söbebö loköbaduwobö, ¿jö̧tö? Ja̧danö, jwaikwöda kwi̧sebinaduwobe, sulabenö omukwatadödanöma omukwatöködösa jö̧ba̧lö, ¿jö̧tö? Ja̧danö, sulabenö ja̧bo̧ ja̧i̧ wene omukwatö, otiwanö öpöjödö kwölabinaduwobe, ¿jö̧tö? Ja̧danö, jweinö yebabinö Diosnö kwomukwatinaduwobe, Diosma sulabe öpöjödo̧ jö̧ba̧lö, ¿jö̧tö? Ja̧danö, jwaikwöda ötjönö ösödö kwomukwatinaduwobe, ¿jö̧tö? Ja̧danö, jwaikwöda Dios ösödi̧danö ja̧köbaduwo jö̧ba̧lö, wetinadanö sulabenö ja̧bo̧nö lȩkebinaduwobe, ¿jö̧tö? Jau chömöledö, okobe jwiinö ja̧ kwi̧sebinaduwobe, sulabenö baledinama, ökwödö jawamaökö jö̧ba̧lö. Jejenö kwi̧sebinaduwobetjö̧, öwaetjöda öwawobe, kwo̧'wo̧ tjo̧achinaduwama böjȩ jojodö tjo̧'wo̧ tjo̧achi̧damaökö, kwo̧'wo̧ tjo̧achinaduwama Dios ösödi̧danöda kwo̧'wo̧ tjo̧achinaduwobe jö̧ba̧lö.

¹² Chömöledö, chiwȩyudina jawa omukwatö sulabenö kwomukwatinaduwa kabatibö kwöbalewachinaduwobe, ja̧danö jejenö balewachö otiwanö kwi̧sebinaduwobe, isabenö otiwanö ötjö Pablonö ösödadöja jö̧ba̧lö, ¿jö̧tö? Jejenö kwi̧sebaduwo jö̧ba̧lö, belö kwialusöja chiwȩyudijatö chömöledö. Jau chömöledö, belö chiwȩyudinama, jo̧ba sulabenö ja̧binanö lȩekwa omukwatö chiwȩyudijatö, ja̧danö jo̧ba suli̧ öwaedajawö̧nö pjaatakwawa omukwatö chiwȩyudijatö, ¿jö̧tö? Jo̧kwaijayonö, ja̧bi omukwatö chiwȩyudinajayonö, ja̧damaökö omukwatö chiwȩyudinama. Jau chömöledö, inesö omukwatö chiwȩyudinama Dios öba a'otjö inesö ötjö Pablonö kwösödaduwi̧ wene öwaetjöda öwawo jö̧ba̧lö chiwȩyudijatö.

¹³ Ja̧danö, jejenö öwawobetjö̧, do̧'wo̧ luwo̧ ujuluwachibanö ju̧kwadösa chömöledö. Jau chömöledö, ja̧ wene a̧ja̧kwö do̧'wo̧ luwo̧ ösöwachibanö da̧ja̧kwijatö, ja̧danö ju'wibi chömöledö. Titonö o̧'wo̧ ösöwachibanö pjakatinaduwobe edö, ja̧bi bajalekwönönö do̧'wo̧ ösöwachibanö pjaatinobe chömöledö.

¹⁴ Jau chömöledö, belö Tito kwiteboduwibe i̧'yakwa̧ abönö, jo̧banö yötawijatö ökwödönö, Corintio jojodöma otiwanö tja̧ja̧kwakwedö jö̧ba̧lö, ja̧danö yöta̧linadanö kwa̧ja̧kwinaduwobetjö̧, taba lö̧jökönö chö̧ja chömöledö. Jau chömöledö, ba̧kwȩlö̧jatebö jweinö yödawijatö ökwödönö, ¿jö̧tö? Ja̧danö, Titonö ökwödönö yöta̧linabi jwei̧ wene jö̧ba̧lö otiwanö kwi̧sebinaduwobe, otiwanö tja̧ja̧kwakwedö jö̧ba̧lö yöta̧linadanö isabenö otiwanö kwa̧ja̧kwinaduwobetjö̧.

¹⁵ Ja̧danö, Tito yöawi̧ otiwanö kwa̧ja̧kwaduwobetjö̧, jo̧ba yöawi̧ kwösödinaduwa wene omukwatö, ajayinö ökwödönö ösödinatjö bajalekwönönö nöinö ökwödönö ösödobe Titoma chömöledö. Jau chömöledö, Tito yöawi̧ a̧ja̧kwö, Aaa, bitema Dios yöawi̧ jweinö yöbawo̧ jö̧ba̧lö, yöawi̧danö otiwanö yebabinö a̧ja̧kwö ja̧köbinaduwobe.

¹⁶ Ja̧danö, babema ötjöbi cho̧'wo̧ ösöwachibanö chomukwatobe ökwödö Corintio jojodönö, yötawi̧danö isabenö otiwanö ja̧bö ja̧döja jö̧ba̧lö chöwaisobetjö̧.